කුජ හත නරකම නැත
ග්‍රහ ලොවේ සුකුමලිය සිකුරුය. ග්‍රහ ලොවේ තරුණයා කුජය. පුරුෂයකුගේ විවාහය ප්‍රබලවීමට සිකුරු බලවත් විය යුතුය. ස්‌ත්‍රියකගේ විවාහය බලවත්වීමට කුජ යහපත් විය යුතුය. ස්‌ත්‍රී කේන්ද්‍රයක කුජ ග්‍රහයාගේ පිහිටීම ඉතා වැදගත්ය. ස්‌ත්‍රියගේ විවාහය පිළිබඳ බොහෝ කරුණු කාරණාවන් කුජ ග්‍රහයා මූලිකව ගොනු වී ඇත. කේන්ද්‍රයේ සත්වැන්නේ කුජ පිහිටීම විශේෂය. එහෙයින් කාන්තා ඔබ, ඔබේ විවාහයට බලපෑම් කරන කුජ ග්‍රහයා පිළිබඳව විමසිලිමත් වීම ඉතා වැදගත්ය. පෘථිවියට ආසන්නම ග්‍රහයා කුජය. වසර 60 දහසකට පසු 2003 වසරේදී කුජ ග්‍රහයා පොළොවට වඩාත් සමීප විය. අතීත රෝමවරුන් ඔවුන්ගේ දෙවියා ලෙස කුජ ග්‍රහයා සැලකීය. අතීත හින්දුවරුන්ගේ මතය අනුව කුජ ග්‍රහයා ස්‌කන්ධ හෙවත් කතරගම දෙවියන්ය. ජ්‍යොතිෂය අනුවනම් කුජ ආවේගශීලී දරුණු ග්‍රහයෙකි. මේෂ - වෘශ්චික රාශිවල අධිපති කම කුජ සතුය. කුජගේ නීච රාශිය කටකයයි. කුජ බලවත්වන ජන්මියා එඩිතරය. නිර්භීතය. පසු නොබසියි. කුජ සතුරුගත වූ විට මිනිසා තිරිසනෙකු කිරීමටද සමත් වෙයි. නොහික්‌මුණු ගති - තිරිසන් ආශා හමු වේ. ස්‌ත්‍රී දූෂණ - කාම අපරාධකරුවන්, හොරුන්, මිනීමරුවන් ලෙස මිනිසා පොළඹවනු ලබන්නේද ශල්‍ය වෛද්‍ය, ඉංජිනේරු, කාර්මික ශිල්පය, භූමි දේපළ පිළිබඳවද මූලිකත්වය ගනු ලබන්නේ සහෝදර කාරක වන කුජමය.
ස්‌ත්‍රී කේන්ද්‍ර සටහනක හත්වැන්න සුවිශේෂිය. එමෙන්ම කේන්ද්‍ර සටහනක 1-2-4-7-8-12 යන ස්‌ථාන තුළ කුජ ග්‍රහයා පිහිටීම අසුබය. එහි අශුභත්වය යොමු වන්නේ සහකරු වෙතය. සහකරු අකාලයේ මියයැම හෝ විවාහය හැර යැම කාන්තාව අතරමං වීමකි. විවාහය කඩාකප්පල් වීමකි. පොදු පිළිගැනීම එලෙසය. එවැනි ස්‌ත්‍රී කේන්ද්‍ර සටහනක ගැලපීමට පුරුෂ කේන්ද්‍ර සටහනේද 1-2-4-7-8-12 යන කවර ස්‌ථානයක හෝ කුජ පිහිටියේ නම් කුජ දෝෂය භංගවෙයි. ස්‌ත්‍රී කේන්ද්‍රයක කුජ හත්වැන්නේ වීම සහකරු අකාලයේ මිය යන්නේය යන ආකල්පය ගොඩනැගීමට සමත් වී ඇත. එහෙත් හත්වැන්නේ කුජ උච්චව හෝ ස්‌වක්‌ක්‍ෂේත්‍රව සිටීම එම දෝෂ භංග වී විවාහය නොසිතූ - නොපැතූ ලෙස සාර්ථක වීමකි. යුගදිවිය සාමයෙන් - සමගියෙන් ගතකිරීමකි. වෘෂභ, කටක, තුලා ලග්න හිමියන්හට හතේ කුජ ඉතා යහපත්ය. විවාහය වාසනාවන්තය.හත්වැන්නේ කුජ සතුරුගතවීම විවාහයේ සුබ සිහින කඩා බිඳ දැමීමකි. පොරොන්දම් සියල්ල ගැලපුණ ද හත්වැන්නේ කුජ අසුබ නම් පොරොන්දම්වල ගැලපීම අභිබවා අයහපත මූලික වෙයි. හත්වැන්නේ කුජගේ අශුභත්වය ප්‍රතියෝජක කේන්ද්‍ර සටහනෙන් භංග වන්නේ නම් එය විවාහයට සුදුසුය.
