හතර කේන්ද්‍රය පාළුවීමෙන් ජීවිතයට අයහපතක් වෙනවාය කියන්නේ බොරු...
මේ රූප සටහනේ දැක්වෙන්නේ (රවුම් කළ) සතර කේන්ද්‍ර ස්ථානයි. සංඛ්‍යා වශයෙන් දක්වන විට ඒවා 1, 4, 7, 10 වශයෙන් හඳුනාගත යුතුවේ.
“අපේ පුතාගේ හතර කේන්ද්‍රය පාළුයි. එයාව මහණ කරන්නට පන්ස‍ලේ ලොකු හාමුදුරුවෝ ඉල්ලනවා” මෙවැනි ප්‍රකාශන නිතර අපට අසන්නට ලැබේ. හතර කේන්ද්‍රය පාළුවීම අවසනාවක් ලෙසත් එවැනි පුද්ගලයෙකු අනුන්ගෙන් යැපීම සඳහා මහණ කළ යුතු බවත් වැඩි දෙදෙනකු අතර ප්‍රචලිත අදහසක් වේ. දීර්ඝ සංසාර ගමනේ වර්තමාන භවයේ දී අප පෙර කළ කුසල් අකුසල් පිළිබඳව දැක්වෙන සටහන, චිත්‍රය අපේ ජන්ම කේන්ද්‍ර සටහන ලෙස භාවිතයට ගනී. මෙය ඝෘජුවම බමුණු දහමක් වුවද බෞද්ධයන් විශාල ප්‍රමාණයක් ස්වකීය දහමේ අතිවිශිෂ්ට කරුණු පසෙක ලා මෙම බමුණු දහම ඔස්සේම හඹා යන ආකාරය දක්නට ලැබේ. මෙය අතිශය ඛිෙදජනක තත්ත්වයක් බව සිහිපත් කළ යුතුව ඇත. සසර ගමනේ පෙර කුසල් අකුසල් නිසි ලෙස හඳුනාගෙන ඒවාට පිළියම් යෙදීම සඳහා භාවිතා කළ යුතුව ඇති ජ්‍යොතිර් විද්‍යා රීතින් අද වන විට බඩගෝස්තරවාදීන් විසින් ජන ජීවිතය තව තවත් ව්‍යාකූල භාවයට හා අසරණ භාවයට පත් කිරීම සඳහා යොදා ගෙන ඇති බව පැහැදිලිව දක්නට පුළුවන.
ජ්‍යොතිර් වේදයට අනුව දැක්වෙන කේන්ද්‍රයක මෙම හතර කේන්ද්‍ර ස්ථාන පිළිබඳව මුලින් කරුණු සඳහන් කළ යුතු වේ. ජන්ම කේන්ද්‍රයක 1, 2 ආදී වශයෙන් 12ක් දක්වා කොටු දැක්වේ. මේවා භාවරාශි ආදී වශයෙන් නම් සඳහන්වේ. මේ සෑම කොටුවකින්ම පුද්ගලයාගේ පෞරුෂයට අදාළ සියලුම කාරණාවන් කියවේ. මෙහි දැක්වෙන රූපසටහනේ ප්‍රධාන කේන්ද්‍රස්ථාන ලෙස සැලකෙන 1, 4, 7, 10 යන කොටු හතර කේන්ද්‍ර ස්ථාන ලෙස හැඳින්වේ. පුද්ගලයෙකුගේ ජීවන මාර්ගයේ සාර්ථකත්වය සඳහා අවශ්‍යම බහු මූලික කාරණාවන් මෙම හතර කේන්ද්‍රස්ථාන හතරට අයත්වේ.
1 කොටුවෙන් ඔහු සතු මූලික පෞරුෂ ලක්ෂණ සියල්ලමත්, 4 වැන්නෙන් සිතිවිලි, මවු පාර්ශ්වය, දේපළ ඉඩම් කඩම් හා ඥාති සම්බන්දතාවයනුත් 7 වැන්නෙන් විවාහය හා ජීවිත කොටස් කරුවන් පිළිබඳවත් 10 වැන්නෙක් ජීවන මාර්ග, රැකියා, පිය පාර්ශ්වය ආදී කරුණු පිළිබඳවත් කරුණු අවබෝධ කර ගත හැකිවේ. මේ ස්ථාන 4 ග්‍රහයන්ගෙන් හිස් වූ විට ජීවිතයට අත්‍යාවශ්‍ය වන ඒ සියලු කාරණාවන් අහිමි වීමක්. බිඳ වැටීමක් සිදුවේය යන මිථ්‍යා අදහස සමාජය පුරා පැතිරී ඇති බව වර්තමානයේ දකින්නට ලැබේ. කේන්ද්‍රයේ වෙනත් ග්‍රහ පිහිටීම්වල ශක්තිය එම භාව අධිපතීන් වෙනත් තැනක ශක්තිමත්ව පිහිටීම, එම භාවයන්ට එල්ල වන සුබ දෘෂ්ටි වැනි බොහෝ කාරණාවන් අනුව ඉතා වාසනාවන්ත ජීවිත ගත කරන දස දහස් ගණන් දෙනා ගැන වසර පනහකට වැඩි කාලයක් ජ්‍යොතිෂ අත්දැකීම් ලැබූවෙකු ලෙස මම දනිමි.
