දරුපල නැත්තේ ඇයි?
මනුෂ්‍ය ජීවිතය තුළ දරුවකුගේ උත්පත්තියට හිමිවන්නේ සුවිශේෂී තැනකි. බොහෝ දෙනකුට කිසිදු ගැටලුවක් නොමැතිව දරුඵල හිමිවෙයි. සමහර දෙනකුට කුමන ප්‍රතිකාර සහ ප්‍රතිකර්ම කළත් දරුඵල හිමි නොවෙයි. එසේම දරුවන් සිටියත් ඔවුනට ආදරය නොදක්වන, නිසි ආරක්‍ෂාව ලබානොදෙන, දරුවන් අත්හැර දමන හා දරුවන් ඝාතනය කරන මවුපියන්ද සිටිති.
දරුඵල අහිමිවීම කෙරෙහි පූර්ව කර්මඵල මෙන්ම කායික දුර්වලතා හා ආබාධයන්ද බලපායි. පූර්ව කර්ම ඵලයන් කොටස් 2කට බෙදිය හැකිය.
1. පෙර භවයන්වලදී දරු ගැබ් විනාශ කිරීම (ගබ්සා කිරීම), දරුවන් කායිකව හෝ මානසිකව පීඩාවට පත්කිරීම, දරුවන් අතහැර දැමීම, දරුවන් ඝාතනය කිරීම වැනි කර්මයන් නිසා මෙම භවය තුළදී දරුවකු නොමැතිව සොවින් විඳවීමට විශ්ව ධර්මය විසින් දඬුවමක් ලබාදී ඇත.
2. මාතෘ ශාප සහ පීතෘ ශාප (තම මවට හෝ පියාට කායිකව හෝ මානසිකව පීඩා කිරීම නිසා ඔවුන්ගේ සිත් තුළත් ඇතිවන වේදනාව ශාප බවට පත්වෙයි). බ්‍රාහ්මණ ශාප (පූජක හා පැවිදි පක්‍ෂයට පීඩා කිරීම නිසා ඔවුන්ගේ සිත් තුළින් පැමිණි ශාපයන්). සර්ප ශාප (නාගයන් මරා දැමීම, ඔවුන්ගේ වාසස්ථාන විනාශ කර දැමීම නිසා ඇතිවූ ශාප) ආදිය දරුඵල අහිමිවීම කෙරෙහි බලපායි මෙම ශාපයන් කේන්දරය තුළින් හඳුනාගත හැකිය.
ස්ත්‍රියගේ හෝ පුරුෂයාගේ කායික ආබාධයන් අතරින් ප්‍රතිකාර මඟින් සුවකළ හැකි ඒවා මෙන්ම සුව කළ නොහැකි ඒවාද ඇත.
කේන්දරය තුළින් දරුඵල පරීක්‍ෂා කිරීම
දරුඵල පරීක්‍ෂා කිරීමේදී රාශි කේන්දරය පමණක් නොව සප්තාම්ෂ කේන්දරයද පරීක්‍ෂා කළ යුතු බව ජෛමිණී මහාසෘෂීන් සඳහන් කර ඇත. රාශි කේන්දරයේ 5 වැන්න දරුඵල නිවේදනය කරන ප්‍රධානම රාශියයි. 7 වැනි රාශියෙන් විවාහය පෙන්වන නිසා විවාහයේ ඵලය වන දරුවන් 7 වැන්නෙන්ද 11 වැන්න වන 5 වැනි රාශියෙන්ද පෙන්වයි. 5 වැනි රාශිය හෝ එහි අධිපති බුධ, සිකුරු හෝ ශනි සමඟ සම්බන්ධවීමෙන් දරුඵල පිළිබඳ ගැටලු ඇතිවෙයි. හේතුව මෙම ග්‍රහයන් නෛසර්ගික පුත්‍රකාරක ගුරුගේ කාරකත්වයන්ට අවහිර කරන බැවිනි.
