රාහුට හිමි ජීවින අංක හතර
රාහුට අයිති ජීවින අංක 04 ගැන කරුණු කාරනා කියාදීම මෙම ලිපියේ මූලික අරමුණයි. රාහු කාලය තුළ යමක්‌ කරයිද එයද බාධාවකට හේතුවකි. ජීවන අංක 04 ඉක්‌මවා අංක 05 ගැන විස්‌තර පල උනේ ඒ නිසාද කියා මට නිකමට සිතේ. ඉතින් පාඨක සැම වෙත ඇති වුන අපහසුතාව ගැන මා ඉතාම කනගාටු වන අතර ජීවන අංක 04 ගැන දැන් කියවා බලා ගන්න.
රාහුට ඇත්තේ නයි හිසකි. දිග කකුල් දෙකක්‌ද ඇත. රාහු ඡායා ග්‍රහයෙක්‌ වන අතර අංක 04 නියෝජනය කරයි. තමාගේ ජන්ම පත්‍රය තුළ රාහු හොඳ ස්‌ථානයක සැදී පැහැදී සිටිය හොත් සියලු යසඉසුරු ලබා දෙනවා ඇත. නරකට සිටියොත් ඔළුව නැති වැඩ කරලා සියලු දේ විනාශ කර ගන්නවා. ඔබ ඉපදිලා තියෙන්නේ 04, 13, 22, 31 යන දිනයකද කියල බලන්න. එසේ නම් ඔබේ ජීවන අංකය අංක 04 බව වටහා ගන්න. ඒ කීවේ ඉලක්‌කම් දෙකක්‌ එකතු කළ විට එකතුව 04 වීමයි. දැන් වැටහෙනවා නේද? මේ ජීවන අංකය යෙදෙන්නේ උපන් දවස අනුවයි. මෙම අංක 04 හිමි අය තර්ක කිරීමට හරිම දක්‍ෂයි. සමහරු කියන්නේ එකට එක කියන කෙනෙක් කියල. කවුරු මොනවා කීවත් තමා ගත් මතය හරි කියල හිතාගෙන කටයුතු කිරීම පුරුද්දකි. ජීවන අංක 04 හිමි බොහෝ උදවිය තමාට මොන තරම් අග හිඟකම් පැමිණියත් අනුන්ගෙන් ඉල්ලන්නේ නැත. හත්වේලක්‌ බඩ ගින්නේ හිටියත් යමෙක්‌ කෑවද කියල ඇහුවොත් ඔව් මා කෑව කියල කියන්නෙත් මේ අය බව වටහා ගන්න. සමහර අවස්‌ථාවල කිසිම හරයක්‌ නැති වැඩ කරන්නේද මේ අය තමයි. නයි ඔළුවක්‌ කියල මා මුලින් කීවේ ඉක්‌මන් කේන්ති කාරයො නිසයි. ඇත්ත නැත්ත කුමක්‌ වුවත් හරි ඉක්‌මනට කරනදේ කිරීමට උත්සාහ දරනු ඇත. සමහර ගමේ ගොඩේ උදවිය එයාට හරි කඩි ගාය කියල කියනවා. ඔබ අසා ඇතිනෙ. ඒ වගේම තමා දිග කකුල් දෙකක්‌ කියල කීවේ. රටේ හැම තැනක්‌ම පාහේ දැක බලා ගැනීමට හරිම ආසයි. හැම තැනම ඇවිදිම පුරුද්දක්‌ කරගෙන තියෙනවා. ඇවිද්ද පය දහස්‌ වටී කියල කියමනක්‌ තියෙනවා නේද? ඒකත් ඉතාම හොඳයි. රාහු හොඳට හිටිය ජිවන අංක 04 හිමි උදවිය තමයි රට රාජ්‍යවල ගමන් කරල මුදල් හොයල සුපිරි විදියට ජීවත්වන්නෙ. පිට රට ගිහිල්ල රන් කහවනු සොයා ගත්තත් රාහු නරකට හිටිය ජීවන අංක 04 හිමියන් තමයි කාල බීල සියල්ල විනාශ කරගෙන දුක්‌ විඳින්නෙ. සිගරැට්‌, අරක්‌කු වලට දැඩි ලෙස හිත ඇදී යන්නේත් එම අයටයි. මේ අයට හිර ගෙවල්වල ලගින්නත් ඇතැම් විට මානසික රෝහල්වල ප්‍රතිකාර ලබා ගැනීමටත් සිදුවේ. ඔබත් අංක 04 හිමි කෙනෙක් නම් හිතුවක්‌කාරි නොවී පනින්න පෙර සිතා බලා කටයුතු කරගන්න. මේ අංක 04 හිමි අයට සැඟවුණ කුසලතා තිබිමට පුළුවන්. එම කුසලතා මතුකරගත හොත් ජීවිතය හරිම සුන්දර එකක්‌ කර ගැනීමටත් පුළුවන. ඒ ගැන ජ්‍යෙතිර් විද්‍යා විශාරදයකුගෙන් ඔබේ කේන්ද්‍ර පිළිබඳ විස්‌තර විමසා දැනගන්න. අංක 04 ජීවන අංකය හිමි උදවිය වැඩි වේලාවක්‌ ගෙදර රැඳෙන්නේ නැත. කුමක්‌ හෝ සෙවීම පිණිස හෝ නැතුව ගෙදරින් පිටවීම ආශාවක්‌ කර ගනී. සමහර අයගේ පවුල් ජීවිතද අවුල්කර