කුජ අසුබ ස්‌ථානයන්හි ඵල මෙලෙසය
කුජ පළමුවැන්නේ, අන් උපදෙස්‌ පිළිනොගනී. හිතුවක්‌කාර අයෙකි. නිර්භීතය. හිස තුවාල කර ගනියි. නපුරුය. කුජ දෙවැන්නේ, කටකාරය. වාචාලය. වචනයෙන් අකීකරුය. අනුන් පාලනයට දක්‍ෂය. මුදල් නාස්‌තිකරයි. කුජ හතරවැන්නේ, හිතුවක්‌කාරය. මුරණ්‌ඩුය. මවුපිය දේපළ නැතිකරයි. අනුකම්පා විරහිතය. කුජ හත්වැන්නේ, නාස්‌තිකාරයෙකි. උපකාර කරන උදවිය සමඟ අමනාපය. විවාහය බාධක සහිතය. වැන්දඹුවීමට ඉඩ තිබේ. විනෝදකාමියෙකි. කුජ අටවැන්නේ මිල මුදල් හීනය. අනතුරු අපහසුකම් ඇත. පවට බිය නැත. ආත්මාර්ථකාමීය. කුජ දොලොස්‌වැන්නේ, සියල්ල අවුල්කරගන්නේ තම ඒකමතික තීරණයන් තුළය. විවාහයේ සහෝදර පිරිස්‌ සමඟ අමනාපය. චරිතය දූෂ්‍ය වෙයි. නීති විරෝධී ක්‍රියා තුළින් නඩුහබවලට පැටලෙයි. නිදහස අගයයි. 1-2-4-7-8-12 රාශි තුළ කුජ හැසිරීම මෙලෙස වුවද එය භංගව යන්නේ විසෙන් විස නැසීමේ ක්‍රමවේදය අනුවය. කුජ දෝෂයට වඩා කුජ හත්වැන්නේ පිහිටීම විවාදාත්මකය. එහෙත් එහි අසුබත්වය තුළින් මතුවන සුබවාදී දැක්‌ම ජන්මියාට සහනයකි. අනාගතයට ආලෝකයකි. ලග්න අනුව කුජ හත්වැන්න තුළ ගොනුවීම මෙලෙසය.
- මේෂ ලග්නයට හත්වැන්න තුලා රාශියයි. ක්‍රියාශීලී අයෙකි. ව්‍යාපාර කටයුතු, හවුල් කටයුතු සඳහා දක්‍ෂතා පෙන්වයි. රාගාධික අයෙකි. විසිතුරු දෙයට ඇස යොමුවෙයි. විවාහය තමන් විසින්ම සාර්ථක කර ගනියි.
- වෘෂභ ලග්නයට හත්වැන්න වෘශ්චික රාශියයි. විවාහයෙන් පුරුෂයනට වස්‌තුව ලැඛෙයි. ඉක්‌මන් තීරණ ගන්නා සමාජයේ කැපී පෙනෙන පුද්ගලයෙකි. පසුකාලීනව විවාහය සාර්ථකය.
- මිථුන ලග්නයට හත්වැන්න ධනුවයි. උසස්‌ අයගේ උදව් උපකාර ලැබීමට හේතුය. වැඩිහිටියන්ගෙන් දේපළ ලැඛෙයි. විවාහය යහපත් වෙයි.
- කටක ලග්නයට හත්වැන්න මකරයයි. නොගැලපෙන සබඳතා තුළින් පීඩාවට පත්වෙයි. සියල්ල වටහාගෙන විවාහ දිවියට ඇතුළු වෙයි. දිරිමත් ජීවිතයක්‌ ගතකරයි. අතීත මතකය සිතෙන් බැහැර කරන තරමට අනාගතය යහපත්ය.
- සිංහ ලග්නයට හත්වැන්න කුම්භයයි. ස්‌ථිර අදහස්‌ ඇති අයෙකි. දුටු දුටු තැන හිත නොරඳයි. ස්‌ථිර ප්‍රේම සබඳතාවයකින් හෝ විවාහයෙන් ජීවිතය සාර්ථක කර ගනියි.
- කන්‍යා ලග්නයට හැත්වැන්න මීනයයි. විවාහය පමාවට හේතු යෙදෙයි. එයට කලබල නොවිය යුතුය. අසීමිත ආදරය තුළ අත්දැකීම් බහුලවීමට ඉඩ තිබේ. ප්‍රීතිය දුකට හේතුවෙයි. දේපළ හිමි යහපත් විවාහයක්‌ සිදුවෙයි.
