ඔබ කෝච්චියක යන්නෙක්ද...? විවාහයත් කෝච්චියක්
එසේ නම් කෝච්චිය ප්‍රමාද වීම, කෝච්චිය මිස්වීම, කෝච්චියේ පාපුවරුවේ එල්ලී යෑමට සිදුවීම ආදී දේවල් ඔබේ ජීවිතයට එල්ල විය හැකි සාමාන්‍ය පොදු ගැටලු වන්නට ඇත.
මේ කෝච්චි ගමනත් අපේ ජීවිතයත් එක සමාන නොවෙතැයි ඔබට සිතිය හැකිද...?
ජීවිතය කෙසේ වෙතත් අපේ විවාහ ජීවිතය නම් කෝච්චි ගමනට සමානය. "විවාහය" ගැන බොහෝ දෙනා දන්නේ පොරොන්දම් ගැළපීම, නොගැළපීම, දික්කසාදය, දෙවැනි විවාහය, අනියම් සබඳතා ගැන පමණි. ඒත් විවාහයද දුම්රිය ගමන මෙන් සමාන්තර රේල් පීලි දෙකක් මත ගමන් කරන දිගු ගමනකි. දුම්රියේ රේල් පීලි දෙක කිසිදා යානොවන්නාක් මෙන් විවාහ වන දෙදෙනකුගේ සිතුම් පැතුම්, ගති පැවතුම් කිසිදා සමාන නොවේ.
පොරොන්දම් බැලීමේදී විසි පොරොන්දම, අෂ්ටකූඨ පොරොන්දම, එකොළොස් පොරොන්දම් ආදිය ගැන කතා කරමු. එසේම විවාහයට බලපාන සුබ ග්‍රහයන් සේ සඳු සහ සිකුරුත්, සඳු-සිකුරු යෝගයත් සලකන අතර අසුබ ග්‍රහයන් සේ ශනි සහ කුජත්, "ශනිමංගල" යෝගයත් විශේෂ වේ. බොහෝ දෙනා සිකුරු හතේ, කුජ හතේ යන්න අසා ඇති අතර අවබෝධයක්ද පවතී. මේ පොරොන්දම ගැළපීම හෝ භෞම දෝෂ ගැන කතාකරන විට බොහෝ දෙනා පෙන්වා දෙන්නේ විවාහය පමාවීම, දික්කසාදය හෝ දෙවැනි විවාහය ගැන පමණි.
එහෙත් මේ ඉහත සඳහන් වූයේ විවාහය ගැන දොෂ තුනක් පමණි. අවිවාහකයන් විවාහ වීමට පෙරුම් පුරන අතර විවාහකයන් විවාහය නමැති "ගැල" ඇදගෙන යෑමට බොහෝ වෙහෙස ගනිති. අමාරුවෙන් දුම්රියට ගොඩවුවත් ගමනාන්තය දක්වා ගත කරන කාලය සොඳුරුය, මිහිරිය, වේදනාබරය. ජ්‍යොතිෂවේදීන් හමුවට පැමිණ ගැටලු ඉදිරිපත් කරන්නන් ගැන පමණක් නොව උසාවියේ එදිනෙදා ඇසෙන නඩුවලින් වැඩිම සංඛ්‍යාව දික්කසාද නඩු හා ඊට අදාළ නඩු බව පැහැදිලිය.
