ජීවිතයට මඟ පෙන්වන තරු එළිය
පරක් තෙරක් නොපෙනෙන මහා සාගරයේ දිග, පළල, ගැඹුර කොතෙක්දැයි කිව නොහැකි සේම ජේ‍යාතිෂ විද්‍යාවෙහිද වටිනාකම සහ ගැඹුරද කිව නොහැකි තරම්ය. නමුත් මේ ජේ‍යාතිෂ විද්‍යාව නිවැරැදිව උගෙන තව තවත් ජේ‍යාතිෂමය පර්යේෂණ කරමින් සැබෑ ලෙසම සමාජ මෙහෙවරක යෙදෙන ප්‍රවීණ ජේ‍යාතිෂවේදීන්ගේ ප්‍රමාණය අතළොස්සක් බව නම් කිව යුතුය. මන්ද දැන් දැන් ජේ‍යාතිෂයද ධනය උපයන ව්‍යාපාරයක් වී හමාර බැවිනි. එහෙත් අලුත් ජේ‍යාතිෂ දැනුම සොයමින්, පර්යේෂණ කරමින්, නවග්‍රහ ශක්තීන් තුළින් ලෞකික ජීවිතය සැපවත් කරන්නට ජේ‍යාතිෂමය විසඳුම් ලබාදෙන උතුම් ජේ‍යාතිෂවේදීන්ද ඇති බැවින් ඔවුන්ගේ පොතපත, ලිපි ආදිය තුළින් පාඨක ඔබේ ජීවිතය සාර්ථක කරගත හැකි මාර්ගයන් කිහිපයක් ගැන මෙසේ දැනුම්වත් කරමි. නිවැරැදි ජේ‍යාතිෂ දැනුමෙන් පිරිපුන් ප්‍රවීණ ජේ‍යාතිෂඥයකු ලවා ඔබේ කේන්ද්‍රය වසරකට වරක්වත් බලවා, කියවා ඉදිරි කාල සීමාව ගැන දැනගැනීම ඉතා උචිත බව ඔබ දන්නවාද? ඉන් ඔබට ප්‍රශ්නයක් පැමිණි පසු ඒ ගැන වදවීමට ගතවන කාලය හා වියදම් වන ධනය තරමක්වත් ඉතිරි කරගත හැකි වනු ඇත. එමඟින් එම ගැටලුවෙන් ඔබව විඳවන්නට තිබෙන ඉඩ ප්‍රමාණයද අඩුවේ. ඒ පෙර සූදානම හා දැනුම්වත් වීම වඩා වැදගත් වීමයි. එසේම මවුපියන්ගේ ඒකායන අරමුණ තම දරුවන්ට උපරිම අධ්‍යාපනයක් ලබාදී උසස් වෘත්තියකට යොමු කරවීමයි. එහි වැරැද්දක් නැතත් ලොව සැමට වෛද්‍යවරුන්, නීතිඥයන්, ඉන්ජිනේරුවන්, විද්‍යාඥයන් විය නොහැකිය. පුද්ගලයකු මෙලොවට බිහිවන විටම ඔහුට හිමි යම් රැකියාවකට, ක්‍ෂේත්‍රයකට උරුමකම් කියයි. එය දරුවාගේ මුල් අධ්‍යාපන අවධිය තුළදීම දැනගැනීම ඉතා වැදගත්. එවිට ඔබට ඔබේ දරුවාගේ සහජ හැකියා, උරුම හැකියා ක්‍ෂේත්‍රය දැනගෙන ඒ පැත්තටම යොමු කළ හැකිය. ඉන් දරුවාගේ යටපත්ව තිබූ දක්‍ෂතා ඔප්නැංවෙන්නේ සසර පුරුද්දට මෙනි. එසේම එමඟින් දරුවාගේ ඉදිරි අනාගතය සාර්ථක හා ස්ථාවර වීමද සිදුවේ. යුවළකගේ විවාහය වෙනුවෙන් බොහෝ විට කේන්ද්‍ර බැලීම තුළ විමසන්නේ පොරොන්දම් ගැළපීම් ප්‍රතිශතය ගැන පමණි. එහි ප්‍රමාණය මත පමණක් කිසිලෙසකින්වත් විවාහයක් සඳහා දෙදෙනාගේ ගැළපීම තීරණය කළ නොහැකිය. පොරොන්දම්වලින් වුවත් ලග්න, චන්ද්‍ර රාශ්‍යාධිපති, ගණ, නැකැත් යන පොරොන්දම් ඇතුළත්ව අට පොරොන්දමෙන් වැඩි ප්‍රතිශතයක්ම ගැළපිය යුතුය. ඊට අමතරව දෙදෙනාගේ කේන්ද්‍රවල ඇති අනෙකුත් ග්‍රහ රටාවන්ද ගැළපිය යුතුය. නොවුණහොත් එම විවාහ දිවිය දින කිහිපයකට සීමා වීම අරුමයක් නොව උරුමයක් වනු ඇත. ලොව උතුම්ම සුවය නිරෝගීතාවයි. නමුත් මෙලොවට උපදින ඒ ඒ ජන්මියා සතුව පවතින හා උරුමය පරිදි යම් යම් රෝගාබාධවලට ඔවුන් නිතැනින් යොමුවේ. නමුත් ප්‍රවීණ ජේ‍යාතිෂවේදියකුට ඔබගේ කේන්දරය බැලීමෙන්, කියැවීමෙන් ඔබට අනාගතයේදී ඇතිවන්නා වූ රෝගාබාධයන් කාල සීමාවන් හා ඒ රෝග සෑදෙන ඉන්ද්‍රියන් පවා කලින්ම ප්‍රකාශ කළ හැකි බව ඔබ දන්නවාද? ඉහත කරුණු කාරණා තුළින් ඔබට වැටහෙන ප්‍රධානම කරුණ වන්නේ ජේ‍යාතිෂය අපේ ගෘහ ජීවිතයේ සාර්ථකත්වය සාක්‍ෂාත් කර ගැනීමට යෙදාගත හැකිය යන්නයි. එයද තවත් කාරණා ඇතුළත්ව විවිධ ක්‍ෂේත්‍රයන් වෙනුවෙනි. නමුත් ඒ සියලු කාරණා ගැන පෙර දැනුම ලබා කුමන පිළියම්, වත්පිළිවෙත් කළද ඉන් සැබෑ ප්‍රතිඵල ගැනුමට නම් ඔබ ධාර්මික දිවියක උරුමකරුවකු විය යුතුමය. පන්සිල් නිති සුරකින, මෙත් සිතින් යුත් පිරිසුදු චිත්ත තරංගයන් ඇති කෙනකු වීම අනිවාර්යය. ඉන් බොහෝ කර්ම බලවේගයන්ගේ අගුණයන් සමනය කළ හැකිය. එය ඔබේ ගෘහ ජීවිතයේ සාර්ථකත්වයට මනා වූ ආලෝකයක් දෙන තුරු ආලෝකයක්ම වන්නේය.
දැහැමි, එල්. ජනාදනී - රඹුක්කන
උපුටා ගැනීම මව්බිම පුවත්පත
