තත් සැණෙන් ධනවතුන්ගේ බලවතුන්ගේ හොට බිම ඇන්නවන සෙනසුරු
සෙනසුරුගේ හැටි නොදන්නා සමහරකු සෙනසුරුට ‘ඇයි ඔච්චර බය’ කියා අසති. සෙනසුරුගේ නියම ප්‍රතිරූපය දැක ගන්නටත්, දැනගන්නටත් සෙනසුරු මහා දශාවක් හෝ සෙනසුරු ඒරාෂ්ටක අපල කාලයක් මනුස්සයාට උදාවිය යුතුය. එම කාලය තුළදී සෙනසුරුගේ ක්‍රියාකාරකම් කෙතරම් ප්‍රබල දැයි ජන්මියාට අත්විඳීමට ලැබෙනු ඇත. සෙනසුරු පාප ග්‍රහයෙකි. නැත හොත් පීඩා කාරකයෙකි. එසේත් නැතහොත් අලුගෝසුවකැයි සෙනසුරුගේ පීඩාවට ලක් වූවෝ පවසති. මගේ නිගමනයටත්, අත්දැකීමටත් අනුව සෙනසුරු ග්‍රහයා හැඳින්විය යුත්තේ ‘බෞතීස්ම කරන්නා’ නැතහොත් ‘පව්’ සෝදන්නා යන නාමයෙනි. අප විසින් පෙර ආත්මවලදී කරන ලද අකුසල කර්ම සඳහා දඬුවම් ලබා දී, අපගේ පව් සෝදා හැර, සිත, කය, වචනය යන තුන් දොර පිරිසුදු කරලීමේ සත්කාර්යය ඉටු කරනුයේ සෙනසුරුය. සෙනසුරු ග්‍රහයාට වුවත් හිතුවක්කාරී ලෙසින් අපට දඬුවම් පැමිණවිය නොහැකිය. ඔහුද විශ්වයේ නීතියට අනුව කටයුතු කිරීමට බැඳී සිටින ග්‍රහයකු බැවින් සාධාරණය ඉෂ්ට කළ යුතුය. ශනි හෙවත් සෙනසුරු නරකට හිටියහොත් සියල්ල උඩු යටිකුරු කරවන ග්‍රහයෙකි. ජන්මියාට සියලු අයහපත උදා කරවීමට මොහොතක්වත් ප්‍රමාද නොවන සෙනසුරු තරාතිරම නොබලා දඬුවම් පමුණුවන ග්‍රහයෙකි. ධනවතුන් හා බලවතුන් සැණෙකින් බිම ඇද දමා හොට බිම ඇන්නවීමට සෙනසුරු බොහොම දක්ෂය. වසර තිහක් පුරා පැවැති යුද ගිනි දැල් නිවා, අප දේශය විනාශ කළ කුරිරු ප්‍රභාකරන්ගේ අවසානය සනිටුහන් කරන ලද්දේද සෙනසුරු විසිනි. ජනතාවගේ මුදල් වංචා කළ සක්විතිලා මෙන්ම බැංකුකරුවන්ද මහ උළුගෙදර යකඩ කූරු අතර සිරගත කරන ලද්දේද අන් කවරකුත් නොව, සෙනසුරුමය. ‘සෙනසුරු’ යනු අසාධාරණ ග්‍රහයකු යැයි ඔබට සිතෙනු ඇත. නැත! සෙනසුරු තරම් සාධාරණ, යුක්ති සහගත ග්‍රහයකු ග්‍රහ මණ්ඩලයේ තවත් නොමැත. පෙර භවයන්වලදී ජන්මියා විසින් කරන ලද පාපකර්මවලට සෙනසුරු ග්‍රහයා දඬුවම් ලබා දෙයි. ඒ ඔහුගේ රාජකාරියයි. සෙනසුරු විසින් එසේ කරනුයේ මෙම භවයේ පටන් හෝ ජන්මියා පිරිසුදු, යහපත් පුද්ගලයකු කිරීමේ අධිෂ්ඨානයෙන් මිස, පෞද්ගලික පළිගැනීමක් සඳහා නොවන බව කොයි කවුරුත් දැන සිටීම වැදගත් වේ.
