හඳහනේ ධන වාසනා - මීන ලග්නය
- මීන ලග්න හිමි අයගේ දෙවැන්න වන ධනස්ථානය තුළ අඟහරු සිටීනම් මුදල් ලැබීමට භාග්‍ය ඇත. අඟහරු යෝග කාරක ග්‍රහයා බැවින් ධනස්ථාන ගතව සිටීම ප්‍රබල ධනයෝගයකි. මුදල් ඉපයීමට උනන්දුව දක්වයි. ක්‍ෂණිකව ධනලාභ ලබයි. කාර්මික ක්‍ෂේත්‍රය හා ආරක්ෂක අංශවල නිරතවීනම් සාර්ථක ප්‍රතිඵල ලැබිය හැකියි.
- බුධ ග්‍රහයා දෙවැන්න තුළ නම් කතාව උපයෝගී කරගෙන මුදල් ලබයි. බොහෝදුරට නීතිඥවරයෙක් ගුරුවරයෙක් විය හැකියි. කුඩා ව්‍යාපාර හිමිකරුවෙකුනම් සාර්ථක ව්‍යාපාරයක් හිමිවේ. තමන්ට උරුම දේපොළ වලින් ලාභ ප්‍රයෝජන ඇත. ලබන සහකරුට හෝ සහකාරියට ස්ථිර ආදායම් මාර්ගයක් ලැබෙන අතර ඔබ පිරිමි අයකුනම් බිරිය ස්ථිරවම රැකියාවක් කරයි.
- ගුරු දෙවැන්න තුළ නම් ප්‍රබල ධනයෝගයකි. මහා විශාල ප්‍රමාණයෙන් ආර්ථික ලාභ ලබයි. ව්‍යාපාරයක් කළොත් ඉතාමත් සාර්ථකයි. ගුරු වෘත්තිය හා ස්ථිර රැකියාවකටද හිමිකම් ඇත. නිතරම තමන් සතුව විශාල මුදලක් ඉතිරිව පවතී.
- සිකුරු දෙවැන්න තුළ නම් මුදල් ඉපයීමට දක්ෂයි. කලා හැකියාවන් තුළින්ද මුදල් ඉපයිය හැකියි. කොපමණ සල්ලි අතගෑවත් ඉතිරියක් කර ගැනීමට අසීරුයි. කෙනකුගෙන් මුදලක් ණයට ගත්තොත් ගෙවා ගැනීමට නොහැකියි. විය හියදම් කිරීමට සීමාවක් නැත.
- ශනි දෙවැන්න තුළ නම් විදේශගතව මුදල් උපයයි. ශනිට නීච රාශියක් බැවින් නිතර අතමිට හිඟපාඩුකම් පවතී. තමන්ගේ පරිහරණයට තමන් සතු මුදල් ප්‍රමාණවත් නොවීම නිසා අන් අයට විශාල ප්‍රමාණයෙන් ණය විය හැකිය. ගෙවා ගැනීමටද අසීරුයි. ජන්ම කේන්දරයේ අනෙකුත් ග්‍රහයන් දුර්වලනම් යාචකයකු වීමට ඉඩ ඇත.
- සෙනසුරු උත්පත්තියේ වක්‍රව පිහිටිනම් විශාල වශයෙන් ධනලාභ ලබයි.
- රාහු දෙවැන්න තුළ නම් මුදල් ලැබීමට හොඳයි. ආදායම් උපයන මාර්ග කිහිපයක් ඇත. වරින් වර ආර්ථික ස්ථාවරය වෙනස් වන අතර ඖෂධ අලෙවිය, රෝහල් ආශි්‍රතව රැකියා අංශ ආදියෙන් ධනය උපයයි. වැරැදි පැත්තකට යොමු වුවොත් නරකින් හෝ ධනය ලබයි.
- කේතු දෙවැන්න තුළ නම් රහස් ක්‍රම මඟින් මුදල් ලබයි. ගුප්ත බලවේගවලින් පිහිට ඇත. මන්ත්‍ර ශ්‍රාස්ත්‍රය ශ්‍රාස්ත්‍ර කීම ආදියෙන් මුදල් ලැබිය හැකියි. වියහියදම් පැත්ත බහුලයි.
- රවි ග්‍රහයා දෙවැන්න තුළ නම් රවිට උච්ච රාශියකි. තමන් ළඟ මුදල් නැතත් ඇති අයකු ලෙස රටට පෙන්වයි. රජ ධනකාරක බැවින් උච්ච බල සහිතව සිටීම ප්‍රබල ධනයෝගයකි. උනන්දුව උත්සාහය දරයි. දේශපාලන අංශ තුළින් පල ප්‍රයෝජන ලබයි. හදිසි ධන ලාභයක් රවිගේ දශාකාලය තුළ ස්ථිරවම ලබයි.
- සඳු ග්‍රහයා දෙවැන්න තුළ නම් තමන් උගත් දෙයින් උපරිම පල ප්‍රයෝජන ලැබිය හැකිය. වෙනත් වෘත්තීය දක්ෂතා ඇති අයෙකි. වෙහෙස නොවී මුදල් ලබන අතර සාධාරණව මුදල් ලබයි. ලද මුදලින් සතුටුවෙයි. ගෙදර නිකන් හිටියත් මුදල් ලැබීමට භාග්‍ය ඇත.
ප්‍රවීණ ජේ‍යාතිර්වේදී සරත්චන්ද්‍ර බෝතලාගේ උපුටා ගැනීම මව්බිම පුවත්පත
