සතුන් කියන අනාවැකි තේරුම් ගමු
සතුන්ට මිනිසාට තරම් දියුණු මනසක් නැතත් ඔවුන්ට ඇති සංවේදී බවින් යුත් ඉන්ද්‍රියන් පිහිටා ඇත. මේ නිසා ඉදිරි කාලයේදී සිදුවන යම් යම් සිදුවීම් පිළිබඳව අනාවැකි පළකිරීමේ පුදුම හැකියාවක් ඔවුන් තුළින් පෙන්නුම් කරයි. බළලාට නරියාට ඉව ඇත. වවුලාට ද අධි සංවේදී ශ්‍රවණෝන්ද්‍රියක් ඇත. පරෙවියා සැතපුම් ගණන් ඈතට පියාඹා ගොස් නැවතත් සිටි තැනටම පියාඹාගෙන එයි. ඒ උගේ මොළයේ ඇති විශේෂ ස්නායු කොටසක් මගින් යෑයි විද්‍යාඥයෝ සොයාගෙන ඇත. පොළවේ උස් පහත් ස්ථාන ඌ හොඳින් මතකයේ තබාගෙන ඒ ඔස්සේ නැවත එන බව කියෑවේ. ඒ අනුව සමහර සතුන්ට අනාවැකි පළ කිරීමේ හැකියාවක් ඇති බව අපිට හිතාගත හැක.
බල්ලා කන්පට ගසන්නේ වැස්සක් ළගාවන බව දැනෙන බැවිනි. එයට හේතුව බල්ලාට අධි සංවේදී ශ්‍රවණ ඉන්ද්‍රියන් ඇති බැවින් වායුගෝලයේ ඇතිවෙන වෙනස්කම් ඌට හොඳට දැනෙන නිසාය. එය බල්ලා අපිට අගවන අනාවැකියකි.
කුරුල්ලන් පිළිබඳ අනාවැකි සකුණ ශාස්ත්‍රයෙන් කියෑවේ. සකුණ ශාස්ත්‍රයට අනුව හේරුණ්ඩ, පිංගල, කාක, තුක්කුම, මයුර ආදී පක්ෂීන් මිනිස් ජීවිතයට බලපෑම් කරන පක්ෂියෝ වෙති. එයින් කපුටා ප්‍රධාන ස්ථාන ගනී.
- වෙසක් මාසයෙහි උපද්‍රවයෙන් හානියට පත් නොවුණ වෘක්ෂයක කපුටන් කූඩුවක් සෑදුවහොත් ඒ ගමෙහි හෝ නගරයෙහි වෙසෙන අයට ආහාර සුලබ වීම හා අභිවෘද්ධිය සැලසෙන බව ජ්‍යොතිෂ මතයයි.
- විෂ සහිත හෝ කටු සහිත හෝ වියලී ගියා වූ හෝ ගසක කූඩුවක් සෑදුවහොත් ඒ පෙදෙසට දුර්භික්ෂයක් ඇති වේ.
- යම් ගසක නැගනහිර ශාඛාවක කවුඩු කැදැල්ලක් ඇතොත් එම වර්ෂයෙහි ප්‍රථම වර්ෂාව සරත් සෘතුවේදී ලැඛෙන බව ජ්‍යොතිෂ මතය වේ. එය උතුරු හෝ දකුණු දිශාවේ අත්තක වේ නම් සරත්, හේමන්ත සෘතු දෙක අතර කාලයේ වැසි ලැබේ. බටහිර දිග අත්තක වී නම් සිසිර සෘතුවේදී සෑම වැසි ලැඛෙයි. ගස මුදුනේ වී නම් වර්ෂාව බහුල වශයෙන් ලැබේ.
- කපුටකු විසින් වැලි, ධාන්‍ය, තෙත මැටි හා මල් ආදිය කිසිවක් ගෙන එමින් සිටිනු දැකීම ධන හානියකට හේතුවක් වේ.
