දරුපල ප්‍රමාදය වළක්වන පැරැණි කෙම් ක්‍රම
වර්තමානයේ විවාහක තරුණ තරුණියන් වෙත පැනනැඟී ඇති ප්‍රධාන වශයෙන් ජේ‍යාතිර්වේදීන් වශයෙන් අප වෙත ඉදිරිපත්වන ගැටලුවක් වන්නේ නිසි කලට දරුපල අහිමි වීමයි. එසේ වීමට හේතුව වශයෙන් පෙන්වා දිය හැක්කේ පසුගිය භවයන් තුළ සිදු කළ සර්ප ඝාතන, මවුපියන්ගේ ශාපයන්ට ලක්වීම, ගබ්සා කිරීම, දරුවන්ට වෙනස්කම් කිරීම ආදී කරුණු වේ. මත් පැන් හා මත් ද්‍රව්‍යවලට ඇබ්බැහිවීම. විශේෂයෙන් පුරුෂ පක්ෂය දීර්ඝ වේලාවක් ශරීරයට තද යට ඇඳුම් භාවිතය. දැඩි උෂ්ණ ස්ථානවල දීර්ඝ වේලාවක් සේවය කිරීමට සිදුවීම. x කිරණවලට නිතර නිතර යොමු වීම. ගුවන් තොටුපොළ පරිශ්‍රයේ සවිකර ඇති සිරුර විනිවිද යන කිරණ සහිත යන්ත්‍ර තුළින් නිතර ගමන් කිරීම. ඡායා පිටපත් යන්ත්‍ර අසල නිතර සේවය කිරීමට සිදුවීම.
දරුපල පිළිබඳ විමසීමේදී ප්‍රධාන වශයෙන් ස්ත්රී - පුරුෂ දෙදෙනාගේම කේන්ද්‍රවල බැලිය යුතු විශේෂ ග්‍රහ යෝග තිබේ.
පස් වැන්නාධිපතිගේ පිහිටීම නිරීක්ෂණය කළ යුතු වේ. එනම් 5 අධිපති 8, 12 වැනි රාශියක තැන්පත්වීම දරුපල අඩු වීමට හේතු වේ. 5 අධිපතියා ශනි සමඟ යෝග වීම. 5 වැන්න තුළ කුජ, ශනි, රාහු, කේතු වැනි පාප ග්‍රහයන් දුර්වලව තැන්පත් වීම. ඉහත පාප ග්‍රහයන් ස්ත්රී කේන්ද්‍රයේ 12 වැන්නේ තැන්පත් වීම තුළින් ගබ්සාවීම්වලට ලක්විය හැකිය. 5 අධිපතියා වක්‍ර තත්ත්වයට පත්වීමෙන් දරුපල අහිමි වීමට හේතුවක් වේ. 5 වැන්න, 9 වැන්න, 11 වැන්න හා 2 වැන්න එහි අධිපතීන්ගේ හා ඔවුන් රැඳී සිටින නැකැත්, එම රාශි තුළ තැන්පත් ග්‍රහයන්, එම ග්‍රහයන් රැඳී සිටින නැකැත්, එම ග්‍රහයන්ට වැටෙන ග්‍රහ දෘෂ්ටි පිළිබඳ ඉතා විමසිලිමත් විය යුතුයි. මිථුන, සිංහ, කන්‍යා වැනි වඳ රාශියක් 5 වැන්න වූ විට දරුපල හීන වීමට බලපානු ඇත. තවද 5 අධිපතියා 22 වැනි දෙර්කාණාධිපතියා 64 වැනි නවාංශකාධිපතියා හෝ බාධක ග්‍රහයා වුවහොත් තත්ත්වය තවත් නරක් විය හැකි අතරම 5 වැන්න තුළ ඉහත ග්‍රහයන් තිදෙනාගෙන් එක් අයකු හෝ තැන්පත් වීමද අහිතකර විය හැකිය. ඉහත සඳහන් කරන ලද්දේ ලග්නයෙන් 5 වැන්න පිළිබඳවය. එමෙන්ම චන්ද්‍ර කේන්ද්‍රය සාදා ඒ තුළින් ද ආරූඪ ලග්නය සොයා ඒ තුළින්ද ඉහත කරුණු පරීක්ෂා කිරීමෙන් එම ස්ත්‍රියට හෝ පුරුෂයාට දරුපල ඇතිද නැතිද යන වග සූක්ෂ්ම ලෙස පරීක්ෂා කළ යුතුය.