ජ්‍යොතිෂයෙනුත් එපා කියන නෑනා මස්සිනා විවාහය ඕනෑම නෑ
සුදාරකගේ අම්මට ඕනකම තිබුණේ නිපුනිට සුදාරකව විවාහ කරවලා දීලා ගමටම හද්දා මඟුල් කන්නට දීලා නිපුනිව එයාගේ ලේලිය කරගන්නට. සුදාරකගෙ අම්මගෙ අයියගෙ එකම දෝණි තමයි නිපුනි. දෙන්නාම ඇවැස්ස නෑනා මස්සිනාලා. මේ කසාදෙට පරහට හිටියේ එකම එක්කෙනයි. ඒ නිපුනිගේ අම්මා. "පවුල්වලින් නෑදෑයෝ හොයන්නෙ අසුවල් කාරියකටෙයි? අනිත්තෙක දෙන්නාම ඇවැස්ස නෑකමනේ. ඔය ඇවැස්ස විවාහ හරි අසුබලු..." නිපුනිගේ අම්මා හිටියේ එකම වචනයක. ඒත් කාලයාගේ ඇවෑමෙන් නිපුනිගේ අම්මාට පරාජය භාරගන්න සිද්ධ වුණා. නිපුනි සුදාරකගේ ගෙදරට ආවේ සුදාරකගේ මනමාලිය වෙලා. ඒත්, කාලයාගේ ඇවෑමෙන් නිපුනිත් සුදාරකත් මවුපිය යුවළක් වුණා. ඒ පුංචි විදුරවිට. ඒත්, විදුරවිට ලෝකය බලන්න බැරි වුණා. ඒ දරු පැටියා ලෝකෙට බිහි වුණේ සදාකාලික අන්ධ බවත් අරගෙන. වෛද්‍ය විද්‍යාවත්, ජ්‍යොතිෂ විද්‍යාවත් එකසේ බැහැර කරන මේ නෑනා මස්සිනා විවාහය ගැන අපි ටිකක් ගැඹුරින් කතාබහ කරමු. සිංහල සම්ප්‍රදාය තුළ පැවැති විවාහ ක්‍රම කීපයක් අතුරින් නෑනා මස්සිනා විවාහයටද එකල සිටම කිසියම් ස්ථානයක් හිමිවී තිබුණා. මෙම විවාහය තුළින් බොහෝවිට ප්‍රශ්න ඇතිවන්නේ උපදින දරුවන්ටයි. මිනිසා (හෝමෝ සේපියන්ස්) සම්බන්ධව කතා කරන විට පුද්ගලයකු සතු සියලු ගතිලක්‍ෂණ තමන්ගේ ඊළඟ පරම්පරාවට දායාද කිරීම සඳහා වර්ණදේහ යුගල් 23ක් තුළ තැන්පත් කරනවා. වර්ණ දේහ ඔස්සේ මවුපියන්ගෙන් දරුවන්ට ලැඛෙන ගති ලක්ෂණ වන්නේ උස්, මිටි බව හමේ වර්ණය, හිස කෙස්වල ස්වභාවය, ඇස්වල ස්වභාවය, කටහඬ, හැඩරුව, පරම්පරාවෙන් ලැඛෙන මානසික රෝග, තැලසීමියා, හිමොෆිලියා, අධික රුධිර පීඩනය, දියවැඩියාව වැනි රෝග යනාදියයි. සාමාන්‍යයෙන් විවාහ බොහොමයක් සිදුවන්නේ එකම පරම්පරාවක සාමාජිකයන් අතර නොවෙයි. විවිධ පරම්පරාවලට අයත් අඹුසැමියන්ගේ වර්ණ දේහවල අඩංගු ගතිගුණ එකිනෙකට වෙනස් වෙනවා. වර්ණදේහයක ක්‍රියාකාරී කොටස ජානය ලෙස ජීව විද්‍යාවේදී හඳුන්වනවා. එකම පරම්පරාවකින් පැවත එන අයගේ ජාන තුළ සැඟවී තිඛෙන ගතිලක්‍ෂණ බොහෝ දුරට සමාන වෙනවා. ඒ නිසා තමයි එක පරම්පරාවක අය ටිකක් සමාන හැඩරුව ඇතිව උපදින්නේ. ඒගොල්ලන් තුළ සැඟවී තිඛෙන (පිටතට නොපෙනෙන) විවිධ රෝගවලට අයත් ජානද තිඛෙන්නට පුළුවන්. අපි හිතමු හිමොෆිලියා වැනි රුධිර රෝගයක් ගැන. මේ රෝගය තිඛෙන පරම්පරාවක කෙනෙක් රෝගය නැති පරම්පරාවක කෙනෙක් සමඟ විවාහ වූ විට දරුවන්ට රෝගය වැලඳීමේ ප්‍රවණතාව අඩුයි. එහෙම නැතිව රෝගය තිඛෙන පරම්පරාවක කෙනෙක් තමන්ගේ පරම්පරාවේම රෝගය සැඟවී තිඛෙන තවත් කෙනෙක් සමඟ විවාහ වූ විට ලැඛෙන දරුවන්ට එම රෝගය ඇතිවීමේ අවදානම වැඩියි. නෑනා මස්සිනා විවාහයත් මේ වගේ එකක්. කිසියම් රෝගයකට හේතුවන ජාන එකතුවීමෙන් ඊළඟ පරම්පරාවේදී එම රෝගය ඉස්මතු වෙන්න පුළුවන්. නෑනා මස්සිනා විවාහයෙන් ලැබුණ සමහර දරුවන් තුළ මෙවැනි ආබාධ තිඛෙන අවස්ථා ඔබ දැක තිඛෙනවා. මිනිසාගේ පවුල් ඉතිහාසය පරිස්සමින් සොයා බැලීමෙන්ද විශේෂයෙන් රෝග පිළිබඳ සහ සෞඛ්‍ය පිළිබඳ ඔවුන්ගේ ඉතිහාසය පරීක්‍ෂා කිරීමෙන්ද මෙම විෂය සම්බන්ධ ඉතා වැදගත් කරුණු මේ වනවිට නූතන වෛද්‍ය විද්‍යාව සතුව තිඛෙනවා. ඒ අනුව නූතන වෛද්‍ය විද්‍යාවත් නෑනා මස්සිනා විවාහය අනුව කරන්නේ නැහැ. විවාහය කියන කොටම ජ්‍යොතිෂ විද්‍යාව පැත්තෙන් අප ලබා ගන්නා ලොකුම පිළිසරණ තමයි පොරොන්දම් බැලීම.
