හතරේ ග්‍රහයන් සිටින විට
රවී හතරේ නම්,
සීත ඉක්මනින් කම්පා නොවෙයි. තම ඥාතීන් සමඟ සම්බන්ධය අඩු කර ගනී. එසේ නැතිනම් ඥාතීන් අතර ප්‍රධාන කෙනෙක් වෙයි. ඔවුන්ට දෙවැනි වි සිටින්නට කැමති නැත. මවට එතරම් යහපත් නැත. එහෙත් පියාගෙන් දේපල ලැබීමට පුළුවන. කොයි කාට වූවත් පහත වීමට කැමති නැත. වැඩ කටයුතු කෙසේ වූවත් හිත දුර්වල නැත. පපුව ප්‍රදේශයේ උෂ්ණ ගතියක් ඇති වෙයි. ජීවිතයේ මැදි වයස ගත වුනාට පසු ප්‍රසිද්ධියක් ඇති වේ. ටික ටික වූවත් ඉඩකඩම් උපයා ගැනීමට පුළුවන. උසස් අය සමග ගැවසීමට හැකි වේ. පදිංචි ස්ථානයද ගෞරව සහිතව තබා ගනී.
චන්ද්‍රයා හතරේ නම්,
මවට ඉතා හිතවත් වේ. මවගෙන් උපකාර ලැබීමටද හැකි වේ. උණුවන හිතක් ඇති ගුණවත් කෙනෙක් වේ. හතුරෙකුට වූවත් සමාව දීමට මැලි නොවේ. හිතා මතා කිසිවෙකුට වරදක් කළ නොහැක. පපුවේ සෙම් ගතිය වැඩිය. ඇදුම හෝ එවැනි අසනීප සෑදීමට වූවත් ඉඩ තිබේ. නොවරදවාම ඉඩකඩම් ගෙවල් දොරවල් ඇත්තෙකු වේ. හොඳ අලංකාර අළුත් ගෙයක වාසය කිරීමට හැකි වේ. ඉඩකඩම් වලින් ආදායම් ලැබිය හැකිය. ඒවා පිළිබඳව අවුල් වියවුල් ඇතිවිය නොහැක. කීප වරක් පදිංචි ස්ථාන මාරු කිරීමට සිදු වේ. එහෙත් එය තමාගේ දියුණුව පිණිසය.
බුධ හතරේ නම්,
ඉගෙනීමට යහපත් වේ. නුවන ඇත්තෙකු වේ. නැටුම් ගැයුම් වලට ප්‍රිය වේ. ස්ථාන මාරු කර තැන් තැන් වලට ගොස් පදිංචි වීමට සිදු වේ. හොර බොරු කට්ටකම් වලට කැමති නැත. කතා කරනවා නම් ඇත්ත කතා කරයි. නැත්නම් නිකන් සිටි. අන්‍යන්ගේ අදහස් පහසුවෙන් දත හැකිය. අලුත් පොඩි දෙමහල් හෝ තුන් මහල් ගෙයක් ලබා ගැනීමට ආශා කරයි. කවදා හෝ එවැනි නිවසක ජිවත් වීමට හැකි වේ. වාහනයක් ගත්තත් ලොකු ඒවාට ආසා වන්නේ නැත. තරමක් පොඩි ඉක්මනින් යා හැකි වාහන වලට ප්‍රිය කරයි. උගත් කමට වඩා ඥාණය තිබේ.
සිකුරු හතරේ නම්,
හිතට කරදර අඩුය. මවට සැප ලැබේ. මව් තමාට බොහෝ ආදරය වේ. හොඳ අලංකාර අංග සම්පූර්ණ ගෙයක් ලැබීමට පුළුවන. ගෙදර දොර පිරිසිදුවට තබා ගනී. අන්‍යන් තම ගෙදරට කැඳවා සංග්‍රහ කිරීම ප්‍රීතියකි. ගෙදර ඉතා ප්‍රීතිමත් ස්ථානයක් කර ගනී. ඥාතීන් සමඟ සම්බන්ධ කමින් කල් ගෙවයි. තරහ අඩුය. තරහ ආවත් පවතින්නේ ඉතා සුළු කාලයකි. පළිගන්නේ නැත. අනුකම්පාව නිසා සමාව දීමට මාලි වන්නේ නැත. සාමදානයට කැමති නිවුණු කෙනෙකි. විවාහය යහපත් වෙනවා පමණක් නොව විවාහ ජිවිතයද ප්‍රීතියෙන් සැපෙන් ගත කල හැකිය. වයස යන්නට යන්නට දේපල බොහෝ වෙති.
කුජ හතරේ නම්,
ඉක්මනට තරහ ඇවිස්සෙයි. එකට එක නොකර සිටීම මදි කමක් සේ හැඟෙ. ඉගෙනීමට එතරම් යහපත් නැත. රැඳු සරුවල් කර ගැනීමට පෙළබේ. ඥාතීන් සමග විරුද්ධවාදිකම් ඇති කර ගනී. සහෝදරාදීන්ට සැලකිල්ලක් දක්වයි. මවුට කරදර ඇති වේ. මවුගේ ආයුෂ කෙටි කරයි. අදහස් හිතට ආවොත් එය ක්‍රියාවට පමුණු වන තුරු සිතට විවේකයක් ඇති නොවේ. ඉඩ කඩම් වලට ආශා කරයි. ඒවා ලබා ගැනීමටද පුළුවන. තරහ නැති වෙලාවට තම බොහොම හිතවත්කමක් පