ධර්ම දානයේ මහිමයෙන් බුධ ගේ අපලය දුරලන්න
උපතින්ම හිමි වන විවිධ දක්‍ෂතා මෙන්ම දුර්වලකම් ද බොහෝ අයට තිබේ. එකම පලතුරු ගසක ගෙඩිවල එකම රසයක්‌ ඇත. එහෙත් එකම මව්පියන්ට දාව උපන් නිවුන් සහෝදරයන් පවා විවිධ වෙනස්‌ කම් වලින් යුක්‌ත බව පෙනී යයි. සත්වයා විවිධ බවත්, විෂම බවත් ඊට ප්‍රධාන හේතුව කර්මය බවත් බුදුරජාණන් වහන්සේ උගන්වා වදාළහ. ජ්‍යෙතිෂයේ ද ග්‍රභ බලය නැතහොත් අපලය වශයෙන් හඳුන්වන්නේ මෙම කර්ම ශක්‌තිය මගින් ඇති කරන බලපෑමයි. සත්වයා කර්මය උරුම කොට ඇති බවත්, දායාදය කොට ඇති බවත්, නෑයා කොට ඇති බවත් චුල්ල කම්ම විභංග සූත්‍රයේ සඳහන් වන්නේය. මේ වූ කලී උපදින විටම ලබා ඇති බලවේගයකි.
රවි, චන්ද්‍ර හා කුජ යන ග්‍රහයන් ගෙන් හඳුනාගත හැකි කර්ම ශක්‌තීන්, අපල හා ශාන්ති කර්ම ගැන පසුගිය ලිපි වල විස්‌තර කරන ලදී. මෙම ලිපියෙන් සාකච්ඡා කිරීමට බලාපොරොත්තු වන්නේ බුධ ග්‍රහයා පිළිබඳ විස්‌තරයයි.
බුධ යනු ග්‍රහ මණ්‌ඩලයේ සිටින කුඩාම ග්‍රහයා ය. හිරුට ආසන්නවම ගමන් කරන ග්‍රහයා ද වෙයි. යමෙකුගේ කේන්ද්‍රයේ බුධ බලවත් නම් ඔහු හෝ ඇයගේ කථාව චතුර මෙන්ම සිත් ඇදගන්නා සුළු වන්නේය. ගණිතයට දක්‍ෂ වෙයි. චිත්‍ර, ජ්‍යෙතිෂ් ශාස්‌ත්‍රය, ලේඛන කලාව, සැලසුම් ශිල්පය පරිගණක, කැටයම් කලාව, කථිකත්වය. නීතිවේ දී ආදී අංශවල උසස්‌ දක්‍ෂතා දක්‌වන කෙනෙක්‌ද වනු ඇත. ඔවුහු බුද්ධිමතුන් වෙති. එමෙන්ම කටහඬ සුවිශේෂී වෙයි. තවද රහස්‌ පරීක්‍ෂණයේ ද අති දක්‍ෂ වෙයි. වහා අවබෝධ වන අය වන බැවින් එක්‌ වරක්‌ පහදා දීම සෑහේ. මොවුන්ට බොරු කළ නොහැකිය. දක්‍ෂ කථිකයන්, නීතිවේදීන්, ගායකයින් බුධ බලවත් අය වෙති. ආසියාවේ රිදී සීනුව” නම් විරුදාවලිය ලත් හිටපු අගමැති ඇස්‌. ඩබ්. ආර්. ඩී. බණ්‌ඩාරනායක, ජනාධිපති ආර්. ප්‍රේමදාස සහ ප්‍රවීන ගායක මොහිදින් බෙග්, එච්. ඩබ්. රූපසිංහ යන අයගේ කේන්ද්‍රවල බුධ බලවත්ව පිහිටා තිබුණි.
උපතින්ම ඇති වන මෙම සහජ දක්‍ෂතා වලට හේතුවන්නේද විශේෂ කුසල කර්ම ශක්‌තියකි. වචනයෙන් කෙරෙන වැරදි හෙවත් බොරු කීම, කේලාම් කීම, පරුෂ වචනය සහ හිස්‌ වචන කීමෙන් වැලකීම ඉන් පලමුවැන්නයි. උතුම් සත්පුරුෂයන්ට මෙන්ම අධ්‍යාපනය ලබන දුප්පත් ශිෂ්‍ය ශිෂ්‍යාවන්ට ආධාර උපකාර කිරීම, ධර්ම දානයද, ඒ සඳහා හේතු වන්නේය. පෙර ආත්ම වල එවැනි කුසල් රැස්‌ කළ අය බුධ බලවත්ව උපදිති.
