නිදන ඇඳ තැබීමට හොඳම තැන
වාස්තු ශිල්පයට අනුව ඔබගේ ගෘහය සකස්කර ගැනීම තුළින් ජීවිතය ඉතාමත් වාසනාවන්ත කරගැනීමට නිතැතින්ම හැකියාව ලැඛෙනු ඇත. නිවෙසක් පිළිබඳ සිහින මවන ඔබ සැමවිටම වාස්තු ශිල්පයේ සීමාවන් යටතේ ඔබගේ ගෘහයේ සැලැස්ම පිළියෙල කර ගැනීමට කැමැති විය යුතුයි. මෙම කැමැත්ත කෙනකුට ඇතිවන්නේ නිකම්ම නොවේ. එයට පෙර කුසල් තිබිය යුතුයි. පෙර කුසල් නොමැතිවිට යහපත් දෑ කිරීමට සිත නැවෙන්නේ හෝ අවස්ථාව උදා වෙන්නේ නැහැ. ඍෂිවරුන්ගේ දහමක් වන වාස්තු ශිල්පය තමන්ගේ ජීවිතයට එක්කර ගැනීමට ඔබ සැමවිටම සිතට ගත යුතුයි.
වාස්තු ශිල්පයේ සියලු සිද්ධාන්ත යොදා ගෙන ඔබගේ ගෘහය ඉදිකළ ද ඔබ එම ගෘහය නිසියාකාරයෙන් පරිහරණය කෙළේ නැත්නම් එහි සැබෑ යහපත් ප්‍රතිඵල නෙළා ගැනීමට නොහැකි වෙනවා. මේ නිසා ඔබගේ ගෘහය පරිහරණය කිරීම වාස්තු ශිල්පයට එකඟවම කිරීමට හිතට ගන්න. ගෘහය ඉදිකිරීමෙන් පමණක් වාස්තු ශිල්පය අවසන් නොවන අතර ගෘහය ඉදිකර එය පරිහරණය කරන ක්‍රියාපිළිවෙතද බලපාන බව මතක තබා ගන්න.
නිදන ඇඳ තැබිය යුතු ආකාරයඔබගේ නිවෙසේ නිදන ඇඳ තැබීමේ දී එය නිසි පරිදි ස්ථානගත කිරීම ඉතාමත් වැදගත් වෙනවා. නිදන ඇඳ නිසි පරිදි තබා නොමැති වීම ඔබට මානසික පීඩනය, නිදන්ගත රෝග මතුවීම, තරහා යෑම ආදී අයහපත් දෑ දැනෙන අතර දීර්ඝ කාලීන රෝගී තත්ත්ව උත්සන්න වීමටද හේතු වේ. මේ නිසා දරුඵල අහිමි වීම හා ස්වාමි භාර්යා සම්බන්ධය ද අයහපත් විය හැකිය. නිදන ඇඳ තැබීමේ දී පහත සඳහන් ක්‍රමයන් අනුගමනය නොකිරීමට වගබලා ගන්න.
1) උතුරු දිශාවට හිස දමන ලෙස තැබීම 2) බ්‍රහ්ම පාදය උඩ තැබීම 3) යට ලීයකට හෝ බාල්කයකට ඡේදනය වන ලෙස තැබීම 4) පඩිපෙළක් යට යෙදීම 5) මුළුතැන්ගෙය උඩට යෙදීම හෝ යටට යෙදීම 6) බොක්ස් ඇඳවල් භාවිත කිරීම 7) පැරැණි ඇඳන් භාවිත කිරීම 8) කළු පැහැති ඇඳන් භාවිත කිරීම 9) දරුණු සතුන්ගේ හෝ යක්ෂ රූපය සහිත කැටයම් යෙදූ ඇඳන් භාවිතය 10) ආගමික වතාවත් සිදුකරනු ලබන ස්ථානයකට ලම්බකව ඉහළින් ඇඳ තැබීම 11) ආගමික කටයුතු සිදු කරනු ලබන ස්ථානයට දෙපා යෙදෙන ලෙස ඇඳ තැබීම
ඉහතින් පෙන්වා දුන් ආකාරයට ඔබගේ ගෘහයේ නිදන ඇඳන් නොතැබීමට වග බලා ගත යුතුයි. බොහෝ පිරිස් නොදැනුවත්කම නිසා ඉහත සඳහන් කර ඇති වැරැදි ආකාරයකට සහ වැරැදි ස්ථානවල සහ වැරැදි හැඩතල සහිතව නිදන ඇඳ භාවිත කරන බව පෙනී යනවා. වාස්තු ශිල්පයට අනුව ඔබ ඉහත වැරැදි සිදු නොවන ලෙස නිදන ඇඳ ස්ථානගත කිරීමට මතක තබා ගත යුතුයි. ඉහත වැරැදි සහගත ක්‍රමවලින් බහුලව සිදුවන වැරැදි දෙකක් පෙන්වා දිය හැකියි. එනම් නිදන ඇඳ යොදන දිශාව සහ නිදන ඇඳ යට ලී හා බාල්කවලට හසු වීමයි. මෙහිදී ඔබට ප්‍රායෝගිකව එම වැරැදි නිවැරැදි කර ගැනීමට ඇවැසි උපදේශය වන්නේ ඔබගේ නිදන ඇඳ උතුරු දිශාව හැර වෙනත් ඕනෑම දිශාවකට හරවා හිස දැමීමෙනි. මෙහිදී බස්නාහිර දිශාව ද ඉතාමත් යහපත් බව පෙන්වා දෙමි.
