ටක්කෙටම හරියන්න පොරොන්දම් බලන හැටි
විවාහයෙන් පසු ජීවිතය පිළිබඳ මූලික අරමුණු සහ එහි හොඳ නරක පොරොන්දම් බැලීම තුළින් විද්‍යමාන වේ. පාරම්පරිකව පැවැත එන ආකාරයට නම් අට පොරොන්දම, දස පොරොන්දම, විසි පොරොන්දම, යනාදී වශයෙන් නිරීක්‍ෂණයට ලක් කිරීමෙන් සුබ අසුබ විනිශ්චය කර තීරණවලට එළඹීමට පහසුවක් ඇති වේ.
එසේ නමුත් පොරොන්දම් පරීක්‍ෂාවෙන්ම පමණක් සාර්ථක විවාහ ජීවිතයක් ගතකර හැකි නොවේ යන්න මගේ හැඟීමයි. කුමන පරීක්‍ෂණයක් කළත් සමහර විට විවාහයට ප්‍රශ්න ඇතිවන අවස්ථා නැතිවා නොවේ. එය සාමාන්‍ය දෙයකි. විවාහයේ සාර්ථකත්වය විමර්ශනය කර බැලීමේදී දික්කසාද වීම, රෝගී වීම, වැන්දඹු වීම, අකල් මරණයට පත්වීම යනාදිය සාකල්‍ය වශයෙන් පරීක්ෂා කර බැලිය යුතු වන්නේය. බොහෝ විට ඉහත සඳහන් සියලුම දෝෂයන් කුජ හා ශනි යෝග වීමෙන් ඇතිවන්නට බොහෝ දුරට ඉඩ ප්‍රස්තාව ලැබිය හැකිය.
බොහෝ විට විවාහයට එළැඹිය හැකි තරුණ ස්ත්‍රීන් හෝ පුරුෂයන් දැන හඳුනා ගැනීමෙන්ද දැකීමෙන්ද මෙසේ වන අවස්ථා එමට මා ලත් අත්දැකීම්වල අඩංගුව ඇත. විවාහ දෝෂ අතර සමහර නිගමනවලදී ශනි, කේතු යෝග වී සිටීමද කුජ, රාහු යෝගව සිටීමද කුජ, කේතු යෝගව සිටීමද විවාහ දෝෂ ලෙස හැඳින්විය හැකිය. නාවාංශක ගතව ඇති 7 අධිපතියා මෙන්ම 5 අධිපතියාද විවාහ දෝෂයක් ලෙස මෙහිදී දැක්වීම වැදගත් වේ. ග්‍රහයන් දෘෂ්ටි පැවැතීම සහ යෝගව සිටීම නිවැරදි අන්දමට පරීක්ෂා කිරීම වැදගත් වේ. විවාහ දෝෂ ඇති සියලුම ග්‍රහයන්ගේ සම්බන්ධතා ඒ ඒ දේ යෙදෙන අන්දමට පරීක්ෂා කර බැලීම කාලෝචිතය. මේ අන්දමට පරීක්ෂා කිරීමේදී කුජ හා ශනි ගැන විශේෂයෙන්ම පරීක්‍ෂණයට ලක් කළ යුතුය. බොහෝ අවස්ථාවල දෝෂ භංග වන්නේ එවිටයි.
බොහෝම අවස්ථාවල පුරුෂයන්ගේ විනාශය සිදු වන්නේ 1,4,7,12 යන ස්ථාන ස්ත්‍රී ජන්ම පතක යෙදී ඇති විටය. එසේම ස්ත්‍රීන්ගේ විනාශය සිදුවන්නේ පුරුෂයාගේ කේන්දරයේ ඉහත සඳහන් ස්ථානයක කුජ තැන්පත්ව සිටීමෙන් බව සත්‍ය කරුණකි. එසේම මෙම දෝෂය භංග වන අවස්ථාද තිබේ. 1,4,7,8,12 යන ස්ථානවල කුජ, ජන්ම පත් දෙකේම සිටීමෙන් එය නියමාකාරයෙන් සිදු වේ. විශේෂයෙන් කිව යුතු වන්නේ ගුරු බලවත්ව ඇති විට ගුරුට අඟහරු නැත්නම් කුජ පෙනීමෙන් එසේ ඇති නොවේ රෝගී වීමෙන් දෝෂ අවම කර ගත හැකි අතර, අඩු කරගත හැකි ස්වභාවයක්ද පෙන්වා දිය හැකිය.
1,2,3,4, යන නැකැත් පාදයන් නාශාංශක වශයෙන් ව්‍යවහාරයේ පවතින රවි, ගුරු, සිකුරු, ශනි සහ නැකැත්වල මෙය පිළිවෙළට යෙදේ. දෝෂ ඇති වීමට හෝ නැති වීමට බලපාන අවස්ථා ඇත. ඒ පස්වැන්න, හත්වැන්න අධිපති වෙනත් භාවාධිපතියකු සමඟ පරිවර්තනයකට ලක්වීමෙන් සිදුවේ. සමහර විට විවාහ වන දෙදෙනාගේ එක් අයකු මරණයට පත්වීම, විවාහය දෙදරා යෑමට පත්වීම, රෝගී වීම පොරොන්දම් සියයට සියයක් ගැළපුණත් සිදුවිය හැකිය. විශේෂයෙන් නැකැත් පොරොන්දම, මහේන්ද්‍ර පොරොන්දම, යෝනි පොරොන්දම, ස්ත්‍රී දීර්ඝ පොරොන්දම, වශ්‍ය පොරොන්දම, රාක්‍ෂ පොරොන්දම, පක්‍ෂි පොරොන්දම, ලිංග පොරොන්දම, ගැන විශේෂයෙන්ම සලකා බැලීමට අවශ්‍ය වේ. ග්‍රහ අධිපතියා පොරොන්දම් බැලීමේදී පාපාංශක චන්ද්‍රයාට අෂ්ටකුටය හා සුදර්ශන චක්‍රය සෝදිසි කිරීම වැදගත්ය. විශේෂයෙන්ම විසි පොරොන්දමෙන් 18ක්ම චන්ද්‍රයා විමසා බැලීමට උපයෝගී වෙයි. දෙදෙනා දීර්ඝ කාලයක් ජීවත් වීමට හේතු පාදක තිබේද යන්න හය පොරොන්දමින් හය සනාථ කර ගත හැකිය.
ජාත්‍යන්තර ජේ‍යාතිෂ විද්‍යා විශාරද මහාචාර්ය හේමපාල පතිරණ
උපුටා ගැනීම මව්බිම
