දරැවන්ට අකුරැ කියවීමේ නැකැත් ගැන ඔබ මේවා දන්නවාද?
සිය ආදරණීය දරුවාට අකුරු කියවීම නක්ෂත්‍රානුකූලව සුළු මංගල්‍යයක් ලෙස පැවැත්වීම අපේ සංස්කෘතිකාංගයක් ලෙස සැලකීමට බොහෝදෙනා පුරුදු වී සිටිති. සුරතල් ලෙස බස හසුරුවන දරුවාට නැවත නැකතකට අකුරක් කියවීම අවශ්‍යද? අප භාවිත කරන අකුරු කියවීමේ නැකත යනුවෙන් අදහස් කරන්නේ විධිමත් අධ්‍යාපනය සඳහා මූලික අඩිතාලම දැමීමේ නැකතයි. අපේ සංස්කෘතියට ඇබ්බැහි වී ඇති ආකාරයට බොහෝ දෙනා අදහස් කරන ආකාරයට මේ සඳහා සුවිශේෂ වූ නැකතක් පිළියෙළ කර ගත යුතුවේ. දරුවාගේ කේන්ද්‍රයට සරිලන ආකාරයට නැකතක් පිළියෙළ කර ගැනීම වැදගත්ම කාර්ය වේ. දරුවාගේ වයස අවුරුදු තුන සම්පූර්ණ වීමට පෙර මෙම නැකත යොදා ගත යුතුය යන්න එක්තරා අදහසක් වේ. ජ්‍යොතීර්වේදියා මේ සඳහා ජ්‍යොතීර්වේදයේ සඳහන් වන රිතීන්ට අනුකූල වන ලෙස නැකත් වේලාව සකස් කර දිය යුතුව තිබේ. මෙහිදී පරිණත ජ්‍යොතීර්වේදියා සෘෂිවරුන් විසින් ඒ සඳහා ලබා දී ඇති උපදෙස් අනුව ශුභ මුහුර්තය සකස් කළ යුතුවේ. මෙහිදී ශුභ නැකත පවතින මොහොතේදී මේෂ, මිථුන, කටක, කන්‍යා, තුලා, වෘශ්චික, ධනු, මීන වැනි ලග්නයක් උදා වී පැවැතිය යුතුයැයි සඳහන් වේ. මෙම රාශි දරුවාගේ උපන් රාශියට ගැළපීමේ තත්ත්වයද සලකා බැලිය යුතු වේ. මේ කාර්යය සඳහා ශුභ නැකත් ලෙස, අස්විද, රෙහෙණ, මුවසිරස, අද, පුනාවස, මා, පුෂ, හත, සිත, විසා, අනුර, සුවන, දෙනට, සියාවස, රේවතී, උත්‍රපල, උත්‍රපුටුප, පුවපුටුප, නැකත් යෝග්‍ය යැයිද සඳහන් වේ. මේවාද දරුවාගේ උපන් නැකතට සීහෙන එකක් විය යුතු වේ. තවද පුර පක්ෂයේ පුර දසවක, තියවක, විශේනිය දසවක, එකොළොස්වක හා තෙළෙස්වක යන තිථියක්ද විය යුතුය. නැකත යෙදෙන අවස්ථාවට උදාවී ඇති රාශිය 8 වැන්න ශුභ විය යුතු අතර කුජ 2, ශනි 4, 7, 6, 12 යන ස්ථානයකද නොසිටිය යුතුය. මේ සියලු කරුණු සලකා පරිණත ජ්‍යොතීර්වේදියකු ඔබේ දරුවාට විධිමත් අධ්‍යාපනය ආරම්භ කිරීමේ (අකුරු කියවීමේ) නැකත පිළියෙළ කරදෙනු ඇත. මෙම ශුභ නැකත් මොහොතට පෙර සිය ආගමානුකූල කටයුතුවල යෙදී සරස්වතිය හා ගණදෙවි වෙනුවෙන් ගිතෙල් පහන් දල්වා උක් හකුරු, කිරිබත්, කැවිලි 5 වර්ගයක් හා පලතුරු 5 වර්ගයකින් සැදුම්ලත් පූජාවන් කළ යුතු බවද ජ්‍යොතිෂයේ දැක්වේ.
