බහුභාර්යා සංගමයක සාමාජිකාවක්ද?
විවාහයේ සාර්ථකත්වය රැඳී පවතින්නේ ලිංගිකත්වය මතය. එය විවාහයේ සාර්ථක අසාර්ථකත්වයට බොහෝ සේ බලපායි. පුරුෂයකු අධි කාමුකත්වයට පත්වන්නේ උපතේදී වන පිහිටීම් අනුවය. ජන්ම පත්‍රයක් පරික්ෂා කිරීමේදී බහු විවාහ, පර ස්ත්‍රී සේවනය අධි කාමුකත්වය ආදිය ඉතා නිවැරැදිව ප්‍රකාශ කළ හැකිය.
පුරුෂ කේන්දරයක සිකුරුද, ස්ත්‍රී කේන්දරයක කුජද, විවාහය නියෝජනය කරති. එසේම 7 වැනි භාවය සහ විශ්ව කේන්දරයේ 7 වැන්න වන තුලාවද පරීක්ෂා කළ යුතුය. එසේම සිකුරුගෙන් 7ත්, කුජගෙන් 7ත් පරීක්ෂා කළ යුතුය. එම ග්‍රහයන්ගේ සුබ අසුබ බව සැලකිය යුතුය. පැරැණි රජ දවස රජවරු අන්ත--පුර තබාගෙන සිටීමත් ඉංග්‍රීසීන් තහනම් කරන තුරු ලංකාවේ තිබූ එකගෙයි කෑම නම් බහු භාර්යා යෝගයද, මුස්ලිම්වරු තුළ දැනුදු පවතින බහු භාර්යා යෝගයද දැක්විය හැකිය. නමුත් යම් පුරුෂ කේන්දරයක 7 වැන්න අධිපතියා තමා සිටි රාශියේ කොපමණ අංශක ගණනක් පසුකර සිටියද එපමණම භාර්යාවන් ලැබෙන බව සඳහන්ය. එසේම 7 වැන්න දකින ග්‍රහයන් ප්‍රමාණයට භාර්යාවන් ලැබෙන බවද සඳහන් කළ හැකිය. ලග්නාධිපති 8 වැන්න හෝ 7 වැන්න පාපියකු සමඟ වීමද, 2 වැන්නාධිපතියා 7 වැන්නේ හෝ 6 වැන්නේ පාපියකු සමඟ වීමද ඉහත පරිදිමය. 2 වැන්න හෝ 7 වැන්න පාපියකුගෙන් යුතුව 7 වැන්නාධිපතියා පාප දෘෂ්ටි ලැබීමද භාර්යාවන් තුන්දෙනකු ලැබීමට හේතුවකි. රවි, සඳු ලග්නාධිපති හෝ 7 අධිපති ලග්නගතව හෝ 7 වැන්නේ සිටීම එක බිරියක පමණක් ලැබෙන පිහිටීමකි.
7 අධිපති ශනිගේ රාශිවල හෝ සිකුරු හෝ රාශිවල සිට සුබයකුගේ දෘෂ්ටි ල‍ෙදාත් භාර්යාවන් කිහිපදෙනකු සිටිති. 2 වැන්න හෝ 7 වැන්න පාපීන් තැන්පත්ව, 7 අධිපතියා පාපීන් තැන්පත්ව, 7 අධිපතියා පාපී දෘෂ්ටියට ලක්වේද එය භාර්යාවන් තිදෙනකු ලැබීමට හේතු වෙයි. බුධ බලවත්ව 10 වැන්න වීමද, 9 වැන්නාධිපතියාගෙන් 3 වැන්නේ සඳු සිටීමද, බහු භාර්යා යෝගයකි. 2 වැන්න 12 වැන්න අධිපතියන් ලග්නය කෙරෙන් 3 වැන්න වීමද ගුරු හෝ 9 අධිපතිගේ දෘෂ්ටියකට ලක්වීමද එවැනිම යෝගයකි. 7 වැන්නාධිපති සහ 11 වැන්නාධිපති 1, 4, 7, 10 නැකැත වීම බහු භාර්යා යෝගයකි. 9 වැන්නාධිපති 7ත්, 7 අධිපති හතරේ වේ නම් එය භාර්යාවන් තිදෙනකු ලැබීමට හේතුවකි.
මෙම ජන්ම පත්‍ර හිමියා අධික කාමාශාවකින් පෙළෙන අයකු බව බැලූ බැල්මටම පෙනෙන්නේය. ඔහු තම භාර්යාවට හොර රහසේ අනියම් බිරියන් කිහිපදෙනකු සමඟ කම් සැප විඳින්නේය. එසේම ඔහුට රැකියාවද බලවත් ලෙස ඉවහල් වී ඇත. ඔහු විධායක ශේ‍ර්ණියේ නිලධාරියෙකි. ඔහු යටතේ සේවය කරන රූමත් කාන්තාවන් සමඟ ඔහු තම සබඳතා පවත්වාගෙන යයි. එසේම කුජ ලග්නයේ වීම බොහෝ විට තරුණියන් ඔහුත් සමඟ කම් සැප විඳීමට පෙලඹවීමකි. මෙවන් අය තම බිරියට වඩා අනියම් බිරියට බොහෝ විට සලකති. මෙම ජන්ම පත්‍රය තුළ මේෂ ලග්නයට බුධ, ශනි පාපියන්ය. ඔවුන් 2 වැන්නේ සිටීමෙන් එම භාවද පීඩා විඳී. එය සහෝදර පල අඩු වීමට බල පවත්වා ඇත. කුජ උදා කළ රුචක යෝගය ඉහළ අධ්‍යාපනයක් ලබා රැකියාවක් ලැබීමට හේතු වෙයි. මෙම කේන්දරයේ 2 වැන්න හා 7 වැන්න අධිපතියා සිකුරුය. ඔහු උදා කළ කාලත්‍ර මුල ධන යෝගය ලග්නය තුළ යෙදීම ඔහුට විවාහය නිසා ධනය ලැබීමට හේතු වෙයි. එසේම සිකුරු උභය රාශියක යෙදීම බහු විවාහක යෝගයක් වෙයි. යම්කිසි අයකු විවාහයට ඇතුළු වීමේදී පොරොන්දුවලට වඩා මූලිකව මෙම ග්‍රහයෝග පිළිබඳව වැඩි අවධානයක් යොමු කළ යුතුය. එසේ කිරීම යෝජිත හෝ සම්බන්ධයක් මත සිදුවන විවාහයක් වුවද සාර්ථකත්වයට හේතු වන බැවිනි. එම නිසා පොරොන්දම් ගැළපුණු පමණින්ම තීරණයකට නොගොස් සෙසු ග්‍රහ බලය පිළිබඳවද සැලකිය යුතුය.
ඔබගේ ජන්ම පත්‍රය ඉහත ආකාරයට ග්‍රහ පිහිටීම් පිහිටා ඇති නම් ඒ පිළිබඳව මනාව අධ්‍යයනය කර එයට ගැළපෙන පිළියම් කර ගැනීම තුළ සාර්ථක පවුල් ජීවිතයක් ගත කිරීමට හැකිය. ශාන්තිකර්ම ආදිය, මැණික් ප්‍රතිකාරය ආදිය උපකාර කර ගත හැකිය.
ප්‍රවීණ ජේ‍යාතිෂවේදීඋඩුනුවර ඩී. එම්. නිලන්ත කුමාරදනසේකර076-7827160
