ගැහැනු ගති ගැන චන්ද්‍රයා කියන තතු
ජන්ම පත්‍රයක නව ග්‍රහයන් අතරින් රවි හා සඳු ප්‍රධානම හා වැදගත්ම ආලෝක ග්‍රහයන් දෙපළ ලෙස අප ජේ‍යාතිෂයේදී හඳුන්වනු ලබනවා. මේ අතරින් සඳු හෙවත් චන්ද්‍රයා කාන්තා කේන්දරයක පිහිටා ඇති ආකාරය ඉතාමත්ම වැදගත්වේ. හඳහනක සඳු ගේ පිහිටීම අනුව අපට කාන්තාවකගේ ගතිගුණ පිළිබඳ ඉතා පැහැදිලි ජේ‍යාතිෂ්‍යානුකූල විග්‍රහයක යෙදිය හැකියි. කාන්තා කේන්දරයක චන්ද්‍රයා සිටින ස්ථානය සහ සතුරු මිතුරු බවද විසි දෙවැනි දෙර්කාණාධිපතිගේ දෝෂයට හෝ දර්ශනයට හසුවීම විවිධ වූ ග්‍රහබල චන්ද්‍රයා තුළින් ඇති කරයි. එලෙසින්ම කාන්තා කේන්දර සටහනක චන්ද්‍රයා නීච වීම බොහෝ අසුබ පිහිටීමක් ලෙස පිළිගැනීමක් ඇත. චන්ද්‍රයා නීච වීම තුළ ප්‍රධාන කරුණ ලෙස සඳහන් වන්නේ එවන් කාන්තාවන්ගේ විවාහ ජීවිතය අසාර්ථක වීමය. සඳුගේ නීචය ලග්න අනුව විවිධ වෙයි. පහත දැක්වෙන්නේ ලග්න අනුව,
සඳු නීච වන අවස්ථා
මේෂයේදී අටේද, වෘෂභයේදී හතේද, මිථුනයේදී හයේද, කටකයේදී පහේද, සිංහයේදී හතරේද, කන්‍යාවේදී තුනේද, තුලාවේදී දෙකේද, වෘශ්චිකයේදී එකේද, ධනුවේදී , මකරයේදී එකොළහෙදීද, කුම්භයේදී දහයෙදීද, මීනයේදී නවයෙදීද චන්ද්‍රයාගේ නීචවීම සිදු වෙයි. එවැනි ස්ථානයක චන්ද්‍රයා නීච වීම කාන්තාවකගේ චරිතයට හානිදායකය. ඇගේ පාරිශුද්ධතාව අවදානම් යැයි බොහෝ දෙනාගේ පිළිගැනීමයි. චන්ද්‍රයා හෙවත් සඳු කාන්තා කේන්දරයක උච්ච නීච වීම පිළිබඳ බොහෝ දෙනා විමසිලිවත් වෙති. කාන්තා කේන්දර සටහනක චන්ද්‍රයා උච්චවීම ආධ්‍යාත්මික දියුණුවට, ත්‍යාගශීලීභාවයට; ආලය, සතුට සහ සිතුම් පැතුම් පිවිතුරු කිරීමට ඉවහල් වෙයි. චන්ද්‍රයා කාන්තා කේන්දරයක උච්චවීම ඇතැම් විටෙක ඇගේ යුග දිවියට බාධකයක් විය හැකියි. කාන්තා ආධ්‍යාත්මික දියුණුවට නැඹුරු වීම පරිත්‍යාගශීලී වීම මෙලොව දියුණුවට බාධා පමුණුවයි. තමා සතු දේපළ, වත්කම් වර්ධනය හෝ රැක ගැනීමට මැළිවීම අයහපත්ය. එලෙසින්ම චන්ද්‍රයාගේ යහපත් ගුණාංගයන් වන ආදරය, කරුණාව, අනුකම්පාසහගතවීම සහ අධි සංවේදී බව නිසාම එවැනි කාන්තාවන් නොයෙකුත් රැවටිලිවලට හසුවීමට ඉඩ ඇත. මෙවැනි ග්‍රහ යෙදුම් යම් කාන්තාවකට පිහිටියද ඇය ඒ පිළිබඳ දැනුම්වත්වීම තුළින් තම බුද්ධිය මත තම ආත්මගරුත්වය ආරක්‍ෂා කර ගැනීමට හැකි වෙයි. ජන්ම පත්‍රයක සඳු නීච වීම තුළ බොහෝ විට ප්‍රේම සබඳතා තුළින් පරාජය