යමෙකුගේ පෞරුෂය හඳුනා ගැනීමේදී ධාර්මික ආධාර්මික ස්වභාවය ලෞකික හෝ ලෝකෝත්තර මානසික ස්වභාවය වැනි ගැඹුරු කාරණාවන් සලකා බලද්දී සිවු කේන්ද්‍ර ස්ථාන ග්‍රහයන්ගෙන් බොහෝ දෙනා ධාර්මික සමාජයට වැඩදායක පුද්ගලයන් බව මම හඳුනාගෙන ඇත්තෙමි. ඉහළ අධ්‍යාපන සුදුසුකම් ලබා උසස් රැකියාවල නිරත වෙමින් සාර්ථක යුග ජීවිත ගත කරමින් හොඳ ආර්ථික තත්ත්වයකින් යුක්තව දිවි ගෙවන බොහෝ දෙනා පිළිබඳව මම දනිමි. හතර කේන්ද්‍රය පාළු වීම අනුව යහපත් ගුණධර්මවලින් යුක්ත අය බිහිවීමේ සිද්ධාන්තය හේතු කර ගෙන එය පැවිදි යෝගයක් ලෙස පුරාණයේ පටන් පැවත එන අදහසේ ප්‍රබල තේරුමක්ද තිබේ. පැවිද්ද ගුණධර්මවලින් යුක්ත, කපටි කයිරාටික අයෙකු නොවී හැමගේ වැඳුම් පිඳුම් ලැබිමට සුදුසු අයෙකු විය යුතු බව අවිවාදිත කාරණයකි. සතර කේන්ද්‍ර ස්ථාන ග්‍රහයන්ගෙන් හිස් වීම සමගම වෙනත් ග්‍රහ පිහිටීම්ද සලකා සමාජ පූජනීයත්වයට පත්විය හැකි පත්විය යුතු පුද්ගලයෙකු පැවිදි භාවයට පත් කිරීමට සුදුසු අයෙකු බව පොදුවේ කාටත් එකඟවිය හැකි කාරණාවකි. එසේ නොසලකා පැවිදි වූ ඇතැම් අය නිසා ශාසනයට සිදුවන අගතිය පිළිබඳ සාධක අද අපට අසන්නට දකින්නට ලැබේ.
කෙසේ වුවද දීර්ඝ කාලයක් බුදුදහමේ ප්‍රායෝගික අංශය හා ජ්‍යොතිෂය පිළිබඳ සත්‍යතාවය අවබෝධ කර ගැනීමට උත්සාහ දරන අයෙකු ලෙස කිව හැක්කේ කිසිසේත්ම සතර කේන්ද්‍රය පාළු වීම අවාසනාවන්ත හෝ ජීවිතයේ ඉදිරි ගමනට කිසිදු බාධාවක් හෝ නොවන බවය. අද වන විට වෙනත් සියලු වටිනා ක්‍ෂේත්‍රයන් මෙන්ම ජ්‍යොතිර් විද්‍යාව අයථා ලෙස වාණිජකරණය වීම හා හොර ජාවාරම්කාරයන්ගේ තෝතැන්නක් බවට පත්වී ඇති බැවින් වඩාත් බුද්ධිමත්ව සිය ජීවින ගමන සකස් කර ගත යුතු බව සඳහන් කළ යුතුයි. කපටි ෙකෙරාටිකයෙකුගේ වැරදි මානසික ඇඟවීමක් නිසා ඔබේ ජීවිතය සහමුලින්ම නිසරු වීමේ අවදානම වැඩිය. කේන්ද්‍රයේ කුමන ශක්තියක් පැවතිය ද අර කපටින්ගේ මුසා බස් ඒවා යටපත් කිරීමට ප්‍රබල හේතුවක් වේ.
ජ්‍යොතිර්වේදී අමරසේන වේගිරිය
උපුටා ගැනීම ලක්බිම
