ග්‍රහයෙක්‌ නීච වූ පමණින්ම අසුබද?
යම්කිසි ග්‍රහයෙක්‌ ඔබේ ජන්ම පතේ නීචව සතුරුව වක්‍රව අස්‌තව යම්කිසි භාවයක තැන්පත් වී ඇද්ද ඒ තුළින් එම ග්‍රහයාගෙන් ඔබට ලබාදෙන අශුභ ඵල උදාවක්‌ එම ග්‍රහයා දෙයිද නොදෙයිද යන්න මේ ලිපිය තුළින් ඔබට වටහා දීමට මම බලාපොරොත්තු වෙමි. මෙම ප්‍රශ්නයට උත්තර විද්‍යාත්මකව පෙන්වීමේදී ජ්‍යොතිර් විද්‍යාවේ පර්යේෂණාත්මක ක්‍රම විධි රැසක්‌ අනුගමනය කෙරිය යුතු වෙයි. මෙය ඉලක්‌කයට වෙඩි තිබ්බා සේ අනාවැකි කීමට නම් මෙහි නැඹුරු වූ ජ්‍යොතිර් විද්‍යාවේ සාරගර්භව පරිශීලනය කෙරිය යුතුය. යම් ජන්ම පතක ලග්නභාවයේද නවාංශක නීචව අස්‌තව වක්‍රව සතුරුව සිටීද එම ග්‍රහයන් උච්චව කේන්දරයක සිටින ග්‍රහයන්ට වඩා ජන්මියාව ශුභ වූ වාසනා පල උදාකර දී ඇත. එයට මුල් වන හේතු රැසක්‌ ජ්‍යොතිර් විද්‍යාවේ නවීන තාක්‍ෂණය මගින් පෙන්වා දෙයි. උච්චවර්ගෝත්තම බල ලැබූ ග්‍රහයන් අශුභ ඵල ජන්මියාට උදාකරන විට අශුභ නීච ග්‍රහයා ශුභ ඵල උදාකරන අයුරු අපි දැන් පරීක්‍ෂණයකට ලක්‌කර බලමු. එය බැලීමට ඔබගේ කේන්දරය පළමුව ශ්‍රීපති ක්‍රමයට හෝ ක්‍රිෂ්ණ මූර්ති ක්‍රමයකට භාව කේන්දරයකට සාදාගත යුතුය. ඊට පසුව ග්‍රහස්‌පුථ කේන්දරයේ සාදා භාව ෂට්‌ වර්ග ග්‍රහ ෂට්‌ වර්ග දෙර්කාන නවාංශක හෝරා ද්වාදශ්‍යාංගක ත්‍රිශාංශක ග්‍රහ අවස්‌ථාව ග්‍රහයන්ගේ යැම සාදා එහිදී ග්‍රහයාගේ තත්ත්වය සොයා බලා නීචව සිටි ග්‍රහයාගේ නීච තත්ත්වය මැනවින් පරීක්‍ෂණයට ලක්‌කිරීම ද ග්‍රහයා උදා කොටසේද අස්‌ත කොටසේද ග්‍රහයාගේ නිස්‌ගකාරී බලය කලතු කාරක බලය යෝගකාරක බලය නෛසර්ගික කාරකත්ව බලය ද මැනවින් කේන්දරයේ සොයා බැලිය යුතු වන අතර ෂට්‌ කෝණ ත්‍රිකෝණ දෘෂ්ටි සන්තම දෘෂ්ටි පූර්ණ දෘෂ්ටි එකින් එක පරීක්‍ෂණයකට ලක්‌කරමින් අෂ්ටක වර්ග ඵල ෂෝෂ වර්ග බල පක්‍ෂි නේනා නාත්ව බල නැකත් වාරයේ එම ග්‍රහයා ගමන් කළේ ශුභ අශුභ ද ඇති නැකත් වල ද යන්නද සොයා ඔහු ග්‍රහයෝග සංයෝග මොන මොන ග්‍රහයන් සමඟ සිටීද එම යෝග වී සිටින ග්‍රහ යෝග බලද, ශුභ ද, අශුභ ද යන්නත් ජ්‍යොතිර් විද්‍යාවේ ගැඹුරින්ම විශේෂ පරීක්‍ෂණයකට ලක්‌කළොත් මතුපිටින් භාවයක්‌ නවාංශක කුණ්‌ඩලියක්‌ තුළින් නීචව නරකව සිටින ග්‍රහයා මම පෙන්නුව විද්‍යාත්මක ජ්‍යොතිර්විද්‍යා කාරණා තුළින් බලවත් වුණි නම් ඔහු ජන්මියාට උදාකරන අශුභ ඵල වෙනුවට ශුභ ඵල උදා නොකරන්නේ මන්ද යනු ජ්‍යොතිර් විද්‍යාව ප්‍රගුණ කළ අයකුට ප්‍රශ්නයක්‌ නොවේ.
