ධනවත් වීමට දැඩි රුචිකත්වයක් ඇති කන්‍යා ලග්න හිමියන්
මෙලොව උපදින ඕනෑම කෙනකුට පළමුවෙන් හිමිවන්නේ ලග්නයයි. ඔහුට හෝ ඇයට නමක් පවා හිමි වන්නේ ලග්නය ලැබීමෙන් පසුයි. කෙනකු උපදින මොහොතේ නැඟෙනහිර ක්ෂතිජයෙන් උදාවෙමින් පැවැති ලග්නය ඔහුගේ හෝ ඇයගේ ලග්නය වන බව ජේ‍යාතිෂයේ සඳහන්ය. ඡන්මියකුගේ හැඩරුව, ගතිගුණ, චරිතය, දක්‍ෂතා, ලෙඩදුක් ආදී ජීවිතයේ සියලුම දේවල් සිදුවන්නේ ලග්නය අනුවය. ඔබ උපන් ලග්නය අනුව ඔබේ ජීවන තොරතුරු ඉදිරිපත් කරන ලිපි පෙළේ හයවැන්න වන මෙයින් කන්‍යා ලග්න හිමියන් ගැන විග්‍රහ කෙරේ.
ශරීර ලක්‍ෂණ :
කන්‍යා ලග්න හිමියන් උස් නළල් තලයකින් හෙබිය. හිස කෙස් ගනව වැඩී ඇත. දිගු බෙල්ලක් ඇත. වඩා උස නැති සිහින් සිරුරකි. පැහැපත් සමක් හිමිය. සිහින් තොල් ඇති කුඩා මුඛයක් මොවුන්ට හිමි වන අතර අන් අයගේ සිත ඇද ගන්නාසුලු නෙත් යුගලයක්ද පිහිටයි. එමෙන්ම සවන පිනන කට හඬක් මෙම ලග්න හිමියන්ට හිමිවේ. කඩිසර ගමන් ඇති වයසට වඩා තරුණ බව ඉස්මතුවී පෙනෙන ස්වභාවයක්ද දක්වයි. කන්‍යා ලග්න හිමියන්ගේ ශරීරය සියුමැලි බැවින් ළාමක ගතියක් පෙන්වයි. ශරීරය දෙස බැලූ කල ඔතෑනි ස්වරූපයක්ද උසුලයි. සෘජු නාසයක්ද ඇස් දෙකින් අවංක බවක්ද පෙන්වයි.
ගතිගුණ :
කන්‍යා ලග්නයට බුද ග්‍රහයා අධිපති නිසා තියුණු නුවණක් ඇත. අනුකම්පා සහගත අයෙකු වේ. අධික ප්‍රවේශම් සහිතය. ආත්මවිශ්වාසය අඩුය. අනුන් විවේචනය කිරීමේ ගති ලක්‍ෂණ පවතියි. ගෙදර දොර බඩු බාහිරාදිය ක්‍රමවත්ව තබා ගැනීමට කන්‍යා ලග්න කත දක්‍ෂය. කන්‍යා ලග්න පිරිමින් රසවත් ආහාරපානාදියට දැඩි ගිජු බවක් දක්වයි. මොවුන් හඬ නඟා සිනාසෙයි. විනෝදයට සහ විහිළු තහළුවලට රුචියක් දක්වයි. වේගවත් ලෙස කතා කිරීමද මොවුන්ගේ පුරුද්දකි. නෑදෑයන්ට හිතවත්ය. යුක්තියට වැඩ කරන විචාර බුද්ධියෙන් යුත් අයයි. බොහෝ විට සහෝදරයන් සමඟ විරසක වේ. කිසියම් දෙයක් කිරීමේදී එය දීර්ඝ ලෙස විස්තර කරන මොවුන් කරන වැඩය පිළිවෙළකට කරයි. මෙම ලග්න හිමියන් කවුරුත් සමඟ වුවද මිත්‍රකමක් පවත්වා ගන්නේ බොහෝ ටික කාලයකි.
