ගේ දොර ඉඩකඩම් යාන වාහන හිමි කරන ගුරු මංගල යෝගය

ග්‍රහ මඬුල්ලේ විශාලම ග්‍රහයා වන්නේ ගුරුය. විශ්ව කේන්දරයේ දී නව වැන්නට හා 12 වැන්නට අධිපති ග්‍රහයා වේ. පුනාවස, විසා සහ පුවපුටුප යන නැකැත් තුනට අධිපති ග්‍රහයා වේ. ගුරු හෙවත් බ්‍රහස්පති ග්‍රහයා ග්‍රහ මඬුල්ලේ සෞම්‍ය ගති ඇති ලෝකෝත්තර ගති පැවැතුම් පෙන්වන ග්‍රහයෙකි. ග්‍රහ මඬුල්ලේ මන්ත්‍රීවරයා ද වේ. දේව ගුරු, බ්‍රහස්පති, මන්ත්‍රී, ආර්ය යනාදී නම් ගුරුට යෙදෙන පරිවාර නම් අතර කිහිපයකි.

ග්‍රහමඬුල්ලේ සෙන්පති වන්නේ කුජ ග්‍රහයාය. විශ්ව කේන්දරය හෙවත් ලෝක කේන්දරය මේෂය වූ විට එහි ලග්නාධිපති කුජ වේ. කුජ ග්‍රහයා අඟහරු, මංගල ආදී පරිවාර නම් වලින් ද හඳුන්වනු ලබයි. කුජ ආයුධවලට, යුද්ධයට කාරක ග්‍රහයා වෙයි. ගුරු ග්‍රහයාත් කුජ ග්‍රහයාත් යහපත්ව සංයෝග වීම තුළින් ගුරු මංගල යෝගය උදා වේ. ගුරු මංගල යෝගය පිළිබඳව මෙවර යෝග වරුණ ඔස්සේ කතා බහට ලක් කරමු.

ගුරු මංගල යෝගය

ගුරු යනු බ්‍රහස්පතිය, මංගල යනු කුජය. මහා ප්‍රාඥයා වශයෙන් සලකා ගුරු කාර්යශූර මෙන්ම කාර්යක්ෂමතාවය නියෝජනය කරන කුජ සමඟ එක්වීම බෙහෙවින් යහපත් වේ. මෙවැන්නෝ ලතවෙවී නොඉඳ තමා සිතන පතන අරමුණු හා අපේක්ෂාවන් ඉතාමත් හොඳින් ක්‍රියාත්මක කිරීමෙහිලා ඉදිරිපත් වන්නෝය. කාලය මර මරා සිටින අකර්මණ්‍ය පුද්ගලයෝ නොවෙති. ගන්නා තීරණ ද බොහෝ දුරට නිවැරැදිය. කුජ ශරීරයෙහි ඇට මිඳුළු නියෝජනය කරයි. මෙනිසා කුජ ගුරු එකට ඇති අය ශරීර ශක්තියෙන් ද යුක්තය. ඒ ශක්තිමත් ශරීරය නුසුදුසු නොගැළපෙන දේවලට යොදා ගන්නා අය නොවේ. කුජ ගුරු යෝගය ඇති අය බොහෝ විට ලේ සෙලවීම්, අනතුරු අන්තරාදියෙන් වැටීම් තැළීම්, කැඩීම් බිඳීම් ආදී ක්ෂණික පීඩාවන්ගෙන් ආරක්ෂා වනු ඇත.

ඇට මිඳුළු ඉතා ශක්තිමත් මොවුහු ශරීරය ද ආරක්ෂා කර ගැනීමටත් සුදුසු ලෙස කෑම් බීම් පරිහරණය කරන සෞඛ්‍යයට ද මූලිකත්වය දෙන අය බව කිව යුතුය. කුජ ගුරු යෝගය කටක ලග්නයට මීන ලග්නයට අතිශයින් ප්‍රශස්තය.

මේ ලග්න දෙකට මොවුන් දෙදෙනා ධර්මස්ථානය හා කර්මස්ථානය අධිපතියෝ වන නිසා ය. එය රාජ යෝගයකි. මේෂ, වෘශ්චික, ධනු ලග්නවලද මේ යෝගය සාධනීය ලෙස බලපවත්වයි. ඊට හේතුව නම් එම ලග්නවලට මේ ග්‍රහයෝ දෙපළ යහපත් භාවාධිපතිකම දරන හෙයිනි. කුජ ග්‍රහයා මංගල ලෙස හැඳින්වීම ද නිසා කේන්දරවල අයහපත් පිහිටීම් ඇතත් කුජ ගුරු යෝගය ඇත්නම් එම විවාහ දෝෂ සමනය වෙයි.

අනෙකුත් අයහපත් පිහිටීම් නිසා විවාහයේ අර්බුද ඇති වුවත් කුජ ගුරු යෝගය නිසා එම අර්බුද සෙමෙන් සෙමෙන් සමනය වී සාමකාමී යුග දිවියකට මඟ පෙන්වයි.

මෙවැන්නන්ට ඉතා හොඳ ආරෝහ පරිණාහ දේහ සම්පත්තියෙන් යුතු දූ පුතුන් ලැබීමට ද මෙය හේතුවක් වෙයි. ඔවුන් ද යනමඟ යන නිර්භීත අය වෙති.

ගුරු මංගල යෝගය යෙදෙන ආකාරය ඉහත දක්වා ඇත. මේ අය කලබලයක් නැති නිශ්ශබ්ද අයයි. පිට රටවල යාමට, ශිෂ්‍යත්ව ලැබීම් හිමි වෙයි. ආත්මශක්තිය ඇත. තම කටයුතු නිදහසේ කරගෙන යයි.

