උපන් නැකතින කියන ගතිගුණ

අස්විද

පින් ඇත්තියකි. ධන ධාන්‍යාදිය සහිත වූද යහපත් විවාහ ජීවිතයක් ද ගත කරන්නට ලැබෙයි. සිය ස්වාමිපුරුෂයාට සෙනෙහෙවන්තය.

බෙරණ

අයහපත්ය. නොයෙක් කරදර ඇති කර ගනියි. පොරොන්දු කඩ කරන්නියක් වෙයි. දුෂ්ට ගති ඇති කරයි. පතිවත නොරකී. වඳභාවයට වුවද පත්විය හැකිය.

කැති

දිළිඳු විය හැකිය. ඉක්මනින් විවාහ වේ. වඳභාවයට පැමිණේ යැයි කියා තිබේ. පර පුරුෂයන්ද සේවනය කරයි.

රෙහෙණ

යහයපත්ය. දූ දරුවෝද එසේය. සුන්දර රූප ස්වභාවයද වේ. විවාහ දිවිය වාසනාවන්තය. දියුණු වීමට හැකිය. බොහෝ සැප සම්පත් ලබයි.

මුවසිරස

දහමට ළැදිය. ජීවිතයද ඉන් සාර්ථක කර ගනී. පතිවත රකී. සිය ස්වාමිපුරුෂයාට ප්‍රිය වේ. බොහෝ දරුවන්ද ලබයි. දීර්ඝායුෂ ද හිමිය.

අද

අයහපත්ය. සිය ස්වාමි පුරුෂයා කෙරෙහි සෙනෙහසක් නොවේ. යුග දිවියේද නොයෙක් ප්‍රශ්න මතුකර ගනී. ආඩම්බරය.

පුනාවස

යහපත්ය. පතිවත රකී. විවාහ ජීවිතය සාර්ථක වන්නේය. ශීලාදී ගුණධර්මවලින් යුක්තය. හදිසි ධන ලාභවලට හිමිකම් කියයි.

පුෂ

කාර්යයෙහි ශූරවේ. සිය ස්වාමියාට ප්‍රිය වේ. දරුඵල මැනවි. ධන ධාන්‍යාදී සැප සම්පත් වලින් යුක්ත වේ. ශරීරය ලස්සන වේ. ගුණවන්තියකි.

අස්ලිස

කම්මැළි වේ. වහා කිපෙනසුලුය. ස්වාමියාට අයහපත් පර පුරුෂයන් කෙරෙහි ඇලුනියක්ද බොරු කියන්නියක්ද වෙයි. ගබ්සා වීම් සහිතයි. විවාහ දිවිය දෙදරා යෑමට ඉඩ තිබේ.

මා

විවාහය පමාවීමට හෝ විවාහ නොවීමට හේතුයි. මාන්නය සහිතයි. නිවුණු සිතක් ඇත්තේ. තරහ නොගනියි.

පුවපල්

කෘෘර ගති ඇත්තියක් වෙයි. නිතර නිතර තරහා ගනියි. රෝගාබාධවලින් දුක් විඳින්නියක් වේ. එහෙත් ගුණවන්තය. ධන ධාන්‍යාදී සම්පත්වලින් යුක්ත වේ.

උත්‍රපල්

ආගමට දහමට ළැදිය. තරහා නොගනියි. අන්‍යයන්ටද ප්‍රිය වේ. පතිවත රකී.

හත

යස ඉසුරු හිමිවේ. බොහෝ දරුවන් ලබයි. අලෝභී තැනැත්තියක් වෙයි. යුග දිවියද වාසන්වන්තය.

සිත

ශරීරය ලස්සනවේ. උසස් පුද්ගලන්ගෙන් උදවු උපකාර ලැබේ. විසිතුරු කර්මාන්තාදියේ දක්‍ෂතා ඇත්තියක් වේ. ධනය ද ලබයි. පැවැත්ම අයහපත් විය හැකියි.

