සෙනසුරු හිතන තරම් කළුද?
සෙනසුරු තරුව ප්‍රමාණයෙන් බ්‍රහස්‌පතීට වඩා ටිකක්‌ කුඩාය. බරින් හා ඝන ප්‍රමාණයෙන් ද අඩුයි. ශනි ග්‍රහයාට හිරු වටා යැමට වසර 29 මාස 06 ක්‌ ගතවෙයි. ජ්‍යෙතිෂ්‍යට අනුව නෛසර්ගික පාපයෙකි. බොහොමයක්‌ දෙනා සෙනසුරු ග්‍රහයාට බිය වන්නේය. එසේ බිය වන්නේ සියලු අනිෂ්ට විපාක පමුණුවන්නා වශයෙන් වර්ග කර ඇති නිසාය. බුධ, ශුක්‍ර, රාහු ග්‍රහයින් සෙනසුරුට මිත්‍ර වන අතර, රවි, චන්ද්‍ර, කුජ සතුරුවේ. සම ග්‍රහයන් ලෙස සැලකෙන්නේ ගුරු සහ කේතුය. ශනි ග්‍රහයා දුෂ්ට ගතිගුණවලින් පෝෂිතය. දුප්පත්කම, කුම්මැහිකම, අවාසනාවන්තකම, දුක්‌විඳිමින් තවදුරටත් දුක්‌ විඳීම, කුසීතකම, වයසට ගිය අයකු ලෙස දිස්‌වීම, කිලිටි වස්‌ත්‍රවලින් යුක්‌තවීම වැනි දේ මුල් කරගෙන සෙනසුරා නිර්මිතව සිටී.
මෙම ග්‍රහයාට රාශියකින් ඊළඟ රාශියට යැමට වර්ෂ 2 1/2 ක්‌ පමණ ගතවේ. ග්‍රහ මණ්‌ඩලයේ වැඩිම කලක්‌ එක රැසක සිටින ග්‍රහයා ද ශනි වන්නේය. වසරකට වරක්‌ වක්‍රවීම් ද ඇතිවේ. ශනිගේ ගමනේදී ඵල විපාක වැඩියෙන්ම යෙදෙන්නේ රාශියේ කෙළවරේ ගමන් ගන්නා විටයි.
සෙනසුරු ග්‍රහයා නරක නොහොඳ ග්‍රහයකු ලෙස හැඳින් වුවත් මොහුගෙන් හොඳ දේද සිදුවේ. ශුභ ඵල ලැබීමට නම් බලවත්ව ශුභ දෘෂ්ටි ලැබ ඊට යෝග්‍ය තැනක සිටිය යුත්තේය. වෘෂභ තුලා ලග්නවලට ශනි රාජ යෝග කාරක වෙයි. මෙහිදී ශනියේ නරක දුෂ්ටකම් අඩු කරයි. කේන්ද්‍ර හිමියාගේ 12 වැන්නට ලග්නයට (01) සහ දෙවැන්නට ශනි පැමිණීම එAරාශ්ඨකයි. මෙය රවි-චන්ද්‍ර සිටින රාශිවලින් ද සිදුවේ.
කේන්ද්‍රයේ 08 ට ශනි පැමිණීම ද අශුභදායක වෙයි. රවි-සඳු දෙදෙනාගෙන් 08 ට ශනි පැමිණීම ද භයානකයි. අපල උදාකරයි. කේන්ද්‍රයේ ශනි පිහිටා ඇති අයුරුත්, ශනි ගමන් ගන්නා ස්‌ථානවල ඇති වන බල දුබලකම් අනුවත් ශුභ, අශුභ, දියුණුව, දියුණු නොවීම, උස්‌පහත්වීම් ගැන සොයා බැලිය යුත්තේය. ජන්මියාට වස්‌තුව බවභෝග, යසස, කීර්තිය ලබාදී උසස්‌ අයකු කරන්නේ ශනි බලවත්ව ශුභ දෘෂ්ටි ලබා සිටියහොත්ය. එසේම එකී උසස්‌ බලවත් තත්ත්වයන් ද පසුව විනාශ කර දමයි. නැති කරයි. ශනි බලවත්ව සිටියහොත් රාජ්‍ය පාලන තන්ත්‍රයට පවා උචිතවේ. උසස්‌ දේශපාලනඥයකු කරයි. දුබලව සිටියහොත් එහි අනෙක්‌ පැත්තයි. සමාජයෙන් පවා කොන්වූ හිඟන්නකු කරයි. ශනිට නියම අවස්‌ථාව පැමිණිවිට හොඳ හෝ නරක හෝ දෙකින් එකක්‌ කරයි. ශනි ග්‍රහයා බලවත්ව කේන්ද්‍රයේ පිහිටීමෙන් සියලු අයහපත් දේ යටපත් කරමින් ආත්ම දමනයෙන් යුත් අයකු කරයි. ආගමානුකූල ජීවිතයකට පිවිසේ. විපත් කරදර සිදුවීම් ගැන කල්තියා දැනගෙන ඊට මුහුණදීමට කල්තියා ලක ලැහැස්‌තිවේ. කරුණා සහගතව කටයුතු කරමින් දක්‍ෂ වැඩකාරයකු බව පෙන්වයි. ඥනවන්ත අයකු ලෙස ප්‍රකට වේ.
