කේන්ද්‍ර පලාපල වරදින්නේ ඇයි?
කේන්ද්‍රයක ග්‍රහ පිහිටීම් දෙස බලා ප්‍රතිඵල ප්‍රකාශ කිරීම ලේසි පහසු කාරණයක්‌ නොවේ. ඇතැම් විට ජ්‍යෙතිෂඥයා මුළාවට පත්විය හැකිය. එවිට සිදුවන්නේ සාවද්‍ය තොරතුරු රැසක්‌ ප්‍රකාශ වීමය. ඇතැම් විට එම තොරතුරු වලින් සේවාදායකයා ද මුළාවිය හැක. මක්‌නිසාද ඔහු මුහුණ දෙන්නා වූ තත්ත්වයට සමානකමක්‌ ද ඒ ප්‍රකාශයේ තැනින් තැන මතුවන බැවිනි.ග්‍රහයෙක්‌ රාශිය තුළ සිටින්නේ කුමන අන්දමින් දැයි කේන්ද්‍රයෙන් බැලූ බැල්මට නොපෙනේ. අපට පෙනෙන්නේ සිකුරු මීන රාශියේ සිටින බව විය හැක. කේන්ද්‍රය අතට ගත් සැනින් සිකුරු මීන රාශියේ සිටින බව පෙනුනත් ඇත්තටම ඔහු මින රාශියේම දැයි සැක හැර දැන ගත යුතුය. ඒ සඳහා නවාංශකය පීරා ඔහු මීන රාශියේ අංශක කීයක්‌ තුළ සිටින්නේ දැයි විමසා දැනගෙන ප්‍රතිඵලය වෙත අවතීර්ණ විය යුතුය. රාශියකට ද්‍රෝෂ්කාණ තුනකි. මේ ද්‍රෝෂ්කාණ තුනෙන් ග්‍රහයා සිටින ද්‍රෝෂ්කාණය කුමක්‌ වේද එයට අදාළව ග්‍රහයාගේ ප්‍රතිඵලය සකස් වෙයි. මේ අනුව මීනයේ සිටින සිකුරු කුම්භ රාශියට අදාළ ප්‍රතිඵල හෝ මේෂ රාශියට අදාළ ප්‍රතිඵල හෝ මීන රාශියට අදාළ ප්‍රතිඵලය හෝ විය හැක. නමුත් සිකුරු අපට කේන්ද්‍රයේ දිස්‌වන්නේ මීන රාශිය තුළිනි. එසේම කිනම් හෝ රාශියක සිටින ග්‍රහයා කේන්ද්‍රයේ දුබලව සිටියත් නවාංශකය තුළ බලවත්ව සිටින්නේ නම් ඔහුගේ බලය අදාළ රාශියට බලගැන්වෙයි. එසේම ඕනෑම ග්‍රහයෙක්‌ යම් කේන්ද්‍රයක බලවත්ව සිටින බව පෙනුනත් ඇත්තටම ඔහු බලවත් දැයි තීක්‍ෂණව පැති කීපයක්‌ හරහා විමසිය යුතුය. අපි ණය මුදලක්‌ ලබා ගැනීමට බැංකුවකට ඉදිරිපත් කළ යුතු ලිපි ලේඛනවලින් එකක්‌ හෝ නිවැරැදි නොවුනහොත් එම ණය මුදල ලබා ගැනීමට දුෂ්කර වන්නා සේම ග්‍රහයෙකුගේ සුබ ප්‍රතිඵල ලැබීම ද ඒ හා සමානය. සෑම පැත්තක්‌ම විමසා බැලීමෙන් නිශ්චිත ප්‍රතිඵලය ලැබේ දැයි තීරණය කළ යුතුය.
