සඳු ගැන වැරැදි මත
වැඩි අවස්ථාවල ජේ‍යාතිෂ කටයුතුවලට සම්බන්ධ වෙන්නෙ බෞද්ධ ආගම අදහන ජනතාවයි. ඉඳ හිට අනෙක් අයත් සම්බන්ධ වෙනවා. අප මේ දෙස බුද්ධාගම තුළින් බැලුවම පේන්නෙ සෑම උපතක්ම සිදුවෙන්නෙ කර්මය අනුව කියල. මෙම ආත්මය තුළ කුසල් කිරීමෙන් පෙර ආත්මවල කරල තියෙන අකුසල්වල බලපෑම යම් ප්‍රමාණයකින් අඩුකර ගන්නත්, අකුසල් කිරීමෙන් එය තවත් වැඩිකර ගන්නත් හැකියාව තියෙනව කියන කාරණාව ප්‍රායෝගිකව සත්‍යයක් බව අපට පිළිගන්න පුළුවන්. කුසල් පිළිබඳ කල්පනා කරල බලනවනම් ඕනෑම හොඳ ක්‍රියාවක් කුසල් ගනයට වැටෙනව. එහෙම නම් දවසක් තුළ කොයිතරම් ප්‍රමාණයක් අපට අවස්ථා ලැබෙනවද සත්ක්‍රියා කරන්න. ඒ විදියට අපට ක්‍රියාවෙන්, මුදලින් පමණක් නෙවෙයි වචන තුළිනුත්, සිතුවිලිවලිනුත් යහපත් දේ කරන්න හැකියාවක් තියෙනවා. ඊට අමතරව ආගමානුකූලව කටයුතු කිරීමත් බෝධි පූජා, සෙත් කවි වැනි දේ තුළිනුත් අපට පින් රැස් කරන්න පුළුවන්. මේ කරුණු මුලින්ම සඳහන් කළේ මාතෘකාවට මේ කරුණු අදාළ වන නිසයි.
අපි මුලින්ම බලමු සඳු 8 වැන්නේ සඳු තැන්පත්වීම විශාල දෝෂයක් ලෙස සමහර දෙනකු තුළ ඇති මතයේ සත්‍යතාව පරීක්‍ෂා කරමු. සම්භාවිතාවක් ලෙස ගතහොත් ජනගහනයෙන් 8%ක් පමණ දෙනාට මෙම පිහිටීම ඇති බව අපට සිතාගත හැකිය. සරල ලෙස පවසයි නම් ලග්න 12 උදෙසා බැලූවිට සාමාන්‍ය අගය මෙය වේ. මෙම ප්‍රමාණය ගත්විට සියලුදෙනාට එක ලෙස ජීවිත හානි සිදුවීම්, දියේ ගිලීම් ආදී දේ සිදුවීමට හැකියාවක් ඇතිද යන්න බුද්ධිමත් ලෙස බැලූවිට ඔබට වැටහෙනු ඇත. විශේෂයෙන් මේ සඳහා සොයා බැලිය යුතු කාරණා කිහිපයක් ඇත. යම් කෙනකු මිය යෑමට බලපාන හේතු කිහිපයක්ම ඇති අතර සියලු දේ සම්පූර්ණ වීම මේ අවස්ථාවලදී සිදුවේ. මේවා ඉතා විරල අවස්ථා වේ. මුලින්ම ලග්නයට අදාළව එම පුද්ගලයාට මාරක දශාවක් හෝ අතුරු දශාවක් ලබා තිබීම, ඒරාෂ්ටක එකක් හෝ ඊට වැඩි සංඛ්‍යාවක් ලබා තිබීම, 22 වන දෙර්කාණය අධිපතිට දශා සම්බන්ධයක් තිබීම, හඳහනට අනුව මෙම කාලය තුළ ග්‍රහයන් දුර්වල මට්ටමක පැවැතීම, ප්‍රධාන වන අතර විවාහක අය සඳහා බිරියට හා දරුවන්ට දැඩි අපල කාල ලබා තිබීම මෙන්ම දරුවන් සම්බන්ධයෙන් නම් මවුපියන්ට පීඩා දෙන දශාවක් ලබා තිබීමත් මවුපියන්ගේ ජන්ම පත්‍රවල දරුවන් සම්බන්ධ ස්ථාන දුර්වල වී තිබීමත් සාමාන්‍ය අපල මාරක ගෙන දිය හැකි කාලසීමා වේ. මේ සියල්ල සම්පූර්ණ වෙතත් මේ සියලු කරුණු සඳහා බලපාන්නේ මෙම ආත්ම භවයට පෙර