වයසින් වැඩෙන්ම කුඩා දරුවන් කතා කරන්නට පටන් ගනී. බහ තෝරනවා. යෑයි හඳුන්වන මෙය පමාවන විට බිය වන මව් පියන් ඊට හේතු හා ප්‍රතිකාර සෙවීමට වෙහෙසෙනු පෙනේ. කතා කිරීමට පමාවන දරුවන්ගේ කේන්ද්‍ර වල බුධ දුර්වල බවද දක්‌නට ලැබේ. බුධ ග්‍රහයා කේන්ද්‍රයක දෙවැන්නේ නීච වීම, ගොතය ඇති වීමට හේතු විය හැකිය. දරුවන්ගේ කතාව පමාවීම, ගොත ගැසීම, වචන උච්චාරණයේ දුබලතා, ඉගන ගන්නා කරුණු අමතකවීම, ගණිතයට දුර්වල වීම, වලිප්පුව, සිහිමද ගතිය, අපස්‌මාරය, මොලයේ හා ස්‌නායු වල දුර්වලතා, සමේ රෝග ඇඟිලිවල රෝග, වෙව්ලීම, ගොළු වීම, බිහිරිවීම, අධික කථාව මෙන්ම තුන් දොස්‌ කිපීමෙන් ඇති වන රෝග බුධ දුර්වලවීම නිසා උදාවන අපල වන්නේය.
තවද බුධ දුර්වල අය කේලාම් හා බොරු කියන කපටි වංචාවල යෙදෙන හිස්‌ වචන හෙවත් වාචාලකම් දොඩන අය බවද පෙනේ. උතුමන්ට අපහාස කරන, නින්දා කරන එවැන්නෝ වචන ගලපා කථා කිරීමට ද ලිවීමට ද අසමර්ථ වෙති. හොර ඔප්පු ලිවීම, බොරු සාක්‌ෂි දීම, හොර අත්සන් යෙදීම වැනි විවිධ වංචනික ක්‍රියා කිරීමට හා අනුන් රැවටීමට ද මොවුන් විශේෂ දක්‍ෂතා දක්‌වන්නෝය. සොරකම් කීරීමට අවශ්‍ය කැට බුද්ධිය බුධ විසින්ම ලබා දේ. ඒ නරකට පිහිටි බුධ ගෙනි.
බුධ ඉංග්‍රීසියෙන් හඳුන්වන්නේ මර්කරි යන වචනයෙනි. මර්කරි යනු රසදිය වලට කියන නමකි. රසදිය, උෂ්ණත්වය ඉහළ පහළ යන විට වේගයෙන් වෙනස්‌ වන ද්‍රව්‍යයකි. බුධ ග්‍රහයාද රසදිය මෙන් එකතු වන ග්‍රහයාගේ හැටියට ඉක්‌මනින් වෙනස්‌ වන්නේය. ජ්‍යෙdතිෂයේ දී බුධ කුඩා දරුවෙකුට සමාන කර ඇත්තේ ද ළමයින් තමන්ට එකතු වන කෙනාගේ හැටියට හැඩ ගැහෙන බැවිනි.
ඔබේ කේන්ද්‍රයේ බුධ තැන්පත්ව ඇති ආකාරය අනුව එහි බල දුබල කම් වටහා ගත යුතුය. කේන්ද්‍රයේ පළමුවන කොටුවේ හෙවත් ලග්නයේ සිටින විට දිග් බලය නම් බලයද, කන්‍යා රාශියේ සිටින විට උච්ච බලයද ලබන බුධ ග්‍රහයා මිථුන රාශියේ දී “ස්‌වක්‍ෂෙත්‍ර” නම් බලය ලබයි. මීන රාශියේ නීච නම් දුර්වල තත්ත්වයට පැමිණේ.