එසේම ග්‍රහයෙකුගේ තත්ත්වය ද 12 ආකාර වෙයි. ඕනෑම මිනිසෙකුට ද තත්ත්වයන් කලින් කලට වෙනස් වෙයි. යම් මිනිසකුට යම් දෙයක් කිරීමට හැකි අවස්‌ථා තිබේ. නොහැකි අවස්‌ථා ද තිබේ. හැකි අවස්‌ථාවලද විවිධ තත්ත්වයන් පවතී. නොහැකි අවස්‌ථාවලද විවිධ තත්ත්ව තිබේ. අවශ්‍ය ක්‍රියාවට මුදල් පැවතුනත් ලෙඩදුක්‌ නිසා හෝ වෙනත් වැඩ කටයුත්තක්‌ නිසා හෝ අදාළ ක්‍රියාවට එළැඹිය නොහැක. නැත්නම් අනෙක්‌ සියලු පහසුකම් තිබුණත් මුදල් නැතිවිය හැක. එනිසාද අදාළ කාර්යය කළ නොහැකි වෙයි. මේ හැම දෙයක්‌ම සම්පූර්ණ නම් අදාළ කාර්යය කළ හැක. එනිසා ගුරුමුෂ්ඨි කොපමණ තිබුණත් ග්‍රහයෙකුගේ නියම ඵල ලබා ගැනීම දුෂ්කර විය හැකිය. ඒ අනුව ග්‍රහයෙකුගේ තත්ත්ව 12 ක් ගැන පරාශර සෘෂිවරයා සඳහන් කරයි. එනම්,
- ශයන
- උපවේෂණ,
- නේත්‍රපානී
- ප්‍රකාශ
- ගම
- ආගමන
- සභා
- ආගම
- භෝජන
- නෘත්‍යලිප්සා
- කෞතුක
- නිද්‍රා
යනුවෙන් එම තත්ත්වයන් විග්‍රහ කර තිබේ. යම් රාශියක සිටින ඕනෑම ග්‍රහයෙක්‌ මේ අවස්‌ථා 12 න් එක්‌ අවස්‌ථාවකට වැටේ. එනිසා යම් රාශියක යම් ග්‍රහයෙක්‌ සුබවාදීව පිහිටා ඇත්නම් එම රාශියෙන් කියෑවෙන ඵල සංවර්ධනය වීම සිදු වේ යන ගුරු මුෂ්ඨිය බිඳී යන අවස්‌ථා එළඹෙන බැවින් ජ්‍යෙතිෂඥයා තීක්‍ෂණ විය යුතුය.
සාමාන්‍යයෙන් සුබ ග්‍රහයෙක්‌ සුබවාදීව කේන්ද්‍රයේ සුබ ස්‌ථානයක සිටීම එම භාවයේ ප්‍රතිඵල වර්ධනය වීම ගුරුමුෂ්ඨි අනුව සැබෑ සත්‍යයකි. උදාහරණයක්‌ ගතහොත් සිකුරු 4 වැන්නේ මිත්‍රව හෝ සුබව සිටීමත්, එම ලග්නයට සිකුරු සුබ ග්‍රහයෙක්‌ වීමත් අනුව එම හතරවැන්නට අදාළ ගේ දොර, යාන වාහන, ඉඩකඩම් ආදී තත්ත්වයන් ඉතා යහපත් ලෙස ලබාදෙයි. නමුත් යම් යම් ස්‌ථානවල සිටි පාප ග්‍රහයන්ගේ අශුභ දෘෂ්ටිවලට ලක්‌ව සිටී නම් එම අශුභ දෘෂ්ටි දුන් ග්‍රහයන් සිටි රාශිවලට අයත් දේවල්වලින් කුමක්‌ අරභයා හෝ 4 වැන්නෙන් ප්‍රකාශිත එකී ලැබීම් කෙරෙහි අශුභ බලපෑම් එල්ල කරයි. එක්‌කෝ එකී ලැබීම් ලැබීම සිදුවුණත් යට කී දෘෂ්ටි දුන් පාප ග්‍රහයන් සිටි රාශිවලින් කියවෙන කරුණුවලින් කුමක්‌ අරභයා හෝ ඒවා විනාශ වී යැමය. එනිසා ග්‍රහයන් කේන්ද්‍රයේ කොටු 12 තුළ කොපමණ සුබවාදීව පිහිට සිටියත් කොපමණ ගුරු මුෂ්ඨ§ ප්‍රකාශ වී තිබුණත් කේන්ද්‍රය පරීක්‍ෂා කරන අවස්‌ථාවේ සිට ඉදිරියට අදාළ ග්‍රහයාගේ වර්තමාන හා අනාගත තත්ත්වය ද ඒ අයුරින්ම විමසා බැලිය යුතුය. උත්පත්ති ග්‍රහ බලය හා වත්මන් ග්‍රහ බලය අනුව ඇතිවන තත්ත්වයන් අවබෝධ කළ යුතුය. ඇතැම් විට අශුභ ග්‍රහයන් අශූභ ස්‌ථානවල යෝග වී ඉතාම විශිෂ්ට ගණයේ සුබඵල ලබා දෙන අවස්‌ථා ද පවතී. ඒවා බැලූ බැල්මට ඉතා නරක ප්‍රතිඵල අත්කරන බවක්‌ පෙනෙන නිසා බොහෝ විට ජ්‍යෙතිෂඥයා මුළාවට පත්ව සාවද්‍ය ප්‍රතිඵල ප්‍රකාශ විය හැක. එනිසා ඔවුන්ගේ පිහිටීම් හා තත්ත්වයන් තීක්‍ෂණව විමසා බැලිය යුතුය. එම තත්ත්වයන් සුබවාදී වී තිබේ නම් කේන්ද්‍ර සටහන තුළ අශුභ තත්ත්වයක්‌ බැලූ බැල්මට පෙනුනත් ඒ තුළ සුබ තත්ත්වය සැඟවී තිබිය හැක.
