විදෙස් ගමනට ඉඩ ලැබේවිද?
වර්තමානයේ බොහෝ දෙන උසස් අධ්‍යාපනය වෙනුවෙන් හෝ රැකියා අවස්ථා වෙනුවෙන් හෝ වෛද්‍ය ප්‍රතිකාර ආදිය සඳහා හෝ දේශපාලන රැකවරණය සඳහා හෝ වඩාත් සැප පහසු ජීවිත ගත කිරීම සඳහා හෝ විදේශගත වීමට දැඩි උනන්දුවක් ්දක්වන බව නොරහසකි. සමහරුනට ඉතා පහසුවෙන් විදේශගත වීමට අවස්ථා නොලැබෙන අතර සමහරුනට කරදර බාධක මධ්‍යයේ විදේශගත වීමට අවස්ථා යෙදෙන අතර තවත් සමහරුනට කොතෙක් උත්සාහ කළ ද විදේශගත වීමට අවස්ථා යෙදෙන්නේ නැත. සමහරුනට විදේශගත වීමට අවස්ථා යෙදුන ද තමන් විදේශගතවූ අරමුණ ඉටු කර ගැනීමට නොහැකිව ආපසු ඒමට සිදුවන අවස්ථා හෝ එම රටේදී විවිධ කරදර බාධක වලට මුහුණ දීමට සිදුවන අවස්ථා යෙදීමටත් ඉඩ ඇත. මේ සියල්ල ජන්ම පත්‍රය පරීක්ෂා කිරීමෙන් කල් තබා දැන ගත හැකිය.
කේන්දරයක තනි භාවයක් හෝ රාශියක් පමණක් පරීක්ෂාවෙන් විදේශගත විය හැකිද යන්න කිව නොහැකිය. කේන්දරයේ රාශි හෝ භාව සියල්ලම පාහේ පරීක්ෂා කළ යුතු වුවත් නමවැන්න, දොළොස්වැන්න, දෙවැන්න, හතරවැන්න, හත්වැන්න සහ අටවැන්න විශේෂ වෙයි.
ප්‍රධානතම ස්ථාන හෙවත් භාව දෙක වන්නේ නමවැන්න සහ දොළොස් වැන්නය. එම භාව දෙක චර රාශීන්ට හෝ ආපෝ රාශීන්ට අයත් නම් (චර රාශි යනු මේෂ, කටක, තුලා, මකර යන රාශීන්ය. ආපෝ රාශි යනු කටක, වෘශ්චික සහ මීන යන රාශීන්ය. විදේශගත වීමේ අවස්ථා ඇති කරයි. එයිනුත් කටක රාශිය නම් විදේශගත වීමේ ඉඩකඩ වැඩිය.
කේන්දරය පරීක්ෂා කොට එම ජන්මියාට විදේශ ් ගමන් යෙදෙන ග්‍රහ යෝග තිබේද යන්න කිව හැකි ග්‍රහ පිහිටීම් මොනවාද යන්න මෙම ලිපියෙන් ් සාකච්ඡා කෙරේ.
පළමුව අපි විදේශ ගමන් යෙදෙන කාලවකවානු සොයන ආකාරය විමසමු. ඒවා මෙසේය.
- නමවැන්න හෝ දොළොස්වැන්න අධිපතීන්ගේ මහ දශා හෝ අතුරු දශා කාලයන්හිදී විදේශ ගමන් යෙදිය හැක.
- රාහුගේ මහ දශා කාලයෙදී
- නමවැන්නේ තැන්පත් ග්‍රහයා හෝ ග්‍රහයන්ගේ මහ දශා හෝ අතුරු දශා කාලවලදී
- ස`ඳුගෙන් නමවැන්න අධිපතිගේ මහ දශා හෝ අතුරු දශා කාලයන්හිදී
- අටවැන්නේ තැන්පත් ග්‍රහයන්ගේ මහ දශා හෝ අතුරු දශා කාලයන්හිදී
විදේශගත වීමේ අවස්ථාවට අදාළ ග්‍රහ පිහිටීම් ගැන සැලකීමේදී
- කිසියම් ජන්මියෙකුට උසස් අධ්‍යාපනය සඳහා විදේශගත වීමේ අවස්ථා තිබේ දැයි පරීක්ෂා කිරීමේද එම ජන්මියාගේ හතරවැන්න (ප්‍රාථමික අධ්‍යාපනය හතර වැන්නෙන් පෙන්වයි.) අධිපතියා නමවැන්නේ වී (නමවැන්න උසස් අධ්‍යාපනය පෙන්වයි.) එම නමවැන්න චර හෝ ආපෝ රාශියක් වී නම් සහ නමවැන්නාධිපති දොළොස් වැන්නාධිපතති සමග නම් එම ජන්මියාට උසස් අධ්‍යාපනය සඳහා විදේශගත වීමේ අවස්ථා තිබෙන බව පෙන්වයි.
- හතර වැන්න අධිපතියා දොළොස්වැන්නේ නම් උපන් දේශයට වඩා වඩාත් සුවදායී ජීවිතයක් විදේශයන්හිදී ගත කළ හැකි බව කියවෙයි.
