පාට පිරුණු ලෝකයක්‌ අපල සපල යෝගයක්‌
සතියට දින හතක්‌ තිබේ. දින හත හඳුන්වන්නේ ග්‍රහයන් හත්දෙනකුගේ නමිනි. සඳුට හිමි දවස සඳුදා ආදී වශයෙනි. රාහු හා කේතුට හිමි දවස්‌ නැත. ග්‍රහයන්ද සුබ ග්‍රහයන් හා අසුබ ග්‍රහයන් ලෙස වෙන් කර ඇත. මේ අනුව අසුබ ග්‍රහයන්ට හිමි දවස්‌ වන අඟහරුවාදා, සෙනසුරාදා දින අසුබ දවස්‌ වශයෙන්ද, ඉතිරි දවස්‌ සුබ දවස්‌ ලෙස ද පිළිගනු ලැබේ. මේ සාමාන්‍ය වශයෙනි.. නැකත් ශාස්‌ත්‍රයේදී සුබ නැකත සමඟම නැකත් වේලාවට ඇඳිය යුතු ඇඳුමේ පාට ගැන ද නිර්දේශ කිරීම ජ්‍යොතිෂ රීතියකි. සඳුදාට සුදු පාට, බදාදාට කොළපාට ආදී වශයෙන් දක්‌වා ඇතත් ඒ ඒ පුද්ගලයාගේ ජන්ම පත්‍රය අනුව ග්‍රහ බල විනිශ්චයකර බලා සුබපාට තීරණය කිරීම වඩාත් ප්‍රශස්‌ත වේ.
පුද්ගලයකු අඳින පළඳින ඇඳුමේ වර්ණය අදාළ පුද්ගලයාට බලපාන්නේ ද?
- සෑම කෙනකුම පාහේ යම් පාටක්‌ වැඩිපුර භාවිතා කරනු දක්‌නට ලැබේ. ඒ මන්ද?
- කැමැති පාට අනුව කෙනකුගේ චරිත ලක්‍ෂණ හෝ වෙනත් සුබාසුබයන් ගැන කිව හැකිද?
- භාවිත කරන වර්ණ අනුව අන්‍යයන් අප වෙත දක්‌වන ආකල්ප වෙනස්‌ වේද?
මේ පිළිබඳව සාකච්ඡා කර ඔබේ ජීවිතය ජය ගැනීමට භාවිත කළ යුතු පාට පිළිබඳව යම් අවබෝධයක්‌ ලබා ගැනීම මේ ලිපියේ අරමුණයි. කේතු හිමි කළු පාට කළු පාට හිමිවන්නේ කේතු ග්‍රහයාටය. මෙම ලිපිය ආරම්භ කිරීමට කළු පාටම තෝරා ගන්නේ යොවුන් වියේ බොහෝ දෙනෙක්‌ කළු පාටට ඇළුම් කරන බව පෙනෙන බැවිනි. දැනට වසර හතළිහකට පමණ පෙර සමාජයේ කළු පාට ඇඳුම් දක්‌නට නොතිබූ තරම් ය. ඕනෑම පාටක්‌ ප්‍රිය ද, අප්‍රිය ද යන්න තීරණය කළ හැකි වන්නේ අප අවට පරිසරයේ එම පාට ඇති තැන් සොයා බැලීමෙනි.