සා

පින්වතියකි. ගුණධර්ම දනී. අධ්‍යාපනට යහපත්ය. විවාහ ජීවිතය ද වාසනාවන්ත එකක් වේ. යහපත් ස්වාමියෙක්ද දූ දරුවන් ලබයි. ධනය ලබයි.

විසා

යහපත් ශරීරය වේ. ප්‍රියමනාපය. සැපසේ වාසය කරන්නට ලැබෙයි. පතිවත රකී. සිය ස්වාමිපුරුෂයාට සෙනෙහෙවන්තය. එහෙත් දරුවන්ට අපලය. නිතර තරහා ගනියි.

අනුර

සිය ස්වාමිපුරුෂයාට ප්‍රිය වේ. ගුණධර්ම දනී. බොහෝ දරුවන් ලබයි. ඔවුන්ද ගුණගරුක අය වන්නේය. සෞභාග්‍යය ඇත්තියක් ද වේ.

දෙට

දිළිඳු වේ. නොයෙක් දුක් කරදර විඳී. පැවැත්ම අයහපත්ය. විවාහ ජීවිතය ද අවාසනාවන්ත එකක් වේ.

මුල

අන්‍යයන්ට කරදර නොකරයි. ප්‍රියමනාප තැනැත්තියකි. ගුණය ද ධනයද අඩුවක් නොවේ. යහපත් දරුවන් ලබයි. ස්වාමිපුරුෂයා ද යහපත්ය.

පුවසල

විවාහ ජීවිතය අවාසනාවන්ත එකක් වේ. දූ දරුවන්ටද අසුබය. අන්‍යයන්ට කරදර කරන්නට මැළි නොවේ. එහෙත් මවුපියන්ට යහපත්ය.

උත්‍රසල

පිනැත්තියකි. අන්‍යයන්ට ප්‍රියමනාප වේ. යහපත් අයම ආශ්‍රය කරයි. ආගමට දහමට ළැදිය. සාර්ථක විවාහ ජීවිතයක් ගතකරන්නට භාග්‍යය හිමිවේ. උදරාබාධ ඇතිවිය හැකිය.

සුවණ

බවබෝග සම්පත් ලබයි. ශරීරය ලස්සන වේ. අධ්‍යාපනයට යහපත්ය. ධර්මය කෙරෙහි සිත නැඹුරුය. පතිවත රකී. යහපත් දරුවන්ද ලබයි.

දෙනට

ධනවත් වේ. පතිවත ඇත්තියක්ද වේ. යහපත් දරු මුනුබුරන් ලබයි. ස්වාමියාද යහපත් අයෙක් වෙයි.

සියාවස

බොහෝ සැප සම්පත් ලැබේ. යුග දිවිය සාර්ථක වේ. පින්වත් දරුවන් ලබන්නියකි. නෑදෑ හිත මිත්‍රාදීන්ගේ ගෞරවයට පාත්‍ර වේ. පතිවත ද රකියි.

පුවපුටුප

ඥාතීන් අතර ගැටුම් ඇතිකර ගනී. නුසුදුසු පුද්ගලයන් ආශ්‍රය කරයි. විවිධ දුක් කරදරයන්ට මුහුණ පෑමට සිදුවේ. එහෙත් අධ්‍යාපනයට යහපත්ය.

උත්‍රපුටුප

බොහෝ සැප සම්පත් ලබයි. ආඩම්බර වේ. යහපත් උසස් සැමියෙකු ද දරුවන් ද ලබන්නියකි. ධාර්මික ජීවිතයක් ගත කරයි.

රේවතී

යස ඉසුරු ලැබේ. ගුණවන්තියක් වේ. විවාහ ජීවිතයද වාසනාවන්ත එකකි. උදරාබාධ ඇතිවිය හැකිය.

ජේ‍යාතිෂවේදී මංජුල තරුකෙම 

උපුටා ගැනීම මව්බිම පුවත්පත