ශ්‍රී ලංකාවේ ජනතාව බස්නාහිර දිශාවට හිස දමා සයනය කිරීමට දැඩි බියක් දක්වයි. එයට හේතුව මියගිය පසුව එම දිශාවට මෘත දේහය තැබීමයි. බටහිර දිශාවට මෘතදේහ තැන්පත් කරන්නේ ශ්‍රී ලංකාවේ පමණයි. සැබෑ ලෙසම විය යුත්තේ මියගිය විට මෘත දේහයේ හිස උතුරු දිශාවට හරවා තැබීමයි. මීට විද්‍යාත්මක හේතු කාරණා පවතිනවා. උතුරු දිශාවට හිස දැමීම සුදුසු නොවන බවට වාස්තුවේ පෙන්වා දෙන්නේ එම දිශාව අධික චුම්බක ශක්තියක් සහිත බැවිනි. බුදුවරුන් පවා උතුරු දිශාවේ සැතපුණේ පිරිනිවන් මංචකයේදී පමණි. එබැවින් ඔබ මෙම කරුණු බුද්ධිමත්ව වටහා ගන්න. එසේම ඔබගේ නිවෙස අංශක 90ක දිශානුගතකරණයක් නොමැති විටෙක ප්‍රධාන දිශාවට හිස යොමු නොවන බැවින් නිවෙසේ ඕනෑම පැත්තකට ඇඳ යෙදිය හැකිවේ.
එසේම ඊළඟ කාරණය වන්නේ නිදන ඇඳට ලම්බකව යෙදෙන යටලී, පරාල, බාල්ක හා කුරුපාවල ග්‍රහණයට හසු වීමයි. මෙය සෑම නිවෙසකම ප්‍රායෝගිකව දක්නට ඇති තත්ත්වයකි. මෙහිදී වහලයේ සිවිලිම ගසා ඇත්නම් එම දෝෂය බලවත් නොවන අතර සිවිලිම ගසා නොමැති නිවාස සඳහා කළ යුත්තේ නිදන ඇඳ යෙදීමේදී යටලී, බාල්ක හෝ කුරුපාවලට කැපී යන ලෙස ඇඳ තැබීමෙන් වැළැකීමයි. එහිදී ඒවාට සමාන්තරව ඇඳ යෙදීම අයහපත් නොවේ. මේ නිසා වාස්තු ශිල්පයේ සිද්ධාන්ත ප්‍රායෝගිකව යොදා ගන්නා ආකාරය පිළිබඳ ඔබ බුද්ධිමත්ව සිතිය යුතුයි. වාස්තු ශිල්පය ප්‍රායෝගික වූ තරමට එම ශිල්පයෙන් මිනිසුන්ට ලබාගත හැකි ඵල ප්‍රයෝජන විපුල වේ. වාස්තු ශිල්පයේ සෑම දෝෂයක් සඳහාම විද්‍යාත්මක විධිමත් පිළියම් පවතින අතර ගැටලුව ඇත්තේ ශිල්පය භාවිත කරන අය තුළ ඇති දැනුම මඳකමයි.
වාස්තු විද්‍යා විශාරද ශාස්ත්‍රවේදී පේරාදෙණියේ ඩී.යූ. සෙනරත් උපුටා ගැනීම මව්බිම පුවත් පත