මේ අනුව හිසකෙස්‌ හා ලොම්, ටයර්, තාර, තාරපාර, කපුටා, කුණු ගොඩවල් වැනි ස්‌ථානවල මෙන්ම අන්ධකාර රාත්‍රියන් කළුපාටට හිමි වෙයි. විරෝධය දක්‌වන විට කළු කොඩි ඔසවනු ලැබේ. පෝරකයට නියම වූ අපරාධකරුවකු කළු වස්‌ත්‍රයකින් දෑස්‌ වසා බැඳ මරණ දඬුවමට යටත් කෙරේ. මේ අනුව කළු වර්ණය පැතිර ඇත්තේ අප්‍රසන්න තැන්වලය. කළු වර්ණය භාවිත කරන අය ද මනස අඳුරු වූ අනාගතය ගැන අවිනිශ්චිත හා සැකය සහිත ජනප්‍රිය බවින් හීන අය බව දක්‌නට ලැබේ. ජීවිතය ජයගෙන ඉලක්‌ක කරා යැමට ඔබ සිතන්නේ නම් වහාම කළුපාට භාවිතය අත්හල යුතු වේ. විහාරාරාම වැනි පූජ්‍ය ස්‌ථානයකදී කළු අඳින අය සමච්චලයට භාජන වනු ඇත. සඳුට හිමි සුදුපාට සඳු ග්‍රහ මණ්‌ඩලයේ බිසව ලෙස ද මව ලෙස ද හඳුන්වන්නේ එම ග්‍රහයා මවු ගුණය පෙන්වන බැවිනි.
තවද මානසික තත්ත්වයට අධිපති ග්‍රහයා ද සඳු වෙයි. සඳුට හිමි සුදුපාට ඇත්තේ පරිසරයේ කවර ස්‌ථානවලදැයි විමසා බලන්න. පාසල් ශිෂ්‍ය ශිෂ්‍යාවන්, හෙද හෙදියන්, උපාසක උපාසිකාවන්, කන්‍යා සොයුරියන් හා මවුවරුන්, කිරි අම්මාවරුන්, වෛද්‍යවරුන්, සිල්වතුන්, ගුණවතුන් අතර මෙන්ම ඉද්ද, සමන්, පිච්ච, නෙළුම් වැනි මල්වල ද සුදුජ්පාට දක්‌නට ලැබේ. පූජනීය ස්‌ථානයට යන්නේ සුදුවතින් සැරසීගෙන ය. මේ අනුව පරිසරයේ සිල්වත් බව, සාමය, පවතින තැන්වලම සුදුපාට ඇති බව ද දැක ගත හැකිය. සුදු පාටට ඔබ කැමැති නම් ඔබ ද සාමය හා පිවිතුරු බව අගයන "සුදු චරිතයක්‌" බව කිව යුතුය. සමාජයේ කොතැනටත් සුදු පාට ගැලපේ. ඔබේ අරමුණ එවැනි චරිතයක්‌ බවට පත් වීම නම් සුදු ඇඳුම භාවිත කරන්න. එය ඉක්‌මනින් ඔබේ ඉලක්‌ක ළඟා කර දෙනු ඇත.
කුජ හිමි රතු පාට රතු පාට හෙවත් ලේ පාට හිමිවන්නේ කුජ ග්‍රහයාටය. කුජ හෙවත් අඟහරු ග්‍රහ මණ්‌ඩලයේ සෙන්පතියා යෑයි හැඳින්වේ. සටන අඟහරුගේ ක්‍රියාවයි. රතුපාට ඇත්තේ කොතැනද? එතැන සටන්කාමී බව තිබේ. සටන්කාමී සමාජවල රතු කොඩි එසවෙයි. එවිට කතා කරන්නේ හඬනඟමින් සටන් පාඨවලිනි. මස්‌කඩවල, ලේ හා මස්‌ වල, රතුපාට දක්‌නට ලැබේ. රතු නෙළුම්වල ඇත්තේ වෙනස්‌ රතුපාටකි. නිවසක්‌ ඉදිරියේ රතු මල් වැවීම අශුභ බවට පිළිගැනීමක්‌ තිබේ. එමගින් ලේ උරා බොන කෘමීන් බෝ වන බැවිනි. මේ අනුව ඔබ රතු පාට තෝරා ගත යුත්තේ හිංසාකාරී සටන් වල යෙදෙන්නේ නම් පමණි. නො එසේ නම් රතු පාටට කැමැති අය මෛත්‍රියට විරුද්ධ ද්වේශය බහුල වූද, රාගාධික වූ ද කෙනකු බව පිළිගැනීමට සිදුවේ. රතු පාට සුබ පාටක්‌ නොවන්නේ එබැවිනි.