- තුලා ලග්නයට හත්වැන්න මේෂයයි. උසස්‌ අදහස්‌ ඇති වේ. තම ඒකමතික තීන්දු තීරණයන් තුළ විවාහ සහකරු සමඟ මතභේද ඇතිවෙයි. යුක්‌තියට හිස නමයි.
- වෘශ්චික ලග්නයට හැත්වැන්න වෘෂභයයි. ඉක්‌මන් විවාහයකි. නිර්භීතය. අයථා සබඳතා තුළින් චරිතයට හානිකරය.
- ධනු ලග්නයට හත්වැන්න මිථුනයයි. ඥතීන් හට හිතවත්ය. ප්‍රේම සබඳතා කිහිපයකි. විනෝදයට ලැදිය. අදහස්‌ වෙනස්‌වීම මත පසුකාලීනව සාර්ථක විවාහ දිවියක්‌ ගත කිරීමට හේතුය.
- මකර ලග්නයට හත්වැන්න කටකයයි. එඩිතරකම අඩුය. විවාහයේ අසමගිය ඇතිවන්නේ එකිනෙකා වටහා නොගැනීම මතය. දරුවන් හටද එම අසමගිය බලපායි. කටයුතු පළමුවර අසාර්ථක වුවද දෙවැනි වර සාර්ථකය.
- කුම්භ ලග්නයට හත්වැන්න සිංහයයි. මොවුන් අවංකව කටයුතු කරයි. සතුටින් විසීමට උත්සාහ කරයි. පහසුවෙන් ආදර සබඳතා ගොඩනගාගන්නා මොවුන් තම සහකරුට ලැදි සමාජයට ප්‍රියජනක අයෙකි.
- මීන ලග්නයට හත්වැන්න කන්‍යාවයි. මොවුන් සමාජසේවා කටයුතු සඳහා ලැදිය. විවාහය කල් පසුවෙයි. නොගැලපෙන සබඳතා ඇතිකර ගැනීමට හේතුයි. කපටි නුවන ඇත. කල්ගතවී සිදුවන විවාහය කාලානුරූපව යහපත් වෙයි.
ඔබේ ලග්නය අනුව කුජ හත්වැන්නේ පිහිටියේ නම් මෙවැනි පලාපලයන් පෙන්නුම් කරයි. කුජ හත පිළිබඳව විවාහයකදී විමසුම් බොහෝය. එයට ජ්‍යොතිෂමය ගැලපීම් මෙලෙසය. කුජ හත්වැන්නේ කේන්ද්‍ර සටහනකට ගුරු හත්වැන්නේ කේන්ද්‍ර සටහනක්‌ ගැලපෙයි. ගුරුට කලකදී විවාහය නීරස වුවද විවාහය පීඩාකාරි වුවද විවාහය අතහැර නොයන්නේය. කුජ හත්වැන්නේ ප්‍රබල ලිංගික ආවේගය හමුවේ ශනි හතද කවර පීඩාවක්‌ වුවද විඳ දරාගෙන විවාහය රැකගනියි.එහෙත් කුජ හතට රාහු හත ගැලපීම විමසුම් කළ යුතුය. රාහු හත හිමිකරු සහකරුට අකල් මරණ උදාකරනු ලබයි. කරුණු කාරණා එලෙසින් වුවද කුජ හත හිමි කාන්තාව එඩිතරය. රූමත්ය. පිරිපුන් ශරීරයක්‌ ඇත්තියකි. ඇය සමාජය තුළ කවර ආකාරයෙන් හෝ කැපී පෙනෙයි.කුසීතයෙන් තොරව උද්‍යෝගයෙන් ලෝකය දකින කුජ හත හිමියා නිවැරැදිව හඳුනා ගැනීම යුග දිවිය තුළ සහකරුගේ වගකීමකි. එම පිබිදුණු හැකියාවනට අනුගතව දිරියෙන් ඉදිරිය දැකීම දියුණුවේ මංපෙත වනු ඇත. අදහස්‌ හඳුනාගැනීම සහ එයට අනුගත වීම යුගදිවියේ සාර්ථකත්වයයි. ඔබද කුජ හත හිමි අයෙක්‌ නම් පසුතැවිලි නොවන්න. මන්දයත්, දිරියෙන් ජීවිතය ජයගන්නා ශක්‌තිය ඔබ තුළ නිසැකවම ඇති බැවිනි.
මතුගම ජයනෙත්ති
උපුටා ගැනීම දිවයින පුවත් පත
