කුජ හත නරකම තැන
විවාහය පුද්ගලයකුගේ උපතේ සිට මරණය දක්වා අතර කාලය තුළදී සිදුවන සුවිශේෂි සිදුවීමකි. එහෙත් දහසක් බලාපොරොත්තු පොදි බැඳගෙන ඉතා උත්කර්ෂවත් ලෙස උත්සව පවත්වා දෑඟිලි බැඳගන්නා සමහර විවාහ පවා කෙටි කාලයක් තුළදී දෙදරා යන්නේය. ඇතැම්හු එකගෙයි විසුවත් විරසකය. එකිනෙකා නුරුස්සයි. නිරන්තරයෙන්ම දෙදෙනා අතර අඩදබරය.
මෙරට සෑම විවාහයක්ම පාහේ සිදුවන්නේ එකිනෙකාගේ ජන්ම පත්‍රය බලා ඒ අනුව නැකත් සෑදීමෙනි. මෙය අපගේ සංස්කෘතියේ විශේෂිත චාරිත්‍රයකි. එසේ නම් දෙදෙනාගේ ජන්ම පත්‍ර ගළපා සිදුකරන විවාහ දෙදරා යන්නේ ඇයි?
විවාහයට බලපාන විශේෂ වූ නැකත් ඇති බවක් ඇතැම් නැකත් විවාහ ජීවිතයට දැඩි බලපෑම් ඇති කරන බවත් ඔබ දැන සිටියාද? එවැනි බලපෑම් ඇතිවන, ඇති කරන බොහෝ දෙනා භීතියට පත්කරවන නැකතක් ලෙස 7 නැකත සඳහන් කළ හැකිය.
මෙම ලිපියෙන් විමසා බලන්නේ 7 නැකත පිළිබඳවයි.
විවාහය ගැන කතා කිරීමේදී සෑම අයකුම භීතියට පත් කරන 7 නැකත කේන්ද්‍රයේ 1, 2 ආදි වශයෙන් ගණන් කළ විට හමුවන 7 වන කොටුව හෙවත් විවාහක ස්ථානයේ පිහිටා තිබේ. 7 වන නැකතට සම්බන්ධ වන්නේ අඟහරු හෙවත් කුජ ග්‍රහයායි. කුජ ග්‍රහයා කැඩීම්, බිඳීම් කරන, අනතුරු සිදු කරන ග්‍රහයකුවීමත් පෘථිවියට තරමක් කිට්ටුවෙන් පිහිටීම නිසා කුජ ග්‍රහයා මිනිස් ජීවිතයට මෙතරම් බලපෑමක් කරනවා විය හැකිය. කුජ ග්‍රහයාගෙන් විවාහය සම්බන්ධව ඇතිවන දෝෂ ‘භෞම’ දෝෂ කියා හඳුන්වයි.
ඉහත කී ස්ථානයක් වන 7 වන කොටුව හෙවත් විවාහ ස්ථානය තුළ අඟහරු හෙවත් කුජ ග්‍රහයා තැන්පත්ව සිටීමෙන් විවාහයට දැඩි ලෙස බාධා ගෙන දෙන 7 නැකත උදා වේ. එහෙත් නැකත් පංතිය තුළ ‘අස්විද, බෙරන, කැති, රෙහෙන ආදී නැකැත් 27 තුළ සඳුට අයත් ‘හත’ නමින් හඳුන්වන නැකත ඉහත කී විවාහයට ගැටලු ගෙන දෙන අවස්ථා නොවේ.
හතේ කුජ සිටි පමණින්ම කුජ දෝෂය ඇති නොවේ. ඔබගේ ලග්නය අනුව කුජ සිටින රාශිය කුජට යහපත් රාශියක්ද අයහපත් රාශියක්ද උච්ච, නීච, සතුරුද ආදිය ද බැලිය යුතුය. එසේම කුජ ග්‍රහයාට ශනි, රාහු රවි වැනි ග්‍රහයින්ගේ දෘෂ්ටි වැටීමෙන්ද 7 නැකතේ ප්‍රබලත්වය වෙනස් වේ.
යම් කේන්ද්‍රයක කුජ 7 සිටි පමණින්ම සහකරු හෝ සහකාරියගේ කේන්ද්‍රයේ හතම සිටීම අවශ්‍ය නැත. සහකරුගේ කේන්ද්‍රයේ කුජ ග්‍රහයා 1,2,4,7,8,12 ස්ථානයේ සිටීම ප්‍රමාණවත් ය.
