අනුන්ගේ මාලිගාවට වඩා තමන්ගේ පැල්පත හොඳ යැයි සිතන කටක ලග්න හිමියෝ
මෙලොව උපදින ඕනෑම කෙනකුට පළමුවෙන්ම හිමි වන්නේ ලග්නයයි. ඔහුට හෝ ඇයට නමක් පවා හිමි වන්නේ ලග්නය ලැබීමෙන් පසුවයි. කෙනකු උපදින මොහොතේ නැඟෙනහිර ක්‍ෂිතිජයෙන් උදාවෙමින් පැවැති ලග්නය ඔහුගේ හෝ ඇයගේ ලග්නය වන බව ජේ‍යාතිෂයේ සඳහන්ය. ජන්මියකුගේ හැඩරුව, ගතිගුණ, චරිතය, දක්‍ෂතා, ලෙඩදුක් ආදී ජීවිතයේ සියලු දේවල් සිදුවන්නේ ලග්නය අනුවය. මෙයින් කටක ලග්න හිමියන් ගැන විග්‍රහ කෙරේ.
ශරීර ලක්‍ෂණ :
කටක ලග්න හිමියන්ට ප්‍රියංකර වූ මුහුණක් හිමිය. සෞම්‍ය සිහින් දික්වූ අවයව ඇති ශරීරයක් හිමි වන්නේය. හිස මහත්ය. බෙල්ල මුඛය හා ඇස් මහත්ව ඇත. හිසකෙස් මඳක් දුඹුරුය. මොවුන්ට ඇත්තේ මධ්‍යම ප්‍රමාණයේ ශරීරයකි. මෙම ලග්න හිමියන්ට සියුම් සමක් ඇති බැවින් ගොරෝසු දේවල් පරිහරණයට අපහසුකම් ඇතිවේ. ලග්න භාවයේ වෙනස්කම් අනුව තරමක් මිටි වන අයද ඇත. වයස්ගත වීමේදී උදරය නෙරා එන තත්ත්වය පවතී.
ගතිගුණ :
කටක ලග්නයට අධිපති ග්‍රහයා වන්නේ සඳු හෙවත් චන්ද්‍රයාය. සඳු සිතිවිලිවලට අධිපති වන නිසා නිතර සිතිවිලි අතර සැරිසරන කටක ලග්න හිමියන් නිතර චිත්ත පීඩාවන්ට ලක්වේ. තමා හිතන දෙය ඒ අයුරින්ම ඉටුකර ගැනීමට නොහැකි වන අවස්ථාවන් එමටය. මේ නිසාවෙන් මොවුන් කියන දෙයට වඩා වෙනස් දෙයක් බොහෝවිට ක්‍රියාවට නංවයි. යහපත් ගති ලක්‍ෂණ මෙන්ම උසස් සිතිවිලි කටක ලග්න හිමියන්ට පවතී. ක්‍රියාවෙහි දක්‍ෂ වූ හොඳ චින්තන ශක්තියක් ඇති කෙනෙකි. ධනවත් වීමේ වාසනා ගුණය ඇති අය වෙති. තම නිවෙසට ඉතා හිතැති වීම නිසා නිවෙසෙහිම නිතර වාසය කිරීමට කැමැතිය. අනුන්ගේ මාලිගාවට වඩා තමන්ගේ පැල්පත හොඳ යැයි සිතයි. මොවුන් තුළ ඉවසීමේ අඩුකමක් දක්නට ලැබුණද තරහ එතරම් කල් හිතේ රඳවා නොගනී. සෝඩා බෝතලය කැඩුවා වගේ යැයි කටක ලග්නය හිමියන්ට කියන්නේ එහෙයිනි. දරුවන්ට ඉතා ආදරේය. ස්ත්‍රී පක්‍ෂයට මොවුන් වැඩි හිතවත් බවක් දක්වයි. තම යටත් සේවකයන්ට හොඳින් සලකයි. පිනට දහමට වඩා ළැදියි. අන් අයට අනුශාසනා දීමට ඉදිරිපත් වේ. මෙවන් අයට බොහෝ විට එක මතයක් නොමැත. නිතර අදහස් වෙනස් කරයි. අනතුරු විපත් ආදියට බියක් දැක්වීම නිසා මොවුන් නිතරම ප්‍රවේශමට වග බලා ගනී. මොවුන් බෙහෙවින්ම චංචල වූ සිතක් ඇත්තන්ය. අන් අය වසඟ කර ගැනීමේ මනා හැකියාවක් පවතී. ආගන්තුක සත්කාරයට ළැදියාවක් දක්වන