සෙනසුරු ඒරාෂ්ඨකයක් ගැන කියා බිය වැද්දීම වැරදියි
පෙර ආත්ම භාවවලදී සිදුකළ කුසලාකුසල කර්ම සම්බන්ධ කැඩපත, ජන්ම පත‍්‍රයයි, එය හඳහන, වේලාපත්කඩය ආදී නම්වලින්ද හැඳින්වේ. එකම ජන්ම පත‍්‍රය තුළ ජන්ම පත‍්‍ර විශාල සංඛ්‍යාවක් සැගවී තිබෙන බව ඔබ මොහොතකටවත් සිතුවාද? උපන් මොහොත සාදන ලද ජන්ම පත‍්‍රය උදා ලග්නය යනුවෙන් භාවිතා කිරීම සුදුසුම ක‍්‍රමය වේ. ඒ එක් ජන්ම පත‍්‍රයකි. එහි චන්ද‍්‍රයා සිටි රාශිය මුල්කොට සාදන ලද ජන්ම පත‍්‍රය ජන්ම ලග්නය යනුවෙන් භාවිතා කරනු ලබන අතර, සූර්යයා, සිටි රාශිය අනුව සාදන ලද ජන්ම පත‍්‍රය සූර්ය කේන්ද්‍රය නොඒසේනම් සූර්ය ලග්නය වේ. උදා ලග්නය, ජන්ම ලග්නය, සූර්ය ලග්නය, කෙනෙකුගේ ස්වරූපය පෙන්වන අතර, විවාහය පිළිබඳ නවාංශකයෙන් බැලිය යුතුය. නවාංශ කලත‍්‍රානං යනුවෙන් මානසාගරී කතුවරයා පවසා තිබේ. අද ශ‍්‍රව්‍ය දෘශ්‍ය මාධ්‍ය මගින් කරනු ලබන පලාඵල කථනයේදී නවාංශකය පිළිබඳව ප‍්‍රකාශ කරනු නොලැබේ.
පුද්ගලයාගේ සහෝදර ඵල පමණක් නොව වික‍්‍රමය පිළිබඳව විමසා බැලීමට දෙර්කාණ කේන්ද්‍රය විමසිය යුතුය. උදා ලග්නයෙන්, ජන්ම ලග්නයෙන්, සූර්ය ලග්නයෙන්, ආරූඪ ලග්නයෙන්, නොපෙනෙන රහසිගත තොරතුරු භාග්‍ය හෙවත් චතුර්තාම්ශ කේන්ද්‍රරයෙන් බැලිය යුතුය. දරුවන් පිළිබඳ සියලූ කරුණු එනම්, දරුවන් ලැබේද? නොලැබේද? දරුවන් උසස් අධ්‍යාපනය ලබයිද? ජන්මියාට සලකාවිද යනාදි කරුණු "සප්තාම්ශ” කේන්ද්‍රරයෙන් බැලිය යුතුය.
රැකියාව පිළිබඳව දැනගත යුතු සියලූ කරුණු දශාමිශ කේන්ද්රයෙන් බැලිය හැකිවේ. ජන්මියාගේ දෙමාපියන් පිළිබඳ සියලූ කරුණු ද්වාදශාම්ශ කේන්ද්රයෙන් බැලිය යුතුය. තවත් වර්ග කේන්ද්‍ර බොහෝ ප‍්‍රමාණයක් තිබෙන අතර, අඩුතරමින් ඉහත ප‍්‍රකාශ කළ වර්ගකේන්ද්‍ර ආරූඪ පද තුළින් විමර්ශනය කිරීමෙන් සාර්ථක නිවැරදි පලාඵල අනාවැකි ප‍්‍රකාශ කළ හැක.
