විවාහ ජීවිතය ට ග්‍රහයෝ එබිකම් කරන හැටි
විවාහය ජීවිතයේ සුන්දර තම සන්ධිස්‌ථානයකි. යම් අයකුගේ හඳහන නොහොත් ජන්ම පත්‍රයට අනුව ඔහුට හෝ ඇයට ලැබෙන සාහකාරිය හෝ සහකාරයාගේ රූප ශෝභා සම්පන්න බව, ගතිපැවතුම්, දේපළ වත්පොහොසත්කම් අධ්‍යාපන තත්ත්වය, රැකියාව ආදී කරුණු පිළිබඳව දක්ෂ ජෝතීර්වේදීනට පැවසිය හැකිය. පුද්ගලයෙකු තවත් පුද්ගලයකුට හෝ ප්‍රිය මනාප වීම සාමාන්‍ය සිරිතකි. තරුණියක තරුණියකු හා හෝ තරුණයෙකු තරුණියක හා ප්‍රිය මනාප ව වීමද එසේමය. දැන හැඳින ඇසුරුකිරීමෙන් ප්‍රේමකිරීමෙන් සිදුවන විවාහයන් බොහෝමයකි.
ප්‍රසන්න පෙනුමකින් යුත් නෙත් සිත් ආකර්ශනය කරගත හැකි පරිදි රූප ශෝභාවයකින් යුත් කාන්තාවන් ගොරෝසු කළු, අව ලක්‍ෂණ මුහුණක්‌ ඇති පුරුෂයකු සමග විවාහ වී සිටින අවස්‌ථා අපට දකින්නට ලැබේ. එසේම හැඩකාර, කඩවසම් පෙනුමකින් යුත් සුරූපී තරුණයෙකු අවලස්‌සන තරුණියක සමග විවාහ වී සිටිනු දැකීමටද පුළුවන. ශෝභන හා අශෝභන රූසපුවලින් යුත් අය මෙසේ කොතෙකුත් විවාහ වී සිටිති. මෙවැනි සිදුවීම් ඇති වන්නේ ඒ ඒ අයට පිහිටා ඇති අඩුපාඩු අඟ පසඟ දුර්වල කම් නිසාම නොවේ. ජෝතීර් වේදයට අනුව එවන් විවාහ වලදී ග්‍රහයන්ගේ සුවිශේෂී බලපෑමක්‌ද ඇති වීමෙනි. ජාතක කථා වලට අනුව කුස පබා විවාහය ගැනද සිහිපත්වෙයි.
කේන්ද්‍රයේ හත්වැනි ස්‌ථානය විවාහය ගැන විශේෂිත වෙයි. ස්‌ත්‍රී – පුරුෂ ජන්ම පත්‍රයක ලග්නය වැදගත් ස්‌ථානයකි. ලග්නාධිපතියා මෙන්ම ලග්නයේ බලවත් චන්ද්‍රයා සිටීමද ශුභ දායකය. කලින් සඳහන් කළ පරිදි 07 වැන්න හා 07 අධිපතියා පාප පීඩීතව සිටීම විවාහ ජීවිතයේ යහ පැවැත්මට හානි කරවේ. කේන්ද්‍රයේ දෙවැන්න සහ අට වැන්නද විවාහ දිවියට බලපානු ලබයි. දරුවන් ගැන පහෙන් බැලීමද අවශ්‍ය කාරණයකි. පස්‌වැන්නේ පාපයෙකු සිටීමෙන් දරුවන්ට අපලදායක මෙන්ම, වඳවීමටද පුළුවන. කුජ – ශනි 05 වැන්නට සුදුසු නොවේ. ගර්භාෂ ගත ලෙඩ සාදනු ලබයි. 05 අධිපතියා 09 සිටීමෙන් උසස්‌ මව් පදවියකට හිමිකම් කියයි. පිංවත් දරුවන් ලබයි. සිකුරුගෙන් 07 වැනි රාශියද විවාහයට බලපාන්නේය.