සෙනසුරු ග්‍රහයාට එක් රාශියක් පසු කිරීමට වසර දෙකහමාරක් පමණ ගතවේ. ඒ අනුව බලනවිට සෙනසුරුට රාශි වළල්ල වටා යෑමට අවුරුදු 29 1/2ක 30ක පමණ කාලයක් ගත වන බව ගණන් බලා ඇත. මහලු වයසට කාරක වන සෙනසුරු ග්‍රහයාගෙන් ප්‍රධාන වශයෙන් යෙදෙන ඒරාෂ්ටක සතරක් ඇත. ලග්න ඒරාෂ්ටකය, ලග්න අෂ්ටම ඒරාෂ්ටකය, ජන්ම ඒරාෂ්ටකය හා ජන්ම අෂ්ටම ඒරාෂ්ටකය එම හතරයි. ඒරාෂ්ටක ඇති වනුයේ සෙනසුරුගේ ගෝචර ගමන අනුවය. ලග්න ඒරාෂ්ටකය සෙනසුරු හෙවත් ශනි ග්‍රහයා කිසියම් ජන්මියකුගේ කේන්දරයේ ලග්නය (1 වැනි කොටුව) මතින් ගමන් කරන කාලය ලග්න ඒරාෂ්ටක කාලය ලෙසින් හැඳින්වේ. මෙම ලග්න ඒරාෂ්ටකය පවතින කාලය වසර 7 1/2 කි. සෙනසුරු ග්‍රහයා ලග්නයට පිටුපසින් තිබෙන කොටුව වන 12 වැන්නට ගෝචරයෙන් පැමිණීමෙන් ලග්න ඒරාෂ්ටකයේ පළමු වසර 2 1/2 ආරම්භ වෙයි. දෙවැනි වසර 2 1/2 ලග්නය මත ගමන් කරන විටදීත්, තෙවැනි වසර 2 1/2 කොටස ලග්න නාමයෙන් දෙවැන්නේ සෙනසුරු ගමන් කරද්දීත් යෙදෙනු ඇත. යම් හෙයකින් චන්ද්‍රයාද 12, 1, 2 යන භවයක උපතින් තැන්පත්ව සිටියහොත් ලග්න හා ජන්ම ඒරාෂ්ටක අපල දෙකකට එකවර මුහුණ දීමට ජන්මියාට සිදුවනු ඇත. ලග්න අෂ්ටම ඒරාෂ්ටකය සෙනසුරු ග්‍රහයා ලග්නභාවයේ සිට අටවැනි භාවය මතින් ගමන් කරන කාලය ලග්න අෂ්ටම ඒරාෂ්ටක කාලය ලෙසින් ජේ‍යාතිෂයේ හඳුන්වයි. යම් හෙයකින් උපතේදී චන්ද්‍රයාද, අටවැනි කොටුවේ පිහිටා සිටියහොත්, ලග්න අෂ්ටම ඒරාෂ්ටකය සමඟ ජන්ම ඒරාෂ්ටක අපලය යන ඒරාෂ්ටක අපල දෙකකට එකවර මුහුණ දීමට ජන්මියාට සිදුවනු ඇත. ලග්න අෂ්ටම ඒරාෂ්ටක අපලය පවතින කාලය වසර දෙකහමාරකි. ජන්ම ඒරාෂ්ටකය උත්පත්ති කේන්දරයේ කිසියම් භාවයක (කොටුවක) චන්ද්‍රයා තැන්පත්ව සිටියදී, එම භාවය මතින් සෙනසුරු ග්‍රහයා ගෝචර ගමනේ යෙදෙන අවස්ථාව ‘ජන්ම ඒරාෂ්ටකය’ නමින් හැඳින්වෙයි. එම ඒරාෂ්ටක අපලය වසර දෙකහමාරක කාලයක් බලපවත්වනු ඇත. ජන්ම අෂ්ටම ඒරාෂ්ටකය චන්ද්‍රයා උත්පත්ති කේන්දරයෙහි කිසියම් භාවයක (කොටුවක) පිහිටා සිටියදී, එම භාවයේ සිට අටවැනි භාවය යෙදෙන කොටුව මතින් සෙනසුරු ග්‍රහයා ගමන් කරන අවස්ථාව ‘ජන්ම අෂ්ටම ඒරාෂ්ටක’ අපල කාලයයි. මෙම ඒරාෂ්ටක අපලවලට අමතරව සෙනසුරු ග්‍රහයා උපතේදී සම, නීච හා සතුරු ලෙසින් දුර්වලව පිහිටීමෙන්ද රවි, කුජ, රාහු වැනි පාපයකු සමඟ යෝගව සිටීමෙන්ද අපල ගෙන දෙනු ඇත. එමෙන්ම සෙනසුරුගේ මහ දසාවක් හෝ අතුරු දසාවක් ලබා තිබීමද ජන්මියාට අපල ගෙන දෙන්නකි. සඳුගේ (චන්ද්‍රයාගේ) මහ දශාව පවතින කාල සීමාවේදී සෙනසුරු ගෝචරයෙන් අටේ ගමන් කිරීමද, රවිගේ මහ දශාවේදී සෙනසුරු දසවැන්නේ ගමන් කිරීමද, කුජගේ මහ දශාවේදී සෙනසුරු හතේ ගමන් කිරීමද බලවත් අපල ගෙන දීමට හේතු කාරක වනු ඇත.
