රාහුගෙන් සුබපලත් ලබන්න පුලුවන් ද කියල දන්නවාද?
“එයාට රාහු ලබල යැයි කවුරුන් හෝ සම්බන්ධයෙන් කෙනෙකු පවසන්නේ රාහු යනු සුබ ග්‍රහයෙකු නොවේය යන ආකල්පය මතය. එහෙත් රාහු නරකට සිටි විට නරක ග්‍රහයෙකු වුවද හොඳට සිටින විට ඉතා හොඳ ග්‍රහයෙකි. රාහු සම්බන්ධයෙන් විශේෂත්වයක් වන්නේ රාහු දෘශ්‍යමාන ග්‍රහ වස්තුවක් නොවීම ය. ඒ අනුව රාහුට යැයි විශේෂිත වූ වෙනම රාශියක්ද නැත. රාහු සිටින ස්ථානයේ ග්‍රහයාගේ බලය මත රාහුගේ හොඳ හෝ නරක තීරණය වේ. රාහු සිටින්නේ නරක ග්‍රහයකු රාශියක නම් රාහුගේ බලපෑමද සුබ නොවේ. එහෙත් සුබ ග්‍රහයකුට අයත් රාශියක සිටින විට රාහුද ඉතා සුබ ආකාරයෙන් ක්‍රියා කරනු ඇත. ඒ ආකාරයටම රාහු බලවත් වූ සුබ ග්‍රහයෙකුගේ දෘෂ්ටියට ලක් වන අවස්ථාවේදී සුබ බලපෑමක් එක් කර දෙද්දී එහි අනෙක් පැත්තද එසේමය. රාහු වැඩිපුරම සුබ නොවන්නේ 5, 9, 12 රාශින්වලදීය ජන්ම පත්‍රයක පස්වැන්න අධ්‍යාපනය හා ආදරය පිළිබඳ පවසන රාශියයි. පස් වැන්නේද රාහුගේ බලපෑම සුබ නොවන්නේ අධ්‍යාපනය සම්බන්ධයෙන් චිත්ත ශක්තිය දුර්වල කරවීම, ධාරණ ශක්ති හීන කරවීම හා රාහුගේ දුර්වල බලපෑම් නිසා අධ්‍යාපනය කඩාකප්පල් කර දැමීමට පවා හේතු විය හැකි නිසාය. ආදරය සම්බන්ධයෙන්ද පස්වැන්නේ රාහුගේ බලපෑම හේතුවෙන් ආදර සබඳතා බිඳවැටීම්වලට ලක්විය හැකිය. නවවැන්න ආගමික ස්ථානය වන අතර ආගමික කටයුතු සම්බන්ධයෙන් රාහුගෙන් කිසිදු උදව්වක් නොලැබිම නිසා නව වැන්නට රාහු සුබ නොවේ. දොළොස් වැන්නට රාහු සුබ නොවන්නේ රාහු ඉතිරි කරන්නට කැමති ග්‍රහයකු නොවන නිසාය. රාහු රැස් කිරීමට ආශාවක් නොදක්වන ග්‍රහයෙකු නිසා රාහු දොළොස්වැන්නට පැමිණීම හේතුවෙන් ලැබිම් සඳහා භාග්‍යය අහිමි විය හැකිය.
* ඥාන යෝගයක් ඇති විට රාහුගේ බලපෑම සුබවේ රවි, බුධ බලවත්වීමෙන් ඇතිවන ඥාන යෝගයකදී රාහු ද ඊට සම්බන්ධ වූ විට ඉගෙනීම වේගවත් කරමින් අධ්‍යාපනය සම්බන්ධයෙන් ඉතා හොඳ බලපෑමක් ඇති කරවයි.
* ධන යෝගයක් ඇති විටද රාහුගේ බලපෑම සුබවේ ධන යෝගයට රාහු සම්බන්ධ වූ විට ධනය ගලා ඒමට පටන් ගනිමින් මහා ධනවතෙකු බවට පත් කරවයි. එහෙත්, මෙහි ඇති අහිතකර බව වන්නේ රාහුගේ දශාව නිමා වූ සැනින් ධනය ගලා ඒමද ඇන හිටීමයි.
* රාහුගේ අහිතකර බලපෑමෙන් සර්ප දෂ්ඨන, වසවිෂ ශරීරගත වීම් පිස්සු බල්ලන්ගේ සපා කෑම් ආදියට ලක්විය හැකිය.
* රාහුගේ අයහපත් බලපෑම් හේතුවෙන් කෙනෙකු මත්පැන් මත්ද්‍රව්‍ය ආදියට ඇබ්බැහිවීමටත් නරක මිතුරන්ගේ ඇසුරට පත්වීමටත් ඉඩ තිබේ.
* රාහු දුර්වලව අසුබ ස්ථානවල සිටිද්දී රාහු දශාවක්ද ලැබූ විට වයෝවෘද්ධ ළඟම ඥාතීන්ගේ අභාවයන් ඇතිවිය හැකිය. නැතිනම් සීයලා ආච්චිලාට සුබ නොවිය හැකිය.
* රාහු අටවැන්නේ අසුබව සිටි විට දැඩි චිත්ත පීඩා හෝ මානසික රෝග පවා හටගත හැකි අතර විවාහ ජීවිතය පවා දෙදරා යා හැකිය.
* රාහු හත්වැන්නේ බලවත් වූ විට එම කේන්ද්‍රය හිමි කරුවාට ඉතා රූමත් භාර්යාවක් ලැබෙන මුත් එය දිගුකල් පවතින්නක් නොවන බව පැවසේ.
* රාහු දෙවැන්නේ බලවත් වූ විට ඉතා සුන්දර වූ මුහුණක් හිමිවේ. දුටුවනම කාගෙත් නෙත් සිත් පැහැර ගන්නා ආකාරයේ රූසපුවකට හිමිකම් ලබයි. එහෙත් රාහු දෙවැන්නේ අසුබව පිහිටි විට කුරුලෑ ලප කැළැල් වලින් පිරි මුහුණක් උරුමවේ.
* රාහු දොළොස්වැන්නේ අසුබව පිහිටි විට නොකළ වැරදි වලට පවා සිරගතවීමට සිදුවේ. එහෙත් දොළොස්වැන්නේ රාහු බලවත්ව සුබව පිහිටි විට කුමන වරදකට හෝ හිරේ විලංගුවේ දැමිය නොහැකිය.
ජාඇල. නිවන්දම විශ්‍රාමලත් විදුහල්පති ජ්‍යොතිර්වේදි එම්.ටී. ධර්මසේන.
උපුටා ගැනීම ලක්බිම පුවත්පත