අතර නිතර අන්‍යයන්ගේ ප්‍රශංසාවට ලක්වේ. තරමක හිතුවක්කාර ගතියක්ද පෙන්වයි. දේපළ මුදල් ආදියට ආශා කරයි. කතාවට දක්‍ෂ මොවුන් කතාවෙන් ජනතාව දිනා ගනී. වෙනස් වන දිවි පෙවෙතකට කැමැති මොවුන්ගේ ජීවිතයේ නැඟීම් මෙන්ම බැසීම්ද බොහෝ ඇතිවේ. අන් අයගේ අදහස් උකහා ගන්නට දස්කම් පෙන්වයි. කටක ලග්නයේ සංකේතය වන කකුළුවා හරහට යන්නාක් මෙන් සමාජයේ පොදු අදහස්වලට විරුද්ධ වන විප්ලවකාරී අදහස් ඇතිවේ. අතීත තොරතුරු මතකයේ තබා ගන්නා මොවුන් ජීවිත කාලයේ අවසානයේදී ධනවත් වේ. තම ධනය ඥාතීන්, දරුවන්, ප්‍රේම සම්බන්ධතා නිසා නැතිකර ගනී. ජීවිතයේ අන්තිම කාලයේ දරුවන්ගෙන් යැපීමට මොවුන්ට සිදුවේ. නිතර ඇවිදින අවිවේකී ජීවිතයක් ගත කරන මොවුන් අවංක වන අතර බොහෝ විට රහස් එළි නොකරයි. කටක ලග්න ගත කාන්තාවන් වැඩට දක්‍ෂ වන අතරම තම ස්වාමියාට ඉතා ළැදිව කටයුතු කරයි.
ආදරය හා ලිංගිකත්වය :
කටක ලග්න හිමි අය තුළ කාමුක බව අඩුය. ප්‍රේම කිරීමේදී අවංකව කටයුතු කරයි. කටක ලග්න හිමියන් නියම ආදරවන්තයන් ලෙස හැඳින්විය හැකිය. ආදරය කර එය අහිමි වුවහොත් ජීවිතයම තනිව ගත කිරීමට පවා මෙම ලග්න හිමියන් පසුබට නොවේ. විවාහයෙන් පසු මොවුන්ගේ ලෝකය වන්නේ තම සහකරු හෝ සහකාරිය හා දරුවන්ය.
විවාහය :
විවාහ දිවි පෙවෙත සතුටින් ගත කරන අතර ගෙදර‍ෙදාර කටයුතු සාර්ථකව කරන අයකු විවාහයේදී අපේක්‍ෂා කරයි. සහකරුට අවනතව ක්‍රියා කරන අතර අයථා ප්‍රේම සබඳතා ගැන මොවුන් සිතන්නේවත් නැත. ඔක්තෝබර් 22 - නොවැම්බර් 22 අතර කාලයේ උපත ලැබූ හෝ පෙබරවාරි 20 මාර්තු 20 අතර කාලයේ උපත ලැබූ අයකු විවාහය සඳහා සුදුසු වේ.
රැකියාව :
මොවුන්ට වඩාත්ම ගැළපෙන්නේ තමන්ගේම රැකියාවකි. කිරි, පලතුරු, දියර වර්ග නිෂ්පාදන රැකියාවලින් ආදායම් උපයයි. ආහාර වෙළෙදාම, ධීවර කර්මාන්තය, ආනයන අපනයන රැකියාවද සුබ ඵල උදා කරයි. රෝහල් සේවාව, පැරැණි භාණ්ඩ විකිණීම, නාවික හමුදා සේවය, දේශක වැනි අංශවල රැකියාද සුදුසුය. අවංක නිසා අන් අයගේ වැරැදි නොඉවසයි. ආගමික හෝ සමාජසේවා ආයතනවල රැකියාද කටක ලග්න හිමියන්ට හිමිවේ. එමෙන්ම විදේශගත රැකියා සඳහාද වරම් ලැබේ.
ධනය හා වස්තුව :
මෙම ලග්න හිමියන් ස්ව උත්සාහයෙන් ධනය රැස්කරන අතර මුදල් ගනුදෙනුවලදී අවකංව කටයුතු කරයි. අනවශ්‍ය දේවල් සඳහා වැයකිරීම් සඳහා මුදල් නොයොදවන අතර හොඳ මුදල් කළමනාකරණයක්ද ජීවිතය තුළින් විදහා දක්වයි.
