සැඟවුණු ධන රාශිය
කේන්ද්‍රයක පලාපල කථනයේදී ආර්ථික ශක්‌තිය මැන බැලීමට අප යොදාගනු ලබන්නේ එකොළොස්‌වැන්නයි. තවද ලග්නය හා ලග්නාධිපතිගේ බල දුබලකම රවි, සඳු දෙදෙනාගේ පිහිටීම මෙන්ම පහ, නවය සහ දහවැන්න කෙරෙහි ද අවධානය යොමුකරනු ලැබේ. දෙක එකොළහ පිළිවෙළින් ධනස්‌ථානය හා අයස්‌ථානය වෙයි. හොඳ ආර්ථික බලවත්කමක්‌ ලැබීමට නම් වාසනාවක්‌ ද තිබිය යුතු වේ. ඒ නිසා ලග්නය, නවය ඒවාට අධිපතීන් හා රවි, සඳු දෙදෙනා කෙරෙහි අවධානය යොමනු ලැබේ. අධ්‍යාපනයෙහි හා රැකියාවෙහි බල දුබලකම මතද ආර්ථිකය තීරණය වන හෙයින් දහවැන්න හා පස්‌වැන්නද විමසුමට ලක්‌කිරීමට සිදුවෙයි. වෙහෙස මහන්සි වී මුදල් උපයන්නට නම් හයවැන්න ද බලවත් විය යුතු බව අමතක නොකළ යුතුය. මෙහිදී විශේෂයෙන් ගුරු, ශනි යන ග්‍රහයන් දෙදෙනා ගැන ද විමසීම වටී.
ආර්ථික ශක්‌තියෙන් පොහොසත් කෙනකුගේ මිල මුදල් හෝ ධනය සුරක්‍ෂිත නොවේ නම් අනිසි ලෙස විය හියදම් වේ නම් එයින් පලක්‌ නොවනු ඇත. සමහරකු ලබන ආදායම් නැවත නැවත යොදවන්නේ මිල මුදල් සොයා ගැනීමේ අරමුණිනි. තවකෙකු එසේ නොවේ. මත් වතුර, මත් ද්‍රව්‍ය පානයට, දුරාචාර ස්‌ත්‍රීන් ආශ්‍රයට, සුදු ක්‍රීඩා කිරීමට ආදී අනිසි ක්‍රියාවන්ටය. මේ බව දැනගත හැකි ක්‍රමයක්‌ ජ්‍යෙතිෂයේ වෙයි. ඒ සැඟවුණු ධන රාශිය ගැන බැලීමෙනි.
කේන්ද්‍රයක සැඟවුණු ධන රාශිය සොයා ගන්නා හැටි විස්‌තර කෙරේ. ඒ සඳහා රවි ආදී එක්‌ එක්‌ ග්‍රහයනට රශ්මි සංඛ්‍යාවක්‌ හිමිකර දී තිබෙන අතර ඒ මෙසේය.
- රවි - 30
- සඳු - 16
- කුජ - 06
- බුධ - 08
- ගුරු - 10
- ශුක්‍ර - 12
- ශනි - 01
සැඟවුණු ධන රාශිය සෙවීමේ මුල් පියවර නම් ජන්ම කේන්දරයේ නවවැන්නාධිපතියා සොයා ගැනීමයි. ඉන්පසු චන්ද්‍ර රාශියේ සිට නවවැන්නට පතිත රාශියේ සිටින බලවත්ම ග්‍රහයා හෝ එසේ නැතහොත් එයට අධිපති ග්‍රහයා සොයාගත යුතුය. අනතුරුව එම ග්‍රහයන් දෙදෙනාටම අයත් රශ්මි ගණන් දෙක එකට එකතු කර දොළහෙන් බෙදා (12 ට වැඩි නම්) ලත් ශේෂය ගෙන සඳු පතිත රාශියේ පටන් එම සංඛ්‍යාව ශේෂය දක්‌වා වූ ඇති රාශියට ගිණිය යුතුය. එවිට ලැබෙනුයේ සැඟවුණු ධන රාශියයි. නිදසුනක්‌ මගින් දක්‌වතොත් මැනවි යෑයි සිතේ. ඒ සඳහා කටක ලග්නය උපයෝගි කරගනිමු.