එහෙත් කුජ හතේ සිටින අයෙකුට සහකරුගේ කේන්ද්‍රයේ කුජ 1.2.7,8, වැනි කොටුවක සිටීම වඩාත් යෝග්‍ය වේ. තවද හතේ සිට කුජ සමග ගුරු, සිකුරු වැනි ග්‍රහයින් සංයෝග වීම හෝ සප්නව වැනි දෘෂ්ටි වැටීමෙන් කුජ දෝෂය භංග වන අවස්ථාද ඇත.
හතේ නැකත වැනි ප්‍රබල කුජ දෝෂ ඇති එකම කුජ දශාව තරුණ කාලයේ ලැබුවහොත් කුජ දෝෂය වඩා ප්‍රබල වේ. එහෙත් ශුභ දශා කාලවල එතරම් එම දෝෂ පල නොදෙයි. එසේම සහකරු හෝ සහකාරිය විදේශගතව සිටීම, දුර බැහැර ප්‍රදේශවල රාජකාරි කිරීම, ආරක්ෂක අංශ වැනි වෘත්තීන්වල නියැළී සිටින (නිතර දෙදෙනා හමුනොවන දුරක් පළාත්වල සේවය කරන) අවස්ථාවලදි කුජ දෝෂ එතරම් පල නොදෙයි.
මෙවැනි තත්ත්වයට පත්වීමට පෙර පව් පිං ද බලපායි. සාමාන්‍යයෙන් 5% පමණ දෙනා 7 නැකතේ උපදියි. මේ අයට ගැළපෙන ලග්නයක් සහිත නැකතක් හමුවුණොත් ප්‍රබල හා දුබල බව ඇති වේ. හත නැකත යම් අයෙකුගේ හඳහනේ තිබූ පමණින්ම එය දෝෂ සහිත නොවේ. ඇතැම් 7 නැකත සිටින අයට තම ජීවිතයේ නොසිතූ සැප සම්පත් ලැබෙන අවස්ථාද නැතුවාද නොවේ.
සමහරු විවාහ වී කෙටි කාලයක් තුළදී (7 නැකතේ බලපෑම් අනුව) සහකරු හෝ සහකාරිය මිය යා හැකිය. එතැනදී ඔවුන් දෙදෙනාගේ එක් අයකු සතු ධනය දේපළ වත්කම් ජීවත්වන අයට හිමි වේ. එවැනි අවස්ථාවලදී ජීවත්වන තැනැත්තාට නොසිතූ විරූ සැප සම්පත් විඳින්නට හැකි වේ.
දරුවන් විවාහ කරදීමේදී සමහර මවුපියන් කරන වරදක් තිබේ. 7 නැකත වැනි තරමක් ප්‍රබල කුජ දෝෂ ඇතිවීට දරුවාට මෙන්ම අනෙකුත් පාර්ශ්වයටද වසන් කරමින් විවාහ කර දෙයි. ඒ සඳහා උපන් නැකත වෙනස් කර අලුතින්ම හඳහන් පවා සාදයි. මෙයින් සිදුවන්නේ දෙපාර්ශවයම අපහසුතාවට ලක්වීමයි.
මේ නිසා කළ යුත්තේ ළමා කාලයේදීම මෙවැනි දෝෂ පිළිබඳ දැනගත්විට දරුවාට ගැළපෙන විවාහයක් කරදීම හා ඔවුන් ඒ පිළිබඳ දැනුවත් කිරීමයි. මන්ද මොනයම් හෝ මංගල දෝෂයක් තිබුණද ඒවා පිළිබඳ කලින් දැනුවත් වී තේරුම් බේරුම් කරගෙන ජීවත්වීමයි. එසේම මෙවැනි දෝෂ ඇති අය ඒවාට සම්බන්ධ වාස්තු දෝෂ නොමැති ගෙයක ජීවත්වීම සුදුසු ජ්‍යෝතිෂ පිළියම් යොදා ගැනීමයි. (යන්ත්‍ර මන්ත්‍ර මැණික් පැලඳීම වැනි) මේ තුළින් යම් තරමක හෝ පාලනයක් සිදුකර ගැනීමට හැකිය.
එසේම මෙවැනි භෞම දෝෂ සහිත කේන්ද්‍ර වුවද ඊට ගැළපෙන අයෙකු සමග විවාහ වී සාර්ථක පවුල් ජීවිත ගත කරන අය සමාජයේ ඕනෑ තරම් සිටිති. කුමන අන්දමේ ගැටලුවක් තිබුණද ඒ සඳහා නිවැරදි පිළියම් සොයා ගැනීම වැදගත්ය.
උපුටා ගැනීම සිරිකත