බුධ හිමි කොළ පාට කොළ පාට ප්‍රභේද දෙකක්‌ වෙයි. තද කොළ පාට හා පලාවන් හෙවත් ලා කොළ පාටයි. තද කොළපාට නිල් පාටට සමාන බවක්‌ දක්‌වයි. බුධට හිමි වන්නේ පලාවන් හෙවත් ලා කොළ පාටයි. බුධ ග්‍රහ මණ්‌ඩලයේ ලේකම්වරයා ය. ලේකම් යනු ලියකියවිලිවලට හා බුද්ධියට අදාළ කටයුතු කරන කෙනකි. බුධ අධිපති අය පලා වර්ග අනුභවයට මෙන්ම ලා කොළ පාටට කැමැත්තේය. රෝහල්වල තිර රෙදි, අප අවට පරිසරයේ වෘක්‍ෂලතාවල දලු වල පැහැය ලා කොළ පාට වේ. බාහිර පෙනුමට වඩා හරයට සලකන්නාවුන් බුද්ධිමතුන් වූ කෙනකු පලාවන් වර්ණය තෝරා ගනු ඇත.
ගුරු හිමි කහ පාට කහපාට, තැඹිලි පාට නැතහොත් ගුරු පාට බ්‍රහස්‌පති ග්‍රහයාට හිමි වෙයි. බ්‍රහස්‌පති ධනයට ප්‍රඥාවට හා පෝෂ්‍යදායක ආහාර වලට අධිපති වෙයි. මේ අනුව ලොව පුරා භික්‍ෂූන් වහන්සේලා, මෙහෙණින් වහන්සේලා, දසසිල් මාතාවන්, තාපසවරුන් වැනි ප්‍රඥාව ලබා ගැනීමට ඉලක්‌ක කර ගත් අය මෙම වර්ණයම භාවිත කරනු දැකිය හැකිය. එමෙන්ම කඩල, කව්පි, පරිප්පු වටානා, බටර්, මාගරින් වැනි පෝෂ”ය ආහාර වර්ගවල ද කහපාට දක්‌නට ලැබේ. බුදුරජාණන් වහන්සේගේ සිවුර ක්‍ෂාය වස්‌ත්‍රයකි. ප්‍රඥාවන්තයන් කිසිවිටෙකත් රතු හෝ කළු වැනි වර්ණ භාවිත කරන්නේ ද නැත. ඔබ මෙම පාටට ප්‍රියනම් ද භාවිත කරන්නේ නම් ද ඔබ තුළ ද ප්‍රඥාවන්ත ස්‌වභාවය වර්ධනය වනු ඇත.
සිකුරු හිමි මිශ්‍ර ලා පාට ග්‍රහ මණ්‌ඩලයේ කාමයට අධිපති ග්‍රහයා සිකුරු හෙවත් ශුක්‍ර ග්‍රහයා ය. සිකුරු සංගීතය, නාට්‍යය, චිත්‍ර, නැටුම් ආදී සෞන්දර්යයට අයත් දේ මෙන්ම රාග නිශ්‍රිත දේද, නියෝජනය කරයි. ලොව පුරා නර්තන ශිල්පීන්, කලා ශිල්පීන්, රූපලාවන්‍ය ශිල්පීන් ආදී කලාකරුවන් හා කලාකාරියන් විචිත්‍ර වර්ණයෙන් බැබලෙන ඇඳුම් පැළඳුම් වලින් සැරසී සිටිනු දක්‌නට ලැබේ. එය ඕනෑම රටක සිකුරු අධිපති බව දරන චරිත හිිමි අයගේ හිත් ගත් වර්ණයයි. මේ අනුව ඔබට ද මෙම විචිත්‍ර වර්ණය හෙවත් මිශ්‍ර වර්ණවලට කැමැත්තක්‌ තිබේ නම් ඔබ ද අලංකාරයට චමත්කාරයට ආකර්ශනයට කැමැති, රාග චරිතයකට හිිමිකම් කියන කෙනකු බව පෙන්වයි. ප්‍රීති උත්සව අවස්‌ථාවට සවසට මිශ්‍ර ලා වර්ණ ගැලපේ.