කුජ – ශනි යන පාප ග්‍රහයන්ට අයත්, මේෂ, වෘශ්චික මකර, කුම්භ, යන ලග්න වලින් උපන් අය බොහෝවිට ප්‍රිය ලස්‌සන ස්‌වභාවයක්‌ නොගනී. මෙම ලග්නවලින් උපන් අය ශුභ ග්‍රහ දැක්‌මක්‌ නොලද කල්හි යටකී පාපයන්ගේම දෘෂ්ටි, සංයෝග ලබා සීටී නම් ඒ අය රූපශෝභාවෙන් පිරිහුණ අයවෙති. එසේ වුවත් යටකී ලග්නයකින් උපන් කේන්ද්‍ර හිමියෙකුට ලැබෙන සහකරු හෝ සහකාරිය රූප ශෝභාවෙන් අග තැන්පත් විය හැකිය. 07 වැන්න ශූභ ග්‍රහයෙකුට අයත් වීම ඊට හේතුවයි.
තුලා – වෘෂභ රාශිදෙක මේෂ, වෘශ්වික, ලග්න දෙකෙන් උපන් අයගේ 07 වැන්න වෙයි. තුලා වෘෂභ රාශි දෙක ශූභ ග්‍රහයෙකු ලෙස සැලකෙන සිකුරුට අයත් නිසා ඔවුන්ට විවාහයේදී ලැබෙන සහකරුවන්, සහකාරියන් මට සිළුටු, දැකුම් කළු රූපශෝභාවෙන් යුත් අය වෙති. එසේම සඳු – බුධ, ගුරු, සිකුරු යන ග්‍රහයෙකුගේ දෘෂ්ටියක්‌ 07 වැනි ස්‌ථානයට ලක්‌වුයේ නම්, අවලස්‌සන අය වුවත් විවාහයට ලැබෙන අය මනා රූපයකින් හෙබි අය වන්නේය. ස්‌ත්‍රියන් නම් වටකුරු මුහුණු ප්‍රිය අඟ පසඟ රැළි සහිත කේශ කලාපය, කාන්තිමත් නෙත්, නිරෝගී සම, මෙන්ම පුරුෂයෙකු නම්, මනාව පිහිටි ශරීරය, උසට සරිලන මහත, ප්‍රතාපවත් හා සිත් වසඟ කරවන පෙනුම ඇති සහකාරයෙකු හෝ සහකාරියක ලැබීමේ වාසනාව හිමිවන්නේ මේෂ වෘශ්චිත ලග්න වලින් උපන් අයටයි.
මකර ලග්නයෙන් උපන් අයගේ 07 වැන්න (චන්ද්‍රරාශිය) කටක රාශියට ශුභ ග්‍රහ දෘෂ්ටි වැටී ඇත්නම් ඔහු හෝ ඇය ලස්‌සන නැතත්, ප්‍රිය පෙනුමක්‌ නැතත් ලැබෙන සහකරු හෝ සහකාරීය රූප ශෝභා සම්පන්න අයකු වේ. කුම්භ ලග්න හිමියන්ගේ 07 වැනි ස්‌ථානය (රාශිය) වන්නේ සිංහ යයි. මේ නිසා කුම්භ ලග්නයෙන් උපන් අයටද කඩවසම් පෙනුමක්‌ ඇති අයකු විවාහයට ලැබේ. රූපය ලස්‌සන වුවත් ඔහු හෝ ඇය කෲර නපුරු ස්‌වභාවයක්‌ ගනී. අහංකාර බවක්‌ පෙන්වයි. එවැනි පරවශ බවක්‌ ඇති වන්නේ ශුභ ග්‍රහ දෘෂ්ටි සංයෝගවලින් තොර වීමෙනි.
