විරුද්ධ ලිංගිකයන්ගේ සිත් ඇදගැනීමේ හැකියාව උපතින් උරුම සිංහ ලග්න හිමියන්
මෙලොව උපදින ඕනෑම කෙනකුට පළමුවෙන්ම හිමිවන්නේ ලග්නයයි. කෙනකු උපදින මොහොතේ නැඟෙනහිර ක්‍ෂිතිජයෙන් උදාවෙමින් පැවැති ලග්නය ඔහුගේ හෝ ඇයගේ ලග්නය වන බව ජේ‍යාතිෂයේ සඳහන්ය. ජන්මියකුගේ හැඩරුව, ගතිගුණ, චරිතය, දක්‍ෂතා ලෙඩ දුක් ආදී ජීවිතයේ සියලු දේවල් සිදුවන්නේ ලග්නය අනුවය. ඔබ උපන් ලග්නය අනුව ඔබේ ජීවිත තොරතුරු ඉදිරිපත් කරන ලිපි පෙළේ පස්වැන්න වන මෙයින් සිංහ ලග්න හිමියන් ගැන විග්‍රහ කෙරේ.
ශරීර ලක්‍ෂණ :
උසට සරිලන මහත් වූ ශක්තිමත් ශරීරයක් ඇත. මෙම ලග්න හිමියන්ට එඩිතර තේජවන්ත පෙනුමක්ද ඇත. තරමක තළෙළු පැහැයක් හිමි ශරීරයක් ලැබෙනු ඇත. රවි බලවත්ව සිටි විට ඉහත ලක්‍ෂණ හොඳින් විද්‍යමාන වේ. ලග්නයේ සිටින සහ දෘෂ්ටි ලබන ග්‍රහයන් අනුව සිරුරේ සිත්ඇදගන්නා බව තරමක් වෙනස් වේ. ගතිගුණ සිංහ ලග්නයට මා නැකැත, පුවපල් නැකැත හා උපත්‍රල් නැකතේ 1 පාදයත් අයත් වන අතර රවිට අයත් වේ. සඳු, කුජ, ගුරු මිත්‍ර වන අතර ශනි, සිකුරු සතුරු වේ. සිංහ ලග්නයෙන් උපන් අය තරමක් තද ගති ඇති නිර්භීත ශක්ති සම්පන්න අය වේ. අනුන්ට අණ දීමේ ශූරයන්ය. ඉතා උසස් බලාපොරොත්තු ඇති හොඳ සංවිධාන ශක්තියක් හිමියන්ය. ක්‍රියාවේ ශූර ත්‍යාගශීලී දුරදක්නා නුවණක් ඇති ජීවිතයේ සුන්දර පැත්ත පමණක් සිතන අය වේ. යන යන තැන ප්‍රධානත්වය හිමිකර ගනී. ඔවුන් තම අදහස් එලෙසින්ම ක්‍රියාවෙහි නැංවීමට දැඩි උත්සාහයක් ගන්නා අතර අන්තිම මොහොත දක්වාම අදහස් වෙනස් නොකරයි. මෙම ලග්න හිමියන් තරමක ආඩම්බර ගතියකින් පසුවන අතර යමක් කිරීමට පෙර හොඳ නරක වටහා ගැනීමේ නුවණක් ඇති අය වෙති. උසස් ගති පැවැතුම් ඇති අවංක හොඳ හදවතක් මොවුන්ට හිමිවේ. මිතුරන්ට හා නෑදෑයන්ට හිතවත් වන අතර නිහඬ අඩු කතාබහක් ඇති සවන්දීම ඥානවන්ත තීරණ ගැනීම දක්නට ලැබේ. යමෙක් වරදක් කළ විට සමාව දීමට මැළි නොවන මොවුන් සියලු දෙනාම විශ්වාස කරයි. අන් අය තමා වර්ණනා කරනවාට රුචිකත්වයක් දක්වන මොවුන් පහත් වැඩ කිරීමට පෙලඹීම අඩුය. ලග්නයට කුජගෙන් අසුබ දෘෂ්ටි ඇති විට හිතුවක්කාර ගති පෙන්වන අතර රවි, ශනි සංයෝග වීම නිසා රජයෙන් බාධා ඇතිවේ.