මෙසේ කේන්ද්‍ර පරීක්‍ෂාවක්‌ පැයකින් හමාරකින් කළ හැකි දෙයක් නොවේ. ක්‍ෂණිකව ඵල ප්‍රකාශ කිරීම් ඇතැම් විට නිවැරැදි වෙයි. ඇතැම් විට වැරදි වෙයි. එසේම නිවැරැදි වුවත් එය ඒ වර්තමානයට පමණක්‌ අදාළ විය හැක. අනාගතයට එම අනාවැකිය වෙනස් විය හැක. එසේ ඉහත කී කරුණු කාරණා තුළ ජ්‍යෙතිෂඥයාට යම් දුරකට ගමන් කරමින් යම් ප්‍රමාණයකට සත්‍ය ගවේෂණය කළ හැක. එහෙත් පූර්ණ ලෙසම සත්‍යය දැකීමට හැකියාවක්‌ නැත. සෑම ගුරු මුෂ්ඨියක්‌ම අසත්‍යයම නොවේ. එහෙත් ග්‍රහයන්ගේ ඉහත කී ගුණාංග හමුවේ ඒවාද වෙනස් වී යන අවස්‌ථා ඇත. උදාහරණයක්‌ ලෙස අප ඉහත කී ලෙස සිකුරු මීන රාශියේ සිටීම ගත හැක. මීන රාශිය තුළ සිකුරු උච්චය. එනිසා එම ජන්මියා වඩාත් සරාගිකත්වයට නැඹුරු වේ. නමුත් සිකුරු 03 වන හෝ පළමුවන දෙර්කාණ දෙකෙන් එකක නම් එම තත්ත්වය එම ජන්මියාගෙන් ප්‍රකාශ වන්නේ නැත. ඊළඟ කාරණය වන්නේ 22 වන දෙර්කාණ අධිපතියාගේ භූමිකාවයි. යම් මහ දශාවක්‌ හෝ අතුරු දශාවක්‌ හෝ විදසාවක්‌ පිරික්‌සීමේදී එම ග්‍රහයා කුමන තත්ත්වයක සිටියත් 22 වන දෙර්කාණ අධිපති ග්‍රහයාගේ අශුභ දෘෂ්ඨියකට ලක්‌ව සිටියේ නම් එම ග්‍රහයාගෙන් සුබ ප්‍රතිඵල බලාපොරොත්තු විය නොහැක. මේ අන්දමට ග්‍රහයෙකුගේ තත්ත්වය පරීක්‍ෂා නොකර සාමාන්‍ය ගුරූපදේශ ඔස්‌සේ ප්‍රතිඵල ප්‍රකාශ කිරීම සාවද්‍ය විය හැක. ග්‍රහ පිහිටීම් ග්‍රහයෝග සහ ග්‍රහයන්ගේ තත්ත්ව ඒ ඒ තැන්හි තමන්ගේ තීක්‍ෂණ බුද්ධියෙන් ගුරුපදේශ ඔස්‌සේ විමසා සත්‍ය අවබෝධ කළ යුතුය.
අගලවත්තේ බී. හේරත්
දිවයින පුවත්පත
අධි ග්‍රහයා යනු යම් කිසි ජන්ම පත්‍රයක වැඩිපුර අංශක ගණනක්‌ ගමන් කර ඇති ග්‍රහයායි. මේ ග්‍රහයාගෙන් කෙනෙකුගේ රැකියාව සහ තවත් බොහෝ...
උපතින්ම හිමි වන විවිධ දක්‍ෂතා මෙන්ම දුර්වලකම් ද බොහෝ අයට තිබේ. එකම පලතුරු ගසක ගෙඩිවල එකම රසයක්‌ ඇත. එහෙත් එකම මව්පියන්ට...
ඔබ ධෛර්යවත් කෙනෙක්‌ද? නොපසුබටද? තම ඉලක්‌කය කරා යන ගමනේදී බාධක කොතරම් පැමිණියත් ඒවා මැඬගෙන ඉදිරියටම යනවාද? වීර්යය, උත්සාහය තිබේද. එසේ නම්...
සිකුරු තරුව පායන නව යොවුන් විය කරා පා තබන දියණියකගේ ස්වාභාවික දායාදයක් වූ මල්වරය ජ්‍යොතිෂය හා බැදෙන්නේ එය ග්‍රහ පිහිටීමක්...
"මගේ අක්කා ඒ කාලෙ හැටියට කේන්දර බැලුවා නිතරම. විවාහ වෙනවා කියපු ඔක්කොම කාලය පසුවුණා. අක්කට ඒ කාලවලදී කොච්චරවත් විවාහ යෝජනා නම්...
උඳුවප් මස පුර අටවක තිථිය ලත් සඳුදා දිනක මධ්‍යම රාත්‍රි 12.00ට පමණ බෙත්ලෙහෙමේ ගව මඩුවකදී ලොවටම අසිරිමත් වූ සුවිශේෂී උපතක් සිදුවිය....
