ජීවන අංකය ලකී සෙවන්ද? එහෙනම් නියමයි !
ඕනෑම වර්ෂයක සහ මාසයක 7, 16, 25 උපත ලත් අයට අංක 7 ජීවන අංකය වේ. කිසිවකුට අවබෝධ කරගැනීමට අපහසු කේතු ග්‍රහයාට හිමි අංක 7 ගැන විස්තර බලන්න. පොත පතට ඉතා ළැදි මේ අය ඉතා බලවත් උගතුන් වනු ඇත. කේතුගෙ ගතිය නිසා බර වැඩ කිරීමට අකැමැතිය. නමුත් හොඳ මොළකාරයන් වන්නේත් හිත වෙහෙසා තම වැඩ කටයුතු කරන්නේත් අංක 7 ජීවන අංකය හිමි අයයි. ඒ වගේම පොත්පත් කතුවරුන් වන්නේත් අංක 7 තුළ උපත ලබා ඇති උදවියයි. මෙම අය පෑනට මුල් තැනදී කටයුතු කරන්නේ හසළ දැනුමක් ඇතිවය. ඔවුන් පුවත් පතකට ලිපියක් ලීවත්, තැනක කතාවක් කළත් එය හරවත් සහ රසවත් අයුරින් කිරීමට ඉතාම දක්ෂය. පොත පත බලන කියවන මේ අය තුළ ඉතා විශාල දැනුම් සම්භාරයක් තිබේ. සමහර අංක 7 හිමි අය අධික කම්මැළිකමක් මවාගෙන කටයුතු කරන අවස්ථාද මා දැක ඇත. කේතු ඡායා ග්‍රහයෙක් නිසා එවැනි දේ සිදුවීම සිරිතක් වුවත් සෙවණැල්ල ලෙස හඳුන්වන කේතු හොඳ මොළගෙඩි රටට දායාද කරදී තිබේ. ජේ‍යාතිර් විද්‍යා විශාරදයන්, අංක විද්‍යා උගතුන්, මන්ත්‍ර ශාස්ත්‍ර වැනි ගුප්ත කටයුතු කරන අය මේ ජීවන අංක 7 යටතේ උපත ලබා ඇත. යමක් කිරීමට ගත්තොත් ඒ දෙය හරියටම කරන්නේද මෙම අයයි. උසස් අධ්‍යාපනයක් ලබා විශේෂඥයන් වන්නේද අංක 7 හිමි අය බව කිව යුතුය. තමාගේ ග්‍රහ තත්ත්වය ප්‍රබලනම් අංක 7 හිමියන්ට උසස් තැනක් කරා යෑමට විශ්ව ශක්තියද හිමිවෙයි. සමහර අවස්ථාවල කේතු එක තැන පල්වෙන අයුරින්ද කටයුතු කරයි. කම්මැළිකම නැත්නම් ඕනෑම දෙයක් කිරීමට හැකියාව ඇත. කටට වැටෙනකල් බලා ඉන්න අයට හතේ හත වදින බවට ඇති කතාවක් ඔබ අසා ඇතැයි සිතමි. ඒ එක්කම ලකී සෙවන් කියන්නේත් අංක 7ට මය. කම්මැළිකමෙන් යුතු වුවත් යමක් කරන්න ගත්තොත් රෑ දහවල් නැතිව වෙහෙස දරා එම වැඩය කිරීමට ජීවන අංක 7 හිමි අය හරිම දක්ෂය. අංක 7 හිමි අයගේ විවාහය පිළිබඳ ගැටලු මතුවෙන බවද කිව යුතුව ඇත. ඊට හේතුව නීත්‍යනුකූලව ප්‍රේම කිරීමට යෑමයි. හැම දේකම වෙනසක් දැකීමට උත්සාහ කිරීම සහ තමාගේ මතය අනුව කටයුතු කිරීමට යෑම නිසා ආලය, ආදරය වගේම විවාහ ජීවිතයද කඩා වැටුණ උදවිය මට හමුවී ඇත. අංක 7 තුළ හරිම ගුප්ත ගතියක් තිබේ. ඡායා ග්‍රහයාට හෝ සෙවණැල්ලට කේතු අයිතිය කියා මම ඔබට මුලින් කීවෙමි. ඉර හඳ තියෙන තාක් කල් සෙවණැල්ල තමා පසු පස ගමන් කරන අතර හොඳ අතට කැරකී තිබුණොත් සෙවණැල්ල තම ජීවිතයට වඩ වඩාත් උදව් කරයි. නරකට පිහිටා ඇත්නම් නොකෙරෙන දීගෙ සෙවණැල්ලත් ඇදයි කීවාක් වැනිය. අංක 7 හිමියන් කම්මැළි නොවී උගත දෙයින් රටට දැයට යහපතක් කිරීමට උත්සාහ වන්න. තමාගේ තත්ත්වයට ගැළපෙන රක්ෂාවල් සොය සොයා කල් නොමරන්න. "සොයන්නාට හම්බවේ" කියා කතාවක් ඇත. "මා හරි උගතාය" කියා ගෙදරට වී වකුටු වී නිදා නොගන්න. තමාගෙ තත්ත්වයට මදි පුංචිකම් සිදුවෙනවා