සෙනසුරු ඒරාෂ්ඨක ගැන සම්පූර්ණ කතාව
සෙනසුරුගෙන් යෙදෙන ඒරාෂ්ඨ වර්ග 04 ක්‌ තිබේ. එනම් සෙනසුරු ලග්නයට පැමිණීම ලග්න ඒරාෂ්ඨකය වෙයි. කේන්ද්‍රයේ 08 වැනි භාවයට පැමිණීම අෂ්ඨම ඒරාෂ්ඨකය වෙයි. උත්පත්තියෙන් සඳු ග්‍රහයා සිටි ස්‌ථානයට සෙනසුරු පැමිණීම ජන්ම ඒරාෂ්ඨකය වෙයි. එසේම උත්පත්තියෙන් සඳු සිටි ස්‌ථානයෙන් අටවැන්නේ සෙනසුරු හැසිරෙන කාලයත් ඒරාෂ්ඨක කාලයක්‌ වෙයි.
මෙසේ මනුෂ්‍ය ජීවිතයේ අවස්‌ථා හතර බැගින් මිනිසාට මෙම ඒරාෂ්ඨක වලට මුහුණ දීමට සිදුවෙයි. මේ එක්‌ ඒරාෂ්ඨක කාලයක්‌ වසර 30 කට පසු උදාවෙයි. ඒ අනුව ඒරාෂ්ඨක හතරෙන් කීපයක්‌ම මේ 30 වසර ඇතුළත යෙදීමේ ඉඩකඩ පවතී. විශේෂයෙන් පෙර භවයන් තුළින් මේ භවයට මනුෂ්‍යයා රැගෙන ආ ආයුෂය - නිරෝගිමත් සිරුර - මෙලොව තුළ සැලසෙන සැපය, තමන්ට ඇති මිල මුදල් වස්‌තු සම්පත්, නිලතල ආදිය, මෙන්ම තමන්ගේ නැණ නුවණ මෙන්ම ප්‍රඥව යන අත්‍යවශ්‍ය මූලිකාංග චංචල කිරීම ඒරාෂ්ඨකවල ස්‌වභාවය වෙයි.
එසේ එකී කරුණු කාරණා මේ භවයට සැලසෙන්නේ පෙර භවයේ තමන් කළා වූ දාන මානවල පුන්‍ය ශක්‌තියෙනි. ඒවා චංචල කළ හැකි ඒරාෂ්ඨක වන්නේ තමන් පෙර, භවයන්හි කළ අකුසල් බලයයි. කුසල් බලය තුළට අකුසල් කාන්දු වීමය. පිරිසිදු ජලය පිරි භාජනයක්‌ කුසල් හෙවත් පිං බලය ලෙස උපමා කළ හොත් එම පිරිසිදු බඳුනට අපිරිසිදු දෙයක්‌ එක්‌වීම නිසා එය අපිරිසිදුවෙයි. එය ඒරාෂ්ඨය ලෙස උපමා කළ හැක.
සෙනසුරු කේන්ද්‍රයේ පිහිටා සිටින්නේ නීචවද - සතුරුවද, සමවද - මිත්‍රවද, උච්චවද, එහෙමත් නැත්නම් තවත් ග්‍රහයින්ගෙන් පීඩා වෙමින්ද ඒ අනුව ඒරාෂ්ඨකවල බල දුබල බව ඇතිවෙයි. අර කී පිරිසිදු ජලයට කුමන හෝ අඳුරු පාටක ඩයි බිඳක්‌ කලවම් වූ විට මුළු ජලයම වෙනස්‌ වෙයි. එය විසිකරනවා හැර ප්‍රයෝජනයකට ගත නොහැක. එසේ හෙයින් අත් පා කඩා බිඳ දමා හදිසි අනතුරුවලින් එලෙස අවයව අහිමි කරන තරමේ තද බල ඒරාෂ්ඨක ඇති කරයි. ඒ සෙනසුරු සතුරු ලෙස, පීඩා ලෙස, අසුබව පිහිටා තිබේ නම් එලෙස සිදුවෙයි.