බුධ – සහ බ්‍රහස්‌පති යන ශුභ ග්‍රහයින් දෙදෙනාට අයත් ලග්න ලෙස සැලකෙන්නේ මිථුන – කන්‍යා (බුධ) ධනුමීන(බ්‍රහස්‌පතී) යන ලග්න 04 යි. මෙම ලග්න 04 න් උපන් අය බොහෝවිට ප්‍රසන්නවූ කඩවසම් පෙනුමක්‌ ගෙන දෙන්නේ වෙති. මේ අයට විවාහයට ලැබෙන සහකරුවන්හෝ සහකාරියන්ද රූප ශෝභාව ඇති අය වන්නේය.
තුලා – වෘෂභ, කටක, සිංහ යන ලග්නවලින් උපන් අයගේ 07 වැනි ස්‌ථානයට (විවාහ ස්‌ථානය) ශුභ ග්‍රහයෙකුගේ දෘෂ්ටි හෝ සංයෝග නොලැබු සිටියේ නම් එතරම් ලස්‌සන නැනැත්තෙකු හෝ තැනැත්තියක විවාහයට ලැබේ. කේන්ද්‍රයක සිකුරු බලවත්ම සිටි තරමට විවාහ ජීවිතයද වාසනාවන්තවේ. සැප සතුට ඇති කෙරේ. ස්‌ත්‍රී කේන්ද්‍රයක සිකුරු 07 සිටීම හොඳයි.
ස්‌ත්‍රියකගේ කේන්ද්‍රයක 07 වැන්නේ රවි – කුජ ශනි, රාහු කේතු වැනි ග්‍රහයින් – පාපයින් සිටීම ස්‌වාමිපුරුෂයාට මාරක තරම් අගුණ තත්ත්වයක්‌ උදාකරයි. ස්‌ත්‍රී කේන්ද්‍රයක 07 වැන්න ඉතා වැදගත් ස්‌ථානයක්‌ ලෙස සැලකෙන අතර එකී ස්‌ථානය ශුභව තිබීම ඉතා වැදගත්වේ. අඹු සැමි දෙදෙනාට තම කාර්යයන් හවුලේ කිරීමට සිදුවන නිසා, 7 වැන්න පාපයන්ට පෙනී ඇත්නම් අනිටු ඵල ලැබේ. මකර ලග්නයෙන් උපත ලබා කුජ 07 වැන්නේ සිටින ස්‌ත්‍රියක – පර පුරුෂයන් සමග කම් සැප සොයයි. සැමියා සමග නිතර සන්ඩු සරුවල් ඇති කරගනී. යම් ස්‌ත්‍රියක්‌ ධනු මීන යන ලග්නයකින් උපත ලබා විවාහස්‌ථානයේ (07 වැන්නේ) බුධ ග්‍රහයා සිටියේ නම් තම ඥානවන්ත කම බුද්ධිමත්කම නිසා පණ්‌ඩිතයෙකු සමාන ජන ප්‍රසාදයට ලක්‌වූ ස්‌වාමි පුරුෂයෙකු ලැබේ. ස්‌ත්‍රියකගේ කේන්ද්‍රයක 05 වැනි ස්‌ථානය ශුභ ග්‍රහ දෘෂ්ටි සහිතව රවි බලවත්ව සිටින්නේ නම් ඉතාමත් වාසනා වන්ත දරුවකු ඇයට ලැබේ. සඳු 05 සිටීමෙන් ලැබෙන දරුවන් දු වරුන්ය. 07 වැන්නේ කුජ සිටින කාන්තාවන්ට ලැබෙන ස්‌වාමි පුරුෂයා එඩිතරයි. සිත දරුණුයි. එසේම ඔහු නීති ගරුකයි. රාහු – ශනි 07 වැන්නේ සිටීමෙන් විවාහය ප්‍රමාදවී, විවාහය සිදු වන විට, වයස්‌ ගත වූ වැන්දඹුවක්‌ හිමිවේ. දරුවකු ලැබුණනොත් දෙදෙනාගේ වෙන්වීමද සිදු විය හැකිය.
උපුටා ගැනීම දිවයින
