අඟහරු 7 හිටියොත් කසාදය ඉවරද?

ග්‍රහ ලොවේ සෙන්පති ලෙසින් හැඳින්වෙන අඟහරු මංගල, භ්‍රාම කෘෘර, අංගාර, අංගාරක, රක්ත ආවනේය, භූමිසුක යන පර්යාය නාමවලින් හඳුන්වනු ලබන අතර පුරාණ සෘෂිවරුන් විසින් "භූමිපුත්‍ර" නමින්ද හඳුන්වනු ලැබිණි. තවද පුරාණ රෝමවරුන්ගේ මතයට අනුව යුද්ධයට අධිපති දේවතාවා ලෙසත්, බයිබලයේ කියවෙන ආකාරයට "යක්ෂයා" ලෙසත් හින්දු ආගමේ කියැවෙන ආකාරයට "ස්කන්ධ දේවතාවා" ලෙසත් තාරකා විද්‍යා මතයට අනුව "රතු ග්‍රහයා" ලෙසත් හඳුන්වනු ලබන්නේත් අඟහරු හෙවත් කුජ ග්‍රහයාය.

අඟහරු මේෂ හා වෘශ්චික රාශි දෙකටත් මුවසිරස, සිත, දෙනට යන නැකැත්වලටත් අධිපතිත්වය දරන අතර මකර රාශියට උච්ච වන අතර අංශක 28 දී පරම උච්ච බලය හිමිවේ. කටක රාශියට නීච වන අතර කටක රාශියේ අංශක 28 දී පරම නීචත්වයත් ලබයි. මේෂ, වෘශ්චික රාශිවලට ස්වක්ෂේත්‍ර බලයෙන් යුක්ත වේ. දකුණු දිශාවට බලවත් වන අතර කේන්ද්‍රයේ 10 වැන්නට දිග්බල හෝ යුක්ත වන අතර රාත්‍රි කාලයේදී බලවත් බවින් යුක්ත වේ. තවද අඟහරු බලවත් වීම තුළ පංචමහා පුරුෂ යෝගයක් වන "රුචක" යෝගයත් උදාකරය. අඟහරු නමැති අපේ අද කතානායකයා අපගේ ජන්ම පත්‍රවල පිහිටීම ඉතා වැදගත් වන අතර විවාහ ආදී කටයුතුවලදී කැපීපෙනෙන ග්‍රහයෙක්ද වේ. මන්ද අඟහරු ජන්ම පත්‍රයක 01, 02, 04, 07, 08, 12 යන ස්ථානයක තැන්පත් වී ඇත්නම් "භ්‍රාම දෝෂය" නැත්නම් "කුජ දෝෂය" යෙදෙන අතර මෙවැනි පිහිටීමකදී වර්තමාන විවාහ අපේක්ෂිත තරුණ පිරිස් මහත්වූ ගැටලූවලට මුහුණ දෙමින් සිටී. බොහෝවිට තරුණියන්ගේ ජන්ම පත්‍ර තුළ අඟහරුගේ පිහිටීම නිසා නිසි කළ දවස ගෙවී විවාහවීමට නොහැකිව හුදකලාවේ සුසුම්ලමින් සිට ජෝතිෂ්‍යයට වෛර කරමින් සිටින බැව් කනගාටුවෙන් වුවත් කීමට කැමැත්තෙමි.