පොරොන්දම් බැලීමේදී කරුණු 20ක් පරීක්‍ෂා කර බලනවා. විසි පොරොන්දම කෙටියෙන් සඳහන් කරනවා නම්, 1- නක්‍ෂත්‍ර, 2-ගණ, 3-මහේන්ද්‍ර, 4-ස්ත්‍රී දීර්ඝ, 5-යෝනි, 6-රාශි, 7-රාශ්‍යාධිපති, 8-වශ්‍ය, 9-රජ්ජු, 10-වේධ, 11-වෘක්ෂ, 12-ආයුෂ, 13-පක්‍ෂි, 14-භූත, 15-ගෝත්‍ර, 16-වර්ණ, 17-ලිංග, 18-නාඩි, 19-දින සහ 20- ග්‍රහ පොරොන්දම ආදී වශයෙන්. මෙම කරුණු 20 ගැනම ඉතා දීර්ඝ පැහැදිලි කිරීම් ජ්‍යොතිෂයේ සඳහන් වුණත් මේ අතරින් වැඩි ප්‍රමාණයක් ගැළපෙනවා නම් විවාහයට සුදුසු යැයි නිර්දේශ කරන්න පුළුවන්. ඉහත අංක 15 ගෝත්‍ර පොරොන්දම ගැන ජ්‍යොතිෂයේ මෙසේ සඳහන් වෙනවා. ස්ත්‍රී පුරුෂ දෙදෙනාම එකම ගෝත්‍රයට අයත් නැකැත්වල නම් අශුභයි - නොසීහේ. ස්ත්‍රී පුරුෂ දෙදෙනා ගෝත්‍ර දෙකක නම් ශුභයි - සීහේ. ගෝත්‍රය යනුවෙන් වංසය පරම්පරාව හැඳින්වෙන බවද ගෝත්‍ර පොරොන්දමෙන් පරම්පරාවේ දියුණුව ගැන සොයා බලන බවද, සඳහන් වෙනවා. එකම ගෝත්‍රයකට අයත් විවාහ අශුභ වන්නේ ලේ නෑයන් අතර විවාහයෙන් අංගවිකල දරුවන් ලැබීමේ ඉඩක් පවතින නිසා බවද තවදුරටත් ගෝත්‍ර පොරොන්දමේදී විස්තර වෙනවා. අපි අපගේ පරම්පරා ඔස්සේ පසුපසට යනවිට අත්තා, මුත්තා, නත්තා, පනත්තා, කිත්තා, කිරිකිත්තා කියලා කිව්වාට මුත්තාගෙන් එහාට ඒ අය කවුරුද කියලා අපි බොහෝ දෙනා දන්නේ නැහැ. ඉතින් අපි විවාහ වෙනකොට සමහර විට එකම පුද්ගලයකුගෙන් පැවැතෙන දරුමල්ලන්ගේ එකම ලේ තිඛෙන අය අතර විවාහ සිදුවෙන්න ඉඩ තියෙනවා. මෙතැනදී උපන් නැකත් පදනම් කරගෙන සෘෂිවරුන්ගේ අධි මානසික බලය යොදා නිර්මාණය කරන ලද ගෝත්‍ර හතේදී ගෝත්‍ර දෙකක් අතර සිදුවන විවාහය නිසා ලේ නෑයන් අතර විවාහය වළකනවා කියලා අපට හිතෙනවා. ජ්‍යොතිෂයේ එන බොහෝ සිද්ධාන්ත සේම මෙම කරුණුද අපගේ සාමාන්‍ය බුද්ධියට වැටහෙන සීමාවෙන් එහා වෙන්න පුළුවන්. කෙසේ වෙතත් පොරොන්දම් බලලා සිදුකරන විවාහවලින් ලැඛෙන දරුවන්ගෙන් වැඩි දෙනෙක් සාමාන්‍ය නිරෝගී අය වීමෙන් මෙම ගෝත්‍ර පොරොන්දමේ වටිනාකම අපට වැටහෙනවා වගේම නෑනා මස්සිනා විවාහය ජ්‍යොතිෂයද අනුමත නොකරන බවත් අපට වැටහෙනවා. බුද්ධිමත් මවුපියන් තම දරුවන් නෑනාටවත් මස්සිනාටවත් විවාහ කර දෙන්න යොමු වන්නේ නැහැ.
උපුටා ගැනීම මව්බිම පුවත් පතඇසුරෙනි