සප්තාම්ෂය යනු 7 වැනි රාශියේ වර්ග කේන්දරයයි. ස්ත්‍රියගේ සප්තාම්ෂයට සඳු සහ පුරුෂයකුගේ සප්තාම්ෂයට රවි හා ගුරු දරුඵල කෙරෙහි සුවිශේෂී වැදගත්කමක් දක්වයි. මෙම ග්‍රහයන් සප්තාම්ෂයේ 2, 6, 8, 12 යන ස්ථානයක තැන්පත්වීම හෝ දැඩි ලෙස පාපී ග්‍රහ පීඩාවට හසුවීමෙන් දරුඵල පිළිබඳ ගැටලු හෝ දරුඵල අහිමිවීමේ තත්ත්වයක් ඇති කරයි.
බුධ, සිකුරු හා ශනි දරුඵල කෙරෙහි හානිකර ග්‍රහයන්ය. මෙම ග්‍රහයන් පමණක් සප්තාම්ෂ ලග්නයට ත්‍රිකෝණගතව සිටීමෙන් දරුඵල අහිමි කිරීමට මඟ පාදයි. මෙම ග්‍රහයන් සමඟ රවි, ගුරු, සඳු හෝ රාහු ත්‍රිකෝණගතව සිටීමෙන් ප්‍රමාදවී දරුඵල හිමිවෙයි.
දරුඵල නොමැතිවීමට හේතුව කර්ම දෝෂයක්ද, කායික ආබාධයක්ද යනවග දැනගන්නේ කෙසේද?
මේ සඳහා රාශි කේන්දරය පරීක්‍ෂා කළ යුතුය. රාශි කේන්දරයේ ලග්නයෙන් සහ රවිගෙන් 3 වැනි සහ 9 වැනි ආරූඪ පද තුළින් එම දෝෂයන් සොයාගත හැකිය.
ලග්නයෙන් 3 වැනි හා 9 වැනි ආරූඪ පදවලින් 2, 6, 8 හෝ 12 යන ස්ථානයක රවි තැන්පත්වී සිටීමෙන් හෝ බුධ, සිකුරු හෝ ශනි යන ග්රහයෙක් එම ආරූඪ පදයක තැන්පත්ව සිටීමෙන් කායික ආබාධයක් ඇතිබව පෙන්වයි. මෙවිට වෛද්‍ය ප්‍රතිකාර මඟින් සාර්ථක ප්‍රතිඵල ලබාගත හැකි බව පෙන්වයි. එම නිසා ශාන්ති කර්ම කිරීමෙන් ඵලක් නැත.
රවිගෙන් 3 වැනි හා 9 වැනි ආරූඪ පදවලින් 2, 6, 8 හෝ 12 යන ස්ථානයක රවි තැන්පත්ව සිටීමෙන් හෝ බුධ, සිකුරු හෝ ශනි එම ආරූඪ පදයක තැන්පත්ව සිටීමෙන් කර්ම දෝෂයක් ඇති බව පෙන්වයි. මෙවිට වෛද්‍ය ප්‍රතිකාර කොපමණ කළත් සාර්ථක ප්‍රතිඵල නොලැබෙයි. එම නිසා ශාන්ති කර්ම හෝ වේදීය ප්‍රතිකර්මවලට යොමුවීම සුදුසුය.
කළ යුත්තේ බටහිර වෛද්‍ය ප්‍රතිකාරද? දේශීය වෛද්‍ය ප්‍රතිකාරද? යන වග දැනගන්නේ කෙසේද?
දරුඵල බලාපොරොත්තුවෙන් සිටින බොහෝදෙනකු වසරක් පමණ ගතවී සාර්ථක ප්‍රතිඵලයක් නොලැබුණු විට බටහිර වෛද්‍ය ප්‍රතිකාර සඳහා යොමු වෙති. එහි කිසිදු වරදක් නැත. එමඟින් සාර්ථක ප්‍රතිඵල ලබන අය ඕනෑතරම් සිටිති. එසේම දීර්ඝ කාලයක් ඔෟෂධ ප්‍රතිකාර, ශල්‍යකර්ම සහ බීජ තැන්පත් කිරීම (ධ්උධ්) වැනි ක්‍රම සිදු කළත් ඒවායින් කිසිදු ප්‍රතිඵලයක් නොලබන අයද ඕනෑතරම් සිටිති. නමුත් ඔවුන්ට කිසිදු කායික ආබාධයක් නොමැති බවද වෛද්‍යවරු පවසති.
