ප්‍රේමය විවාහය සහ දරුවෝ

ප්‍රේම සම්බන්ධතාවන් සහ විවාහය:

සාමාන්‍යයෙන් සියයට හැත්තෑවක් පමණ තරුණ තරුණියන් ප්‍රේමයෙන් වෙළෙති. ඔවුන් බොහෝ දෙනකු විවාහයට පත්වන අතර කිහිප දෙනකු ප්‍රේමය බිඳවැටී වෙනත් මං සොයා යති. කෙසේ වුවද ජන්ම පත්‍රයක් මඟින් ප්‍රේම සම්බන්ධතා ගැන විනිශ්චය කිරීමේදී එහි 5 වැනි භාවය කෙරෙහි අවධානය යොමු කරන්න. 5 වැනි භාව ස්ඵූටයේ උප ස්ථානය හිමි ග්‍රහයා ජන්ම පත්‍රයේ 2 වැනි, 5 වැනි, හෝ 11 වැනි භාවවලට නිවේදයකු වෙයි නම් ප්‍රේම සම්බන්ධතා ඇති වෙයි. 7 වැනි භාවයට නිවේදකයකු නම් විවාහයෙන් එක් වෙති. එහෙත් මෙම ග්‍රහයා හෝ මෙම ග්‍රහයා තැන්පත්ව සිටි නක්‍ෂත්‍රය හිමි ග්‍රහයා 4 වැනි හෝ 10 වැනි භාවවලට නිවේදකයකු වෙයි නම් ප්‍රේම සම්බන්ධතා බිඳවැටී යයි.

විවාහය සහ දරුපල:

ජන්ම පත්‍රයේ 7 වැනි භාව ස්ඵූටයේ උප ස්ථානය හිමි ග්‍රහයා 2 වැනි, 7 වැනි හෝ 11 වැනි භාවවලට නිවේදකයකු වෙයි නම් ප්‍රේම සම්බන්ධතා ඇතිව හෝ නොමැතිව විවාහ වෙති. එහි 2 වැනි, 7 වැනි, සහ 11 වැනි භාවවල නිවේදක ග්‍රහයන්ගේ මහ දශාවේදී සහ අතුරු දශාවල දී විවාහ වෙති. ජන්ම පත්‍රයක් මඟින් දරුපල ගැන විනිශ්චය කිරීමේදී එහි 5 වැනි භාවය කෙරෙහි අවධානය යොමු කරන්න. 5 වැනි භාව ස්ඵූටයේ උප ස්ථානය හිමි ග්‍රහයා ජන්ම පත්‍රයේ 2 වැනි, 5 වැනි හෝ 11 වැනි භාවවලට නිවේදයකු වෙයි නම් දරුපල ඇතිවෙයි. එහෙත් මෙම ග්‍රහයා හෝ මෙම ග්‍රහයා තැන්පත්ව සිටි නක්‍ෂත්‍රය හිමි ග්‍රහයා 4 වැනි හෝ 10 වැනි භාවවලට නිවේදකයකු වෙයි නම් දරුපල නැතිව යයි. ජන්ම පත්‍රයේ 5 වැනි භාවය මඟින් පළමු වැනි දරුවා ගැන පෙන්වන අතර එම දරුවාට 3 වැනි භාවය මඟින් ඔහුගේ සහෝදර සහෝදරියන් ගැන පෙන්වයි. එවිට 5 වැනි භාවයට 3 වැනි භාවය වන 7 වැනි භාවය මඟින් 2 වැනි දරුවා ගැන පෙන්වයි. ඒ ආකාරයට 7 වැනි භාවයට 3 වැනි භාවය වන 9 වැනි භාවය මඟින් 3 වැනි දරුවා ගැනද පෙන්වයි. දරුවන්ගේ ස්ත්‍රී පුරුෂ භාවය ගැන මේ ආකාරයටද නිගමනය කළ හැකියි. ජන්ම පත්‍රයේ 5 වැනි භාවයේ උපස්ථානය හිමි ග්‍රහයා පුරුෂ රාශියක් වන මේෂ රාශියේ තැන්පත්ව සිටියේ නම් පිරිමි දරුවෙක්ද, ස්ත්‍රී රාශියක් වන වෘෂභ රාශියේ තැන්පත්ව සිටියේ නම් ගැහැනු දරුවෙක්ද ලැබේ. මේ අනුව, 5 වැනි භාවයේ උපස්ථානය හිමි ග්‍රහයා තැන්පත්ව සිටි හෝ නිවේදකත්වය දරන රාශිය අනුව ස්ත්‍රී පුරුෂ භාවය ගැන නිගමනය කළ හැකිවෙයි. මේෂ, මිථුන සහ සිංහ රාශි ක්‍රියාකාරී ඒවා නොවන බව සලකති. ජන්ම පත්‍රයේ 5 වැනි භාවයේ උපස්ථානය හිමි ග්‍රහයා, මෙවැනි රාශිවල තැන්පත්ව සිටියේ නම් දරුවන් පිළිසිඳ ගැනීම්වලට බාධා ඇති වෙයි. කේතු, කුජ හෝ රවි යන ග්‍රහයන් 5 වැනි භාවයේ උපස්ථානය හිමි ග්‍රහයා හෝ එම ග්‍රහයා, තැන්පත්ව සිටි නක්‍ෂත්‍රයේ නිවේදක ග්‍රහයකු වෙයි නම් දරුවන් පිළිසිඳ ගැනීම් ඇතිවන්නේ නැත. ජන්ම පත්‍රයේ 5 වැනි භාවයේ උපස්ථානය හිමි ග්‍රහයා හෝ එම ග්‍රහයා තැන්පත්ව සිටි නක්‍ෂත්‍රය හිමි ග්‍රහයා යුග්ම ස්වභාව ඇති ග්‍රහයකු හෝ යුග්ම රාශිවල තැන්පත්ව සිටියේ නම් නිවුන් දරුවන් ලබයි.

මව්බිම