බුධ ග්‍රහයා කන්‍යා රාශියේ බලවත්ව ගමන් කරන කාලය ඇතුළත, බුධට අයත් කන්‍යා රාශිය උදාවන බදාදා දිනක බුධ හෝරාව හා පංචම කාල හෝරාව උදාවන වේලාවට සරස්‌වතී යෝගය යෑයි කියනු ලැබේ එය අකුරු කියවීමට ඉතා ශුභ නැකතකි.
ඔබේ කේන්ද්‍රයේ පළමුවැන්නේ බුධ පිහිටා ඇත්නම් ඔබ උසස්‌ ඉගෙනීමක්‌ ලබන බුද්ධිමතෙකි. කෙනෙකු දුටුපමණින් එන්නේ කුමකට දැයි හඳුනාගැනීමට තරම් තීක්‍ෂණ දැනුමක්‌ ඇත. දෙවැන්නේ නම් ධනය හා චතුර කථාව ඇත. තුන්වැන්නේ නම් යහපත් සහෝදරයන් මෙන්ම අසල්වාසීන්ද ලබයි. බලවත් බුධ හතරේ නම් යහපත් ගේ දොර ඉඩ කඩම් ලබයි. හිතට එකඟව කතා කරයි. විවාහය යහපත් ය. පස්‌වැන්නේ නම් ජීවිතාන්තය දක්‌වා ඉගෙනීමේ යෙදේ. වහා අවබෝධවන තීක්‍ෂණ බුද්ධියක්‌ තිබේ. 6 නම් සතුරු කරදර මෙන්ම ස්‌නායු ගත රෝග ඇතිවීමටද හේතුයි. 7 නම් හොඳ විවාහයක්‌ සිදුවේ. එමෙන්ම උදව් උපකාර කරන හිතවතුන්ද ලැබේ. 8 වැන්නේ නම් සෞඛ්‍ය ගැටලු, කථා කිරීමේ දෝෂ ආදී අපල ඇති වන්නේය.
බලවත් බුධ 9 වැන්නේ නම් පෙර පින, වාසනාව ඇත. දෙවි පිහිට ලබයි. එමෙන්ම උසස්‌ අධ්‍යාපනයට හිමිකම් තිබේ. උපාධි ලැබිය හැකිය. 10 නම් උසස්‌ රැකියාවන් ලබයි. නීතිඥ, ගණකාධිකාරී, විනිශ්චයකාර, රාජ්‍ය ලේකම්, වැනි තනතුරු හිමිවේ. 11 නම් උසස්‌ රැකියාවත් ද ආදායම් මාර්ග ද යහපත් යහළුවන්ද ලබන කෙනෙකි. බුද්ධිමත් හිතවතුන් පිරිසක්‌ රට පුරාම ඇති වේ. 12 නම් කථාව නිසා පාඩු සිදු කර ගනී. ස්‌නායු දුබලතා වලට හේතු විය හැකිය. ඉගෙන්මට බාධා ඇති වීමට පුළුවන.
බුධ ග්‍රහයා තමන්ට එකතු වන ග්‍රහයාගේ ස්‌වරූපයට හැරෙන බව කලින් සඳහන් කළෙමු. මේ අනුව රවි සමග එක්‌ වූ විට ප්‍රඥාවන්තයෙක්‌ වන බවද සඳු සමග එක්‌ වූ විට සෞභාග්‍යවත් බව හා කීර්තිය ලබන බවද, කුජ සමග නම් කපටි ව්‍යාපාරිකයකු වන බවද ගුරු සමග නම් ප්‍රඥාව හා සෞන්දර්ය පිළිබඳ දක්‍ෂතා ඇති වන බවද කියා තිබේ. ග්‍රහ සංයෝග හා දිශා අන්තර්දශා වලදී මේ බව ප්‍රකටව පෙනෙන්නේය.