අතීත සමාජය තුළ යෝජිත විවාහයන් බහුල වුවත් වර්තමානයේදී ඒ තත්ත්වය වෙනස් වී තිබේ. වසර ගණනක ඇසුරින් පසු විවාහවීමට තීරණය කරගත් පසුව පොරොන්දම් බැලීම සිදුවේ. එහිදී තරුණියන්ට අඟහරුගේ පිහිටීම මත විවිධාකාර තත්ත්වයන්ට මුහුණ දීමට සිදුවේ. විශේෂයෙන් අඟහරු 07 වැන්නේ පිහිටීම මෙම තත්ත්වය තවත් ප්‍රබල කිරීමට හේතුවේ. තවද අඟහරු 07 වැන්නේ පිහිටීම ඉතාමත් අශුභ තත්ත්වයකි. කේන්ද්‍රයක් අතට ගත් පමණින් මෙය අඟහරු 07 මෙය ගැළපෙන්නේ නැහැ යැයි ක්ෂණික තීන්දු තීරණවලට පෙලඹීම අභාග්‍යසම්පන්න දෙයක්ද වේ. එසේම ජන්ම පත්‍රයක් අතට ගත් සැණින් යුගදිවිය ආශ්‍රිත අනියත බියක් ජනිත කිරීම කනගාටුවට කරුණකි. අඟහරු යනු කාන්තා ජන්ම පත්‍රයක සුවිශේෂී තැනක් හිමිකර දෙන ග්‍රහයෙක් වේ. පුරුෂයන් සඳහා සිකුරු ග්‍රහයාගේ පිහිටීමත් කාන්තාවට අඟහරුගේ පිහිටීමත් විවාහය, යුගදිවිය යන අංශවලට ප්‍රධාන මෙහෙවරක් ඉටුකරය. කාන්තාවකගේ ප්‍රාණවත් බව, ක්‍රියාකාරීත්වය සඳහා වැඩිදායකත්වයක් අඟහරු ලබාදේ. ජන්ම පත්‍රයක 01, 04, 07, 10 යන ස්ථානයක (කේන්ද්‍රස්ථාන) අඟහරු බලවත්වීම (මකර, මේෂ, වෘශ්චික) පංච මහා පුරුෂ යෝගයක් වන රුචක යෝගය යෙදෙන බව පෙර සඳහන් කර ඇත. එවැනි බලගතු යෝගයක් අඟහරුගෙන් යෙදෙනවිට කාන්තාවට අශුභ තත්ත්වයක් ඇතිකරන්නේ යැයි පැවැසීම යුක්ති සහගත නොවේ. අඟහරුගෙන් පමණක් නොව අන්‍ය ග්‍රහයන්ගෙන්ද යම් කරදර බාධා යෙදෙන බැව් අපි දනිමු. කාන්තාවන්ට හා පුරුෂයන්ට එකිනෙකාට ආකර්ෂණය වීමට අඟහරු - සිකුරු බලපෑම ඉතා වැදගත් වේ. උදාහරණයක් ලෙස කාන්තා කේන්ද්‍රයේ අඟහරු පිහිටි රාශියේ පුරුෂ කේන්ද්‍රයේ සිකුරු තැන්පත්ව තිබේ නම් ඉතාමත් ශුභ පිහිටීමක් වන අතර ආත්ම ගණනක සම්බන්ධතාවක් පවතින බව කිව හැක. පෙර මා සඳහන් කළ පරිදි බොහෝ තරුණියන්ට මෙම අඟහරු බලවත් වීම නිසා නිවසට වී හූල්ලමින් සිටීමට සිදුව ඇත්තේ එම තත්වයන්ට ගැළපෙන කේන්ද්‍ර හිමියෙක් හමුවන තෙක්ය. මන්ද බොහෝ ජෝතිෂවේදීන් අඟහරු 07 බලවත් වී නම් එවැනිම අඟහරු 07 බලවත් වූ කේන්ද්‍රයක් මිස අනෙක් විවාහයන් කිරීම ඉතාම අශුභ බැව් පවසා තිබීම වේ. මන්ද බොහෝ දෙනා තුළ පවතින්නේ තරුණියගේ ජන්ම පත්‍රයේ අඟහරු බලවත් නම් විවාහය අසාර්ථක වීම, දික්කසාද වීම, සහකරුට මරණය ගෙනදීම වැනි අශුභවාදී සංකල්ප වේ. මෙය ඇත්තෙන්ම ප්‍රායෝගිකද? යන්න විමසා බැලීම වැදගත්වේ. කෙනකුගේ උරුමයක් තවත් කෙනකුට ලබාදිය හැකි වුවත් කරුමය එසේ ලබාදීමේ හැකියාවක් නොමැති බව බුද්ධිමත් ඔබට වැටහෙනවා ඇත. ජන්ම පත්‍ර පරීක්ෂා කරන විට ආයු කාලය පිළිබඳ විද්‍යමාන වේ. අල්පායුෂ, මධ්‍යායුෂ, පරමායුෂ යනුවෙන් එය වර්ගීකරණයක් කර තිබේ. එසේ නොමැතිව අඟහරු බලවත්වීම තුළවත් ආයුෂ පොරොන්දම අශුභවීම වත් සහකරුට මරණය ගෙන දෙන බැව් පැවැසීම යුක්ති සහගත නොවේ. කාන්තාවකට එදිනෙදා කටයුතු කරගෙන යෑමට අවශ්‍ය ශක්තිය, ක්‍රියාශීලීත්වය මෙන්ම යහපත් බිරියක් ලෙස ස්වාමියාව ලිංගික වශයෙන් සතුටු කිරීමේ ශක්තිය, දරුප්‍රසූතීන් මෙන්ම පවුලේ ඇතිවන යම් යම් ගැටලූවලට මුහුණදීමේ ශක්තියද ලබාදෙන්නේ අඟහරුය. තවද වෘෂභ, කටක, තුලා ලග්නවලින් උපත ලබන කාන්තාවකගේ ජන්ම පත්‍රයේ 07 වැන්නේ අඟහරු පිහිටීම තුළ පංච මහා පුරුෂ යෝගයක් වන "රුචක යෝගය" යෙදී තිබීම ඉතා යහපත් අතර භ්‍රාම දෝෂද භංග වන බව පැවැසීමට කැමැත්තෙමි.

අඟහරු 07 වැන්නේ බලවත් වූ පමණින් විවාහාදී කටයුතු අසාර්ථක නොවේ. අන්‍ය ග්‍රහයන්ගේ දෘෂ්ටිය සංයෝග, රාශිය ඉතා වැදගත් වන අතර බලවත් වූ බ්‍රහස්පති, සිකුරු, චන්ද්‍රගේ පිහිටීම් දෙස බැලීම ඉතා වැදගත් වන අතර අඟහරුගෙන් යෙදෙන භ්‍රාම දෝෂ භංගවන ආකාර ජෝතිෂ්‍යය ශාස්ත්‍රය තුළ කොතෙකුත් දැකගත හැකිය. අඟහරු බලවත්වීම ඔබේ ජීවිතයේ බොහෝ සපසම්පත් ලබාදීමට හේතුවන අතර යහපත් යුගදිවියට උරුම ලැබීමක්ද වේ.

උපුටා ගැනීම මව්බිම