ආලය උඩු යටිකුරු කරන සිකුරු සමග යෙදෙන යෝග
විවාහයට බලපෑම් එල්ල කරන සත්වැන්නේ උප ස්‌ථානාධිපතියා ග්‍රහ මණ්‌ඩලයේ සුකොමලිය හෙවත් මනාලිය වශයෙන් හඳුන්වනු ලබන සිකුරු මිනිසාගේ සියලු ලෞකික සැප සම්පත් ලබා දීමේ දී වඩාත්ම සමීපතම ග්‍රහයා වශයෙන් හැඳින්විය හැකිය. සිකුරු එකිනෙකාගේ හදවත්, ආලය, ආදරය ප්‍රේමය වෙනුවෙන් ආකර්ශනීය බැඳීමක්‌ ඇතිකරවනමුත් වෙනත් සුබ හෝ අසුබ ග්‍රහයෙක්‌ සමග සංයෝග වූ විට මේ සියල්ල උඩු යටිකුරු කරන්නට සමත් වේ. යමෙකුගේ ඡන්ම පත්‍රයේ යම් කොටුවක සිකුරු ඒ ඒ ග්‍රහයන් සමග සංයෝග වූ විට ඇතිවන සුබ අසුබ මෙසේය.
රවි සිකුරු යෝගය
මෙම යෝගය හිමි අය උසස්‌ නම්බුකාරකමින් යුතුව තම තරාතිරම අනුවද ප්‍රේම සම්බන්ධතා ගොඩනගා ගැනීමට උත්සාහ ගන්නා අයවනමුත් තරමක ආඩම්බරකාර ගති පැවතුම් ඇතිවද තම විවාහයෙන් පසු යම් යම් කටුක අත්දැකීම් වලටද මුහුණ පෑමට හා මෙම යෝගය ඇති ඇතමුන්ට විවාහය ප්‍රමාද වීමටද හේතු සාධක ගෙනදෙනු ඇත.
සඳු සිකුරු යෝගය
මෙම යෝගය පිහිටි අය ආදරය, කරුණාව පෙරදැරි කරගෙන තම පෙම්වතාට හෝ පෙම්වතියට අවංකවම බැඳීමකින් සිටින අය වේ. තම සිතුම්පැතුම්ද සංවේදී බවින් යුතුව පවතිනමුත් අවසඳුගේ බලපෑමක්‌ ඇතිවුවහොත් කෲර ගති පැවතුම්වලින් පෝෂණය වී පෙම්වතාට හෝ පෙම්වතියට වෛර කරන්නන් බවට පත්වේ. කෙසේ නමුදු මෙම යෝගය ඇති අය අතිධාවන කාමයෝගයකටද හිමිකම් කියනු ලැබේ.
කුජ සිකුරු යෝගය
මෙම අය තුළ අවංකත්වය කෙසේ වෙතත් රහසිගත රාගික හැඟුම් උත්සන්න බවක්‌ද තම ආත්ම ගෞරවය චරිතය ගැනවත් නොහිතා එක ප්‍රේම සම්බන්ධතාවකින් සෑහීමකට පත් නොවී දුරදිග නොබලා වැඩකටයුතු කරන අයකු වේ. මෙම අය අවසානයේ නීතිමය ගැටලු වලට පවා මුහුණ පෑමටද සිදුවනු ඇත. මෙයද අතිධාවන කාම යෝගයක්‌ වශයෙන් හැඳින්වේ.
රාහු සිකුරු යෝගය
මෙම යෝගය පිහිටි අය හදිසි තීරණ ගැනීමෙන් තම ප්‍රේමය ආදරය තුළදී අවුල්සහගත රැවටීම් වලට යොමුවිය හැකිය. තමාගේ ආත්මාභිමානයටද පවුලේ ගෞරවයටද කැළලක්‌ ඇතිවන සේ විවිධ ප්‍රශ්න ගෙන දේ. කෙසේ නමුදු චරිතයද විනාශ මුඛයට ඇද දමා ගන්නා අතර විවාහ දිවියේදී ප්‍රශ්න මතුවේ.
ගුරු සිකුරු යෝගය
මෙම යෝගයෙන් පෝෂිත වූ අය ඉතා යහපත් ප්‍රේම සම්බන්ධතාවන්ට හිමිකම් කියනමුත් තමාගේ හා තම පවුලේ ආත්ම ගෞරවය රැකෙන පරිදි හා තම සහකරුට හෝ සහකාරියට දැඩි ලෙන්ගතුකමකින් යුතුව සිටින අයවනමුත් හදිසි තීරණ වලදී මෙම අය ජන්මාන්තර වෛරකරුවන් බවට පත්වීමටද ඉඩ ඇත.
ශනි සිකුරු යෝගය
මෙම යෝගයද එතරම් සුභඵල දෙන යෝගයක්‌ වශයෙන් හඳුන්වාදිය නොහැකිමුත් තම ප්‍රේමය ආදරය තුළින් දැඩි කලකිරිම් හා අසුභවාදී ගති ලක්‍ෂණ මතුවිය හැකිය. කෙසේ නමුත් යුග දිවියක්‌ ආරම්භ කරන අයට තමන්ගේ මධ්‍යම වයසින් පසු දැඩි කලකිරීම් වලටද මෙම අය භාජනය හැකිය.
බුද සිකුරු යෝගය
මෙම යෝගය පිහිටන ඇතැම් අයට තම තාරුණ්‍යයට පෙර සිටම ආදර ප්‍රේම සම්බන්ධතාවන් ගොඩනගාගැනීමේ ප්‍රවණතාව වැඩි බවක්‌ පෙන්නුම් කෙරේ. කෙසේ නමුදු මෙම අය එක ප්‍රේම සම්බන්ධතාවයකින් සෑහීමට පත් නොවී විනෝදාංශයක්‌ වශයෙන් ද ප්‍රේම සම්බන්ධතා කීපයක්‌ ගොඩනගාගන්නා අය නැතුවාම නොවේ. එහෙත් මෙම අය අවසානයේදී බුද්ධිමතව සිතා බලා තමාට සුදුසු කෙනා තමා විසින්ම තෝරා ගනී.
කේතු සිකුරු යෝගය
මෙම අය සමාජයට ආලය ආදරය සඟවාගෙන ප්‍රේaම කරන්නෝ වෙති. එහෙත් අන් අයට නොදැනී රහසිගත සම්බන්ධතා ගොඩනගාගන්නා මුත් තේරුම්ගැනීමට අපහසුවනමුත් මෙම අයගේ විවාහ දිවිය අතරමගදී දෙදරා යැමටද වැඩි ඉඩකඩක්‌ මෙම යෝගයෙන් දිස්‌වේ.
උපුටා ගැනීම දිවයින