සෙනසුරු ඒරාෂ්ඨකය ගැන කියූ පමණින් ජනතාව බියට පත්වෙයි. "එරා" යනු චන්ද‍්‍රයාට පවසන තවත් නාමයකි. අෂ්ඨක යනු අටවැන්නයි. මෙහි තේරුම චන්ද‍්‍රයා සිටි රාශියෙන් අටවැන්නේ සෙනසුරු ගමන් කිරීම අෂ්ඨම ඒරාෂ්ඨකය බවයි. මේ පිළිබඳ කිසිදු පර්යේෂණයක් සිදුනොකළ සමහර ජ්‍යෙතිෂවේදීන් උදා ලග්නයේ උදා ලග්නයෙන් දෙවැන්නේ, උදා ලග්නයෙන් අටවැන්නේ, උදා ලග්නයෙන් දොළොස්වැන්නේ සෙනසුරු ගමන් කිරීම, සෙනසුරු ඒරාෂ්ඨකය වශයෙන් හැඳින්වීම යුක්ති සහගත නොවේ. ඒරාෂ්ඨකයක් යනු කුමක්දැයි ඉහත අර්ථ දක්වා තිබේ. මේ නිසා ජනතාව බිය වැද්දීම සුදුසු නොවේ. මෙය ජ්‍යෙතිෂවේදීන්ද නොදැන කරනු ලබන වරදකි. සෙනසුරු එක් රාශියක් වර්ෂ 2 1/2-3 අතර කාලයක් ගත කරනු ලබයි. නිතරම සත් අවුරුදු ඒරාෂ්ඨකයක් ගැන පවසන නිසාම ඔබ මහත් භීතියට පත්ව ඇත. එසේනම් උදා ලග්නයේ සහ ඉන් දෙපස රාශිවල සහ ඉන් අටවැන්නේ සෙනසුරු ගමන් කරන කාලය වර්ෂ 10කි. මේ අනුව චන්ද්‍ර ලග්නයෙන්ද ඉහත ස්ථානවල සෙනසුරු ගමන් කරන කාලය වර්ෂ 10කි. සූර්ය ලග්නය අනුවද ඉහත ස්ථානවල සෙනසුරු ගමන් කරන කාලය වර්ෂ 10කි. ආරූඪ ලග්නය අනුවද ඉහත ස්ථානවල සෙනසුරු ගමන් කරන කාලය වර්ෂ 10කි. දැන් කෙනෙකුගේ ආයු කාලය වර්ෂ 80ක් නම් වර්ෂ 40ක්ම ඒරාෂ්ඨක බව වැටහෙනු ඇත.
දයාබර පාඨකය ඔබට යම් අනතුරක්, වියෝවක් තිබේනම් එම ඒරාෂ්ඨක කාලය දින 90කට සීමාකර පලාඵල පැවැසිය හැකි අතර, මේ පිළිබඳ වැඩිදුර පර්යේෂණ කළවිට යම් සිදුවීමක් අනිවාර්යෙන්ම සිදුවන බව පැවැසිය හැකිය. සඳු සිටි රාශියෙන් 64 වෙනි නවාංශකයේ සෙනසුරු ගමන් කිරීම නියම අෂ්ඨම ඒරාෂ්ඨකයයි. ඉතා නිවැරදි මෙන්ම නිශ්චිත අනාවැකි සහ පලාඵල ප‍්‍රකාශ කිරීම සඳහා පරාසර, ජෛමිණි, ආචාර්යවරුන් ප‍්‍රකාශිත ආරූඪ ලග්න ක‍්‍රමය ඉතා සාර්ථක ජ්‍යෝතිෂ ක‍්‍රමයකි. සෑම රාශියකටම නවාංශක නවයක් තිබෙන අතර, සඳු සිටි රාශියේ සිට ඉදිරි රාශි හතට නවාංශක (9x7-63) හැට තුනකි. එසේ නම් අටවෙනි රාශියේ 64 වෙනි නවාංශකය තිබේ. ආධුනික ඔබට වටහා ගැනීමේ පහසුව තකා රාශී අනුපිළිවෙළ හා නවාංශක පිළිබඳ වගුවක් ඉදිරිපත් කරමි.
ජ්‍යොතීර්වේදිනී ටී.එම්. සන්ධ්‍යා රමණි කොස්තා - රත්නපුර උපුටා ගැනීම ලක්බිම පුවත් පත