ඔබගේ දැන ගැනීම සඳහා ඒ ඒ ලග්නවලට 5 වැන්නාධිපතියා පහත සඳහන් පරිදි පෙන්වා දෙමි. මේෂ - රවි වෘෂභ - බුධ මිථුන - සිකුරු කටක - කුජ සිංහ - ගුරු කන්‍යා - ශනි තුලා - ශනි වෘශ්චික - ගුරු ධනු - කුජ මකර - සිකුරු කුම්භ - බුධ මීන - සඳු ඔබගේ පහසුව තකා ඉහත 5 වැන්නාධිපතියා කවුරුන්ද යන්න පෙන්වා දුන් නමුත් ඔබ කේන්ද්‍රය තුළ පිහිටි ග්‍රහයන්ගේ බල දුබලතාව හා නැකැත්, ග්‍රහ දෘෂ්ටි පිළිබඳ යම් අවබෝධයකින් තොරව තීන්දු තීරණ ගැනීම තුළින් අයහපතක් සිදු විය හැකි බැවින් ඒ සඳහා පළපුරුදු ජේ‍යාතිර්වේදී මහතකුගේ සහාය අනිවාර්යයෙන්ම ලබා ගැනීම ඉතා යහපත් වේ. තවද ඉහතින් වඳ දෝෂ හෙවත් දරුපල අහිමි කිරීමට යෙදෙන කරුණු කීපයක් පෙන්වා දුන් නමුත් යම් විදියකින් ගුරු ග්‍රහයා ඉතා බලවත්ව 5 වැන්නේ තැන්පත් වීම තුළින් හෝ 5 වැන්නට සුබ දෘෂ්ටියක් දීම තුළින් ඉහත දෝෂ භංග වී දරුපල ඇති වීමට ඉඩ ඇත. තවද ස්ත්රී - පුරුෂ විවාහයට ප්‍රථම පොරොන්දම් පරීක්ෂා කිරීමේදී වෘක්ෂ පොරොන්දම සුබ වූ විට ඉතා හොඳින් දරුපල ඇති බවටත් වෘක්ෂ පොරොන්දම් දුර්වල වූ විට දරුපල අහිමි බවටත් මතයක් පවතී. එය එසේ නොවන බව තරයේ සිතට ගන්න. මෙම පොරොන්දම අසුබ වී දරුවන් සිටිනා අයත් මෙම පොරොන්දම සුබ වී දරුවන් නොමැති අයත් ඕන තරම් සොයා ගත හැකිය. එබැවින් අන් සැම කරුණකටම වඩා විවාහ වීමට සිටින ස්ත්රී - පුරුෂ දෙදෙනාගේ කේන්ද්‍ර දෙකෙහි දරුපල පරික්ෂා කිරීමෙන් පැහැදිලි තීරණයකට කලින්ම එළැඹිය හැකිය. තවත් නොගැළපෙන අදහසක් අප සමාජයේ මුල් බැසගෙන ඇත. එනම් දරුවන් නොමැති නම් එම වගකීම සම්පූර්ණයෙන් ස්ත්‍රිය මත පැටවීමයි. එය මුළුමනින්ම වැරැදි තීන්දුවකි. දරුපල ඇති නැති බවට පුරුෂයාත් ස්ත්‍රිය තරමටම වගකිව යුතුවේ. ඉහත දැක්වූ සියලු කරුණු පුරුෂ කේන්ද්‍රය තුළින්ද පරීක්ෂා කර බලා නිගමනවලට එළැඹිය යුතු වේ. ඉහත කරුණුවලට අමතරව කේන්ද්‍රයේ 7 භාවය පිළිබඳ ඉතා විමසිලිමත් විය යුතුවේ. එයට හේතුව නම් දෙදෙනාගේ කායික ගැළපීම නිවැරැදිව තිබේද යන්න පරීක්ෂා කරන්නේ මෙම භාවයෙන් වන බැවිනි. 7 වැන්න අධිපති, එයට වැටෙන අසුබ ග්‍රහ දෘෂ්ටි එහි තැන්පත් ග්‍රහයන් මේ තුළ රාහු, කේතු, රවි, ශනි, බුධ වැනි ග්‍රහයන් ඉතා දුර්වලව පිහිටීම තුළින් ඒ සඳහා වන උනන්දුව අඩු වන බැවින් දරු පිළිසිඳ ගැනීමක් සිදුවිය නොහැකිය.