උපතේදී රවි-සඳු සමග ශනි යෝගවී නම් වයස අවුරුදු 30 ගත වන තෙක්‌ කරදර විපත්වලින් නිමාවක්‌ නැත. රවි කුජ සමග ලග්න ගතවී නම් අනතුරුවලට භාජනය වේ. ශනි ලග්නයේ (01) ගමන් කරන කාලයේදී හදිසි අනතුරු, අපවාද, චෝදනා ඇති කරයි. වියදම් අධිකවේ. වැඩිවේ. හරි හම්බකරගත් දේ විනාශවේ. පවුලේ අයකුට විපත් කරදර යෙදේ. තමා ගැන නොයෙකුත් අශෝභන නරක තොරතුරු වෙනදාට වඩා ප්‍රචාරය වේ. කලින් ලැබූ ප්‍රසිද්ධිය නැතිවේ. පිට ප්‍රදේශවල පදිංචිය හෝ තමාට හිමි ස්‌ථානයෙන් බැහැරවීමට හෝ සිදුවෙයි. තමා සතු වස්‌තුව ද හොරු පැහැර ගනිති. තමා අතින් ද සොරකම් කිරීම සිදුවේ. රැකීරක්‍ෂා නැති කරයි.
යටකී අයහපත් තත්ත්වයන්ගෙන් යම්තම් හෝ සහනයක්‌ ලැබෙන්නේ මකර, කුම්භ, තුලා, ධනු යන රාශියක ශනි සිටියේ නම් පමණි. ශනි ග්‍රහයා මකර, කුම්භ, තුලා රාශියක්‌ වී උපත ලැබුවත් ශනි ලග්නයේ ගමන් කරන කාලය තුළ මිශ්‍ර ඵල (ශුභ-අශුභ) ඇති කරයි. කුමන ලග්නයෙන් හෝ ඉපිද ශනි 01-03-05-09-10-11 යන ස්‌ථානයක උපතේදී සිටියේ නම් ශනි ලග්නගතව ගමන් කරන කාලයේදී බලවත් ලෙස අපලකාරී තත්ත්වයක්‌ උදා නොකරයි. ශනි ලග්නයේ (01) ගමන් කරද්දී 05 හෝ 09 ස්‌ථානවල ග්‍රහයන් ගමන් කරන විට, ශනිට ත්‍රිකෝණ දෘෂ්ටි වැටීම ඉතාමත්ම ශුභදායකයි. යහපත උදාකරයි. ගරු නම්බු, තාන්න මාන්න ලැබේ. තමාගෙන් අන් අයට සේවයක්‌ සැලසෙයි. 05 වැන්නට ශනිගේ දෘෂ්ටි වැටීමෙන් දරුවන්ගේ අනාගත කටයුතු සඵල වෙයි. 09 ට දෘෂ්ටි වැටීමෙන් ආගමික කටයුතුවල යෙදේ. දුරබැහැර විනෝද ගමන් වන්දනා ගමන් යෙදේ. ශනි බලවත්ව යහපත් තැනක සිටීමෙන් ශනි මහ දශාවේදී හෝ අතුරු දශාවකදී හෝ විශේෂයෙන් අවසාන මොහොතේදී රාශියේ යද්දී ශුභ ඵල උදාකරයි. වාසනාවන්ත තත්ත්වයක්‌ ඇති කරයි.
ශනි මහදශාවේදී හෝ අතුරු දශාවකදී හෝ විශේෂයෙන් අවසාන මොහොතේදී රාශියේ යද්දී ශුභ ඵල උදාකරයි. වාසනාවන්ත තත්ත්වයක්‌ ඇති කරයි.
ශනි මහදශාවේදී හෝ වෙනත් ග්‍රහයකුගේ ශනි අතුරු දශාවකදී ශනිගෙන් ලෙඩ රෝග ඇති කරයි. කුෂ්ට රෝග පිළිකා වැනි කල් අල්ලන ලෙඩ ද, තුවාල ද ඇති කරයි. ඇතැම්විට වම් කකුලට පවා අනතුරු හානි සිදු කරයි. කන් බිහිරිවීම, උගුරේ ආබාධ ඇතිවීම ද සිදුවන්නේ ශනිගෙනි.
තුලා රාශියට ශනි උච්ච වෙයි. ස්‌වක්‍ෂේත්‍ර වන්නේ මකර, කුම්භ රාශිවලටයි. මේෂ රාශියට නීච වේ. වෘෂභ, මිථුන, කන්‍යා ලග්නවලට මිත්‍රවේ. කටක, සිංහ, වෘශ්චික, ලග්න 03 ට සතුරුයි. ධනු-මීන දෙකට සමයි.
