මතකය අඩු කර නිදිමත වැඩි කරන කේශ යෝගය
රෑ නිදිවරාගෙන පාඩම් කටයුතුවල යෙදෙන නමුත් සාර්ථක ප්‍රතිඵල ලබා ගැනීමට නොහැකි වීම, අධික නිදිමත දැනීම, ඉගෙන ගන්නා දේ මතකයේ නොරැඳීම, උනන්දුවක් නොදැක්වීම ආදී ගැටලු දහස් ගණනාවක් ලැබේ. එසේම සමහර දරුවන් වයසේ පමණට කතා නොකරති. අධ්‍යාපනයට දුර්වලය. මෙම ගැටලු ඇති හඳහන් දෙසීයක් සහ එයට සමාන ගැටලු සහිත වැඩිහිටියන්ගේ හඳහන් පනහක් ඉතා ගැඹුරින් අධ්‍යයනය කිරීමේදී ශනි හා කේතුගේ බලපෑම කෙතරම් ප්‍රබලදැයි හඳුනා ගැනීමට හැකි විය.
සෙනසුරු තෙතමනයක් නැති ග්‍රහයෙකි. ඒ ග්‍රහලෝකයේ හැටි පමණක් නොවේ. දශාවක්, ඒරාෂ්ටකයක් ලැබුවාමත් සිතේ තෙතමනයක් නැති අයකු සේ දුක් කරදර දෙයි. බෝධිසත්ත්වයන්ටත් අපල කළ සෙනසුරා සාමාන්‍ය මිනිසකුට අපල කිරීම පුදුමයක් නොවේ. බොහෝ දෙනකු සෙනසුරාට බය ඒකය. හිරුගේ පුත්‍රයකු වන ශනි නපුංශක ග්‍රහයකු ලෙස ජේ‍යාතිෂයේදී සැලකුවත් දෙදෙනා අතර දුර සැතපුම් 886,000,000ක් වන අතර මේ පුත්‍රයා පියා වටා ගමන් කිරීමට වසර 29 1/2ක් ගතකරයි. එතරම් දුරක සිට මෙතරම් වින කරන ශනි තවත් ටිකක් ළං වූවා නම් කුමන තත්ත්වයක් ඇති කරයිද? අවාසනාව, දුක, අධෛර්යය, බලාපොරොත්තු කඩවීම, වැඩකටයුතු අසාර්ථක වීම, දුක් විඳින රෝග ඇති කිරීම, අස්ති බිඳීම, කම්මැළිකම, නඩහබ පැටලීම වැනි තත්ත්වයන් සෙනසුරු අපලයක ප්‍රතිඵල ලෙස ලැබේ.
කේතු ග්‍රහයකු වශයෙන් සැලකුවද එවැනි ග්‍රහලෝකයක් දැකිය නොහැකියි. ඒ නිසා සැලකෙන්නේ චින්තන මාත්‍ර ග්‍රහයකු වශයෙනි. චන්ද්‍රයා පොළොව වටා භ්‍රමණය වීමේදී පෘථිවිය සූර්යයා වටා ගමන් ගන්නා මාර්ගය කැපෙන ස්ථාන රාහු හා කේතු වශයෙන් නම් කර ඇත. රාහු යනු මකරාගේ මුඛයත්, කේතු වල්ගයත් වශයෙන් සමහරු සලකති. මොවුන් දෙදෙනා නිතරම සිටින්නේ අංශ 180ක පරතරය සහිතවය.
