ඇදුම රෝගය අඩු වැඩි වෙන්නේත් චන්ද්‍රයාගේ ගමන අනුව
අප ජීවත්වන පෘථිවිය හිරු වටා ගමන් ගන්නා ග්‍රහලෝක අතරින් එකකි. පෘථිවියට තමන්ගේ අක්‍ෂය වටා කරකැවීමට පැය 23 මිනිත්තු 56 තත්පර 4ක් ගතවේ. මෙම කාලය පෘථිවිය මත සිටින්නකුට එය දිනයක් ලෙස දැනේ. කිසියම් දිනෙක සූර්යයා උදාවූ තැන් පටන්, සූර්යයා උදාවූ මොහොතේ පටන් පසුදා සූර්යයා උදාවන මොහොත දක්වා කාලය නක්‍ෂත්‍ර දිනයක් ලෙස පිළිගැනේ. සූර්යයා වටා ග්‍රහලෝක ගමන් ගන්නේ එකිනෙක අතර ආකර්ෂණ ශක්තියෙන් බැඳීමෙනි. අනෙකුත් ග්‍රහයන් පෘථිවියට ළංවී එන විටත්, පෘථිවියෙන් දුරස්වී යන විටත් පෘථිවිය මත එම ග්‍රහයන්ගේ බලපෑම වෙනස් වේ. චන්ද්‍රයා පෘථිවිය වටා ගමන් ගනී. චන්ද්‍රයාගේ ගමන අනුව වඩදිය-බාදිය ඇතිවන ආකාරය ඉතාමත් පැහැදිලි ලෙස අපට දැකගත හැකිය. එමෙන්ම සඳ ඇති කාලයේදී කපා හෙළන ගස්වල ඵලය වැඩි බවද ඉක්මනින් ගුල්ලන් ගසන බවද අපගේ අත්දැකීම්ය. ඇතැම් මානසික රෝග, හඳ ඇති කාලයේදී වැඩිවන බවද අප දැක ඇත්තෙමු. ඇදුම රෝගයේ අඩු-වැඩි වීමක්ද චන්ද්‍රයාගේ ගමන අනුව පෙනෙන්නට තිබේ. සඳු පෘථිවිය වටා දින 30කදී එක්වරක් ගමන් ගන්නා බැවින් වේගයෙන් ගමන් ගන්නා ග්‍රහයෙක් ලෙස පෘථිවිය මත සිට බලන්නකුට පෙනේ. එමෙන්ම සඳුගේ බලපෑම්වලින් කීපයක්ම අපට පැහැදිලිව පෙනෙන ඒවාය. අනෙකුත් ග්‍රහයන්ගේ ගමනද මේ ආකාරයටම පෘථිවිය මත කිසියම් ස්ථානයක පරිසරය මොහොතින් මොහොත වෙනස් කිරීමට සමත් වේ. එම බලපෑම මිනිසාගේ සිතුවිලි සහ අනෙකුත් සියලුම ක්‍රියා පාලනය කිරීමට හේතුවන අතරම ඍෂිවරුන්ගේ අධිමානසික බලයෙන් දැක ජේ‍යාතිෂයට එකතු කර තිබේ. සෑහෙන කොටසක් මෙම වටිනා ශාස්ත්‍රය පිළිගෙන තිබේ. ඔවුහු තමන්ගේ ජන්ම පත්‍රය නිතර පරීක්‍ෂා කර අනාගතයේදී සිදුවිය හැකි උවදුරු හඳුනාගෙන ඒවාට නිසි පිළිවෙත් කරමින් අයහපත් කාල මඟහරිමින්, තමන්ගේ වැඩකටයුතු සඳහා විශ්වයේ පවතින ග්‍රහ බලය වඩාත් සුදුසු ආකාරයට යොදාගෙන ජීවිත ගමන සාර්ථික කර ගනිති. තවත් පිරිසක් ජේ‍යාතිෂය ගැන කිසිම හැඟීමක් නැතිව වැඩ කරති. ඔවුන් මෙම ශාස්ත්‍රය විශ්වාස කරන්නේ නැත. ජේ‍යාතිෂය බොරුවක් යැයි සිතා එය බැහැර කිරීමේ අදහසින් මේ ගැන කරුණු සෙවූ ඇතැමුන් අවසානයේදී ජේ‍යාතිෂය ඉගෙන ගෙන එයින් ප්‍රයෝජන ලබාගත්හ. මෙය මිථ්‍යාවක් යැයි සිතා සම්පූර්ණයෙන්ම බැහැර කිරීම අනුවණකමකි. තමන්ගේ ජීවිතයේ සියලුම කටයුතු ජේ‍යාතිෂයේ සඳහන් ආකාරයට පමණක්ම සිදුවෙතැයි සිතා ඔහේ බලා සිටින්නාද අදූරදර්ශීය. සිත දියුණු කර දැඩි උත්සාහයෙන් කටයුතු කර තමන්ට අවශ්‍ය ඉලක්ක සපුරා ගැනීම සඳහා ජේ‍යාතිෂයෙන්ද පිටිවහලක් ලබා ගැනීම වඩාත් බුද්ධිමත් යැයි හැඟේ. (ලබන සතියේ ග්‍රහයන් පිළිබඳ දැනගත යුතු මූලික කරුණු.)
අගලවත්තේ චන්දන වීරක්කොඩි 077-5489695
උපුටා ගැනීම මව්බිම පුවත්පත
