මැණික්‌ ගලේ දෝෂ විපත් ගෙනෙයි බෝම
මෙලොව උපදින ජන්මීන්ට ජීවිතයේ නොයෙක්‌ ගැටලුවලට මුහුණ පෑමට සිදුවේ. ඒවාට විවිධ ආකාරයේ පිළියම් කිරීම ජ්‍යොතිෂයේදී ඉගැන්වේ. ඒ අතර මැණික්‌ ප්‍රතිකාරයද ඉතාම වැදගත්ය. මෙය ඉතා වැදගත් වුවද නිවැරදිව වටහාගෙන ප්‍රතිකාර කළ යුතුය. මෙම ක්‍රමය මගින් අධ්‍යාපනය දුර්වල අයටත් පිළිකා, ඇදුම රෝගය, දියවැඩියාව වැනි රෝගීන්ටත් දරුපල අහිමි අයටත්, විවාහ ජීවිතයේ ගැටලු ඇති අයටත්, රැකියා බාධක නැති කිරීමටත් ප්‍රයෝජනවත් වේ. යමකුට ව්‍යාපාරයක්‌ කරගෙන යැමේදී ඒවා මැඩගෙන ඉදිරියට යැමට මෙමගින් හැකියාව පවතී. යමකු අධික ලෙස මත්පැන්වලට ලොල්වීම නතර කිරීමට, අකීකරු දරුවන්ට, මාරක දශාපල ඇත්තන්ට නොයෙක්‌ දුෂ්කරතා ඇති අයට මැණික්‌ පැළඳීම මගින් නිසි පල ලද හැකිය. නමුත් මැණික්‌ ගල් පැළඳීමේදී එහි වර්තන අංකය වඩා වැදගත්ය. බොහෝ විට අංශක 45 ට පතුල කපා ඇති මුත් ඊට වඩා වැඩි අගයක්‌ සහිතව ගල් පැළඳීම සුදුසුය. ගල් තෝරා ගැනීමේදී දෝෂ රහිතව යොදා ගැනීමට වගබලා ගත යුතුය. ලාසන පටලය, ත්‍රාසය, හිනත්ය ජීර්ජය, ප්‍රකෘති පටලය, නීල මණ්‌ඩලිය වශයෙන් හේතු වේ. ත්‍රාසය, භින්නය, දෝෂය යනු ගල මැදින් පැළී ඉරක්‌ හටගෙන තිබීමය. මෙම ගල් පැළඳීම පවුලේ සමගිය බිඳවැටීමට අඩදබරවලට දුක්‌ වේදනාවලට මුල් වනු ඇත. මැණික්‌ ගල් මුදුනේ තුඩුවක්‌ නොතිබීම හින්ත පටලය හීන්ත දෝෂය වේ. මෙම ගලක්‌ පැළඳීම නිසා අසල්වාසීන් හා නෑදෑයන් අතර ගැටුම්වලට, නොයෙක්‌ විපත්වලට හේතු වනු ඇත. කෙසෙල් බඩයක්‌ දෙකට කැපූ විට පවතින ආකාරයට මැණික්‌ ගලක්‌ නූල් ඇති ලෙස දැකීම ජීර්ජ දෝෂයි. මෙය ජීවිත හානියටත් එහා සමාන විපත් යෙදීමටත් හේතු වේ. මැණික්‌ ගලේ එක පැත්තක සුදු පැහැගැන්වී තිබීම ප්‍රකෘති පටලය නම් වේ. මේ ගල් වර්ගය පැළඳීම නිසා රැකියාවේ සතුරන් ඇතිවීමට, නොයෙකුත් කරදරවලට හේතු වේ. නීල මණ්‌ඩලි දෝෂය නිල් හා රතුපාට එකිනෙක ගැනී විරූපී වීමය. මෙවැනි මැණික්‌ ගල් පැළඳවීම ස්‌නායු දුර්වලතා, අංශභාගය වැනි රෝගවලට හේතුවනු ඇත. මැණික්‌ ගල්වල පවතින දෝෂ අතර අප වැඩිපුරම කතා කරන නිල් මැණික්‌වල මැද රතුපාට ලේ බඳක්‌ වැටී ඇති අයුරින් වැලි කැට විසිරී ගිය ආකාරයට තිබීම සුදු හුනු පිරියම් කළ ලෙස තිබීම දැක්‌විය හැකිය. මෙම දෝෂ සහිත ගලක්‌ පැළඳීම නිසා වසරක්‌ තුළ මරණයට පත්වීමට ඉඩකඩ බොහෝය. ක්‍රම ක්‍රමයෙන් ආර්ථික පිරිහීමට ශරීරයේ සුවපත් කළ නොහැකි රෝග මතුවීමට ඉඩ ඇත. එසේම ආපෝ, තේජෝ, වායෝ ආදී ලෙස පංච මහා භූතයන්ට අනුවද මැණික්‌ වර්ග කෙරේ. ආපෝ ගුණය දියමන්ති හා මුතු ආදියෙන්ද, තේජෝ ගුණය රතු මැණික්‌ හා රතු කොරල් තුළ ද වායෝ ගුණය, නිල් මැණික්‌ තුළ ද, පඨවි ගුණය එමරල් තුළ ද, අකාශ ගුණය පුෂ්පරාග තුළ ද පවතී, මෙම ගුණයන් ජන්මියාට විවිධ ආකාරයට බලපායි. එම නිසා අපරික්‌ෂාකාරී ලෙස මැණික්‌ යෙදීම කළහොත් අනිටු පල විඳීමට සිදුවනු ඇත. මැණික්‌ පැළඳීමේදී තමාට අසුබ පල උදාකරන ග්‍රහයාගේ මැණිකක්‌ පැළඳීම අසුබ පල තවත් වැඩි වීමට හේතු වේ. නිවැරැදිව කළ යුත්තේ යමකුට අසුබ පල ගෙන එන ග්‍රහයාට වඩා ප්‍රබල සුභ ග්‍රහයකුගේ කිරණ ලබා ගැනීමයි.