- කපුටකු යමෙකුගේ වාහනයකට, ආයුධයකට, පාවහන්වලට, කුඩයට හෝ යම් පුද්ගලයකුට කෙටීම අශුභ ඵලදීමකට හේතුවකි.
- කාකයකු ඇග මතට මළ පහ කළහොත් ආහාර ලාභ ගෙන දේ.
- කාකයකු ගමන් යන්නකුගේ කණ ළගින් පියාසර කර වම්පස සිට නාදකර ඒ දෙසට පියාඹත්ද ඔහුගේ ධනය වර්ධනය වේ.
- කාකයා ගමන් යන්නාගේ වම්පසෙහි සිට නාද කර විරුද්ධ දෙසට පියාඹා ගියහොත් ඔහුගේ ගමනට බාධා වේ.
- කාකයා කෑගසා ඔහු ඉදිරියෙන් වේගයෙන් පියාඹා ගියහොත් ඔහුට ධන ලාභ වේ.
- යමෙකුගේ ඉදිරියෙහි සිට සූර්යයා දෙස බලමින් එක් පාදයකින් පමණක් සිටියහොත් ඔහුට ඉක්මන් ලේ සෙලවීමේ අනතුරකට මුහුණපෑමට සිදු වේ.
- සුදු මලක් හෝ මාංශ හෝ තුඩින් ගෙන නාද කළහොත් ගමන් ගන්නාගේ අභිමතාර්ථය සිද්ධ වේ.
සකුණ ශාස්ත්‍රයට අනුව උලලේනා භයානකම කුරුල්ලා හැටියට සලකා ඇත.
- ගමක උලලේනකු හැඬුවොත් දින හතක් තුළ අසල්වැසි අයකු මියයන බව ගැමියෝ විශ්වාස කළහ. මරණයේ සලකුණ කල් ඇතිව උලලේනාට දැනේ.
එමෙන්ම පාන්කිරිත්තා ද භයානක සංඥ ගෙන දෙන කුරුල්ලෙකි.
- පාන් කිරිත්තකු සඳුදා දිනයක සවස 6 ට තරුණියකගේ හිස මත වැසීම ඇගේ විවාහයට බාධාවකි.
- පාන්කිරිත්තකු අගහරුවාදා දිනයක සවස 4 ට කුඩා දරුවකු වටා කැරකීම දරුවාට දරුණු රෝගක් ඇතිවීමේ පෙර නිමිත්තකි.
- බදාදා දිනයක සවස 6 ට පාන්කිරිත්තකු රෙදි වැලක් මත සිට හැඬීම භයානක පුවතක් නිවසට ලැබීමේ අනාවැකියකි.
- පාන්කිරිත්තන් ගේ ළග ඇති අරලිය ගසක සිට හැඬීම ගෘහ ජීවිතයේ බලවත් ගැටුම් ඇතිවීමට හේතු වේ.
සකුණ ශාස්ත්‍රයට අනුව කපුටා, කෑරලා, උකුස්සා, නීලකොඛෙයියා, අලු කොඛෙයියා, බකමූණා, දෙමලිච්චා, පරෙවියා, මොනරා හා කනකොකා ද අපට විවිධ සංඥ ගෙනෙන පක්ෂීන් වෙති. කපුටෙකු හඬන හඬින් පලාඵල කීමට හැකි රජවරු පෙර කාලයේ සිටියහ. කාකවර්ණ තිස්ස රජතුමා කපුටෙකුගේ පාටින් යුක්ත විය. කපුටා ද භයානකම සංඥ ගෙනෙන කුරුල්ලෙකි.
- දවල් 12 ට කපුටෙකු හිස මත වැසීම භයානක සලකුණකි.
- අමාවක දිනෙක සවස 6 ට කපුටකු වම් උරයේ වැසීම ද මරණයක සලකුණක් වෙයි.
- සූර්යග්‍රහණ අවස්ථාවකදී කපුටෙකු නිවසේ වහලේ සිට හැඬීම නිවසේ කෙනෙකුට හදිසි අනතුරක් සිදුවීමට හේතුවෙයි.
