පෙම්වතාගේ පෙම්වතියගේ ලග්නය ඔබේ ලග්නයට ගැළපේද
මිනිස් වර්ගයාගේ පැවැත්ම සඳහා විවාහය නැතහොත් ස්ත්‍රී -පුරුෂ සම්බන්ධතාව අත්‍යවශ්‍යම දෙයකි. එහෙත් එය සමාජ සම්මත නීතිරීති අනුව සිදුවිය යුතුය. මිනිසා ශිෂ්ටත්වයට පත්වීමත් සමඟම එය ජීවිතයේ වැදගත් අවස්ථාවක් ලෙස සලකන්නට විය. මෙහිදී යුවළක් විවාහයට පෙර ඔවුනොවුන් කායික හා මානසික වශයෙන් ගැළපේද යන්න ජේ‍යාතිෂය අනුව පරීක්ෂා කිරීමට අපි පුරුදුව ඇත්තෙමු. ඒ සඳහා උපයෝගී කරගත හැකි ප්‍රබලතම සාධකය වන්නේ කෙනකුගේ ලග්නය හෙවත් රාශියයි. ලග්නය පාදක කරගත් කරුණු රාශියකින් කෙනකුගේ මුළු ජීවිත කාලයම විවරණය කළ හැකියි.
කෙනකුගේ ලග්නය හා ග්‍රහචාරය ඔහුගේ හෝ ඇයගේ හෝ දෛවය හෙළිකරන කැඩපතක් බඳුය. ආපෝ, තේජෝ, වායු, පඨවි යන ශක්ති හතරෙන් ඉපදී රාශිය හෙවත් ලග්නය තීරණය විය හැකිය. කෙනකු උපදින විට නැඟෙනහිර අහසේ උදාවී පැවැති රාශිය ඔහුගේ හෝ ඇයගේ ලග්නය වෙයි. කිසිම විටෙක එක් අයකු රාශි දෙකකින් ඉපදිය නොහැකිය. මේ අනුව එක් එක් රාශිවලට ගැළපෙන රාශි හෙවත් ලග්න මේ අයුරින් සඳහන් වේ.
මේෂ රාශියෙන් උපන් අයකුට වඩාත් ගැළපෙනුයේ මේෂ හා ධනු රාශිවලින් ඉපදුණු අයයි. මේෂ රාශිය තේජෝ බලයෙන් යුතු රාශියකි. සිංහ හා ධනු රාශිද තේජෝ ගුණයෙන් යුතු රාශි වෙයි.තේජෝ රාශිවලින් උපන් අය සාමාන්‍යයෙන් කාමුකය. කාමුක පුද්ගලයකු කාමුක කාන්තාවක සමඟ එක්වීමද එක්තරා ගැළපීමකි.
සිංහ ලග්නය හිමි අයකුට මේෂ ලග්න කාන්තාවක් විශේෂයෙන් ගැළපේ. මෙම ලග්නය හිමි දෙපක්ෂයම ප්‍රධානත්වයට කැමැති වීමද ගැළපීමක් වෙයි. ඔවුහු තම කීර්තිය, යසස පැතිරවීමටද දැඩි රුචියක් දක්වති. අවංකය. කිසිම විටෙක අයුක්තිය අසාධාරණයට හිස නොනමති. අන් අය අතර කැපී පෙනෙන ලෙසට සිටීමට උත්සාහ දරන අතර මෝටර් රථවාහන ආදියටද දැඩි කැමැත්තක් දක්වති. ඔවුන් බොහෝ විට වාහන කිහිපයක හිමිකරුවන් විය හැකිය. එවැනි අයකු හා එක්වීමට ඕනෑම කාන්තාවක් ප්‍රිය කළත් වඩා ගැළපෙන්නේ මේෂ ලග්නය හිමි කාන්තාවකි. මේෂ, සිංහ, ධනු ලග්න හිමියෝ සාමාන්‍යයෙන් නිරෝගීය. ඒ අනුව කායික වශයෙන්ද ගැළපේ.
සිංහ ලග්නයෙන් උපන් කෙනකුට මීන ලග්නයෙන් උපන් අයකු නොගැළපේ. ගැළපීමක් වුවත් සුළු වශයෙනි. හේතුව සිංහ රාශිය තේජෝ (ගිනි) රාශියක් වන අතර මීන රාශිය ආපෝ (ජල) රාශියක් වීමය. ගින්දරට ජලය මිශ්‍ර නොවේ. එය නොගැළපීමකි. මේෂ ලග්න හිමියන්ගේ ලග්නාධිපති ග්‍රහයා කුජය. රවි සිංහ ලග්න හිමියාගේ ලග්නාධිපති වන අතර ගුරු ධනු ලග්න හිමියාගේ ලග්නාධිපතිය. කුජට රවි හා ගුරු මීන ග්‍රහයන් වීම සුභය.