ආදරය හා ලිංගිකත්වය :
විරුද්ධ ලිංගිකයන්ගේ සිත් ඇද ගැනීමේ හැකියාවක් උපතින්ම උරුම කර ගන්නා සිංහ ලග්න හිමියන් ගැඹුරින් ආදරය කිරීමට පෙලැඹෙන්නේය. එඩිතරව සිය ආදරය ප්‍රකාශ කරන මොවුහු ප්‍රේමය ඉදිරියේ අවංකව කටයුතු කරන්නෝ වෙති. සිංහ ලග්නයෙන් උපන් පිරිමියා තම බිරියට අවංකව ආදරය කරයි. මෙම ලග්නයෙන් උපන් කාන්තාව සිය සැමියාට දැඩි ගෞරව සම්ප්‍රයුක්ත ආදරයක් දක්වයි. යුග දිවියේදී උපරිම කායික තෘප්තියක් අත්විඳීම සිංහ ලග්න විවාහක ස්ත්‍රී - පුරුෂයන්ගේ සිරිතය. විවාහය ආදරයට කැමැති මොවුන් අවස්ථාවක් ලැබුණු විට නියම පෙම්වතුන් වේ. ප්‍රසිද්ධියේ ප්‍රේම කිරීමට මැළිවේ. සිංහ ලග්න හිමියන්ට සිංහ, මේෂ, වෘශ්චික ලග්න හිමියන් විවාහයට වඩා සුදුසු වේ. සිංහ ලග්නයෙන් උපන් අයට මාර්තු 21, අප්‍රේල් 21 අතර උපන් අය හෝ නොවැම්බර් 2, දෙසැම්බර් 25 අතර උපන් අයද වඩා යෝග්‍ය වනු ඇත.
හැකියාව :
මෙම ලග්න හිමියන්ට බොහෝ විට රජයේ දෙපාර්තමේන්තු සහ සංස්ථාවල රැකියා හිමිය. පරිපාලන සේවය, ලිපිකරු සේවා, සමාජ සේවා ආදියත් හිමිවේ. කර්මාන්ත ශාලාවල කටයුතු රන් ආභරණ අංශයේ රැකියාද ගැළපේ. ශල්‍ය වෛද්‍ය, ඖෂධවේදී, දන්ත වෛද්‍ය විනිසුරන් වැනි රැකියාද හිමිවනු ඇත. රජයේ සහ වාණිජ අංශවල උසස් රැකියා ලබන මොවුන්ගේ කුජ බලවත් වීමෙන් හමුදා සහ වෛද්‍ය අංශ රැකියාත් බුධ බලවත් වීමෙන් ව්‍යපාර කටයුතුවලත් නිරත වනු ඇත.
පහසුවෙන් සෑදෙන රෝග :
හෘද රෝග, අක්‍ෂි රෝග, දන්ත ආබාධ, ස්නායුගත රෝග, වකුගඩු හා මුත්‍රාශය ආශ්‍රිත රෝග මොවුන්ට සෑදේ. මොළේ උණ, අපස්මාර රෝග, වාත අමාරුද බලපවත්වන අතර සමබල ආහාර ගැනීම වඩා සුදුසු වේ. මත්පැන් ගැනීම සෞඛ්‍යයට වඩා බලපෑම් සිංහ ලග්න හිමියන්ට කරයි. නමුත් පොදුවේ ගත්කල සිංහ ලග්න හිමියන්ට සෑදෙන අසනීප ඉක්මනින් සුව වේ. මරණය ආයුධ මඟින්, විෂ ශරීරගත වීමෙන්, ජලචර සතුන්ගෙන් සිදුවන හානි ආදිය නිසා මරණය සිදුවීමේ හැකියාවක් ඇත. සිංහ ලග්නයෙන් උපන් අයට අසාධ්‍ය දුක්බර රෝගයක් සෑදී කලක් දුක් විඳ මරණ සිදුවන අවස්ථා අඩුය.
ධනය හා වස්තුව :
සිංහ ලග්න හිමියන්ට ඉඩකඩම් දේපළ හිමි වන අතර තම ගෞරවය සඳහා වියදම් කිරීමට කැමැතිය. ධනය ලැබෙන විවිධ මාර්ග ඇති අතර එහිදී සාධාරණය අසාධාරණය කියා සොයා බැලීමේ සිරිතක් මොවුන්ට නැත. අන් අයගෙන් උපකාර ලැබීමට එතරම් කැමැත්තක් නොදක්වන මොවුනට අවශ්‍ය වුවමනා වේලාවට මුදල් ලැබෙන නමුත් සීමාවන් රහිතව වියදම් කිරීමෙන් අගහිඟතා ඇතිකර ගනී. බොහෝ විට ජීවිතයේ මැදි වයසේදී ධනවතකු වීමේ අවස්ථාව මොවුනට උදාවේ.