සමහර ස්ත්‍රීන්ගේ ශරීරවල පවතින වාතරක්ත දෝෂ දරු ගැබ් නොපිහිටීමට හේතුවෙයි. සාමාන්‍ය ව්‍යවහාරයේ පවතින "ශරීරයේ උෂ්ණාධික බව" ලෙස හඳුන්වන්නේ මෙම තත්ත්වයයි. වාතරක්ත දෝෂයන්ට බටහිර වෛද්‍ය ක්‍රමය තුළ ප්‍රතිකාර නොමැත. එම දෝෂ හඳුනාගත හැකි වෛද්‍ය පරීක්‍ෂණ ක්‍රමයන්ද නැත. මෙවැනි ස්ත්‍රීන් තමයි දීර්ඝ කාලයක් බටහිර වෛද්‍ය ප්‍රතිකාර ලබාගෙන ඒවායින් සාර්ථක ප්‍රතිඵලයක් නොලබා, අවසානයේ දේශීය වෛද්‍ය ප්‍රතිකාරවලට යොමුවීමෙන් පසුව දරුඵල ලබන්නේ.
අග්නි තත්ත්වය නිවේදනය කරන රවි සහ කුජ රාශි කේන්දරයේ 5 වැන්න හෝ 5 වැන්න අධිපති සමඟ සම්බන්ධවී සිටී නම් එම ස්ත්‍රියට වාතරක්ත දෝෂයන් ඇති බව පෙන්වයි. මෙවිට සංසේචනය නොවීමට හෝ සංසේචනය වුවත් ඉක්මනින් ස්වාභාවිකව ගබ්සා වී යෑමට හේතුවෙයි. මෙවැනි ස්ත්‍රීන්ට වාතරක්ත චිකිත්සාව සහ පූර්ණ රුධිර ශෝධන චිකිත්සාව යෙදීමෙන් පසුව දරුඵල ලැබූ අවස්ථා ඕනෑතරම් ඇත.
දරුකමට දරුවකු ගැනීමට ඔබට හිමිකම් තිබේද?
විවාහ වී දීර්ඝ කාලයක් තිස්සේ වෛද්‍ය ප්‍රතිකාර කළත් එසේම දෙවිවරුන්ට බාරහාර හා ශාන්තිකර්මයන් කොපමණ කළත්, කුමන හේතුවක් නිසා හෝ දරුඵල නොමැතිව සිත් තැවුලෙන් සිටිනා අය ඕනෑතරම් සිටිති. වයස අවුරුදු 45 - 50 පසුවී කළ හැකි දෙයක් නොමැතිව සිත හදාගෙන සිටිනා අයද ඕනෑතරම් සිටිති. "අපට හැකියාව තිබුණ කාලයේදී දරුවකු අරගෙන හදාගන්න තිබුණා" යනුවෙන් පසුතැවිලිවන විවාහකයන්ද ඕනෑතරම් සිටිති. දරුවකු ගැනීමට ඕනෑකම හා අවස්ථාව තිබුණත් "අනාගතයේ එම දරුවා කොයි විදියේ කෙනකු වේදැයි දන්නේ නැහැ" යනුවෙන් බියෙන් හා සැකයෙන් සිටිනා අයද ඕනෑතරම් සිටිති. තමන්ගේ ලෙසින් හැදුණු දරුවකු නොවන නිසා දරුවාගේ රූප ස්වභාවය තමන්ගේ මෙන් නොවන නිසා දරුවාට ආදරයක්, සෙනෙහසක් ඇති නොවේ යැයි සිතා එම අදහස අතහැර දමන අයද ඕනෑතරම් සිටිති.