විවාහය පමාවීමට බලපාන සාධක අතර,
- ආර්ථික හේතු
- සමාජමය හේතු
- ශාරීරික හේතු
- ජ්‍යොතිෂමය හේතු
- අධ්‍යාපන සාධක
- භූත දෝෂ (කළුකුමාර දොෂ)
- මානසික හේතු සාධක
- මවුපියන්ගේ මානසික මට්ටම
ආදී කරුණු රාශියක් ඇත. දැරියක උපදින අවස්ථාවේ පිහිටි ග්‍රහ තත්ත්වයන් මත හෝ වැඩිවිය පත්වූ අවස්ථාවේ ඇතිවූ යම් යම් දෝෂ මත විවාහයට බාධා සිදුවේ. එය "කළුකුමාර දෝෂය" ලෙස සමාජයේ ව්‍යවහාර වෙයි. එසේම ජ්‍යොතිෂමය වශයෙන් මුලින් කීවාක් මෙන් කුජ සහ ශනිගේ දෝෂද විවාහයට බලපායි. විවාහය පමාවීම මෙන්ම විවාහයෙන් පසු සිදුවන ගැටලුවලටද මේ කුජ සහ ශනි දෝෂත්, කුජ-ශනි එක්වීමෙන් සිදුවන "ශනි-මංගල" යෝගයත් බලපායි. කුජ ග්‍රහයා හෝ ශනි ග්‍රහයා විවාහස්ථානයේ හෝ ඊට ගෝචර රාශියක සිටීම විවාහ දෝෂයකි. මේ දෙදෙනා වෙන් වෙන්ව හෝ එක්ව සිටීම මේ දෝෂ තත්ත්වයයි. ශනි මංගල යෝගය යනු කුජ ග්‍රහයා සහ ශනි ග්‍රහයා එකම රාශියක (උපතේදී) සිටීම හෝ කුජගෙන් හත්වැනි රාශියක (ජන්ම පත්‍රයේ කොතැනක හෝ) ශනි සිටීමයි. ඒ හැර විවාහයට බාධා කරන ග්‍රහ පිහිටීම් රාශියක පහත දැක්වෙන ආකාරයේ පිහිටීම්වලින්ද විවාහ බාධා ඇතිවෙයි.
- බුධ ග්‍රහයා අටවැනි රාශියේ ගෝචරවීම.
- කුජ අටවැනි රාශියේ සිටීම.
- ගුරු ග්‍රහයා මීන රාශියේ සිටීම.
- සිකුරු ග්‍රහයා මකර හෝ මීන රාශියේ සිටීම.
- සිකුරු සහ සඳු ග්‍රහයන් සතුරු (නීච) ග්‍රහයන්ට මැදිවීමෙන් විෂ කන්‍යා යෝගය පිහිටීම.
මෙසේ අසුබ යෝග නිසා සිදුවිය හැකි විවාහ දෝෂ රාශියකි. ලිපිය දිගුවන නිසා ඒ දෝෂ නාමික වශයෙන් පෙන්වාදීමට අදහස් කරමි. ප්‍රේම සබඳතා බිඳවැටීම, මංගල යෝජනා බිඳ වැටීම, විවාහ යෝජනා ඉදිරිපත් නොවීම, විවාහ (මංගල) පොරොන්දම් නොගැළපීම, විවාහය පමාවීම, තමාට විවාහය අවශ්‍ය නැතිවීම, විවාහ වූ පසු දෙදෙනා දෙතැනක ජීවත්වීම, විවාහයෙන් පසු එකෙකු විදේශගත වීම හෝ රට තුළ ස්ථාන මාරු ලැබීම, විවාහයෙන් පසු එකෙකු බන්ධනාගාර ගතවීම, විවාහයෙන් පසු රෝගී වීම, විවාහයෙන් පසු අනියම් සබඳතා ඇතිවීම, ලිංගික ඛෙලහීනතාව, දරුපල පමාවීම, ආර්ථික බිඳවැටීම්, වැඩිහිටියන්ගේ උදහසට ලක්වීම, රැකියා අහිමිවීම හා ආර්ථික පරිහානිය, දික්කසාදය සහ එකෙකුගේ මරණය. මෙපමණක් නොව තවත් කරුණු රාශියක් විවාහයට බලපානු ලැබේ. මේ නිසා විවාහ වීමේදී පොරොන්දම් හා භෞම දෝෂ නොමැති අය හා විවාහය මැනවි. එසේම පවත්නා දෝෂ මඟහරවා ගන්නට ගුප්ත විද්‍යාත්මක ප්‍රතිකාර ලබාගැනීමද වැදගත්ය. කළුකුමාර දෝෂය පහසුවෙන් ඉවත් කරගත හැකි දෙයකි. විවාහ ගැටලුවලට හොඳම ගුප්ත විද්‍යාත්මක පිළියම චූල ජිනපංජරය වෙයි.
එස්. වීරරත්න ශාස්ත්‍රවේදී විශ්‍රාමික විදුහල්පති - සාම විනිසුරු 0727430179 උපුටා ගැනීම මව්බිම පුවත් පත