ගනී. දික්‌කසාද සඳහාද කරුණු කාරණා ඉස්‌මතු කර ගන්නවා ඇත. තමා කියන දේවල් අනුන් පිළිගන්නේ නැති විට අධික කේන්තිය ගන්නවා. තැන නොතැන කුමක්‌ වුවත් ඔවුන්ට කමක්‌ නැත. කටින් ජය ගන්න බැරිනම් අතින් පයින් හෝ වැඩ පෙන්නා මම උගතා ජගතා වීමට වැර වීරිය දරන බවක්‌ පෙනී යයි. සමහර පුවත්පත් සංස්‌කාරකවරුන් සංස්‌කාරකවරියන්, අප රටේද අංක 04 ට නතුවි සිටිනවා. උගත් ලේඛකයෝ කපා හැරලා මොනවා හරි බහු භූත ලියන අය පත්තරවල පුරවා ගන්නවා. එවිට පුවත්පත මෙලෝ රහක්‌ නැතිවෙනවා. ජ්‍යෙdතීර්විද්‍යාව යනු ඉතා ගාම්භීර විෂයකි. පළපුරුදු උදවිය ඇත්තේ ඉතා ටික දෙනෙකි. එම දක්‍ෂ මුහුකුරා ගිය උදවිය ඇති පුවත්පත්ද බැබලෙනු නොඅනුමානය. හැම දේකටම බුද්ධිය අවශ්‍යයි. බුද්ධිමතුන් කියවන පුවත්පතක මේවා අංක 04 යටතේ ලියා තැබීම උචිතය. ඉතින් අංක 04 කටින් ජය ගන්නා දඟලන නිසා දේශපාලනයට ගිය අයත් සිටිනවා. කට නිසා මිය ගිය පසුත් තමාගේ සොහොනේ පවා ගී වැල් ලියවී ඇති අයත් අප අතර සිටිනවා.මා කීවා නේද? රාහු හොඳට සිට අංක 04 යටතේ උපන් අයට සියලු යස ඉසුරු ලැබෙනවා කියා. ඔබේ කේන්ද්‍රයේ රාහු සුබ ස්‌ථානයක සිටීනම් අංක 04 හිමි දිනක උපත ලබා ඇත්නම් බඹරය වැල්ලේ කැරකෙන බව මතකයේ තබා ගන්න. ඔබ අංක 04 යටතේ උපත ලබා ඇත්නම් වැටකෙයියා කොළ ඔබ නිදන කොට්‌ටයට කටුහැර දමා ගන්න. රාහුගෙ මැණික ගෝමේද නිසා පලදු නැති ලොකු ගෝමේද ගලක්‌ මුද්දක අල්ලා අතේ ගෑවෙන අයුරින් පලඳින්න. තලගුලි දුගී මගි අයට කෑමට දෙන්න. පිස්‌සු හැදුන අයට හෝ මානසික ලෙඩුන්ට උදව් උකාර කරන්න. වැටකෙයියා පැළයක්‌ සිටවා (නිරිත පැත්තේ) දිනපතා වතුර දමන්න. අපල දුරුවී යහපත උදාවනු ඇත. හැකිනම් වැටකෙයියා මලක්‌ බෝධියට පූජා කොට මළගිය අයට පිං දෙන්න.ඕනෑම අවුරුද්දක ජුනි 21 සිට අගෝස්‌තු 27 දක්‌වා කාලය ජීවන අංක 04 හිමි අයට යහපත් බවද මතක තබා ගන්න. 04, 13, 22, 31 යන අංකද දිනයන්ද වැදගත් දේවල් සඳහා යොදා ගන්න. රෝග වශයෙන් අස්‌ථි, බිඳිම්, දත්වල ආබාධ, රුධිර සම්බන්ධ රෝග මානසික රෝග, අජීර්න රෝග සමහර විට මතුවිය හැක.අංක 04 රාහුට අයිති වුණත් කේන්ද්‍රයේ රාහු බලවත් අයුරින් බලවත් ස්‌ථානයක ඇතිව උපත ලබා ඇති රට සුපතල අය කිහිප දෙනෙක්‌ පහතින් දක්‌වනු ඇත. එය උදාහරණයට ගෙන කරුණු කාරනා ජීවන අංක 04 හිමි උදවිය සිහියට ගන්න.
- සර් ජෝන් කොතලාවල 1897.04.04
- ර් ඩී. බී. ජයතිලක 1868.02.13
- එස්‌. ඒ. වික්‍රමසිංහ 1901.04.13
- තේවිස්‌ ගුරුගේ 1923.03.22
- එච්. ආර්. ජෝතිපාල 1935.02.13
- ආර්. ජී. සේනානායක 1911.11.04
- ටී. එම්. ජයරත්න 1944.04.13
ජීවන අංක 04 හිමි උදවිය ජීවිතය හොඳ පැත්තට හරවා ගත්තොත් රටේ ප්‍රසිද්ධ නමක්‌ වගේම ලෝක පූජිත තත්ත්වයට පත්වන්නත් වරම් ඇත. එම නිසා මාගේ ජීවන අංකය 04 කියා දුක්‌වන්න එපා. රාහු දෙන අයට පැල්බැඳගෙන යස ඉසුරු දෙන බවද මතක තබා ගන්න.
ජ්‍යෙතිර්වේදී මාතර පුහුල්වැල්ලේ සුසිල් ප්‍රේමචන්ද්‍රඋපුටා ගැනීම දිවයින
