විවාහය ප්‍රමාද ද? එහෙනම් මේ ගැන දැනගන්න
ගිහි ගෙයි රඳන ස්‌ත්‍රියකගේ හෝ පුරුෂයාගේ පැවැත්ම පිණිස විවාහ විය යුතු බවට සමාජ සම්මතයක්‌ වෙයි. එසේ හෙයින් විවාහවීමට බලාපොරොත්තු වන ස්‌ත්‍රිය හෝ පුරුෂයා විවාහය සම්බන්ධයෙන් තමාගේ දෛවය කෙබඳු විය හැකි දැයි කේන්ද්‍රයෙන් බලවා ගැනීම උචිතය. එබඳු අවස්‌ථාවක ක්‍රි. මු. පද්ධතීයෙන් ලද හැකි ප්‍රයෝජනය අපමණය. ක්‍රි. මු. පද්ධතියේ දී භාවයක උප ස්‌ථානාධිපතියාට විශේෂ තැනක්‌ හිමි වේ. එයට හේතුව භාවයක ක්‍රියාකාරීත්වය මෙහෙයවීම කරන්නේ භාවයක උප ස්‌ථානාධිපතියාවීම නිසාය. විශේෂයෙන් විවාහයේ ක්‍රියාකාරිත්වය පිළිබඳව බලන්නේ හත් වැන්නේ උප ස්‌ථානාධිපතියාගේ පිහිටීම අනුවය.
භාව කෙන්ද්‍රය
භාවයක උප ස්‌ථානාධිපතියා පිළිබඳව සොයන්නට භාව කේන්ද්‍රයක්‌ අවශ්‍ය වේ යයි ඔබට සිතෙනු ඇත. එය එසේ නොවේ. භාව කේන්ද්‍රයක්‌ සාදන්නේ නැතිව වුවද ලග්න ස්‌ඵුටය සොයා ගැනීමෙන් පසුව හත්වන භාව ස්‌ඵුටයත් එම භාවයේ උප ස්‌ථානාධිපතියාත් ඉතා පහසුවෙන් සොයා ගත හැකිය. මෙහි විශේෂත්වය වන්නේ ලග්න ස්‌ඵුටය හත්වන භාව ස්‌ඵුටය ද වීමය. මෙහිදී වෙනස්‌ වන්නේ භාවය පමණකි.
උදාහරණයක්‌ : ලග්න ස්‌ථුටය වෘෂභ 4.02 වුවහොත් 07 වන භාව ස්‌ඵුටය වන්නේ වෘශ්චික 4.02 ය. එවිට හත්වන භාව ස්‌ඵුටයේ උප ස්‌ථානාධිපතියා වන්නේ ශනිය. ශනි ශූභ ග්‍රහයකු නොවේ.
උප ස්‌ථානාධිපතියා
- හත්වන භාවයේ උප ස්‌ථානාධිපතියා ශුභ ග්‍රහයකු වී ශුභ භාව ගතව ශූභ ත්‍රිකෝණ දෘෂ්ඨයක්‌ ලැබුවහොත් කලත්‍රයා ප්‍රියමනාප කෙනෙක් වේ. දක්‌ෂ වේ. වාසනාවන්ත වේ.
- හත්වන භාවයේ උප ස්‌ථානාධිපතියා පීඩා වුවහොත් කලත්‍රයා අවලස්‌සනය. අදක්‍ෂය. පහත් කුලයකය. අවාසනාවන්තය.
- හත්වන භාවයේ උප ස්‌ථානාධිපතියා සඳුගෙන් පීඩා වුවහොත් කලත්‍රයා පහත් ගති ඇති කෙනෙකි. පහත් කුලයකය. චරිතය කෙලෙසා ගනියි.
- රවිගෙන් පීඩා වුවහොත් කලත්‍රයා. වරින් වර දුකට පත් වෙයි.
- කුජගෙන් පීඩා වුවහොත් කලත්‍රයා රහස්‌ සම්බන්ධකම් ඇති කර ගෙන පිරිහෙයි.