උපතින් දුර්වල වීමෙන් හෝ දශා කාලවලදී හෝ බුධගේ අපලය ලබන විට කළ යුතු ශාන්ති කර්ම ජ්‍යෙdතිෂයේ සඳහන්ව තිබේ. එමගින් අපල අඩු කර ශූභඵල උදාකර ගත හැකි වන්නේය. බුධ අපලයට කල යුතු හොඳම ශාන්ති කර්මය නම් ධර්ම දානය දීමයි. සබ්බ දානං ධම්ම දානං ජිනාති යනුවෙන් බුදු හිමියන් වදාළේ සියලු දානයන්ට වඩා ධර්ම දානය උතුම් බවයි. එනම් ධර්ම දේශනා කිරීම හෝ කරවීම, දහම් පොත් ධර්ම පත්‍රිකා මුද්‍රණය කර නොමිලේ බෙදාදීම, ධර්ම දේශකයන් වහන්සේට පූජා සත්කාර කිරීම, ආදිය මෙයින් අදහස්‌ කෙරේ. උසස්‌ සත්පුරුෂයන්ට හොඳ වැඩ කරන අයට වචනයෙන් සංග්‍රහ කිරීම, අගය කිරීම, ප්‍රසිද්ධියේ ප්‍රශංසා කිරීමද ඊට අයත් වේ. මේ සඳහා විශාල වියදමක්‌ යන්නේද නැත.තවද ඉගෙනීමේ යෙදෙන භික්‍ෂූන් වහන්සේට පොත් පත් හා වෙනත් අවශ්‍ය පහසුකම් ලබා දීම, බණපොත් පූජා කිරීම, විශේෂ ශාන්ති කර්මයකි. දුප්පත් ශිෂ්‍ය ශිෂ්‍යාවන්ට ඉගෙනීමට අවශ්‍ය උපකාර කිරීම හා ධර්මාසන පූජා කිරීම ඉතා ශූභය.මේ අතර බුධ අපලයක්‌ ඇති විට මොලය වෙහෙසා වැඩ කිරීම මෙන්ම නිදිවැරීම ද අශුභය. නෙක ඇඳුම් ඇඳීම නොකල යුතුවාක්‌ මෙන්ම වචනය සංවර කර ගත යුතුය. එනම් බොරු කේලාම් කීම, පරුෂ වචන කීම, වැඩකට නැති හිස්‌වචන කීම නොකළ යුතුය.බුධ අපලය සඳහා පූජා තබන විට බුධට හිමි අංක 4 එකතුවට ලැබෙන 04, 13, 22, 31, 40 ආදී සංඛ්‍යා වලින් මල් වට්‌ටි, කොඩි, පහන් පූජා තැබීම මැනවි. නිල් පාට හා කොළ පාට මල්, ෂඩ් වර්ණ (බෞද්ධ) කොඩි, කොහොඹ තෙල් පහන්, සුවඳ ධූප, පූජා තැබීම ශූභය.බුද්ධ පූජාව තබන විට බුදු රජාණන් වහන්සේගේ අසමසම ඥානය ගැන සිහිකර පූජා තැබීම ඉතා ශූභය. බුද්ධ ඥාන පිළිබඳව ඉගෙන ගෙන ඒ උතුම් ගුණ සිහිකරමින් බුද්ධ පූජා තබන විට තමන්ගේ බුද්ධි වර්ධනය වීමට හෙවත් බුධ අපලය සමනය වීමට එය හේතුවේ. පූජා තබා ශ්‍රී විෂ්ණු, උත්පලවර්ණ දෙවියන් ඇතුළු දෙවිවරුන්ට පින් පමුණුවා සෙත්පතා ගත යුතුය.ඉහත පූජාවන් බදාදා දිනයක තැබීම ද පූජා තබා ගාථා කියන විට උතුරු දිසාවේ වාඩිවී මරුට පිටුපා සිටීමද මැනවි. බුද්ධානුස්‌මෘති භාවනාව ඉතා උසස්‌ ශාන්ති කර්මයකි. තවද සිරකර සිටින ගිරවුන් ඇතුළු පක්‍ෂීන් නිදහස්‌ කිරීම, මාළුන් ට කෑම දීම, හා රත්න, නවගුණ, සබ්බපාපස්‌ස යන්ත්‍රයක්‌ පැලදීම ඉතා ශූභය. ඉහත සඳහන් ශාන්ති කර්ම කිරීමෙන් ඔබට මෙලොව දුක්‌ සමනය කර ගැනීමට පමණක්‌ නොව ලබන ආත්ම භාවයද සැපවත් කර ගැනීමට හැකිවීම ස්‌ථිරය.
උපුටා ගැනීම දිවයින