ආදරය සහ ලිංගිකත්වය :
ආදරය ඉදිරියේ මෙම ජන්මීන් ලැජ්ජාශීලීය. නමුත් කටින් නොකීවාට හැඟීම් මඟින් ආදරය අයදියි. රූපශ්‍රීයට වඩා නුවණැති බව අගය කරයි. මොවුන් ආදරය ඉදිරියේ අවංකව කටයුතු කරයි. කන්‍යා ලග්න කාන්තාවන් පිරිමින්ගේ ප්‍රයෝගවලට හසුවීමටද ඉඩ තිබේ. මේ නිසා ආලය ප්‍රේමය ගැන කලකිරීම්වලටද භාජන විය හැකිය. ලිංගික ජීවිතයේදී සැමියාගේ දුබලකමක් දුටුව හොත් ඔහුට අනුකම්පා කිරීමද කන්‍යා ලග්න ස්ත්‍රීන්ගේ සිරිතය. මෙම පිරිමින් ලිංගික ජීවිතයේදී උපරිම සතුට පතන්නෝය. කන්‍යා ලග්න හිමියන් බොහෝ විට සිතන්නේ එක් පෙම්වතියක හෝ පෙම්වතකු ගැන පමණය.
විවාහය :
කන්‍යා ලග්න හිමියන්ගේ විවාහය බොහෝ විට ටිකක් ප්‍රමාදවේ. කන්‍යා ලග්න ගත ස්ත්‍රියකගේ නම් වයස 26-30 අතරද, කන්‍යා ලග්න පුරුෂයකුගේ නම් වයස 28-32 අතර බොහෝ විට සිදුවන බව පෙනේ. මෙසේ කන්‍යා ලග්න හිමියන්ගේ විවාහය ප්‍රමාද වන්නේ විවාහය පිළිබඳ සහකරුවකු හෝ සහකාරියක සොයා ගැනීමේදී හැම දෙයක් ගැනම සොයා බලන නිසාවෙනි. විවාහයෙන් පසුව ගැහැනු දරුවන් වැඩිපුර ලැබේ. අප්‍රේල් 20 සිට මැයි 20 දින හෝ දෙසැම්බර් 01 සිට ජනවාරි 18 දක්වා අතර කාලයේ උපත ලැබූ අයකු විවාහයට වඩා සුදුසු වේ.
රැකියාව :
කන්‍යා ලග්න හිමියන්ට ගුරු වෘත්තිය, හෙද සේවය, ගණකාධිකාරි තනතුරු, වෙළෙදාම, ලිපිකරු, ඉන්ජිනේරු, මුද්‍රණ කටයුතු ආශි්‍රත රැකියා බෙහෙවින් හිමිවේ. එසේම සංගීත, නැටුම් ආදී කලා අංශයේ රැකියාද සුදුසු වේ. නැතිනම් මැහුම් ගෙතුම් විද්‍යා උපකරණ ආශි්‍රත රැකියා මෙන්ම පරිගණක, කැමරා ක්‍රියාකරවීමේ තැනැත්තන්ද වැනි රැකියාවලට හිමිකම් කියයි. කන්‍යා ලග්න හිමියන් දේශපාලනයටද දක්‍ෂ අය වේ.
ධනය හා වස්තුව :
මුදල් පරිහරණයේදී අනවශ්‍ය දේ සඳහා වියම් නොකරන අතර බොහෝ අරපිරිමැස්මෙන් කටයුතු කරන අය වේ. කන්‍යා ලග්න හිමියන් බොහෝ විට ධනවත්වීමට ආශා කරති. එහෙත් ධනවත් වීම සඳහා යන ගමනේදී මොවුන්ට විවිධාකාර බාධා හමුවේ. නමුත් උත්සාහය මත මොවුන්ට ධනවත්වීමේ අවස්ථා පවතී. කෙසේ වුවද කන්‍යා ලග්න හිමියන් විශාල ආයෝජන කිරීමේදී සැලකිලිමත් වීම වඩා යෝග්‍ය වේ.