මේ යෝගය යෙදුණු ජන්මීන් විශේෂයෙන්ම කුජ නිසා කතරගම දෙවියන්ගේ ද ගුරු නිසා ශක්‍ර දෙවිඳුන්ගේ ද පිහිට පැතීම බෙහෙවින් යහපති. ගුණ නුවණින් යුතු මොවුහු සාර ධර්ම අගයන අය නිසාම මනා ලෙස පේ වී පූජා පවත්වා ජය පිරිත සජ්ඣායනය ඉතාමත් වටින්නේය.

ධාර්මික මාර්ගයේ ගමන් ගන්නා අය වෙති.

තවද කුජ සමඟ ගුරුගේ මෙකී යහපත් සංයෝගය නිසා ජන්මියා ඉඩම්, ගේ දොර හා ඉඩකඩම් යාන වාහන ආදියෙන් යුතු අයකු බවට පත්වේ. තර්කන ශක්තියෙන් අනූන නිවැරදි විනිශ්චයෙහි දක්ෂයෙකි.

මේ සංයෝගය දුබල වූ විට හෝ පීඩා වූ විට ජන්මියා අහංකාර, කේන්ති ගන්නා සුලු නිකරුණේ වියදම් කරන්නකු, ධනය හා කාලය කා දමන්නකු බවට පත්වේ. කෘතගුණ අඩුවේ. සිත දුර්වල වේ. කරන කියන වැඩවල පිළිවෙළක් නොවේ. නිතර හඬා වැටෙන්නකු බවට පත්වෙයි. රෝගාබාධවලට ගොදුරු වෙයි.

මේ යෝගය ඇති ජන්මියා ශක්‍ර දෙවියන් හා කතරගම දෙවියන් වෙත පුද පූජා තැබීමෙන් පින්දීමෙන් එම යෝගයේ බලය වඩවා ගත හැකි වේ.

ප්‍රසිද්ධිය ගෙනදෙන අමල යෝගය

මේ යෝගය යෙදෙනුයේ ලග්නයෙන් හෝ චන්ද්‍රයාගෙන් 10 වැන්නේ සුබ ග්‍රහයෝ පමණක් යෙදී සිටියහොත්ය. මේ යෝගය ඇති අය ඉතා අසීමිත ප්‍රසිද්ධියකට පත්වෙයි. ඔවුහු රජුන්ගෙන් රාජ්‍ය නායකයන්ගෙන් ගෞරවයට පාත්‍ර වෙති. ඔවුහු වාසනාවන්තයෝය. සුචරිතවත්ය. අන්‍යයන්ට ආධාර උපකාර කරති. අමල යන්නෙහි තේරුම අපිරිසුදු බවින් තොර පිරිසුදු යන්නයි. 10 වැන්න යහපත් ආකාරයේ සමාජීය හැසිරීම, ගෞරවනීය මට්ටමේ ප්‍රසිද්ධිය පෙන්වන ස්ථානයකි. මෙනිසා සුබයෝම වන බුධ, ගුරු, සිකුරු වැනි ග්‍රහයෝ 10 වැන්න වන මේ කර්මස්ථානයේ සිටීමෙන් ඔහු දුර්දාන්ත , අසංවර, දැඩි කූඨ ක්‍රියාවන්හි නොයෙදී සර්ව සාධාරණ කටයුතුවලම නියුක්ත වන බෙහෙවින්ම ගුණ ධර්ම සුරකින අයෙකු වෙයි.

ඉතාමත් හොඳ සමාජශෝධකයකු, සත් ක්‍රියාවන්හි යෙදෙන්නකු වශයෙන් මෙවැන්නෝ ඇගයීමට පත්වෙති. වර්තමාන කාලයේ ද මෙවැනි ශ්‍රේෂ්ඨ පුද්ගලයෝ යම් යම් අවස්ථාවලදී දේශපාලන කටයුතුවල ද නියුක්තව සිටින අය බවට පත්ව ඇත. එහෙත් ඔවුහු දූෂිත දේශපාලනඥයෝ නොවෙති. අල්ලස, පගාව නොගන්නා සත් ක්‍රියාවෙහි නියුක්ත අය බව පෙනේ. අතීතයේ සිටි යූ.බී. වන්නිනායක, නිශ්ශංක විජේරත්න, ඇම්.ඩී. බණ්ඩා වැනි සමාජ හිතකාමී වූ පරහිතකාමී දේශපාලනඥයන් මෙවැනි යෝග බලයෙන් පෝෂණය වූ අයයි.

පාප ග්‍රහයෝ දහ වැන්නේ සිටීමෙන් බලවත් වන බොහෝ අය අසාධාරණය අයුක්තිය මුල් කර ගනිමින් කටයුතු කළ දේශපාලනඥයන් බව අපට කොතෙකුත් පෙනී ගොස් ඇත. මෙවැනි පිහිටීම් යෙදුණු අමල යෝගය සහිත කේන්දරයක් පහත දැක්වේ. මේ ආකාරයට අමල යෝගය යෙදුණු උදාරතර ජන්මීන් විශේෂයෙන්ම යහපත් ඇවතුම් පැවැතුම්වලින් යුක්ත නිසාම සද්ධර්මයෙහි නියුතුවීම, බෝධි පූජා පැවැත්වීම වඩ වඩාත් හිතකර වේ. විෂ්ණු දෙවියන්ට පූජා පැවැත්වීම බෙහෙවින්ම පලදායක වේ.

ආචාර්ය ජී. ඇම්. ගුණපාල
උපුටා ගැනීම සුබසෙත