එම කටක ලග්න කේන්ද්‍ර සටහනෙහි චන්ද්‍රයා වෘශ්චික රාශියේද වූයේ යෑයි සිතමු. කටක ලග්නයේ පටන් නවවැන්න මීනය වෙයි. ගුරු අධිපති වේ. ගුරුට රශ්මි 10 ක්‌ හිමිය. සඳු සිටි රාශියේ සිට නව වැන්න ලග්නය වේය. ඒ කටකයයි. එහි රවි ග්‍රහයා වූයේ යෑයි සිතා රවිට අයත් රශ්මි ගණන වූ 30ත් ගුරුට හිමි රශ්මි ගණන වූ 10 ත් එකට එකතු කර ගනිමු. එවිට එකතුව වශයෙන් 40 ක්‌ ලැබෙන අතර දොළහෙන් බෙදූ විට තුනකුත් ශේෂය වශයෙන් හතරකුත් ලැබෙයි. ඉක්‌බිති සඳු සිටි රාශියේ සිට 04 ක්‌ ඉදිරියට ගැණ ගැනීමෙන් මෙම කේන්ද්‍රයේ සැඟවුණු ධන රාශිය හමුවේ. ඒ අටවැන්න වූ කුම්භ රාශියයි.
සැඟවුණු ධන රාශිය අටවැන්න වූ විට ලබන ආදායම ප්‍රධාන වශයෙන් ස්‌ත්‍රියක්‌ නම් දැවැද්ද සොයා තැබීමට, වෛද්‍යවරු වෙනුවෙන් නැතොත් රෝගාබාධ හේතුවෙන් විය හියදම් කිරීමට, නීති ප්‍රශ්නවලට, චිත්ත සන්තාපයෙන් වෛද්‍යවරු මිදීමට, නින්දා අපහාසවලින් බේරීමට ආදියට වියදම් වේ. එහෙත් මෙකී දේවල් මෙසේ නොවන තැන් ද වේ. ඒ සැඟවුණු ධන රාශියට අධිපති ග්‍රහයා බලවත්ම ජන්ම කේන්ද්‍රයේ හෝ ධන රාශියෙන් කේන්ද්‍රගතව හෝ ත්‍රිකෝණගතව සිටීමෙනි. මෙම කටක ලග්න හිමියාගේ සැඟවුණු ධන රාශියට අධිපති ශනිය. එම ශනි ජන්ම කේන්ද්‍රයේ හතරවැන්නේ වෙතොත් මේවායේ මර්දනයක්‌ වෙයි. එවිට හතරවැන්නට අදාළ කරුණු සම්බන්ධයෙන් සිතිය යුතුය. එසේ වෙතොත් ධන රාශියෙන් ත්‍රිකෝණගත වන අතර ලග්නයෙන් ද කේන්ද්‍රගත වේ.
දැන් සැඟවුණු ධන රාශිය සොයන හැටි අපි දනිමු. මීළඟට සැඟවුණු ධන රාශිය පතිත වන ස්‌ථානය අනුව විස්‌තර විමසමු. මෙහි යම් අශුභ පලයක්‌ වෙතොත් ඒවායේ මර්දනය ඉහත පරිදි වන බව ද ශුභ ඵලයක්‌ වෙතොත් එපරිද්දෙන් පල වර්ධනය වන බව ද සිත තබාගත යුතුය. තවත් ලෙසකින් කියතොත් මෙසේය. සැඟවුණු ධන රාශිය 11 වැන්නට (ශුභයි) පතිත වූයේ නම් 11 අධිපති ද ඉහත කී තැනක බලවත් වූයේ නම් යහපත් ප්‍රතිඵලය. ආර්ථිකය සුරක්‍ෂිතය. මෙහිදී ධන රාශියට අධිපති ලග්න හා ධන රාශිය යන දෙකටම කේන්ද්‍ර හෝ ත්‍රිකෝණගත වේ නම් වඩාත්ම යහපත් වේ. කරුණු දෙකෙහිම අශුභ ස්‌ථානවලට (6.8.12) වැටේ නම් අශුභය.
සැඟවුණු ධන රාශිය ලග්නස්‌ථානය වූ විට :කැමැති දේවල් ලබාගැනීමට, ජයග්‍රහණ, ගෞරවය හා ප්‍රසිද්ධිය වෙනුවෙන් ශරීර තත්ත්වය පවත්වා ගැනීම පිණිස, ලාභ ලැබීමට, දැනුම වර්ධනයට, දේශපාලන කටයුතු වෙනුවෙන්, කේෂාලංකාරයට, ශරීර ශක්‌තිය වර්ධනයට, දීර්ඝ ගමන් යැමට, සහකරු හෝ සහකාරියගේ අවශ්‍යතාවන් සඳහා ලබන ආදායම වැය වේ.