- බුධගෙන් පීඩා වුවහොත් ඔහු රහස්‌ කාම ක්‍රියාවන්ට සම්බන්ධ වෙයි.
- ගුරුගෙන් පීඩා වුවහොත් කලත්‍රයා පූජකයන් සමග වරදේ බැඳේ.
- සිකුරුගෙන් පීඩා වුවහොත් කලත්‍රයා ගැබ්නියන් සමග වරදේ බැඳේ.
- ශනිගෙන් පීඩා වුවහොත් කලත්‍රයා වයසක සහ රෝගී අය සමග වරදේ බැඳේ.
- රාහුගෙන් පීඩා වුවහොත් කලත්‍රයා තිරිසන් සතුන් සමග අනාචාරයේ හැසිරේ.
- කේතුගෙන් පීඩා වුවහොත් අනාචාර ගති පැවතුම් නිසා කලත්‍රයා මහ විපත්වලට පත් වේ.
කරදර පීඩා
- පිරිමි කේන්ද්‍රයක හත්වන භාවයේ උපස්‌ථානාධිපතියා තුන් වැන්නට හෝ අට වැන්නට සම්බන්ධ වුවහොත් බිරිඳට අසහන, කරදර, දුක්‌ පීඩා ඇති වේ.
- හත්වන භාවයේ උප ස්‌ථානාධිපතියා සඳු වි පීඩා වූ විට බිරිඳ සහ දරුවන් වෙන්වන තරමට දුක්‌විපාක ඇතිවේ.
- හත්වන භාවයේ උප ස්‌ථානාධිපතියා කුජ හෝ කේතු වු විට ද, කේතු දෙකේ පීඩාවට පත්ව සිටි විට ද කලත්‍රයා ඉතා දුප්පත් කෙනෙකු වේ.
සතුරු කරදර
- හත්වන භාවයේ උප ස්‌ථානාධිපතියා හය වන භාවයේ සිටි විට විවාහයට සතුරන්ගෙන් කරදර ඇති වේ. නැතිනම් විවාහය බිඳ වැටේ.
- හත්වන භාවයේ උප ස්‌ථානාධිපතියා අට හෝ දොළහ සිටි විට දෙදෙනා නිතර එකිනෙකාට දොස්‌ කියමින් බැන ගන්නා තත්ත්වයක්‌ ඇති වේ. එකිනෙකා නුරුස්‌සන ගති ඇති වේ. එසේම කලත්‍රයා කලහකාරී වේ.
- හත් වැන්නේ උප ස්‌ථානාධිපති ගුරු හෝ සිකුරු වී හය, අට හෝ දොළහ හෝ සිටියහොත් කලත්‍රයා කලහකාරී වේ.
රෝගියෙක්‌
- උත්පත්ති කේන්ද්‍රයේ හත්වන භාව ස්‌ඵුටයේ උප ස්‌ථානාධිපතියා කේන්ද්‍රයේ දෙකේ හෝ තුනේ සිටිද්දී හය, අට හෝ දොළහ අධිපතියා එම උප ස්‌ථානාධිපතියාව පීඩා කළහොත් කලත්‍රයා සදාකාලීක රෝගියෙකි.
ග්‍රහා වාසනා
ග්‍රහා වාසනාව වශයෙන් සැලකෙන්නේ විවාහයට ශුභ වශයෙන් සැලකෙන ජන්ම කේන්ද්‍රයේ දෙක, පහ, හත, එකොළහ යන භාවවල අධිපතියන් එම භාවවල තැන්පත් වීමත් එම භාව නිවේදකයන් ශුභ තත්ත්වයෙන් සිටීමත්ය. උත්පත්ති කේන්ද්‍රයේ දෙක, පහ, හත, එකොළහ යන භාව අධිපතියන් හා එම භාව නිවේදකයන් විවාහයට ශුභ වශයෙන් සැලකෙන දෙක, පහ, හත, එකොළහ යන භාව වලින් ඈත්ව හතර, හය, අට, දහය, දොළහ යන භාවවල තැන්පත්වීම හෝ නිවේදකයන් වීම විවාහයට ඉතා අශුභය.
උපුටා ගැනීම දිවයින