ගෙදර පරිසරය :
නිවෙසේ අයට හිතවත් වන අතර දරුවන් සහ භාර්යාව සමඟ සතුටින් සිටී. කොපමණ ඇවිද්දත් නිවෙසට පැමිණීම සතුටක් ලෙස සිතයි. රැකියාවද නිවෙස ආසන්නයේ තබා ගැනීමට උත්සාහ කරයි. මිතුරන්ට සලකන නමුත් දිගුකල් පවතින මිතුරන් අඩුය. මිතුරන් කළ උපකාර කිසිවිට අමතක නොකරයි. ළමයින්ට අධ්‍යාපනය, සැප සම්පත් ලබාදෙයි. තම සියලු දෙය ළමයින්ට පරිත්‍යාග කරයි. මොවුන්ගේ ළමයින්ද මවුපියන්ට ඉතා හිතැතිවේ.
සෑදෙන රෝග :
බොහෝ විට පෙණහලු ආශ්‍රිත රෝග, ඇදුම, ආමාශගත රෝග ඇති වීමේ තත්ත්ව ඇත. ස්නායුගත රෝග මෙන්ම පියයුරු පිළිකා ද පහසුවෙන් සෑදේ. පපුවේ පහළ කොටස හා බඩ ආශ්‍රිතව ආහාර දිරවීමේ අපහසුකම්, අම්ලපිත්ත රෝග, සෙංගමාලය, කැස්ස වැනි රෝග වැලඳීමට පෙර ප්‍රවේශම් වීම සුබදායක වනු ඇත.
මරණය :
බෙල්ලේ ආබාධ, සෙම් රෝග, ඇට කැඩීම් බිඳීම්, කැපුම් තුවාල, ආමාශගත රෝග යන හේතුවකින් මෙම ජන්මීන්ගේ මරණය සිදුවිය හැකිය. මෙම ලග්නයෙන් උපන් අය දස දවසකින් කිරි අප්‍රියාවකින්ද අවුරුදු 5කින් උණද 7 වැනි වසරේ අතීසාර රෝගයද 19 ජලයෙන් බියක්ද 29 වියෙහි සර්ප බියක්ද 35 වියෙහි නින්දාවක්ද 40 වැනි වියෙහි උදර රෝගයක්ද (ගෙඩිවැනි) 44, 48 වයසේදී සිවුපා බියක්ද ඇතිවිය හැකිය.
අත් අකුරු :
අත් අකුරු නිතර වෙනස් වනසුලුය. ලියාගෙන යන විට අකුරු ක්‍රමයෙන් විශාල වේ. අස්සනට යටින් ඉරක් අඳියි. අස්සන දිගුය. අත් අකුරු විවිධ වේ.
ජය අංක හා සුබ දවස් :
කටක ලග්න හිමියන්ගේ සුබ දිනයන් වන්නේ සඳුදා, අඟහරුවාදා, බදාදා, බ්‍රහස්පතින්දා යන දිනයන්ය. සිකුරාදා ධනය ලැබීම. බදාදා ගමන් බිමන් සඳහා, බ්‍රහස්පතින්දා මුදල් කටයුතු හා අධ්‍යාපන කටයුතුවලට වඩා සුබ වේ. ඉරිදා හා සෙනසුරාදා එතරම් සුබ නොවේ. ජය අංක වන්නේ 2, 7, 9 යන අංකය. නමුත් 5, 8 යන අංක කටක ලග්න හිමියන්ට අසුබය.
ජය වර්ණ හා සුබ මැණික් :
සුදු, ක්‍රීම්පාට, රතු හා කහ පාට සුබපල උදාකරන අතර නිල් හා කොළපාට අසුබ වර්ණ වේ. දියමන්ති, මුතු, පුෂ්පරාග වැනි මැණික් වර්ගවලින් සුසැදි ආභරණ පැලඳීමෙන් සුබපල උදාකරයි.
දුර්වලතා :
තමා කරන කියන දේවල් පිළිබඳ තමන්ටම විශ්වාසයක් නොමැතිවීම මෙම ලග්න හිමියන්ගේ ප්‍රබල දුර්වලතාවකි. එමෙන්ම අන් අයට වැඩි අනුකම්පාව දැක්වීමෙන් කරදර ළංකර ගනී. සිතේ පවතින චංචලභාවය නිසා ඇති කරගන්නා නොසන්සුන් බවද මොවුන් තුළ ජනිත වන තවත් දුර්වලතාවකි.
විශේෂ උපදෙස් :
කටක ලග්න හිමියන් ඉවසිලිවන්ත විය යුතු අතර, ශනි ලග්නයේ පිහිටි අය වඩාත් ඉවසිලිවන්ත වීම වටී. ආත්මාර්ථකාමීභාවයද අඩුකර ගත යුතුය. එමෙන්ම කටක ලග්න හිමියන් බිය නැති කරගත යුතුවාක් මෙන්ම හීනමානයද නැති කරගත යුතුය. නිතර රතු හෝ රතු මිශ්‍ර ඇඳුම් පැලඳුම් භාවිතය නිසා මෙම සකස්විය යුතු දේවල් නිරායාසයෙන්ම සඵල වනු ඇත.