කියා නොසිතා මහ පාරට බැස උගත් ශාස්ත්‍රය හෝ කියා දෙන්න. එක්තරා ඉංග්‍රීසි මහත්මයෙක් "ලංකාවේ ගස් යට විශ්වවිද්‍යාල තියෙනවා" යැයි කියා ඇත. ඒ කීවේ ශිල්ප ශාස්ත්‍ර හොඳින් දන්නා උදවිය ගස් යට ශාස්ත්‍ර කියන හෙයිනි. සර්ප විස වෛද්‍යවරු නයි පොළඟුන් පෙන්වා ගස් යටට වී රසවත් කතා කියන අවස්ථා ඔබත් දැක ඇතැයි මම සිතමි. තමාගේ තත්ත්වය ගැන සිත සිතා කාලය අරින්නේ නැතිව උගත් දෙයින් වැඩක් ගන්න. ජීවන අංක 7 අයට කරන්න බැරි දෙයක් නැත. ජීවත් වීමට මාර්ග හුඟාක් තිබේ. දේශපාලනයට ගියත් පොඩි එකාගෙ දුක දන්නෙ අංක 7 හිමි අයයි. එමෙන්ම අංක 7 හිමි අය ළඟ දැනුම හුඟාක් ඇති නිසා කෙනකුට යටත් වීමට හිත දෙන්නේ නැත. තවද කාව්‍ය ශාස්ත්‍රය, ගීත රචනය වැනි දේවල් වලටත් ජීවන අංක 7 හිමි අය හරිම දක්ෂයෝය. ඒ වගේම මුහුදු ගමන්, වෛද්‍ය වෘත්තිය, මූර්ති කලාව දියර වර්ග වෙළෙදාම, ගුප්ත විද්‍යාව යන දේවල් අංක අංක 7ට ඉතාම ගැළපෙනු ඇත. දෛව අංකය බලන හැටිත් ඔබට මතක ඇතැයි සිතමි.
උපන් වර්ෂය උපන් මාසය උපන් දිනය එකට එකතු කර බලන්න. (1955 + 6 + 17 = 34 = 3 + 4 = 7යි). ජීවන අංකය තියෙන්නේ උපන් දිනයේ අංකයයි. ඉහත උදාහරණයේ දෛව අංකය 7 වන අතර ජීවන අංක 1 + 7 = 8 බව වටහා ගන්න. දෛව අංකය 1, 3, 5, 6, 7, 8 හිමි වීම ජීවන අංක 7 හොඳට ගැළපෙනු ඇත. වාසනාව තම උත්සාහය මත ලබා ගනී. වැරැදුණ හැම වෙලාවකම ඊට වඩා උසස් අයුරින් නැඟී සිටී. එක දොරක් වැසෙන විට මෙම අයට දොරවල් 4ක් ඇරෙනු ඇත. ජුනි 21 සිට ජූලි 27 දක්වා කාලය වාසිදායක බව කිව යුතුය. ඉරිදා සඳුදා යන දවස්ද 7, 16, 25 යන දිනයන්ද වැදගත් කටයුතුවලට යොදා ගැනීම තුළින් දියුණුව දැකිය හැකිය. 7, 16, 25, 34, 43, 52, 61, යන වයස් සීමාවලදී අංක 7 හිමියන්ට ඉතා වැදගත් දේවල් සිදුවේ. වයස අවුරුදු 9, 18, 27, 36, 45, 54, 63, 72, 81, 90 කාල වකවානුවලදී අයහපත් දේවල් සිදුවිය හැකි නිසා කල්පනාකාරී වන්න. රෝග වශයෙන් ලේවල සීනි ඇතිවීම, ස්නායු දුර්වලතා, උදරාබාධ, රුධිර ගමනය පිළිබඳ ගැටලු සහ දත්වල ආබාධ ඇති වීමට ඉඩ තිබේ. පොත පතට වගේම ටිකක් දහඩිය දමන වැඩත් කිරීම තුළින් අංක 7 හිමියන්ගේ රෝග තත්ත්වයන් අවම කරගත හැකි නිසා ඒ ගැනත් හිතන්න. අංක 7 හිමි ප්‍රසිද්ධ අයගේ නම් ටිකක් දැන ගැනීම පිණිස ලියමි.
කුමාරතුංග මුණිදාස 1887. 07. 25, සී. පී. ද සිල්වා 1912. 04. 16, ආතර් සී. ක්ලාක් 1917. 12. 16, ආනන්ද රාජකරුණා 1885. 02. 07, කොල්වින් ආර්. ද සිල්වා 1907. 02. 16 යන අය ජීවන අංක 7 යටතේ උපත ලබා ඇත. තවත් උගත් බුද්ධිමත් රට පිළිගත් මහා පඩිරුවන්ද අංක 7 යටතේ උපත ලබා සිටියත් ලිපිය දීර්ඝවන නිසා ලියා තැබීම අපහසුය.
ජේ‍යාතිර් විද්‍යා විශාරද මාතර පුහුල්වැල්ලේ සුසිල් ප්‍රේමචන්ද්‍ර 0777-622734
උපුටා ගැනීම මව්බිම පුවත්පත