ජල බඳුනට දුහුවිලි ආදිය ඇතුළු වී අපිරිසිදු වූයේ නම් කරන කියන කටයුතු අස්‌ථාවර වීම, නින්දා අපහාස මෙන්ම නොපිළිගැනීම්වලට ලක්‌වීම, වැඩකටයුතු කඩා කප්පල් වීම, ලෙඩ දුක්‌ රෝගාබාධ ඇතිවීම ආදී කරුණු කාරණා ඒරාෂ්ඨක හරහා පැමිණේ. එබැවින් මෙකී තත්ත්වයන් අවබෝධ කර ගැනීමට සෙනසුරු කුමන අන්දමේ විශ්ව බලයක්‌ද යන්න සෑම කෙනෙක්‌ම අවබෝධ කළ යුතුය. සිතිජයේ ඈත කෙළවරක ඉහළ අහසේ ගමන් කරන සෙනසුරු ඔබේ ජීවය තුළද සිටී. ඒ ඔහුගේ කිරණ ශක්‌ති මගින් ඔබට සම්බන්ධවීම තුළය. එනිසා ඔබ තුළම සිටින සෙනසුරු පළමුව හඳුනාගත යුතුය. විශේෂයෙන් මිනිසා මෙලොව තම ලෞකික පැවැත්ම උදෙසා කායික හා මානසිකව වෙහෙසක්‌ දරයි. මිනිසාගේ වෙහෙස තමන්ගේ අභිවෘද්ධියට, අනුන්ගේ යහපතට, තමන්ගේ සතුටට විනෝදයට, නැතිනම් තම හැකියාව වර්ධනය පිණිස, නැතිනම් ආත්ම විමුක්‌තිය පිණිස, දන්දීම්, බණ භාවනාදි ක්‍රියා පිණිස ආදි වශයෙන් එම වෙහෙස විවිධාකාර වෙයි. අනුන්ට අයහපතට හේතුවන වෛර, ක්‍රෝධ, ආදී ක්‍රියා සම්බන්ධවද වෙහෙසක්‌ ගනී.
විශේෂයෙන් මේ වෙහෙස ඔබට ලබාදෙන්නේ කුජ ග්‍රහයාය. එනම් එකී ඕනෑම දෙයක්‌ ක්‍රියාත්මක කිරීමේ මානසික හා ශාරීරික ශක්‌තිය කුජ ලබාදෙන අතර එම ක්‍රියාවන් තුළ නියෑලෙන විට ඒවාට බලපාන අවහිර, බාධක, ප්‍රශ්න. ගැටලු විස¹ගැනීමේ ශක්‌තියත් ඒවාට මුහුණ දී ලබාගන්නා ජය පරාජයටත් මූලික වන්නේ සෙනසුරුය. මෙලෙස අවහිර බාධක ගැටලු ඇතිවන විට ඒවාට අවශ්‍ය පියවර ගැනීමට සිත වෙහෙසිය යුතුය. බාධක, කරදර, ප්‍රශ්න, තමන් අරමුණු කරන කාර්යයට ප්‍රතිවිරුද්ධ දේවල්ය. උදාහරණයක්‌ ගතහොත් ඔබ පාන්දර හතරට පමණ පිබිදී තම රාජකාරි කටයුතු සඳහා පිටත්වන කෙනෙක්‌ කියා සිතමු.
පාන්දර හතරට පිබිදෙන ඔබට "අනේ හරි අමාරුයි... එළිවෙන කල් නිදාගන්න ඇත්නම් කොච්චර එකක්‌ද" කියා සිතෙයි. එහෙත් ඔබ එය පාලනය කර ගනී. ඉතා ආයාසයෙන් වුවද ඒ අමාරුකම නිදිබර ගතිය මගහරවා ගනී. ඒ ස්‌වභාවය නිවේදනය වන්නේ සෙනසුරු ගෙනි. ඇඳ පැළඳගෙන බසය ළඟට පාරට ගිය විට එදින එම බසය ධාවනය නොවුණි. "වෙලාවට වැඩට යන්න බැරිවෙයි". ඔබගේ සිතට නැගේ. සිත ජුගුප්සා ජනක වෙයි.
පැය බාගයකට පසු එන බස්‌රථයට නගී. එහි සෙනග වැඩිය. හිටගෙන සිරවී යන්නට නොහැක. එහෙත් යායුතුමය. අමාරුවෙන් හෝ බස්‌රිය තුළ සිරවී සිටී. එපමණක්‌ නොව හෝල්ට්‌ එකෙන් පිටත් වූ බසය නවත්වා තව තවත් සෙනඟ පුරවා ගතී. එනිසා වැඩට යන්නට පරක්‌කුව පමණක්‌ නොව සෙනඟ නිසා සිරවීම තවත් වැඩිවෙයි. මේ සියල්ල විඳ දරාගනී. ඒ මදිවට ට්‍රැපික්‌වලට බස්‌රිය නවතී. විනාඩියෙන් විනාඩිය කාලය ගෙවීයයි. අන්තිමේ බසයෙන් බැස සේවා ස්‌ථානය වෙත දුවමින් යයි. යාන්තම් අටට විනාඩි කීපයකට කලින් සේවයට වාර්තා කිරීමට හැකි වෙයි.
මේ හෑම තැනකම තිබුණේ රැකියාව අද දවසේ කරගැනීමට බැරිවේද යන අවදානමයි. සිතට ගතට අවශ්‍ය ජවය කුජගෙන් ලැබුණ අතර, අවදානම, ශාරීරික හා මානසික පීඩනය මැද නොසැලී සේවා ස්‌ථානය වෙත ගෙන ගියේ සෙනසුරුය. අවදානම හා පීඩාව ඇති කළේද ඔහුමය. මේ අන්දමට මිනිස්‌ ජීවිතයේ සෑම දෙයක්‌ කෙරෙහිම සෙනසුරු අපට බලපායි.