මෙම කටයුතුවලින් පසු එළඹෙන ශුභ නැකත් මොහොතේදී එම දිනයට අනුව නියම කරන ලද දිශාවන් බලා අකුරු කියවිය යුතු බව සඳහන් වේ. කවුරුන් විසින් දරුවාට අකුරු කියවිය යුතුද යන්න බොහෝදෙනෙක් විමසන ප්‍රශ්නයකි. නායක හිමිනමක්, මහාචාර්යවරයෙක් හෝ වෙනත් සුවිශේෂ වූ උගතෙකු විසින් අකුරු කියවනු ලැබූ විට එම ආශ්චර්යයෙන් දරුවාගේ අධ්‍යාපන කටයුතු සාර්ථක වනු ඇතිය යන්න බොහෝදෙනෙක් විශ්වාස කරති. සිය දරුවාට ශාස්ත්‍රාරම්භයට, අත්‍පොත් තැබිමට සුදුසුම පුද්ගලයන් වන්නේ මව හා පියා පමණි. මව සහ පියාගේ අධ්‍යාපන මට්ටම පහත් යැයි හීනමානයට පත් වී බාහිර වෙනත් කෙනෙකුට මෙම උතුම් කාර්ය පැවැරීම සුදුසු ක්‍රියාවක් නොවේ. සෙනෙහස නිසා ලේ කිරි බවට පත්වන අම්මාටත් දහඩිය මුගුරු හෙලා ඔවුන් සුරකින පියාත් හැර මේ සඳහා වෙනත් සුදුස්සෙක් සිටීද? සෙනෙහසින් දහමින් සිය ආදරණීය දරුවා මෙහෙයවමින් කටයුතු කිරීම තුළින් දරුවන් උසස් තත්ත්වයට පත් කළ මාපිය දහස් ගණනකගේ සටහන් මා සතුව තිබේ. දැඩි තරගකාරී තත්ත්වයක් පවතින වර්තමාන දුර්වල අධ්‍යාපන ක්‍රමය තුළ අනවබෝධය නිසා මහත් පීඩාවට පත්වන ශිෂ්‍යයන් හා දෙමාපියන් කෙතරම් ප්‍රමාණයක් සිටිතිද?
පුද්ගලයකුගේ කේන්ද්‍රය තුළ ඔහු සසර පුරා රැස්කර ගෙන එන කුසලතාවයන් මනා ලෙස ගැබ් වී තිබේ. පරිණත ජ්‍යොතීර්වේදියකුට ඒවා නිසි ලෙස හඳුනාගෙන ඔහු හැදෑරිය යුතු විෂය පද්ධතිය අවබෝධ කර ගත හැකි වේ. වෛද්‍යවරයකු, ඉංජිනේරුවරයකු, නීතිඥයෙකු හා වෙනත් ඕනෑම අංශක් සඳහා ප්‍රවීණ කුසලතාවයන් කේන්ද්‍රයේ සටහන් වේ. එය හඳුනාගෙන අධ්‍යාපන මාර්ගය තෝරා ගත් විට ඉතා පහසුවෙන් දරුවා සිය ඉලක්කය කරා මෙහෙයවීමට හැකි වේ. අවාසනාවකට මෙන් වර්තමානයේ මේ අනවබෝධය හා වැරදි ආකල්ප හා වැරදි අධ්‍යාපන ක්‍රම නිසා ඉච්ඡා භංගත්වයට පත් වූ විශාල පිරිසක් මෙරට තුළ සිටින බව දකින්නට පුළුවන. ජ්‍යොතිෂයේ දැක්වෙන අකුරු කියවීමේ නැකත යන මංගල්‍ය සියලු ආශ්‍රයෙන් මේ සියලු කාරණාවන් අවබෝධ කරගන්නේ නම් රටේ දරුවන් තුළ පවතින අතෘප්තිය හා අසහනය පහ වී සමෘද්ධිමත් පුරවැසි පිරිසක් බිහි කර ගත හැකි වන්නේය. රටේ අවාසනාවට බොහෝ ජ්‍යොතීර්වේදීන් සිය අනුග්‍රාහකයන්ට අපල, උපද්‍රව පෙන්වා ඔවුන් සෘණ මානසිකත්වයට හා හීනමානයට පත්කරමින් ඉණ ඉහ අත ගා ගෙන තව තවත් ප්‍රපාතයට පත්කරවන ආකාරයක් වර්තමානයේ දකින්නට ලැබේ. ප්‍රවේශමෙන් පුද්ගලයාගේ අපල උපද්‍රව හඳුනාගෙන එහි බර ඔහු මත නොදරා උපක්‍රමශීලීව පිළියම් යෙදීම ජ්‍යොතීර්වේදියකු සතු යුතුකම හා වගකීම වන්නේය. අපේ මාහැඟි සංස්කෘතියට අනුව වෙනත් සිද්ධීන් මෙන්ම අකුරු කියවීම හෙවත් විධිමත් අධ්‍යාපනය සඳහා දරුවාගේ ගමන් මග ආරම්භ කරන සංධිස්ථානය පිළිබඳ චාරිත්‍ර වාරිත්‍ර සකස් කර ඇත්තේද විශාල ප්‍රමිතියකට අනුව ඉදිරි ගමන ගොඩනැගෙන ආකාරයට බව පැහැදිලි වේ. අඩ සියවසකට වැඩි කලක් උපක්‍රමශීලීව උපදෙස් ලබා දෙමින් කේන්ද්‍රයේ ග්‍රහ දුර්වලතා පරාජය කරමින් සමාජයේ ඉතා ඉහළ තැන්වලට පත්කළවුන් දස දහස් ගණනකගේ අත්දැකීම් මා සතුව තිබේ.
උපුටා ගැනීම ලක්බිම පුවත්පත