මැණික්‌ පැළඳීමේදී වඩාත් පරීක්‌ෂාකාරී විය යුතුය. ඒ නිසා ජ්‍යොතිෂ විද්‍යාව තුළ නිර්දේශිත ක්‍රම ගණනාවක්‌ පවතී, එයින් සුදුසු ක්‍රමයක්‌ අනුගමනය කිරීමට ජ්‍යොතිෂ්‍යවේදියා දැන ගත යුතුය. යමෙකුට මැණික්‌ පැළඳීමේ ක්‍රමවේද ගණනාවක්‌ පැවතියද සුදුසුම ක්‍රමවේද කිහිපයක්‌ සඳහන් කරමු. ගත කරන මහ දශාව අනුව මැණික්‌ පැළඳීම, තම රැකියාවට අදාළව පැළඳවීම, රෝගවලින් මිදීම සඳහා මැණික්‌ පැළඳවීම, පවතින නඩුහබ ගැටලු සඳහා ද ජන්ම පත්‍රයේ සුබ කාරක ග්‍රහයන් සොයා බලා ඒ අනුව පැළඳවීම, තම ඉෂ්ඨ දේවතාවාට හිමි මැණික්‌ පැළඳවීම, පංච මහා භූතයන්ට අනුව මැණික්‌ පැළඳවීම හෝ යෝග කාරක ග්‍රහයා අනුව සිදුකිරීම ඉතාම යහපත්ය. මෙම ක්‍රමවේදය තාමසික ප්‍රකාරය නම් වේ. එනම් ග්‍රහයකු සතු බලය විනාශ කිරීමට ඔහුට වඩා බලවත් ප්‍රතිවිරුද්ධ ග්‍රහයා බලවත් කර ගැනීමය. යම් දරුවකුට ඉගෙන ගැනීමේ යම් දුර්වලකමක්‌ පවතී නම් එයට අදාළ ග්‍රහයාගේ බලය නැති කිරීමට සුදුසු ග්‍රහයකු බලවත් කළ යුතුය. එනම් ඒ සඳහා බුධ බලවත් කරගැනීමට හැකිය. යමකුට රැකියා ස්‌ථානයේ බාධක හිරිහැර පැමිණි විට ඊට හේතුවන කරුණු සොයා ඊට අදාළ ග්‍රහයාට අවශ්‍ය ආකාරයට ප්‍රතිකර්ම කළ යුතුය. යමකුට මාරක අනතුරු තිබේ නම් ඊට අදාළ ග්‍රහයාගේ බලය බිඳ දැමීමටත් සුරාවට ලොල් වූ අයට ඉන් මිදීමටත් අකීකරු දරුවන් කීකරු කර ගැනීමටත් මෙම මැණික්‌ ප්‍රතිකාරය තුළ කළ හැකි දැ බොහෝය. මැණික්‌ පැළඳීම විශේෂයෙන්ම භාවිත කරනුයේ ව්‍යාපාරිකයන් සහ දේශපාලනයට සම්බන්ධ වූ පුද්ගලයන්ය. ඔවුන්ට මහජන ආකර්ෂණය ලබාගැනීමට මැණික්‌ පැළඳීම මහත් පිටුවහලකි. මෙම මැණික්‌ ප්‍රතිකාරය වඩා සුබ වන්නේය. තම අපලකාරක ග්‍රහයාට අනුව යන්ත්‍රයක්‌ පැළඳ සිටියදී හෝ වෙනත් යන්ත්‍රයක්‌ පැළඳ සිටියදී සමහර විට නොදැනුවත්ව කිල්ලට හසුවිය හැකිය. නමුත් මෙම මැණික්‌වලට එසේ නොවේ. වාහනයක්‌ මිලදී ගැනීමට අවශ්‍ය වූවායයි සිතමු. නමුත් ඔහුගේ වාහන කාරක සිකුරු දුර්වල තත්ත්වයක සිටී නම් කිසිදින වාහනයක හිමිකාරිත්වය ලැබීමට නොහැකිය. මෙවැනි ගැටලුවලට මැණික්‌ ප්‍රතිකාරය සාර්ථක පල ලබා දෙයි. රෝග පීඩා සඳහා සහනයක්‌ ලබාගැනීමට මැණික්‌ පැළඳීම. හිතුමතේට එය නොකළ යුත්තකි. පවතින ග්‍රහයාගේ දෝෂය, රෝගය අනුව පළඳින අත, ඇඟිල්ල ආදිය වෙනස්‌ වනු ඇත.
පානදුරේ නිලන්ත ධනසේකර
උපුටා ගැනීම දිවයින පුවත් පත