ආත්මවලදී කරන ලද පින් පව් ලෙස සලකන හෙයින් මේ භවය තුළ එකතු කරගන්නා කුසල සහ අකුසල හඳහන තුළ නොදැක්වේ. මේ නිසා අප පවසන සමහර කරුණු යම් ප්‍රමාණයකින් වෙනස් වීමටද අවස්ථාව ඇත. එය අමතරව නවීන ලෝකය තුළ ඇති විද්‍යා දියුණුව මෙන්ම වෛද්‍ය විද්‍යා දියුණුව නිසා සමහර මරණ වැළැක්වීමට ඇති හැකියාවද පුදුම සහගතය. මේ නිසා සුවකළ නොහැකි යැයි අප පිළිගෙන තිබූ සමහර රෝග පීඩා අද පහසුවෙන් සුවකර ගත හැකි මට්ටමට පත්වී ඇත. එයින් පෙනී යන්නේ මාරක අනතුරු, මරණ වැනි දේ පිළිබඳ පවසන විට අන් අයගේ සිත්වලට අනවශ්‍ය පීඩනයක් ඇති නොවන ලෙස දැනුම්වත් කිරීමත්, මෙම වටිනා ශාස්ත්‍රය මිනිසුන්ගේ යහපත උදෙසාම යොදා ගැනීමත්ය.
දැන් අපි බලමු තවත් මතභේදයට ලක් වී ඇති පිහිටීමක් ලෙස සඳු නීච වීම පිළිබඳ. මුලින්ම බලමු ලග්නවලට අනුව සඳු නීච වන්නේ කුමන ස්ථානයකද කියල. මේෂ ලග්නයට සඳු 8 වැන්නේත්, වෘෂභ ලග්නයට 7 වැන්නේත්, මිථුන 6ත්, කටකයට 5ත්, සිංහයට 4ත්, කන්‍යාවට 3ත්, තුලාවට 2ත්, වෘශ්චිකයට 1ත්, ධනුවට 12ත්, මකරයට 11 වැන්නේත්, කුම්භයට 10ත්, මීනයට 9ත් සඳු නීච වේ. සඳු නීච වීම විශේෂයෙන් බලපාන්නේ මිනිසුන්ගේ සිත්වලටය. එක එල්ලේම මෙසේ සිදුවන්නේ සිතුවිලි ඉපදීම සඳහා බලපාන ප්‍රධාන ග්‍රහයා සඳු වීමයි. අනෙක් සියලු ග්‍රහයන් මේ සඳහා දායක වේ. මෙම ප්‍රධාන ග්‍රහයා නීච වූ විට සිතුවිලි දුර්වල වීම සිදුවේ. එසේ වෙතත් සඳු නීච වුවත් මෙම නීච තත්ත්වය බිඳෙන අවස්ථා කිහිපයක්ම දැකගත හැකිය. මේවා නීචභංග රාජයෝග ලෙස හැඳින්වේ. මෙම සියලු යෝග පැවසීම පහසු වුවත්, ඒවා තේරුම් ගැනීමට සාමාන්‍ය පාඨක පිරිසට අපහසු වීමටද ඉඩ ඇති බැවින් ඒවා ඇතුළත් නොකළෙමි. කෙසේ වෙතත් සඳු නීච වීම වැඩි වශයෙන් බලපාන්නේ ස්ත්‍රී පක්ෂයට බවද පෙනී යයි. සාමාන්‍ය වශයෙන් මේ සඳහා බලපාන්නේ සඳු නීච වූ කාන්තාවන්ගේ වචන මෙන්ම ක්‍රියාවන්ද දරදඬු බවක් පෙන්වයි. අප සමාජය බලාපොරොත්තු වන්නේ කට ඇති දූවරුන් නොව කට ඇති පුතුන්මය. මෙය කාන්තාවන් සඳහා බලපාන යෝගයක් බව පැවැසුවේ එහෙයිනි. පිරිමි අංශයෙන් බැලුවහොත් මෙය සමහර දෙනා ඉතා බලවත් පාලකයන් බවටද බොහෝ උදාහරණ ඇත. කලෙක ආසියාවේ රිදී සීනුව ලෙස හැඳින්වුණු එස්. ඩබ්. ආර්. ඩී. බණ්ඩාරනායක මැතිඳුන්ගේ ජන්ම පත්‍රය තුළද සඳු නීච වී ඇතත් කුජ සමඟ එක් වී නීච භංග රාජ යෝගයක් සෑදී ඇත. මෙවන් උදාහරණ කොතෙක් ඇතත් මෙය තේරුම් ගැනීමට ප්‍රමාණවත් වනු ඇතැයි සිතේ.