- කපුටෙකු තමන්ගේ වම් පාදයේ වැසීම පවුලේ කෙනෙකුට දරුණු රෝගයක් හටගැනීමේ පෙරනිමිත්තක් සේ ද සැලකේ.
අපේ නිවෙස් තුළ සුරතලයට ඇතිකරන සතුන් ද ඔවුන්ගේ විවිධ හැසිරීම් රටාවල් තුළින් අපිට අනාවැකි පෙන්නුම් කරති.
- අපි යම් ගමනක් යැමට සූදානම් වන විට ගෙදර ඇති කරන බල්ලෙකු ඇග වටා එතෙමින් කුරු කුරු ශබ්ද නගා නිවසේ එහා මෙහා දුවයිද එමගින් අප යන ගමන නිෂ්ඵල බැව් ඌ අනාවැකියකින් අගවයි.
- අසල්වාසී බල්ලෙකු පැන ගමනට බාධා කෙරේ නම් එකී ගමනද ප්‍රතිඵල රහිත වෙයි.
- ඇඳිවතෙන් අදිනුයේ නම් මාර්ගයෙහි බාධක කියාපෑමකි.
- කටු සහිත ගස්, දර ගොඩක්, ගල් ගොඩක්, තම පාවහන්, කඩා වැටුණ අත්තක් වැනි දෙයකට ඌ මුත්‍රා කරන ලද්දේ නම් එම ගමන ද සාර්ථක නොවේ.
- ගමනක් යැමට සූදානම් වන විටදී ගෙදර ඇති කරන බල්ලා වලිගය වනමින් ආචාර සමාචාර කෙරේ නම් යන ගමනින් යහපත, සතුට, සැනසුම උදාකරන බවට සංඥවකින් දක්වන අනාවැකියකි.
- දහවල් කාලයෙහි සුනඛයන් උඩු බිරීම සොර සතුරු උවදුරු ළගාවීමක පෙර නිමිත්තක් වන අතර සවස් කාලයක උඩුබිරීම තම නිවසෙහි අභාග්‍යය පෙන්වා දීමකි.
- මැදියම් රැයෙහි උඩුබිරීම ද ඒ හා සමානව විපාක දෙන බවට ගැමියන් තුළ මතයක් ඇත.
- සුනඛයා තම නිවසේ භූමිය හාරයිද එමගින් නිවසේ ගෘහමූලිකයාට ධන ලාභ ගෙන දෙන බව පෙන්නුම් කරයි. සියලු අරමුණු සඵල වන බවට ද පෙර නිමිත්තකි.
- සුනඛ රංචුවක් රාත්‍රි කාලයේදී එක විට බුරයි නම් සොර සතුරු කරදරක් ඇති බැව් පෙන්වීමකි. එමගින් නියගින්, ජලයෙන් තැන්පත් ධනය ක්ෂය වීම්ද, ජලයෙන් වන විපත් ද ඉදිරියේදී ඇතිවිය හැකි බවට අනාවැකියකි.
නිවස අවට පරිසරයේ ශ්‍රියාව වැඩි කරගන්නට සුදු පරෙවියන් ඇති කිරීම සමහරුන්ගේ සිරිතකි. එය එසේ වුවත් යම් හෙයකින් උන් ගේ හැර ගියොත් මුළු නිවස අවට පරිසරයම පාලුවට හැරෙනවා පමණක් නොව අඹුසැමියන් අඬදබර වී නිවස අතහැර යැම ද සිදු වේ. තම සුරතලයට ඇති කළ එම පක්ෂීන් ද නිවෙස අතහැර යන්නේ අප පවුලට අපල කාලයක් ළගාවී ඇති බවට අනාවැකියක් පළ කරමිනි.
හිඹුටානේ පියතිලක ද අල්විස් උපුටා ගැනීම දිවයින පුවත් පත ඇසුරෙනි