සෙනසුරු අසුබව පිහිටීම ඇතිවිට පාන්දර හතරේ සිට රැකියාව වෙනුවෙන් ඒ කළ දුෂ්කර කැපවීම අපතේ යැමටද ඉඩකඩ පවතී. උදේ අට පසුවී ගියානම් දවසෙන් අඩක්‌ හෙවත් වරුවක්‌ එදා තම රාජකාරි කැපී යැමට ඉඩ තිබිණි. ඒ සෙනසුරු වඩාත් අශුබව කේන්ද්‍ර වල පිහිටි විටය. කන්දක්‌ විලිලා මී පැටවකු වැදුවා යන කියමන බඳුය. එවිට සිදුවන්නේ පාඩුවකි.
ඒරාෂ්ඨක මෙන්ම අසුබව සෙනසුරු පිහිටි අයගේ සෙනසුරු මහ දශාවලද සෙනසුරු එයට වඩා තදබල වෙයි. සිතන අත ගහන සෑම කටයුත්තකටම ඉහත කී පරිදි බොහෝ බාධක කරදර ඇතිකොට කිසිම ප්‍රයෝජනයක්‌ නොලබා හිස්‌ බවට පමුණුවයි. මුදල් හෝ යම් යම් දේ ණයට දුන්නොත් එවාට ප්‍රශ්න කරදර මතුවී අන්තිමේ උසාවි ගානේ යන්නටත් සිදුවී දුන් මුදල් ඵලක්‌ ඇති නොවන පරිදි ලැබෙයි. ණය ගත්තොත් ඒවායින් සාර්ථක ප්‍රතිඵලද අත්නොවී අන්තිමේ නින්දා-අපහාස, ගුටිබැට කා උසාවි ගානේ යමින් අන්තිමේ එයට වඩා වටිනා දේවල් විකුණා එයින් මිදීම හෝ සිරගත වන්නට හෝ සිදුවෙයි.
ව්‍යාපාර කටයුතුවලට පවා විවිධ බාධක කරදර ඇතිවී දියුණුව අඩාල කරයි. කොපමණ හොඳ ශාන්තුවරයෙක්‌ වගේ ජීවත් වූවත් තදබල ඒරාෂ්ඨක වලදී නින්දා අපහාසවලට මෙන්ම විශ්වාසය පවා බිඳීයැම් වලට ලක්‌කරයි. විශේෂයෙන්ම බලාපොරොත්තු බිඳී නොසිතූ දේවල්වලට ක්‍ෂණිකව ලක්‌කරයි. එනිසා සෙනසුරු ආත්ම විශ්වාසය ඇතිකිරීම මෙන්ම සිඳබිඳ දැමීමද කරයි.
එනිසා සෑම කෙනකුටම සෙනසුරු අත්‍යවශ්‍යම ග්‍රහයා වෙයි. එසේම භයානක දුක්‌දෙන ග්‍රහයාද වෙයි. වෛද්‍යවරයෙකුට සෙනසුරුගේ තදබල ඒරාෂ්ඨක පැමිණි කල ඔහු සොයා එන ලෙඩ්ඩු අඩු වේ. හෙට අනිද්දා මැරෙන්න සිටින ලෙඩෙක්‌ දෙන්නෙක්‌ පැමිණ බෙහෙත් ගනී. දෛවයට අනුව ඔවුන් මියයයි. ඉන්පසු අහවලාගෙන් බෙහෙත් බී අසවලා මැරිලා යයි ආරංචි පැතිර තව තවත් ඒ වෛද්‍යවරයා සමාජයට මුහුණ දෙන්නටත් බැරි තරම් අපහාසවලට ලක්‌වෙන බවත් ජ්‍යෙතිෂාචාර්ය වික්‌ටර් හෙට්‌ටිගොඩ මහතා ජීවිතය හා ග්‍රහයෝ යන තම ග්‍රන්ථයෙන් ප්‍රකාශ කරයි.
මෙලෙස සෙනසුරු නපුරු වන්නේ අප විසින්ද එවැනි දේවල් සත්ත්වයාට පෙර කළ නිසා උපන් පාප විපාක ලෙසිනි. තමා කරන පාපය ගොනා පසුපසින් එන කරත්ත රෝදය මෙන් තමා පසුපස පැමිණ දුක්‌ අත්කරන බව බුද්ධ දේශනාවේ වෙයි. කරත්තය නමැති ජීවිතය අදින ගොනා නම් මිනිසුන් වූ අපය. රෝද දෙක නම් සෙනසුරුගේ ඉහතකී ස්‌වභාවයයි. රෝදය ඇතුවත් බැරිය. නැතුවත් බැරිය. එනිසා මේ තේරුම්ගෙන සිතුවිලි මවන, ක්‍රියා යහපත් කරගෙන මේ භවය තුළ පිං පුරමු.
ජ්‍යෙතිෂවේදී අගලවත්තේ බී. හේරත්
උපුටා ගැනීම දිවයින පුවත්පත