- පස්වැන්න, නමවැන්න සහ දොළොස්වැන්න අධිපතීන් සංයෝගයක් දශාම්ස කේන්දරයේ පිහිටා ි ඇත්නම් එම ජන්මියා වෘත්තීය අවශ්‍යතා වෙනුවෙන් විදේශගත වන්නෙකු කරවයි. එවැනි සංයෝගයක් ඇති තැනැත්තේ කිසියම් වෘත්තියක විශේෂඥයෙක්, නිපුණතාවයක ඇත්තෙක් වෙයි.
- නමවැන්නාධිපති, දසවැන්නාධිපති සහ දොළොස්වැන්නාධිපති දශාම්ස කේන්දරයේ සංයෝගනම් එම ජන්මියා සම්මාන ලැබීමට හෝ රාජ්‍යතාන්ත්‍රික තනතුරු භාර ගැනීමට විදේශගත වන්නෙකු වෙයි.
- ලග්නාධිපති සහ හතරවැන්න අධිපති දොළොස්වැන්නේ නම් එම ජන්මියා විදේශයන්හි ස්ථීර පදිංචිය ලබන්නෙකු වෙයි.
- දොළොස්වැන්න අධිපති හතරවැන්නේ නම් එම ජන්මියාට විදේශගත වීමට අවස්ථා විරල කරවනු ඇත.
- ලග්නාධිපති සහ දෙවැන්නාධිපති අතර පරිවර්තවන යෝගයක් යෙදී ඇත්නම් එම ජන්මියා විදේශයක පුරවැසිභාවය ලබනු ඇත.
- දොළොස්වැන්නාධිපති ලග්නයේ සිට කේන්දරයේ ත්‍රිකෝණ ස්ථානවලට (පස්වැන්න සහ නමවැන්න ත්‍රිකෝණ ස්ථාන වේ.) මධ්‍යයේ වූ රාශිවල නම් එනම් තුන්වැන්නේ හෝ එකොළොස්වැන්නේ නම් එම ජන්මියා විදේශයන්හිදී ජයග්‍රහණ ලබනු ඇත.
- විදේශගතවීමට අදාළ ග්‍රහ පිහිටීම් යෙදී විදේශගත වූවත දොළොස්වැන්නාධිපති දුබලව සිටියදී ලග්නාධිපතිගේ දෘෂ්ඨි ලබයි නම් එම ජන්මියාට තනිව එම රටේ ඈත පළාතක වාසය කිරීමට සිදුවන අතර දොළොස්වැන්නාධිපති බලවත්ව සිටියදී ලග්නාධිපතිගේ දෘෂ්ඨි ලබයි නම් එම ජන්මියා එම රටේ සැප පහසු නගරයක වාසය කරනු ඇත.
- විදේශගතවීමට අදාළ ග්‍රහ පිහිටීම් යෙදී තිබුණ ද එම ජන්ම පත්‍රයේ සඳු දුබල නම් එම ජන්මියාටත් විදේශගතවීමට අවස්ථා නොයෙදෙනු ඇත.
- සඳුගේ හෝ සිකුරුගේ මහ දශා කාලයන්හි විදේශගත වෙයි නම් එය බොහෝ විට විනෝදාස්වාදය පිණිස වනු ඇත.
- රාහු අටවැන්නේ සිටියදී අටවැන්නාධිපති දහවැන්නේ නම් එවිටත් විදේශගතවීමට අවස්ථා ලබා දෙනු ඇත.
- සෙනසුරු දෙවැන්නේ හෝ හතරවැන්නේ සිටියදී සඳු දොළොස්වැන්නේ නම් විදේශගතවීමට අවස්ථා ලබයි.
- හයවැන්නාධිපති සහ හත්වැන්නාධිපති දහවැන්නේ සිටියදී නමවැන්නාධිපති හත්වැන්නේ ්නම් විදේශගතවීමට අවස්ථා ලබයි.
- නමවැන්නාධිපති නමවැන්නේ සිටියදී දහවැන්නාධිපති හත්වැන්නේ නම් විදේශගතවීමට අවස්ථා ලබයි.
- රාහු හතරවැන්නේ හෝ නමවැන්නේ නම් විදේශගතවීමට වැඩි උනන්දුවක් ඇති කෙරෙන අතර ඊට අවස්ථාද ලබයි.
තවත් මෙවැනි අවස්ථා ගණනාවක් තිබෙන අතර ඉහත දක්වා තිබෙන අවස්ථාවක් දුටු පමණින් ස්ථීර වශයෙන්ම විදේශගත වන බව පැවසීමට කලබල නොවිය යුතු වන අතර ගත වන මහ දශාව අතුරු දශාව ඊට ගැලපේද, ස`ඳුගේ ස්වභාවය කෙබඳුද යනාදියත් පරීක්ෂා කර නිගමන වලට එළඹීම වඩා සුදුසුය.
ජ්‍යොතිෂවේදී සරත් මහීපාල
දුරකථන 071 806 6249/ 070 503 7446
උපුටා ගැනීම දිවයින