වෘෂභ, කන්‍යා, මකර වැනි පඨවි රාශිවලින් උපන් අයට ගැළපෙන්නේ පඨවි රාශිවලින් උපන් අයයි. වෘෂභ ලග්න හිමියාට ගැළපෙන්නේ කන්‍යා, මකර රාශිවලින් උපන් කෙනකු හෝ වෘෂභ ලග්නයෙන් ඉපදුණු අයෙකි. වෘෂභ ලග්න හිමියාගේ ලග්නාධිපති සිකුරුට කන්‍යා රාශිය අධිපති වුවද මකර රාශිය අධිපති සෙනසුරුද මිත්‍ර ග්‍රහයෙකි. වෘෂභ ලග්න හිමියන් දැඩි ගතිගුණවලින් යුක්ත බැවින් තම මතයටම මුල්තැන දීම ඔවුන්ගේ සිරිතය. ප්‍රධානත්වය ලබා ගැනීමට කැමැති වුවත් එය දරා ගැනීමේ හැකියාවක් ඔවුන් තුළ නොමැත. පඨවි රාශිවලින් උපන් අය බොහෝ විට අලස ගති ගුණ ඇති අය වෙති. වෘෂභ ලග්න හිමියකුට සිංහ ලග්න හිමිකාරියක් නොගැළපේ. වෘෂභ ලග්නාධිපති සිකුරුට සිංහ ලග්නාධිපති රවි සතුරු වීම එයට හේතුවයි. ක්‍රියාශීලි රවිට අලස ගති ඇති සිකුරු නොගැළපේ.
මිථුන, තුලා, කුම්භ වායු භූත රාශි වෙයි. මිථුන ලග්නයෙන් උපන් අයකුට ගැළපෙන්නේ තුලා, කුම්භ හෝ එම ලග්නයේම අයෙකි. ඔවුනට කායික හා මානසික වශයෙන් වඩාත් ගැළපෙන්නේ තුලා ලග්න හිමියන්ය. මිථුන ලග්නාධිපතීන්ට තුලා ලග්නාධිපති මිත්‍ර ග්‍රහයකු වීම එයට හේතුවෙයි. මිථුන ලග්නාධිපති බුධ වන අතර තුලා ලග්නාධිපති සිකුරුය. මිථුන, තුලා ලග්න හිමියන් අලසකමින් සිටිමින් සැප විඳීමට කැමැති අය වෙති.
ඊළඟට වැදගත් වන්නේ ජල රාශිවලින් උපන් අයයි. කටක, වෘශ්චික, මීන ජල රාශි වශයෙන් සැලකේ. කටක ලග්න හිමියන්ට විවාහයේදී ගැළපෙන්නේ වෘශ්චික හෝ මීන ලග්න හිමියන්ය. කටක ලග්න හිමියාගේ ලග්නාධිපති ග්‍රහයා වන්නේ සඳුය. වෘශ්චික රාශියට අධිපති ගුරු සඳුගේ සම ග්‍රහයෝ වෙති.
සඳුට ජේ‍යාතිෂයේදී සතුරු ග්‍රහයන් නොමැත. ඒ අනුව කටක ලග්න හිමියන්ට වෘශ්චික, මීන ලග්න හිමියන් විවාහයේදී යම් ප්‍රමාණයකින් ගැළපෙනු ඇත. ජල රාශිවලින් උපන් අය දියනෑමට දක්වන්නේ ඉතාමත් ආසාවකි. ඔවුහු ඉක්මනින් කලබලයට පත්වෙන සමාන අදහස් ඇති අය වෙති. මේෂ ලග්න හෝ සිංහ ලග්න හිමියකු කටක ලග්න හිමිකාරියක් සමඟ විවාහ වුවහොත් බොහෝ විට පවුලේ අවුල් ඇතිවිය හැකිය.
ස්ත්‍රියකගේ උපන් රාශියේ සිට ගණින විට පුරුෂයා උපන් රාශිය 1, 3, 4, 5, 7, 9 ,10, 11 වී නම් සුබයි. 2, 6, 8, 12 වී නම් සුබ නොවේ. මෙහිදී අසුබයැයි කියන 2, 6, 8, 12 යන රාශිද මේෂ , වෘශ්චික යන කුජට අයත් රාශි වීමෙන්ද මකර, කුම්භ යන සෙනසුරුට අයත් රාශි වීමෙන්ද සුබවේ. ස්ත්‍රී රාශියක් ස්ත්‍රියකටද පුරුෂ රාශියක් පුරුෂයාටද යෙදී අධිපතියන් මිත්‍ර ග්‍රහයන් වී නම්ද වඩා ගැළපේ. විවාහයේදී පවුලේ ගැටුම් ඇති වූ බොහෝ දෙනකුගේ කේන්දර විමසා බැලුවොත් දෙදෙනාගේ නොගැළපෙන කරුණු රාශියක් ඇති බව පෙනේ. මේ අතරින් ඉහත විස්තර කළ රාශි ගැළපීම් ද වැදගත් වේ.
මව්බිම