පින්වත් නිරෝගී දරු උපතක් :
මේ සඳහා හැකි තරම් උෂ්ණාධික ආහාර පානවලින් වැළකී ශරීරය සිසිල් කරන ආහාරපාන ගැනීම මඟින් ඔබේ බලාපොරොත්තු සඵල කරගත හැකිය. හැකි තරම් උදය වරුවේ ස්නානය කිරීම යහපත් වේ. ස්නානයෙන් පසුව සුවඳ වර්ග ඇඟ ගැල්වීම ඉතා සුදුසුය. එමඟින් ගන්ධබ්බයන් එම ශරීරයට ආකර්ෂණය වේ. දරුවන් එක් අයකු හෝ ලබා ගන්නා තෙක් හැකි තරම් උපත් පාලනය නොකළ යුතු වේ. දීර්ඝ කාලයක් එම බෙහෙත්වලට හුරු වූ විට වඳභාවයට පත්වීමට ඉඩ තිබේ. සතියකට වරක් හෝ කොහොඹ කොළ කොටා එළකිරි සමඟ උදෑසන පානය කිරීම යහපත් වේ. හැකි තරම් ජලය පානය කිරීම යහපත් වේ. පුරුෂයා හැකි තරම් තැඹිලි මදය සමඟ පානය කිරීම ඉතා සුදුසුය.
දරුපල අහිමි අයට සරල කෙම් ක්‍රමයක් :
දරුපල අහිමි වී බලාපොරොත්තු කඩකරගෙන සිටින අය මෙම කෙම් ක්‍රමයද අත්හදා බලන්න. පසළොස්වක පෝය දිනක සියඹලා ගසකින් දලු මිටක් කතා නොකර රහසේ කඩා ගෙන සපා ගිලින්න. (මේ සඳහා සියඹලා ගස තෝරාගෙන ඇත්තේ ජන වහරේ සඳහන් අන්දමට කතරගම දෙවියන්ගේ බිරියක් වන වල්ලිඅම්මාගේ වාසභවන සියඹලා ගස බවට විශ්වාසයක් පවතින බැවිනි.) මේ සඳහා හිතේ චකිතයකින් අවිශ්වාසයකින් තොරව දැඩි විශ්වාසයකින් කරන සියලු කටයුතු සිදු කිරීම තුළින් ලැබෙන ප්‍රතිඵල ද ඉතා යහපත් වේ. වල්ලිඅම්මා දේවාලයට (කතරගම) භාරවීම තුළින්ද යහපතක් උදාකර ගත හැකිය. දරුවන් බලාපොරොත්තුවෙන් සිටින අය නිතරම ගැබිනි මාතාවන්ට මුළු හදින්ම උදවු උපකාර කර ආහාරපාන ආදිය ලබා දිය යුතු වේ. කුඩා දරුවන්ටද අසීමිත ලෙස ආදරය, කරුණාව දැක්විය යුතුවේ. ඔවුන්ට තෑගි බෝග ලබා දී සතුටු කළ යුතු වේ. ඒ සෑම ක්‍රියාවක් අවසානයේම මා හටත් මෙවැනි සම්පතක් ලැබේවායි ප්‍රාර්ථනා කරන්න. දරුවන් බලාපොරොත්තුවෙන් සිටින අය පහත සඳහන් ක්‍රමය අනුගමනය කිරීමෙන් නිරෝගී බලවත් දරුවකු ලබාගත හැකි වේ. ස්ත්රී මාස් ශුද්ධියෙන් පසු පහත සඳහන් දිනයන්වල එක්වීම තුළින් ඉදිරියෙන් දක්වා ඇති ගතිගුණ පිහිටි දරුවන් ලැබෙන බවට පොත පතේ සඳහන් වේ. 