මෙම සඳු නීච වන්නේ වෘශ්චික රාශිය තුළය . මෙම සඳු නීච වීමේදී සඳු සිටිය යුත්තේ විසා, අනුර, දෙට නැකැත්වලය. අධ්‍යාපනය අතින් බලන විට සඳු නීච වී ඇති බොහෝදෙනා දක්ෂයන් බව පෙනී යන්නේ මෙම වැඩිදෙනා උපදින්නේ ශනිගෙන් හෝ බුධගෙන් වීමයි. එයට බලපාන්නේ මෙම සඳු නීච වීමේදී විසා නැකැතෙහි 4 වැනි පාදයේදීත්, අනුර නැකැතෙහි 1,2,3,4 හෝ දෙට නැකැතෙහි 1,2,3,4 පාද තුළ වීමයි. මෙම නැකැත්වලින් ඉපදුන විට බොහෝ දෙනාට බුධ, කේතු ග්‍රහයන්ගේ දශා ඉගෙන ගන්නා කාලය තුළ ලැබීමයි. දියුණු තත්ත්වයකට පත්වීමට නම් දරදඬු බවද, වචනවල ඇති දැඩි බව උපකාර වන බවද අකැමැත්තෙන් වුවද පිළිගත යුතුය. නායකත්වය නම් අන් අය පාලනය කිරීමයි. මේ සියලු කරුණුවල අනෙක් පැත්ත බැලුවහොත් සඳු උච්ච වීම ගත හැකිය. සඳු උච්ච වන්නේ වෘෂභ රාශිය තුළය. මේෂ ලග්න හිමියන්ට 2 දීත්, වෘෂභ ලග්නයට 1 දීත්, මිථුන ලග්නයට 12 දීත්, කටක ලග්නයට 11 දීත්, සිංහ ලග්නයට 10 දීත්, කන්‍යා ලග්නයට 9 දීත්, තුලා ලග්නයට 8 වැන්න තුළත්, වෘශ්චික ලග්නයට 7 වැන්නේත්, ධනු ලග්නයට 6 වැන්නේත්, මකර ලග්නයට 5 වැන්නේත්, කුම්භ ලග්නයට 4 වැන්නේත්, ධනු ලග්නයට 6 වැන්නේත්, මකර ලග්නයට 5 වැන්නේත්, කුම්භ ලග්නයට 4 වැන්නේත්, මීන ලග්නයට 3 වැන්නේත්, සඳු සිටී නම් උච්ච වී ඇති බව සොයාගත හැකිය. මෙවැනි වැඩිදෙනා තුළ මවු සෙනෙහස, ආගම දහමට ළැදි බව, සත්‍ය කතා කිරීම වැනි බොහෝ යහපත් ගුණාංග ඇත. නමුත් ගැටලුව වන්නේ මෙම කරුණු සියල්ල තුළ ඇත්තේ ගුණ යහපත් කම් මිස ලෞකික දියුණුව නොවන බවත් ඒවා ගුණවතුන්නම් මිල නොකරන බවත්ය. එසේ නම් ඔබ දකින, ඔබ බොහෝ සේ අගය කරන බලය, නිලය, මුදල් ලැබීමට වැඩිපුර ඉඩකඩ ඇත්තේ සඳු නීච වූ අයටය. එසේ නම් ඔබ මෙතෙක් කල් සඳු නීච වීම මුදල් ලැබීමට බාධාවක් ලෙස සිතා සිටියත් එය එසේ නොවන බව දැන් ඔබට වැටහෙනු ඇතැයි මට සිතේ.
ප්‍රවීණ ජේ‍යාතිෂවේදී රෝහිත අතුරලියඋපුටා ගැනීම මව්බිම පුවත්පත