මතුපිටින් ග්‍රහයන් පෙනෙන දල කේන්දර සාදා පලාපල කථනය පැවසීම හරියටම නිවැරැදිව ජ්‍යොතිර් විද්‍යාවේදියකුට ප්‍රකාශ කළ නොහැක. එයට මූලික වූ ප්‍රතිසාධක රැසක්‌ ඇත. එයින් එකක්‌ නම් ඔයාට සෙනසුරුගෙන් තද මාරක අපල උදා වෙනවා. මරණය වළක්‌වන්න බෑ. ගුරුමහ දශාව ඉතාම ශුභ ඵල දෙනවා යෑයි දෙපැත්තට පලාපල පවසන ජ්‍යොතිර්වේදීන් රටේ කොතෙක්‌ ඇත්ද මෙම වටිනා ජ්‍යොතිර් විද්‍යාවේ ආරම්භය පරාසර නාරද වරහ මිහිර වැනි ඉසිවරුන් මේ මාහැඟි ජ්‍යොතිර් විද්‍යාව ඉදිරියට නොනැසී පැවතීමට අදාළ ක්‍රමවේදයක්‌ මෙයට ඇතුළත් කරමින් එම අනුව මෙය භාවිත කළ යුතු බව ද පෙන්වා දී ඇත. සංගීත හෝරා සිද්ධාන්ත ඒ තුන වේ. එයට අනුව විද්‍යාත්මකව මේ ගැන සොයා බැලීමේදී මා ලිපියේ කලින් ග්‍රහ බල සොයන විධිය පෙන්වා දුන් පරිදි දල කේන්දරය බලා සෙනසුරු මාරකයි ගුරු ශුභයි වර්ගෝත්තම බලයි කියා කටින් කිව්වට ග්‍රහයාගේ බලය අර ක්‍රමවේදය උඩ සොයා බලන විට නීච ග්‍රහයා භාව ෂට්‌ වර්ග ග්‍රහ ෂට්‌ වර්ග යෝගකාරක බලයෙන් නැකත් වාරයෙන් ද බලවත්ද බලවත්ව උච්ච ගුරු භාව ෂට්‌ වර්ග බලයෝග කාරකත්ව බල නැකත් බලවලින් දුර්වල නම් උඩ යට මාරු වී පලාපල මාරුවීමක්‌ ගෙන දීම අහන්න දෙයක්‌ද මිනිසාගේ පැවැත්ම තුළ ඉපදීම සිට මරණය දක්‌වා ජ්‍යොතිර් විද්‍යාව ඔහු පසු මරණය තෙක්‌ම සෙවනැල්ල සේ ගමන් කරයි නම් මිනිසාගේ පැවැත්මේ මුල්වන හේතු කාරණාවල කාල 3 ක්‌ ඇත. ළාබාල කාලයේ ලබන ඉගෙනීම රැකියාව ශරීර සැපයට හැදෙන ලෙඩදුක්‌ විවාහය, දූ දරුවන් දෙමවුපියන්ගෙන් ලැඛෙන ඉඩකඩම් යාන වාහන ගෙවල් දොරවල් ලැබීම් ගැන ද ජීවත්ව සිටින කාලය දැනගැනීමට ජ්‍යොතිර් විද්‍යාවෙන් කවුරුත් ආශයි. එය දැනගැනීමට නිවැරැදි ඉලක්‌කයට දැනගැනීමට එයට උත්තර දීම ජ්‍යොතිර්වේදියා සතු පරම යුතුකමයි. පෙර සිටි ඉසිවරු මිනිසා වේලාවට මැරෙන බවත් මේ වේලාවට ඉපදී ඇති බවත් මෙම ගණිත ශාස්‌තරයෙන් පෙන්වා දී ඇත. යමෙකුගේ මරණය ගැන සෙවීමේදී 22 දෙවැනි දෙර්කාන අධිපතිගේ බලයත් සෙනසුරුගේ පුත් වන මාන්දි ග්‍රහයාගේ ගමන අනුවත් 8 අධිපතිගේ දශාව අන්තර් දශා විදහන තුළ සිදුවෙන බවත් දැනගත යුතුය. කේන්දරයේ 1-59 ත්‍රිකෝණ අධිපති යන්ගේ බලයන් හොඳට සොයා බලා මරණය වන කාලය නිගමනය කළ හැක. තවද මරණය ගැන නිගමනය කිරීමේදී ග්‍රහයින් බල දුබලතා වර්ග කර ගණන් සාදාගෙන මැනවින් කල්පනාවට භාජන කර එය කෙරිය යුතුය. ක්‍රිෂ්ණමූර්ති ක්‍රමයට කේන්දරයක්‌ සාදා එය ගණනය කිරීම ග්‍රහ බල දුබලතා ගණනය කිරීම විද්‍යාත්මකව උපස්‌ථාන ස්‌ථාන අධිපති බලය ගැන මැනවින් පරීක්‍ෂණයකට ලක්‌කර ගනිමින් පලාපල කීම අන්තිම නිවැරැදිය.