වීම, රැවටිලිවලට ගොදුරුවීම, චංචල අදහස් ඇතිවීමත්, හඳුනා ගැනීමෙන් තොරව දුටු පමණින් ප්‍රේම සබඳතාවලට යොමුවන්නේත් චන්ද්‍රයා නීච වූ තරුණියන්ය. එවන් තරුණියන් පහසුවෙන්ම තරුණයන්ගේ වසඟයට පත්වීමද ඔවුහු තම පෙම්වතුන්ට අසීමිතව ප්‍රේමයේ උණුසුම හිමිකර දීමෙන්ද ප්‍රේම වියෝගයන්ට බඳුන් වෙති. ප්‍රේම සබඳතාවන් කඩවීම සහ විවාහයට ලැබෙන සහකරුවන්ගේ නොගැළපෙන බව චන්ද්‍රයා නීච වූ කාන්තාවන්හට උරුම විය හැකිය. එය ජාති - කුල - ආගම් හෝ වෙනයම් නොගැළපීමක් විය හැකිය. මෙම නොගැළපීම තුළ මානසිකව පීඩාවට පත්වන්නේ විවාහක පුරුෂයා නොව කාන්තාවයි.
අනියම් සබඳතා, විවාහයෙන් වෙන්වීම සහකරුගේ හැරයෑම හෝ තාඩන පීඩන මෙම නොගැළපෙන විවාහයන් තුළ සිදුවෙයි.කාන්තා කේන්දරයක කුජ සඳු කොතැනක හෝ එකට සංයෝගව සිටීමද විවාහයට පෙර ඇගේ චරිතය කැළැල් කර ගැනීමට ග්‍රහ යෙදුම් ලෙස පිළිගැනෙයි.
සඳු නීච වීම
සඳු - ශනි සංයෝගය කාන්තාවන් දැඩි කනස්සල්ලකට පත් කරයි. විවාහ දිවිය තුළ අවැසි ආරක්‍ෂාව, සැනසීම අහිමි වූ විට ඇති වන කලකිරීම දිවිතොර කර ගැනීමකට පවා හේතුවක් විය හැකියි. මෙවැනි සිදුවීම් සඳු නීචවීම මත සිදුවන අයහපත් ප්‍රතිඵලයන් ලෙස සඳහන් වුවද, එහි යහපත් වීමක් නැත්තේද නොවේ. බුද්ධිමත් තරුණිය තම කේන්දර සටහනේ සඳු නීචවීම තුළින් තමනට අනාගතයේදී සිදුවිය හැකි අනර්ථය වටහා ගනියි. එම අවබෝධය තුළින් ඇය බුද්ධිමත්ව ජීවිතයට මුහුණ දෙයි. එවන් වූ යුවතියක රැවටිලි, මායම්වලට හසු නොවීමද විවාහයෙන් පසු සාර්ථක විවාහ ජීවිතයක් ගත කිරීමද විශේෂත්වයකි. චන්ද්‍රයා උච්ච වූ කාන්තාව ලෝකෝත්තර හෙවත් ආධ්‍යාත්මික දියුණුව පැතීම තුළින් මෙලොව දියුණුව අසාර්ථක විය හැකියි. චන්ද්‍රයා නීච වූ කාන්තාව බුද්ධිය සහ තම අත්දැකීම් තුළින් ලෞකික ජීවිතය සැපවත් කර ගැනීමට උත්සාහ දරයි. නීච සඳු ගුරු සමඟ සංයෝග වීම ද ගුරුගේ දැකීමට හසුවීමද සඳුගේ නීච භංගයට හේතුයි. නීච සඳු සිකුරුගේ සුබ දෘෂ්ටියකට ගොනුවීමද එම දුරුවීමට හේතුවෙයි. සඳු සිකුරු සංයෝගයෙන් උපදින කාන්තාවන් කාන්තා ලාලිත්‍ය මැනවින් විදහා පාන්නවුන්ය. එවන් කාන්තාවන් කලා ලොව බැබළෙන්නේ සඳු සිකුරුගේ යහපත් සංයෝගය නිසාය. චන්ද්‍රයා නීච නොවූවද කාන්තා කේන්දර සටහනක චන්ද්‍රයා පිහිටන ස්ථානය අනුව ඇය පිළිබඳව අපට පහත සඳහන් ආකාරයට තොරතුරු විමර්ශනය කර ගත හැකිය.