තුලාවට ශනි උච්චවීමෙන් ශනිගේ ආකර්ශන බලය පොළවට ලැබීමේ ප්‍රමාණය අඩුවීම නිසා තුලා රාශියේ ශනි ගමන් කරන විට ශුභ තත්ත්වයන් උදා කරයි. ඥනවන්ත අයකු ලෙස කටයුතු කරයි. ශනි මකරයේ ස්‌වක්‍ෂේත්‍රවීම නිසා මෙලොව දියුණුව වෙනුවෙන් වැඩි වෙහෙස මහන්සියක්‌ ගනී. හරිහම්බ කිරීමට සිතයි. විවාහ දිවිය වාසනාවන්ත නොවේ. ශනි කුම්භයේ මුල ත්‍රිකෝණයට යහපත්ය. යහපත් මිත්‍රයන් ආශ්‍රයට ලැබේ. උසස්‌ රැකියාවක්‌ කිරීමේ භාග්‍ය තිබේ. විවාහය ද යහපත් එකකි. දක්‍ෂ කථිකයකු වේ. ලෙඩ රෝග අඩුවේ.
ශනි නීච වන්නේ මේෂ රාශියේදීය. පොළවට කිට්‌ටුව ශනි ගමන් කරන නිසා සැප පහසුතා අඩු කරයි. වෙහෙසකර වැඩපළවල යෙදීමට සිදුවේ. නෑයින් සමග විරෝධතා ඇති කරගනී. තනිව වාසයට ප්‍රියවේ. එහෙත් කේන්ද්‍ර හිමියාගේ ශනි 05 වැන්නේ නීචව සිටියේ නම් ධනවත්වේ.
ශනි වෘෂභ රාශියට මිත්‍රයි. මිථුන කන්‍යා දෙකටම එසේමය. වෘෂභයේ ශනි සිටි විට ලෞකික දියුණුව ඇති කරයි. දේපළ ඉඩකඩම් පිළිබඳ ආශාවන් වැඩිවේ. කර්මාන්ත කටයුතුවලින් ලාභ ලබයි. විවාහ සහකරුට හෝ සහකාරියට ආයුෂ අඩුයි.
මිථුනගේ ශනි සිටිනවිට තමා බුද්ධිමත්, දැනුම් තේරුම් ඇති අයකු ලෙස කටයුතු කරයි. නෑයින්ට සහෝදරයන්ට විරුද්ධව කටයුතු කරයි. ගමන් බිමන් අධිකවේ. දරුවන් ගැන දුකින් කාලය ගත කරයි. කන්‍යා රාශියේදී ශනි මිනිස්‌ ගුණධර්ම අතින් පෝෂණය වෙයි. එහෙත් විවාහය එතරම් සාර්ථක නැත. බුද්ධිමත් අයෙකි. සකසුරුවම්කම තිබේ.කටකයට ශනි සතුරුය. සිංහ, වෘශ්චික දෙකට ද එසේමය. කටක රාශියේ ශනි සිටීමෙන් ජීවිතය ගැන කලකිරේ. දුක්‌ සහිතයි. පවුලේ කටයුතු අවුල් සහගතවේ. දරුවන්ට ලෙඩ රෝග ඇතිවේ. කේන්ද්‍රයේ 6-8-12 ස්‌ථානයක්‌ කටකය වී නම් ශුභ ඵල අපේක්‍ෂා කළ නොහැකිය. තනිව වාසයට කැමැතියි. තපස්‌ ජීවිතයට ප්‍රිය කරයි. සිංහ සේ ශනි සිටීමෙන් තද පුරුෂ ගති ඇති කරයි. කලින් ආශ්‍රය කළ අයකු හා විවාහය සිදුකර ගනී. බුද්ධිමත්, උගත් අයෙකි. තම මතය මිස අන් අදහස්‌ පිළිනොගනී. හෘද රෝග ඇති කරයි. ශනි වෘශ්චිකයේ වීමෙන් තම ජීවිත චර්යාවන් හැඩගසා ගනී. දියුණුව සිදු කරගනී. ආගමික කටයුතුවලට ලැදි නොවේ. ජීවිතයේ අග කාලයදුක්‌ සහිතයි.ශනිට සමරාශි ලෙස සැලකෙන්නේ ධනු, මීන රාශි දෙකයි. ධනු රාශිගත වූ ශනි ආගමික කටයුතුවලට රුචිකම් දක්‌වයි. අන් අයට උදව් පදව් කරයි. තැන්පත් ශාන්ත අයකු ලෙස කටයුතු කරයි. ගෞරවයට කීර්තියට පත්වේ. රැකියාවෙන් උසස්‌ වෙයි. දරුවන් වාසනාවන්තයි. මීන ලග්න ගතවූ ශනි ජන්මියා දුක්‌ කරදර පරිසරයක ජීවත් කරවයි. ශනි මහ දශා කාලය වර්ෂ 19 කි.
උපුටා ගැනීම දිවයින