පහසුවෙන් සෑදෙන රෝග :
රෝග සඳහා බියක් පවතින නමුත් නිරෝගී ශරීරයක් නිසා රෝග සෑදීමේ අවදානම අඩුය. මොවුන්ට උදරාබාධ, පණු අමාරු, මුඛය ආශ්‍රිත රෝග, අණ්ඩ කෝෂ ආශ්‍රිත රෝග මෙන්ම උණ රෝගද පහසුවෙන් සෑදේ. ධාතු ශක්තිය දුර්වලතාවන්ද සමහර විට ඇති කරයි. කන්‍යා ලග්න හිමියන්ගේ ප්‍රතිශක්තිකරණය ඉහළ මට්ටමින් පවතී.
ජය අංක හා ශුභ දවස් :
මෙම ලග්න හිමියන්ට 2, 3, 5, 6, 7 යන අංක ශුභ අංක වන අතර ශුභ දවස් වන්නේ බදාදා දිනයයි. බදාදා දිනයේ ගනුදෙනු ආදියෙන් ලාභ ලැබේ. අඟහරුවාදා, සෙනසුරා, ඉරිදා අශුභ දින වන අතර අනෙක් දිනයන්ද සුබ දායක වේ. ජය වර්ණ හා ශුභ මැණික් කන්‍යා ලග්න හිමියන්ට සුදු, කොළ, කහ පාට ශුභ දායක වන අතර වැදගත් ගමන් බිමන්වලදී එම වර්ණයෙන් යුතු ඇඳුම් පැලඳුම් භාවිතය තුළින් සුබපල ලැබීමේ හැකියාව පවතී. මුතු, දියමන්ති, පච්ච, පුෂ්පරාග යන මැණික් වර්ගයන් පැලඳීම තුළින් ග්‍රහ අපල සමනය කර ගැනීමට පුළුවන.
මරණය :
සිව්පා සතුන්ගේ පීඩාවකින්, ආයුධ හෝ පිත් රෝගයකින් මරණය ඇතිවීම බොහෝ කන්‍යා ලග්න හිමියන්ගේ තොරතුරු අනුව විද්‍යමාන වේ. මරණය ආසන්න වීමේදී ආහාර ගැනීමේ අහසුතාවකින් පෙළෙන අතර දහදිය ගැලීම්ද අධික වේ. වාහන අනතුරකින් හෝ වෙනත් හදිසි අනතුරකින් තුවාල ලබා මරණයට පත්වීමටද බොහෝ කන්‍යා ලග්න හිමියනට සිදුවිය හැකිය. සමහර විට තමා ඉතාම ආදරය කළ කෙනකුගේ වියෝව නිසා හිතේ හටගත් ශෝකය කම්පනය නිසාද මරණය සිදුවීමේ ඉඩ කඩ පවතී.
දුර්වලතා :
ආත්ම විශ්වාසය අඩුකම මොවුන්ගේ ලොකු දුර්වල කමකි. සුළු දේවලට එතරම් කැමැත්තක් නොදැක්වීමද කන්‍යා ලග්න හිමියන්ගේ චරිතයේ අඩුවකි. අනුන්ව විශ්වාස නොකිරීම මෙන්ම කළ යුතු දේවල් තිබියදී නොකළ යුතු දේවල් කිරීමද දුර්වලකමකි. අන් අයගේ උපදෙස් නොගැනීමත් උද්දච්චභාවයත් ඊර්ෂ්‍යාව වැනි තත්ත්වයන් සිතේ හට ගැනීමත් කන්‍යා ලග්න හිමියන්ගේ අඩුලුහුඬුකම් ලෙස දැක්විය හැකිය.
නියෝජ්‍ය විදුහල්පති ජේ‍යාතිර්වේදී එම්. උපුල් ජය ශ්‍රී ද සිල්වා කොස්ගොඩ - 0777 108 343උපුටා ගැනීම මව්බිම පුවත්පත