ශනි හිමි නිල් පාට තද කොළ පාට ද නිල් පාට ද සමාන තතත්වයක්‌ දරන බව පෙනේ. නීල ගොයම් යෑයි කියන්නේ තද කොළ පාට ගොයමටය. සමහර පොත් වල ශනි කාල වර්ණ යෑයි ද කියා ඇත. කළුපාට ද අශුභ බව ඉහත දැක්‌වීමු. පරිසරයේ නිල් පාට බහුලව ඇත්තේ හිස්‌ අහසේ ය. නැතහොත් සාගර ජලයේ ය. ග්‍රහ මණ්‌ඩලයේ ශනි හෙවත් සෙනසුරු නියෝජනය කරන්නේ දුක්‌ කරදර වධ වේදනා හා මාරක අපලයි. ශනි මෙහෙකරුවන්ට අධිපති වන අතර, ශනි ඉතා බලවත්ව පිහිටි අයගේ පමණක් ඉවසීම දරා ගැනීමේ ශක්‌තිය වැනි ගුණාංග පෙන්වයි. සාගර ජලය බීමට හැකි නොවේ. හිස්‌ අහස තුළ ඇත්තේ ද ස්‌පර්ශ කළ නොහැකි හිස්‌ බවය. නිල් වර්ණය බහුලව භාවිත කරන අය තුළ ශනිගේ අපලයන් ද පවතින බව අපි අත්දැකීමෙන් ප්‍රත්‍යක්‍ෂ කර ගෙන ඇත්තෙමු. එය හුදු අනුමානයක්‌ නොවේ. කේතුට හිමි කළු හා ශනි හිමි නිල් පාට එකටම අඳින අයට ශනි ඒරාශ්ටක අපලයක්‌ ඇති බව ස්‌ථිරය. එය වරදින්නේ කලාතුරකිනි. ඔබ ද ජීවිතයේ සාර්ථකත්වය අපේක්‍ෂා කරන්නේ නම් කළු /නිල් වර්ණ භාවිතය ඊට බොහෝ බාධා කරන බව සැලකිය යුතුය.
රවි හිිමි දිලෙන සුදු පාට හිරු පළොක්‌ මල් වර්ණය යෑයි වරාහ මිහිර ග්‍රන්ථයේ කියා ඇත. රවි ග්‍රහ මණ්‌ඩලයේ රජු වෙයි. එනම් පාලකයා ය. අන් ග්‍රහයන් භ්‍රමණය වන්නේ හිරු වටාය. රජවරු මෙකල භාවිත කරන්නේ රක්‌ත වර්ණයට වඩා දිලිසෙන සුදු වර්ණය බව පෙනේ. නිකල් වර්ණයට සමීප දිලිසෙන සුදු පාට පෙරදිග බොහෝ රාජ්‍ය නායකයන් ගේ ද ධනවතුන්ගේ ද, නායකත්ව ගති ලක්‍ෂණ පෙන්වන බොහෝ අයගේ ද පාට බව විමසා බලන විට පෙනී යයි. මේ නිසා මෙම වර්ණය භාවිත කරන අය එවැනි නායකත්වය අපේක්‍ෂා කරන අය බවත් ගෞරවය රැක ගැනීමට හා ගෞරවය ලබා ගැනීමට ඉලක්‌ක කර ගත් අය බවත් පෙන්වයි. දිලෙන සුදු වර්ණය භාවිත කරන අය සමාජයේ කැපී පෙනෙන ගරු කටයුතු චරිතයක්‌ වන බව නිසැකය.