එසේම සෙනසුරුගේ මහ දශාවේ සිකුරු අතුරු දශාවත්, සිකුරු මහ දශාවේ සෙනසුරු අතුරු දශාවත් අවදානම් කාල සීමාවන් ලෙස ජේ‍යාතිෂයේ පෙන්වා දී තිබේ. සෙනසුරු ග්‍රහයා වැඩ කරන ජනතාවත්, කම්කරුවාත්, සමස්තයක් ලෙස පොදු මහජනතාවත් නියෝජනය කරන එකම ග්‍රහයා වේ. වැඩ කරන ජනතාව සෙනසුරුගේ මිතුරන්ය. දුගී, දුප්පත්, මහලු මනුෂ්‍යයන්, ගොවීන්, සෙනසුරුගේ සොයුරෝ වෙති. දුක්විඳින ජනතාව දුකින් ගලවා ගන්න ඉදිරිපත් වන්නන්ට මෙන්ම දුගියාගේ දුකට පිහිට වන්නන්ට සෙනසුරුගේ ආශීර්වාදය හිමිවේ. සෙනසුරු ඒරාෂ්ටක අපලයට බඳුන් වූ විටදී මහා බ්‍රහ්මයා පවා පොළෝ තලයට වැටෙතැයි කියමනක් ඇත. වරෙක මහා ධනවතුන් හිඟන්නන් බවට පත්කර ඇති සෙනසුරු ග්‍රහයා, රජවරුන්, සිටුවරුන් පවා සිය තනතුරුවලින් පහකර දැමූ අවස්ථා ඉතිහාසයේ එමට ඇත. අප මෙම භවයේ ගෙවමින් සිටිනුයේ අප විසින්ම පූර්ව ආත්ම භවයන්හි කරන ලද අකුසල කර්මයන්හි ප්‍රතිඵලයයි. අප අතින් සිදුවූ පෙර සසරේ වැරැදිවල පව් සෝදා හැරීම සඳහා ‘විශ්ව බලය’ විසින් පත්කර ඇත්තේ සෙනසුරු ග්‍රහයාය. තනි තනිව හෝ සාමූහික වශයෙන් හෝ කරන ලද නරක ක්‍රියාවක් හෝ ක්‍රියාවන් රාශියක් ඒරාෂ්ටක අපලයට මුල්විය හැකිය. සෑම ඒරාෂ්ටක අපලයක් තුළම මනාව සුසැදි, පැහැදිලි අන්තර්ගතයක් ඇත. අප අප විසින්ම අපගේ සිතේ එකඟත්වය ඇතිව කරන ලද වැරැදි ක්‍රියාවන්හි නිවැරැදි ප්‍රතිඵලය ලෙස සෙනසුරුගෙන් යෙදෙන ඒරාෂ්ටක අපල හඳුන්වා දිය හැකිය. අප ජීවත්වන මෙම භවයේ පටන් හෝ අපගේ සිත, කය, වචනය යන තුන් දොර පිරිසුදුව තබා ගැනීම තුළින්, මතු උපදින සෑම භවයක් පාසාම දුක් වේදනා පිරි ඒරාෂ්ටක අපල ඇති නොවනු ඇත. අවංකවම ධාර්මික ජීවිත ගත කරන ගිහි, පැවිදි මනුෂ්‍යයනට ඒරාෂ්ටක අපල තදින් ගෙන නොදෙන බව මා දැක තිබේ. එවැනි සමහර පින්වතුන් ඒරාෂ්ටක අපල කාලයක් තිබුණාද කියාවත් නොදනී. හැකි සෑම අවස්ථාවකම බැතිමත්ව, ධර්මිෂ්ඨ ජීවිතයක් ගත කරමින් සුරා සූදුවෙන් තොරව, සල්ලාලකමට හා මාංස භක්ෂණයට ලොල් නොවී, සුසිල්වත් දිවිපෙවතක් ගත කරන සිල්වත් මනුෂ්‍යයන් ඉදිරියේ සෙනසුරු ඒරාෂ්ටක අපල ‘හිරු දුටු පිනි බිඳුවක් සේ’ වියැකී යනු ඇත.
ජේ‍යාතිර්වේදී කොටදෙණියාවේ, ඩී. ඩග්ලස් නිමලවංශ ගුණවර්ධන 0776283097උපුටා ගැනීම මව්බිම පුවත්පත