මෙවැනි පූර්ව නිගමනවලට එළැඹී සිටීම අනුවණ ක්‍රියාවක් බව, දරුවන් හදාගත් සියලුම මවුපියන්ගේ අත්දැකීම්වලින් ප්‍රකාශ වෙයි. මුලින්ම තීන්දුවකට පැමිණීමට ටිකක් අපහසු බව තිබුණ නමුත් දරුවා ලබාගෙන කාලයත් සමඟ තමන්ගේම ලෙයින් හැදුණු දරුවකු ලෙස ආදරය, සෙනෙහස ඇතිවන බව ඔවුන් සියලු දෙනාම පවසයි. දරුවාගේ චරිත ස්වභාවයන් හා රූප ස්වභාවයද තමන්ගේ ස්වභාවයට අනුව පරිවර්තනය වන බවද ඔවුන් පවසති.
එසේ සිදුවන්නේ කෙසේද? කිසිවකු තේරුම් ගැනීමට අපහසු විශ්වධර්මයේ රහස එයයි. එනම් "ඔබ ළඟට පැමිණිය හැකිවන්නේ ඔබ වෙනුවෙන්ම ඉපැදුණු දරුවකුට පමණයි." ඔබගේ කුසයේ බිහිවීමට තරම් පිනක් නොමැති නිසා, වෙනත් මවු කුසකින් බිහිවීමට එම දරුවාට සිදුවිය. නමුත් එම මවුපියන්ට එම දරුවා හිමි නැත. දරුවන් දහස් ගණනක් ඔබගේ දෙනෙත් අබියසට පැමිණියත්, ඔවුන් අතරින් තෝරාගෙන ඔබ දෑත අරගන්නේ ඔබට හිමි දරුවාවය.
කුමන හේතුවක් නිසා හෝ ඔබට දරුඵල අහිමි නම් එයින් පෙනෙන්නේ ඔබගේ පාපකර්මයක් මෙම භවය තුළදී අවසන් වී නොමැති බවයි. නමුත් මෙම දෙපළගෙන් එක් කෙනකුගේ හෝ කේන්දරයේ "පෝෂ්‍ය පුත්‍ර යෝගයක්" පිහිටා තිබේ නම් ඔබ දෙපළ සැබවින් භාග්‍යවන්තය. මෙයින් පෙන්නුම් කරන්නේ ඔබ දෙපළගේ පාපකර්මයක් මෙම භවය තුළදී නිම කිරීමට විශ්ව ධර්මය විසින් අවස්ථාව සලසා ඇති බවයි.
පෝෂ්‍ය පුත්‍ර යෝගයක් යනු දරුකමට දරුවකු හදාවඩා ගැනීමට ඔබට හිමිකම ඇති බව පෙන්වන යෝගයකි. මෙය සෙනසුරු, බුධ හා මාන්දි යන ග්‍රහයන්ගේ පිහිටීම අනුව ඇතිවන යෝගයකි. මෙම යෝගය පවතින යුවළක් දරුවකු හදා වඩා ගැනීමෙන් අනාගතයේදී දරුවාගෙන් ඔවුනට සෙතක් මිස අගතියක් සිදු නොවනු ඇත. දරුවකු ගැනීමට සිතක් පහළ වන්නේද මෙම යෝගය පවතින අයට බව පර්යේෂණාත්මකව මා අත්දැක ඇත.
ළදරුවකු ලබා ගැනීමට ඔබට ඕනෑකම තිබේ නම්, පරිවාස දෙපාර්තමේන්තුවේ ලියාපදිංචි ළදරුවන් ලබාදෙන මධ්‍යස්ථාන ඇත. ඔබගේ පෞද්ගලිකත්වය රහස්‍යභාවය රැකෙන ආකාරයට සහ නීත්‍යනුකූල ළදරුවකු ලබා ගැනීමට අවශ්‍ය තොරතුරු ඔබගේ දිස්ත්‍රික්කයේ පරිවාස දෙපාර්තමේන්තු කාර්යාලයෙන් ලබාගත හැකිය. මෙමඟින් මවුපියන් බවට පත්වූ දහස් ගණනක් දෙනා අත්විඳින සත්‍ය ඔබත් ප්‍රත්‍යක්‍ෂ කරගන්න.
ජේ‍යාතිෂවේදී රස වෛද්‍ය, පවුල් උපදේශක නිල්රුක් සිල්වා
මව්බිම