කටක ලග්න හිමියෙකුගේ කේන්දරේ :
කටක ලග්න හිමියන් පිළිබඳ අප මෙතෙක් ඉදිරිපත් කළ තොරතුරු කොතෙක් දුරට නිවැරැදිද යන්න කටක ලග්න හිමියකුගේ කේන්ද්‍රයෙන් පරීක්‍ෂා කර බැලීමෙන් වටහා ගත හැකිය. මේ සමඟ පළවන්නේ 1977 දෙසැම්බර් මස 30 වැනි සිකුරාදා, කටක ලග්නයෙන් උපන් ජන්මියකුගේ කේන්ද්‍ර සටහනකි. දැනට 36 වැනි වියේ පසු වන මොහු ප්‍රසන්න පෙනුමක් ඇති තරුණයෙකි. කටක ලග්න හිමියන්ට හිමි ශරීර ලක්‍ෂණ මොහුගෙන් විද්‍යමාන වන්නේ ලොකු හිස, මහත බෙල්ල සහ සිහින් වූ දික් වූ අතපය හිමිවීමෙන්ය. මෙම කේන්ද්‍ර හිමියාගේ ගතිගුණ යහපත්ය. පිනට දහමට ළැදිය. එහෙත් සිතෙහි තරමක චංචල ගතියක්ද පවතී. ඉතා ඉක්මනින් කේන්ති යන ගතියක් ඇත්තෙකි. නමුත් ඉතාම ඉක්මනින් තරහ නිවී යයි. මොහුට ඇත්තේ සෝඩා බෝතලය කැඩුවා වැනි ඉක්මන් කෝපයක් යැයි ඔහුගේ පවුලේ අය පවසති. වයස අවුරුදු 22දී මොහු ප්‍රේම සම්බන්ධයක පැටලුණි. එම ප්‍රේම සම්බන්ධයට දෙපසෙහිම විරුද්ධකම් මධ්‍යයේ වුවද පෙම් සටන ජය ගැනීමට මොහු දැක්වූයේ දැඩි උත්සාහයකි. එම සටනින් මෙලොව ජය ගැනීමට නොහැකි වුවහොත් එලොවදී හෝ ජයග්‍රහණය ලබා ගැනීම මොහුගේ අධිෂ්ඨානය විය. කෙසේ හෝ අවසාන මොහොතෙහි දෙපක්‍ෂයේම වැඩිහිටියන්ගේ කැමැත්ත ලබාගෙන තම පෙම්වතිය සමඟ විවාහවීමට මොහු සමත් විය. වයස අවුරුදු 35දී විවාහ වූ මොහුට වයස අවුරුදු 10 දියණියක්ද සිටී. මොහු තම බිරියට හා දරුවාට ඉතා ආදරයක් දක්වයි. හෝටල් පාසලෙහි පාඨමාලාවක් හැදෑරූ කේන්ද්‍ර හිමියා එමඟින් විදේශ හෝටලයක සූපශාස්ත්‍රවේදියකු ලෙස රැකියාවක් ලබා ගැනීමට සමත් විය. දැනට ඉතාලියේ හෝටලයක සේවය කරන මොහු නිවාඩුවක් ලැබුණු හැම විටම තම මවු රටට පැමිණෙන්නේ මිටෙන් හළ කුරුල්ලකු මෙන්ය. ඒ තම බිරිය හා දරුවා දැක බලා ගැනීමේ ආශාවෙනි. මොහුට තම බිරිය හා දරුවා තමාගේ එකම ආදර ලෝකය වේ. විදේශ රටක හෝටලයක රැකියාව කරන මොහුට එම සුඛෝපභෝගී හෝටලයේ ගත කරන ජීවිතයට වඩා තම මවු රටේ පිහිටි තම නිවෙසේ ගත කරන ජීවිතය සැපවත්ය. අනුන්ගේ මාලිගාවට වඩා තමන්ගේ පැල්පත හොඳ යැයි ඔහු නිතර සිතන්නේ කටක ලග්න හිමියන්ගේ සිතුම් පැතුම් පරිදිමය. කටක ලග්න හිමියෝ අනුන්ට දක්වන ඕනෑවට වැඩි අනුකම්පාව නිසා නිතර කරදරේ වැටෙන්නෝය.
උපුටා ගැනීම මව්බිම