• පළමුවැනි භාවය - පමණ ඉක්මවා සිතුවිලි මෙහෙයවීමෙන් කටයුතු අඩාල කර ගනියි. කටයුතු අතපසු වෙයි.
• දෙවැනි භාවය - ඉවසිලිවන්තය. විවාහයෙන් පසු සැමියාට දරුවනට සලකයි.
• තුන්වැනි භාවය - සහෝදර සහෝදරියන්ට හිතවත්ය. ඔවුනට සලකයි.
• සිව් වැනි භාවය - යහපත්ව නිවෙසක් සාදාගෙන සැනසිල්ලේ ජීවත්වීමට සිතය.
• පස්වැනි භාවය - ප්‍රේම සබඳතා රැසකි. සොබා දහමට ආදරය කරයි.
• සය වැනි භාවය - සතුරු උවදුරු පිළිබඳ තැවෙයි.
• හත්වැනි භාවය - නායකත්වයට ළැදිය. අමනාපව ඉක්මනින්ම මිතුරු වෙයි.
• අටවැනි භාවය - මිථ්‍යා මත පිළිගනියි. අනවශ්‍ය ලෙස රෝග පිළිබඳ තැවෙයි.
• නවවැනි භාවය - විදෙස්ගත වීමට හේතුය. දයානුකම්පිතයි.
• දහවැනි භාවය - චරිතය ආරක්‍ෂා කර ගැනීමට මූලිකත්වය දෙයි.
• එකොළොස්වැනි භාවය - ලැජ්ජා බිය හඳුනයි. ස්වාමියාට නව ආදායම් මාර්ග ඇතිවෙයි.
• දොළොස්භාවන භාවය - අනවශ්‍ය වියදම් ඇත්තෙකි. මානසික පීඩනයට හේතුයි.
මෙහි සඳහන් කළ කරුණු සරලය. කාන්තාවන් සුන්දරය. කාන්තාවන්ගේ සුන්දරත්වය සහ මෙම සරල අදහස් ගොනුවූ කල අර්ථ ගැන්වීම පුළුල්ය. කාන්තා කේන්දරයක චන්ද්‍රයාගේ නීචවීම වර්තමානයේ අප බුද්ධිමත්ව දැකිය යුතුය.
උච්ච සඳු
ලෝකෝත්තර දියුණුවට නැඹුරුය. එවන් කාන්තාව තම ළාමක බව තුළින් අවදානමට ගොදුරු වෙයි. නීච සඳු හිමි කාන්තාව ලෝකය අවබෝධ කර ගනියි. ජය පරාජය හඳුනාගනියි. ඇය මෙලොව ජීවිතය සාර්ථක කර ගැනීමට උත්සාහ දරයි. කඳුළින් දකින හසරැල්ල සුන්දරය. එයම සාර්ථක යුග දිවියක ආරම්භය නොවන්නේද? ඔබත් ඔබගේ ජන්ම පත්‍රය හෙවත් හඳහන තුළ චන්ද්‍රයාගේ පිහිටීම පිළිබඳ අවධානය යොමු කොට ඉදිරි අනාගතය පිළිබඳ නිසි අවධානය යොමු කර ගැනීම ඉතාම අගනේය.
උපුටා ගැනීම මව්බිම