නිවෙසේ පරිසරය :
සිංහ ලග්න හිමියන් පවුලේ නායකයා ලෙස පෙනී සිටීමට කැමැතිය. විවේකයේදී ඉතා සතුටින් සිටින අතර අන් අය තමාට කීකරු බවක් බලාපොරොත්තු වේ. මිතුරන්ට සංග්‍රහ කිරීමට කැමැතිය. තම ගෞරවය සඳහා ඕනෑම දෙයක් සිදු කිරීමට පසුබට නොවේ. තම ආර්ථික දුෂ්කරතා ඇති අවස්ථාවලදී වුවද බාහිර ඔපය සඳහා වියදම් කරයි. සිංහ ලග්න ගත ස්ත්‍රීන්ට ඇඳුම් පැලඳුම් ආභරණ නිතර අවශ්‍ය වේ. සහකරුගෙන් එවන් අවශ්‍යතා ඉටු නොවන්නේ නම් නිවසේ අර්බුද ඇති කරයි. සිංහ ලග්න හිමියන් දරුවන්ට සෙනෙහස දක්වන අතර දරුවන් පිළිබඳව ආඩම්බරයෙන් කතා කරයි.
අත්අකුරු :
සිංහ ලග්න හිමියන් අකුරු රවුම්ව ලියයි. ලිවීමේදී වචන අතර පරතරය වැඩි බවක් පෙන්වන අතර ඒකාකාර ස්වරූපයක් අක්‍ෂරවල දක්නට ලැබේ. විශේෂ ගුණාංග සිංහ ලග්න හිමියන් ඍජුව තරමක් අහංකාර අයුරින් ගමන් කරයි. තද කුසගිනි ඇති කරන අතර දුඹුරු වර්ණ ඇඳුම් පැලඳුම් සපත්තු වැනි දේවලට ප්‍රිය කරයි. බලසම්පන්න ශක්තිමත් කටහඬක් ඇති අතර කතාව ප්‍රියජනක වේ.
ජය අංක හා සුබ දවස් :
ඉරිදා දිනය උසස් අය හමුවීමට සුබ වන අතර සෙනසුරාදා, සඳුදා අසුබයි. අනෙක් දිනයත් මධ්‍යස්ථ වේ. බදාදා දිනයත් ලොතරැයි මිලදී ගැනීම්, ප්‍රේම සම්බන්ධතා ගිවිසුම් සඳහා සුබ වේ. ජය අංක වන්නේ 1, 4, 5, 6, 9 ය. 2, 7, 8 අංක අසුබ වේ. සුබ වර්ණ හා සුබ මැණික් රතු පාට, කොළ පාට, දම් පාට සුබ වර්ණ වන අතර සුදු පාට නිල් පාට අසුබ වේ. රතු ගල් වෛරෝඩි සුබ මැණික් වේ.
දුර්වලතා :
කේන්ති යෑමෙන් ගැටලු ඇතිකර ගනී. එසේම ප්‍රශ්නයකදී මධ්‍යස්ථව නොබැලීමද දුර්වලකමකි. වියදම් තරමක් අඩු කරගත යුතුය. පළපුරුද්දක් නොමැතිව ඕනෑම දෙයකට අතගැසීම නිසා පාඩු සිදුකර ගනී. හොඳ අවබෝධයකින් යුක්තව යම් කටයුත්තක සංවිධානයට අත ගැසීමට මොවුන් වගබලා ගත යුතුය. අහංකාර ගති මොවුන්ට දියුණුවට බාධා ඇති කරයි. විවේචනය ප්‍රිය නොකිරීම මෙන්ම තම තීරණ වෙනස් නොකිරීමද සිංහ ලග්න හිමි අයගේ දුර්වලතා ලෙස දැක්විය හැකිය.
නියෝජ්‍ය විදුහල්පති ජේ‍යාතිර්වේදී එම්. උපුල් ජය ශ්‍රී ද සිල්වා කොස්ගොඩ - 0777 108 343උපුටා ගැනීම මව්බිම පුවත්පත
