කේන්දර නොගැළපෙනවා නම් මොන එකකටද පොරොන්දම් බලන්නෙ?

විවාහයකදී පළමුවෙන්ම කළ යුත්තේ දෙදෙනාගේ කේන්දර සටහන් තුළ සිටින ග්‍රහයන්ගේ පිහිටීම් විවාහයකට සුදුසුද, නැතිනම් නුසුදුසුද යන්න සලකා බැලීමයි. සුදුසු නම් පමණක් පොරොන්දම් බැලීම කළ යුතුය. නැතිනම් පොරොන්දම් බැලීම අත්හැරිය යුතුය.මෙම විමර්ශනයේදී පහත කරුණු පිළිබඳව අධ්‍යයනයක් කිරීම වැදගත්ය.

• භෞම දෝෂය හෙවත්කුජ දෝෂය
• කුජ - සිකුරු යෝගය
• සෙනසුරු 7 වැන්නේ සිටීම
• ශනි - මංගල යෝගය
• චන්ද්‍ර - මංගල යෝගය

භෞම දෝෂය හෙවත් කුජ දෝෂය

යෝජිත ස්ත්‍රි / පුරුෂ දෙදෙනාගේ කේන්දර සටහන් වල 1, 2, 4, 7, 8, 12 යන භාව පෙන්වන කොටු තුළින් එකක කුජ ග්‍රහයා සිටීනම් එය කුජ දෝෂයයි. මෙම පිහිටීමක් වුවහොත් යෝජිත අයෙක් කේන්දර සටහනේ පිහිටීම තුළින් කුජ දෝෂය භංගවී යනවා දැයි සලකා බැලිය යුතුවේ. ඒ සඳහා පහත කරුණු පරික්‍ෂාකාරීව විමසිය යුතුවේ.

1.  යෝජිත අනෙක් කේන්දර සටහන තුළ කුජ ග්‍රහයා 1, 2, 4, 7, 8, 12 යන ස්ථානවලින් එකක සිටී නම් කුජ දෝෂය මඟහැරී යයි.
2. 1, 2, 4, 7, 8, 12 යන ස්ථානයක කුජ සිටින කේන්දරයේ ගුරු ග්‍රහයා හෝ සිකුරු ග්‍රහයා බලවත්ව සිටිමින් එම කුජ ග්‍රහයා දෘෂ්ටිමය වශයෙන් දකීනම් එම කේන්දර සටහනේ කුජ දෝෂය භංගවී යයි. මෙම දෘෂ්ටියට හසුවීමට ගුරු හෝ සිකුරු සිටින ස්ථානයේ සිට 5, 7 හෝ 9 වැන්න තුළ කුජ සිටිය යුතුය.
3. කිසියම් විටක කේන්දරයක 1, 2, 4, 7, 8, 12 යන ස්ථානවලින් එකක් කටක රාශිය වී කුජ එහි සිටී නම් එවිටද කුජ දෝෂය භංග වී යයි. කුජ ග්‍රහයා කටක රාශිය තුළදී නීච වෙන නිසාය.
4. කුජ දෝෂය නැති කේන්දර සටහන තුළ 1, 2, 4, 7, 8, 12 යන ස්ථානයක පාපී ග්‍රහයන් වන රාහු, කේතු, ශනි, රවි යන ග්‍රහයකු සිටීනම් එවිටද කුජ දෝෂය භංගවී යයි.

කුජ - සිකුරු යෝගය

මෙම යෝගය අධිකාම යෝගයක් ලෙස සලකනු ලැබේ. එම නිසා කුජ හා සිකුරු එක්ව යෝගවී සිටින කේන්දරයක් හිමි අයකුට එවැනිම කුජ - සිකුරු යෝගවී සිටින කේන්දර සටහනක් හිමි අයකු හෝ කුජ හා සිකුරු අතර දෘෂ්ටිමය සම්බන්ධයක් ඇති කේන්දර සටහනක් හිමි අයකු ගළපාලීම වැදගත්වේ. එනම් කුජ විසින් සිකුරු දැකීම හෝ සිකුරු විසින් කුජ දැකීම විය යුතුය. (කුජට තමා සිටින තැනින් 4, 7 සහ 8 වැන්න පෙනේ. සිකුරුට තමා සිටින තැනින් 5, 7 හා 9 වැන්න පෙනේ.)

7 වැන්නේ සෙනසුරු

සෙනසුරු ග්‍රහයා 7 වැන්නට දිග් බලවේ. එවිට බලවත්කම වැඩිවේ. එවිට සෙනසුරු 7 වැන්නේ සිටින කේන්දර සටහනක් ඇති අයකුට 7 වැන්නේ සෙනසුරු හෝ රාහු, කේතු, කුජ, රවි වැනි පාපී ග්‍රහයෙක් සිටින කේන්දර සටහනක් ඇති අයකු විවාහය සඳහා ගළපා කටයුතු කිරීම වැදගත්වේ.

සලකා බලන කේන්දරවලින් එකක ශනි - කුජ ග්‍රහයන් සංයෝග වී ඇත්නම් එය ශනි මංගල යෝගයයි. එවිට අනෙක් කේන්දර සටහන තුළත් ශනි - කුජ සංයෝගයක් හෝ ඉහත සඳහන් කළ පරිදි එම ග්‍රහයන් දෙදෙනා අතර දෘෂ්ටිමය සම්බන්ධයක් ඇති කේන්දර සටහනක් හිමි අයකු විවාහය සඳහා තෝරා ගත යුතුවේ.

චන්ද්‍ර මංගල යෝගය

මෙහිදී කේන්දර සටහන් තුළින් එකක සඳු - කුජ ග්‍රහයන් සංයෝග වී ඇත්නම් එය චන්ද්‍ර මංගල යෝගයයි.එවිටද අනෙක් කේන්දර සටහන තුළ සඳු - කුජ සංයෝගයක් හෝ එම ග්‍රහයන් දෙදෙනා අතර දෘෂ්ටිමය සම්බන්ධයක් ඇති විය යුතුමය. (ශනි තමා සිටින තැන සිට 3, 7 හා 10 වැන්න දකී. සඳුද තමා සිටින තැන සිට 3, 7 හා 10 වැන්න දකී.)ඉහත සඳහන් ආකාරයට පරික්‍ෂා කර බැලීමෙන් පසු එම ග්‍රහ පිහිටීම් නියම ලෙස පිහිටා ඇත්නම් පමණක් විවාහ කටයුතු සඳහා ඉදිරි පොරොන්දම් බැලීම කළ යුතුය.

ජේ‍යාතිෂවේදී සේනානන්ද කරුණාරත්න කළගෙඩිහේන.මව්බිම