සෙනසුරා සහ රාහු යහපත් ආකාරයෙන් පිහිටි විට ලෞකික වශයෙන් සුබපල දෙන නමුත් කේතුගෙන් නම් එවැන්නක් බලාපොරොත්තු විය නොහැකියි. එසේ වුවත් පරලොව පිළිබඳ කටයුතුවලට නම් හොඳය. යහපත් ආකාරයෙන් පිහිටියහොත් පියකරු පෙනුමක් මෙන්ම හොඳ බුද්ධියක්ද ලැබේ. වියදම් අඩුකරයි. ඒ හැරෙන්න මෙලොව ලෞකික දියුණුව සඳහා නම් බලාපොරොත්තු තබා ගැනීම අමාරුය. දුෂ්ට ස්ථානගත වූ විට මහ දශා අතුරු දශාවලදී රෝගයකින් හෝ වෙනත් ආකාරයකින් දින කිහිපයක් හෝ එක් තැන් කරයි. ඒ ඇවිදින්න දෙපා වෙනුවට නාග සිරුරක් හිමි කරදී ඇති නිසා විය යුතුය. අතේ තිබෙන්නේ පොතකි. ඇවිදින්න බැරි කේතුට අවශ්‍ය අනෙක් අයත් එක්තැන් කරන්නටය. එම සංකේතයන්ගෙන් කියැවෙන දේ කේතුගෙන් ලැබේ.
මෙවැනි ගතිගුණ ඇති දෙදෙනකු එකතු වූ විට කුමක් සිදුවේදැයි සිතා ගැනීම අමාරු නැත. ශනිත්, කේතුත් දෙන්නාම සැලකෙන්නේ පාප ග්‍රහයන් වශයෙනි. මේ දෙන්නාටම ඇවිදින්න බැරිය. කේතුට කකුල් නැත. ශනිට කකුල් ඇතත් ඇවිදින්නේ අමාරුවෙනි. ඒ නිසා මේ දෙන්නා එකට සංයෝග වූ විට ලෞකික දියුණුවට බාධා ඇති කරයි. ජීවිතය ඉදිරියට ගෙන යන්නට සීමා බාධා පනවයි.
ලග්නයේ දුර්වලව පිහිටියහොත් මතක ශක්තියේ දුර්වලතා ඇති කිරීමෙන් අධ්‍යාපනයට බාධා පැමිණේ. දෙවැන්නේ නම් පෙනීමේ, දෘෂ්ටියේ දුර්වලතාත්, 4 වැන්නේ යෙදීමෙන් පදිංචි නිවෙසේ ගැටලු හා භූත බලවේගයන්ට පහසුවෙන් නතු වීමත් වැනි තත්ත්වයන් දැකිය හැකිය. 7 වැන්න විවාහ ස්ථානය හෙයින් විවාහ ජීවිතයේ අසාර්ථකත්වය හා කලකිරීම්වලට හේතු වේ. දුෂ්ට ස්ථාන වශයෙන් හැඳින්වෙන හය, අට හා ෙදාළහ යන ස්ථානවල මෙම සංයෝගය අසුබ අන්දමින් පිහිටා ඇත්නම් ස්නායු දුර්වලතා සෑදීම බොහෝ විට දැකගැනීමට ලැබේ. සිහි මූර්ඡාවීම, මීමැස්මොරය, ඔවුන්ගේ සහලක්ෂණය, වයස පමණට බුද්ධිය නොවැඩීම, අත-පය වලංගු නැතිකම ඉන් සමහරකි.
අතීත සෘෂිවරුන් විසින් රාහු සහ කේතු පිළිබඳ වැඩි විස්තර ලියනු ලැබ නැත. ඔවුන්ගේ උච්ච ස්වක්ෂේත්‍ර රාශීන් පිළිබඳ ඔවුන් අතර මතභේද පවතියි. කුමාරදාස රජතුමන්ගේ සමයේ ලංකාවේ වාසය කළ ශ්‍රී කාලිදාස ප¾ඩිතුමා විසින් සිය "ජේ‍යාතිර්විදාහරණ" නමැති පොතෙහි සඳහන් කර ඇත්තේ "මහර්ෂිවරුන් පවා මොවුන්ගේ උච්චානුච්ච නොකියන ලද්දේ" ය යනුවෙනි. වරාහමිහිරාචාර්යයන් විසින් පවසන ලද ආකාරයට කේතුට මීන රාශිය ස්වක්ෂේත්‍ර වශයෙන්ද, මිථුන රාශිය නීච වශයෙන්ද සැලැකේ. මෑත කාලීනව ඉන්දියාවේ ප්‍රකට ජේ‍යාතිෂවේදියකු වූ මණික් චාන්ද් ජෙයින් මහතා විසින් මේ ග්‍රහයන් පිළිබඳ සවිස්තරාත්මක පොතක් ලියා ඇත.