වර්තමාන යුගයේ ජ්‍යොතිර්වේදීන් කේන්දර සෑදීම පොරොන්දම් බැලීම කොම්පියුටර් ක්‍රමයකට හරවා විනාඩි 5 කින් කේන්දර සාදා පොරොන්දම් බලා දීම කරයි. එය මම නරකයි කියා කියනවා නොවේ. එයින් වැරදියට දේශාංශක අක්‌ක්‍ෂාංශක හරියට නොදා කේන්දර සෑදීමෙන් සෑහෙන කේන්දර ගණන් වැරදියට සාදා ගනී. ගණිත මිනිත ගැන දක්‍ෂ ජ්‍යොතිර්වේදියකුට විනාඩි 15-30 ක්‌ තුළ තමාගේ බුද්ධිමය දැනුමින් කේන්දරයක්‌ සාදාගත හැක. එසේ කළොත් කිසිම දාක ඔබ සාදන කේන්දර වරදින්නේ නැත. ගණිත ශාස්‌ත්‍රය නොදන්නා අයට කොම්පියුටර් ඕනෑ වෙයි. දක්‍ෂ ජ්‍යොතිර්වේදියාට කේන්දර සෑදීමට කොම්පියුටර් ක්‍රම අවශ්‍ය නැත. හරි දේ හරියටම කිරීම ඔබ ජ්‍යොතිර්වේදියකු නම් ඔබ සතු පරම යුතුකමකි. එනිසා විද්‍යාත්මක වූ ජ්‍යොතිර් විද්‍යාවේ සාරවත් වූ සාර ගර්භවලින් පිරි අර්ථවත් වූ මෙම විද්‍යාවේ වටිනා සාරය තුළින් තම රටට ජාතියට ආගමට ජනතාවට සාධාරණ මුදලක්‌ අතට ගෙන දහස්‌ ගණන් මිල මුදල් දුප්පත් ජනතාවගෙන් නොසූරාගෙන ඔබේ සේවය හරි හැටියට මිනිසෙක්‌ ලෙස ඉටුකරන්න. මිනිස්‌කමේ නාමයෙන් තවද දල කේන්දර සාදා ග්‍රහයෙක්‌ උච්චව දල කේන්දරය භාවයේද, නවාංශකයේ ද ඉන්නවා දැක ඔබට හොඳ කාලයක්‌ මෙම ග්‍රහයාගේ දශාවේදී උදාවෙනවා කීමද නීච ග්‍රහයෙක්‌ ලග්න භාවයේද, නවාංශක භාවයේද සිිටිනවා දැක ඔබට දරුණු පන්නන්න බැරි මාරකයක්‌ තියෙනවා. මේ යන්ත්‍රය කරට දාන්න කියා භයකර සල්ලි ගන්න බඩ වඩා ගැනීම් ද නවතා මිනිසුන් බිය නොකර ග්‍රහයාගේ බල දුබලතා ජ්‍යොතිර් විද්‍යාවට අනුව මැනවින් පරීක්‍ෂණයකට ලක්‌කර පලාපල අනාවැකි පැවසීම ජ්‍යොතිර්වේදියකු වූ ඔබ සතු යුතුකමකි.
දිවුල්පිටියේ ඇන්. ජී. පියසෝම
උපුටා ගැනීම දිවයින පුවත්පත