6 වැනි දින රාත්‍රි - පරපුර ඉදිරියට ගෙනයන දරුවෙක් 8 වැනි දින රාත්‍රි - රුවැති පුතෙක් 9 වැනි දින රාත්‍රි - රුවැති දුවෙක් 10 වැනි දින රාත්‍රි - බලවත් දරුවෙක් 12 වැනි දින රාත්‍රි - වාසනාවන්ත පුතෙක් 14 වැනි දින රාත්‍රි - ධාර්මික ගුණැති පුතෙක්. 15 වැනි දින රාත්‍රි - වාසනාවන්ත දුවෙක් 16 වැනි දින රාත්‍රි - ප්‍රඥාවන්ත පුතෙක් ඉහත සඳහන් නොකළ දිනවල එක්වීමෙන් නොයෙක් ආබාධ සහිත දරුවන් බිහි වීමට ඉඩ ඇති අතර, අල්පායුෂ ඇති දරුවන්ද බිහි වීමට ඉඩ ඇති බැවින් ඒ පිළිබඳ සැලකිලිමත් වී නිරෝගී දරුවකු බිහි කර ගැනීම ඔබගේ වගකීම වේ. දරු පිළිසිඳ ගැනීමක් සඳහා එක්වන මොහොතේ තත්කාල ග්‍රහ පිහිටීම බලවත් වූ විට ඉතා බලසම්පන්න නිරෝගී දරුවකු ජනිත වනු ඇත. එවැනි ක්‍රම මෙවැනි ලිපියකින් ඉදිරිපත් කිරීම ඉතා අපහසු කටයුත්තකි. එය අවබෝධ කර ගැනීමද පාඨක ඔබට තරමක් අපහසු වනු ඇත. අතීතයේදී ඒ සඳහා සුබ මුහුර්ථ සකස් කරවාගෙන ඒ කටයුතු සිදු කිරීම තුළින් ඉතා ප්‍රබල දරු උපත් සිදු කළ බවට සාධක ඇත. එවැනි අවශ්‍යතාවක් වෙතොත් ඔබට විශ්වාසවන්ත ජේ‍යාතිර්වේදී මහතකු ලවා සුබ මුහුර්තයක් සාදා ගෙන ඒ අනුව කටයුතු කිරීම තුළින් ඉතා උසස් ප්‍රතිඵල අත්කර ගත හැකිය. දරුපල අහිමි යුවතිපතීන්ට දෙන අවවාදය නම් හැකි තරම් පින්දහම්වලට යොමු වන්න. ඒ අතරම වෛද්‍ය උපදෙස්ද පිළිපදින්න. අනුරාධපුර ජය ශ්‍රී මහා බෝ සමිඳු අබියසට ගොස් අලුයම් කාලයේ බෝධි පූජාවක් තබා දෙවියන්ට පින් අනුමෝදන් කර පින්වත් දරුවකු ලබා දෙන ලෙස ප්‍රාර්ථනා කරන්න. ඔබගේ පැතුම් ඒ අයුරින්ම සඵල වේ.
ජේ‍යාතිෂ්‍යවේදී, ගැටහැත්ත ජේ. ජී. එස්. ආර්. ජයරත්න 0724525651
උපුටා ගැනීම මව්බිම පුවත්පත