ලංකාවේ මෑත භාගයේ ජීවත් වූ අති විශිෂ්ට ජේ‍යාතිර් විශේෂඥයකු ලෙස සැලකෙන හෙන්ද්‍රික් ද සිල්වා හෙට්ටිගොඩ මැතිතුමා විසින් සටහන් කර ඇත්තේ "මේ දෙදෙනා (ශනි සහ කේතු) එකට නරකට සිටි විට ඔවුන්ගේ බලය ආ විට මනුෂ්‍යයාට සෑදෙන රෝග විනිශ්චයට යන්තර තාම හදාගන්ට බැරිවී තිබෙන බව ඔප්පු වී තිබේ. ශරීරයේ නහර පැවැත්ම හොඳටම දුර්වල වෙයි. මොළයේ සියුම් කොටස් ඝන වෙයි. ශරීරය හොඳටම සීතල වෙයි... තීක්ෂණ සියුම් සිතිවිලි නැති වෙයි... මතක තබා ගැනීමේ ශක්තිය නැතිවේ" යනාදී වශයෙනි. එහෙත් කිසිවකු මෙම සංයෝගය කුමන ආකාරයෙන් යෙදුණු විට සුබ දැයි දක්වා නැත.
වර්තමානයේ ජේ‍යාතිෂය ව්‍යාපාරයක් බවට පත් කර ගැනීම නිසා වාණිජමය උපක්‍රම යොදමින් වැඩි ප්‍රමාණයක් හඳහන් පරීක්ෂා කොට දෛනික ආදායම සරු කර ගැනීම බොහෝ දෙනකුගේ මූලික අරමුණ හෙයින් අධ්‍යයනයකට කාල වේලාව යොදවන්න කැමැත්තක් නැත. මෑත කාලයේ එවැනි අධ්‍යයනයන්හි යෙදුණු ජේ‍යාතිෂය සම්බන්ධයෙන් අති විශිෂ්ට දැනුම් සම්භාරයක් සතුව තිබූ අපේ අති පූජ්‍ය බෙල්ලන ඥානවිමල මහනායක ස්වාමින් වහන්සේ ශනි-මංගල යෝගය හෙළි දැක්වූහ. ඉන් පෙර ජේ‍යාතිෂය සම්බන්ධයෙන් විශාරද දැනුමක් තිබූ හෙන්ද්‍රික් ද සිල්වා හෙට්ටිගොඩ මැතිතුමන්ද විවිධ අධ්‍යයනයන් සිදු කර තිබේ.
මා මෙම අධ්‍යයනයට යොමු වූයේ අධ්‍යාපනයට උනන්දුව අඩු වීම, මතක ශක්තියේ දුර්වලතාව, කතා කිරීමේ හා වටහා ගැනීමේ දුර්වලතා ඇතිවීම, ස්නායු දුර්වලතාවයෙන් අකර්මණ්‍ය වීම වැනි ළමා ගැටලු පිරික්සීමේදී කිසිදු අපල තත්ත්වයක් නොමැතිව වුවත් දුබලතා ඇතිවන්නේ කෙසේ දැයි ගැඹුරින් සොයා බැලීමේදීය. විශේෂත්වයක් වූයේ හංස යෝගය හෝ භද්‍රා යෝගය හෝ ඒ දෙකම හෝ තිබියදීත් මෙම තත්ත්වයන් මතු වීමයි. ඒ අනුව ඔප්පු වූයේ කේතු හා ශනිගේ යෝග වීම මහා පුරුෂ යෝග පවා අභිභවා යෑමට තරම් ප්‍රබල බවයි.
මගේ අධ්‍යයනයට අනුව ශනි හා කේතු කුමන ආකාරයකින් (සංයෝග වීම හෝ දෘෂ්ටි ලැබීම) යෝග වුවත් ලැබෙන ප්‍රතිඵලය අඩු වැඩි වන නමුත් යම් ආකාරයක දුර්වලතාවක් ඇති කරයි. විශේෂයෙන්ම උච්ච හෝ නීච හෝ මූල ත්‍රිකෝණ රාශීන්හි මේ දෙන්නාගෙන් එක් අයකු පිහිටියහොත් ඉතා තදබල ආකාරයේ අගුණ ඇති කරයි.