රාහු හිමි අළු පාට/ ධූම වර්ණය ගිනිනෙන් නඟින දුම ස්‌පර්ශ කළ හැකි නොවන අතර, නිතර චලනය වෙමින් තිබේ. රාහු ද ග්‍රහ මණ්‌ඩලයේ පණිවිඩකරුවකු ලෙස මෙන්ම ඔලුව නැති ග්‍රහයා ලෙස ද හඳුන්වනු ලැබේ. රාහු අපලයක්‌ ලැබූ කෙනෙකුට නිතර ගමන් ද, නිෂ්ඵල ගමන් ද නිෂ්ඵල වියදම් ද යෙදේ. රාහු දශාවක්‌ ලැබූ අයකු අළුපාට හෙවත් දුම් පාට ඇඳුම් භාවිත කරන්නේ නම් එවැනි අය මෙම නිෂ්ඵල ගමන් හා වියදම්වලට ගොදුරු වූ හිතේ කිසිදු සැනසීමක්‌ නැති මානසික ආතතියෙන් පෙළෙන කෙනකු බවට පත්වනවා ඇත. හිතට ප්‍රිය චිත්තාකර්ශනීය වර්ණ හැම විටම නියෝජනය කරන්නේ සුබ ග්‍රහයන්ගේ වර්ණ බවත් අප්‍රියජනක අඳුරු වර්ණ පාප ග්‍රහයන් නියෝජනය කරන බවත් විමසා බලන කෙනකුට දැක ගත හැකිය. සුබ ග්‍රහයකුගේත්, අසුබ ග්‍රහයකුගේත් දශා එක්‌ව යෙදෙන විට මිශ්‍රව සෑදෙන පාටක්‌ ලැබේ.
රතු පාටත් සුදු පාටත් මිශ්‍ර වී රෝස පාට සැදෙනවාත් මෙන්ම කුජගේත් සඳුගේත් ගති ලක්‍ෂණ ද මිශ්‍ර වෙයි. රතු පාට කුජගෙන් රාගනිශ්‍රිත සටන්කාමී බව ද සඳුගෙන් සාමකාමී සිල්වත් බව ද ලැබේ. රෝස පාට අඳින කෙනකු තුළ මේ චරිතය ඉස්‌මතුව පෙනේ. පාපග්‍රහයන්ගේ දශාවක්‌ හෙවත් අපලයක්‌ ඇති විට ඒ සඳහා විවිධ ශාන්ති කර්ම ජ්‍යොතිෂයේ නියම කර තිබේ. විවිධ පුණ්‍යකර්ම සිදුජ්කිරීම, යන්ත්‍ර පැළඳීම, ග්‍රහ පූජා තැබීම, ආදී කවර ශාන්ති කර්මයක්‌ තුළ ද පුද්ගලයා අඳින පළඳින වර්ණය ඇති කරන ධන හෝ සෘන බලපෑම සුළු කොට තැකිය හැකි නොවේ. අටසිල්වල වර්ණයක්‌ ගැන සඳහන් වන්නේ නැතත් සිල් සමාදන් වන විට සුදුපාට ඇඳුමක්‌ අඳින්නේ සිල්වත් වීමටය. එයින් ධනාත්මක බලපෑමක්‌ ඇති කරන බැවිනි. අන් වර්ණ භාවිතය ද එසේය. එබැවින් අපල සමනය කර ගැනීමටත්, සාර්ථකත්වය ලබා ගැනීමටත්, බලාපොරොත්තු වන්නේ නම් පළමුව අශුභ වර්ණ භාවිතයෙන් වළකින්න. පාප ග්‍රහයන් වන සෙනසුරු, කේතු හිමි කළු, නිල් පාට අත්හරින්න. තද රතු, තද කොළ පාට ද ඔබට සෘන චිත්ත වේග ආකර්ෂණය කරනු ඇත. සඳු හිමි සුදු, ක්‍රීම් පාට සිකුරු හිමි මිශ්‍ර ලා වර්ණ ගුරුට හිමි කහ පාට, ගුරු පාට වැනි ලා වර්ණ භාවිත කරන්න. දිලෙන සුදුජ්පාට ද ගෞරවනීය බව පෙන්වයි. අපල සමනය කර ගැනීමට අනුගමනය කළ යුතු පළමු ශාන්තිකර්මය වන්නේ සුබ වර්ණ භාවිත කිරීම බව අවධාරණයෙන් දන්වනු කැමැත්තෙමි.
කෑගල්ලේ සුනිල් කුමාර ගම්ලත්
උපුටා ගැනීම දිවයින පුවත් පත