ධන ස්‌ථානය වූ විට :දියුණුව පිණිස, ලාභ ලැබීමට, වෙළෙ¹මට, හිත මිතුරන්ට, ලිපි ද්‍රව්‍ය, ගෘහ කටයුතු, ආහාර පාන වෙනුවෙන් රන්, රිදී, මුතු, මැණික්‌ ආදිය ලබාගැනීමට වියදම් වේ.
සහජ ස්‌ථානය වූ විට :සහෝදර සහෝදරියන් වෙනුවෙන්, ඥතීන් වෙනුවෙන්, ඉගෙනීමට, ලිපි ලේඛන කටයුතු, කෙටි ගමන්, ආගමික කටයුතු, පොත්පත්, ගෘහ භාණ්‌ඩ, රූපවාහිනි, ගුවන් විදුලි, දුරකථන ආදියට වියදම් වේ.
සුබ ස්‌ථානය වූ විට :යාන වාහන, ගේ දොර, ඉඩකඩම්, ගොඩනැඟිලි, මව, භූමි ලාභ ලබාගැනීමට, අධ්‍යාපනයට, ගොවිතැන් කටයුතු, සිහිවටන, රහස් කටයුතු, විදෙස්‌ ගමන්, උසස්‌ වීමට, ස්‌වයං රැකියාවට හෝ තම නිවසෙහිම වාසය කරමින් කරන විවිධ කටයුතුවලට වටපිටාව සැකසීමට ලබන ආදායම වැඩිපුර වියදම් කරයි.
පුත්‍රස්‌ථානය වූ විට :දරුවන් වෙනුවෙන්, ආදර සබඳතා, අධ්‍යාපන, විනෝද කටයුතු, ලොතරැයි, ඔට්‌ටු ඇල්ලීම, සූදුව, අනියම් ඇසුර, යන්ත්‍ර මන්ත්‍ර කටයුතු, ආගමික කටයුතු, ව්‍යාපාර, උසස්‌ පුද්ගලයන් වෙනුවෙන් ආදායම් වැය වේ.
රෝග ස්‌ථානය වූ විට :ලෙඩ රෝග, ආහාර පාන, සේවක සේවිකාවන්, සොර සතුරන්, ණය ගෙවීමට, රෙදි පිළි, කර්මාන්තශාලා, අනතුරු, නරක පුරුදු, සුරතල් සතුන් වෙනුවෙන් වියදම් වේ.
කලත්‍ර ස්‌ථානය වූ විට :විවාහය, විවාහකයා, ගනුදෙනුකරුවන්, ව්‍යාපාර කටයුතු, දික්‌කසාදය, අයහපත් හැසිරීම්, අනියම් සබඳතා, පවුල් කටයුතු, දීර්ඝ ගමන් වෙනුවෙන් ලබන ආදායම වැය වේ.
මාතෘ ස්‌ථානය වූ විට :ලබන ප්‍රතිඵල ඉහත විස්‌තර විය. ඊට අමතරව ශල්‍යකර්ම වෙනුවෙන් ද වියදම් වීමට ඉඩකඩ පවතී.
ධර්ම ස්‌ථානය වූ විට :පුණ්‍ය කටයුතු - වන්දනා ගමන් හා පුද පූජා කිරීම, විදෙස්‌ ගමන් - උසස්‌ අධ්‍යාපනය, ලේඛන කටයුතු, නව නිපැයුම්, විශාල ගෙවල් ඉදිකිරීම් වෙනුවෙන් ආදායම් වැය වේ.
කර්ම ස්‌ථානය වූ විට :රැකියාව, ජයග්‍රහණ, කෘෂිකර්මාන්තය, මැතිවරණ දේශපාලන නිධන් වස්‌තු, ඖෂධ, ආගමික කටයුතු සඳහා ලබන ආදායම් වැය වේ.
අය ස්‌ථානය වූ විට :ලාභය, සතුට, මිතුරන්, සහෝදර සහෝදරියන් වෙනුවෙන්, සමාජ සේවයට, පෙම් සබඳතාවන්ට, වාහන, කලා කටයුතු, දීර්ඝ ගමන්, ජයග්‍රහණ, කොටස්‌කරුවන් උපකාර කරන්නන් වෙනුවෙන් ලබන ආදායම වැය වන්නේය.
වැය ස්‌ථානය වූ විට :සංචාරක ගමන් - නඩු, හබ, අසනීප, ණය ගෙවීම්, ත්‍යාග, ශල්‍යකර්ම, කාමුක ක්‍රියා, නඩත්තු කටයුතු වෙනුවෙන් ලබන ආදායම් වැය වේ.
බණ්‌ඩාරවෙල මංජුල තරුකෙම
උපුටා ගැනීම දිවයින