දශාවේදී හා ඒරාෂ්ටකයේදී ඉතා දැඩිය. සංයෝගය දුෂ්ට ස්ථානයක (6, 8, 12) පිහිටියේ නම් ඒත් දැඩි අගුණ දේ, දෘෂ්ටිය ලැබෙන්නේ කුමන ස්ථානයකින්ද යන්න වැදගත් වෙනසක් ඇති නොකරයි. මෙහි විශේෂත්වයක් වන්නේ ශනිගේ දෘෂ්ටිය පස්වැන්නට (තිකෝණ දෘෂ්ටිය) ලැබෙන බවට පරාසර සෘෂීන් කර ඇති සඳහන නිවැරැදි බව ඔප්පු වීමයි. මේ දෙදෙනාට කුජ සංයෝග වීම අනිෂ්ට ඵල ලබා දේ. එවිට ගොතගැසීම් වැනි හා පසු වයසේදී අධික රුධිර පීඩනය වැනි තත්ත්වයන් දකින්නට ලැබේ. මෙම සංයෝගය 9 වැන්නේ හා 11 වැන්නේ පිහිටි අයගෙන් අයහපත් තත්ත්වයන් දක්නට ලැබුණේ 0.3%ක පමණ ඉතාමත් සුළු පිරිසකගේය. එසේ නැතහොත් අධ්‍යයනයට ලක් වූ හඳහන් 300න් එක් හඳහනක් බැගින් පමණි. (රූපයේ දැක්වෙන වගු බලන්න)
ඉහත වගු අනුව හා හෙළි වූ තොරතුරු සලකා බැලීමේදී පැහැදිලිව පෙනී යන්නේ ශනි හා කේතු යන දෙදෙනාගේ යෝග වීම කුමන ආකාරයකින් සිදුවුවත් ස්නායු කෙරෙහි අයහපත් බලපෑමක් ඇති කරන බවයි.
දරුවන් අධ්‍යාපනය කෙරෙහි ඇති උනන්දුව අඩු නම් අධික ලෙස නිදිමත හා අලස බවින් පෙළෙන්නේ නම් කෙතරම් උනන්දුවෙන් නිදි වරාගෙන පාඩම් කළත් විභාගයෙන් අසමත් වන්නේ නම් කතාව ප්‍රමාද වන්නේ නම් ඔවුන්ගේ හඳහන්වල කේශ යෝගය පවතින්නේදැයි මවුපියන්ට දැනගත නොහැකි නම් අත්දැකීම් සහිත ජේ‍යාතිෂවේදියකු හමුවීම වැඩදායක වෙයි. මේ සඳහා නිවැරැදි ආකාරයට ප්‍රතිකර්ම යෙදීමෙන් පවතින තත්ත්වයට 85-90%කින් පමණ සාර්ථක ප්‍රතිඵල ලබා ගැනීම අපහසු නැති බව අත්දැක තිබේ.
මෙම යෝගය කේශ යෝගය ලෙස මා විසින් නම් කරන ලද්දේ යෝගයට අදාළ ග්‍රහයන්ගේ නම්වල මුල් අකුරු යොදාගනිමිනි. මෙම අධ්‍යයනයේ ප්‍රතිඵලය ජේ‍යාතිෂවේදීන්ට ප්‍රයෝජනයට ගත හැකි අතර තමන් වෙත පැමිණෙන ඉහත දුර්වලතාවන්ගෙන් පෙළෙන දරුවන්ගේ හඳහන් මනා ලෙස පරික්ෂා කිරීමෙන් සත්‍යතාව අවබෝධ කර ගත හැකියි. මෙම හෙළිදරව්වේ මූලික අරමුණ මා ලබා ගත් දැනුමෙන් යෙදී ඉන්නා ජේ‍යාතිෂය පෝෂණය කිරීම වෙනුවෙන් යම් සේවාවකට දායක වීමයි.
ජේ‍යාතිෂවේදී චන්ද්‍රසිරි සී. කළුබෝවිල
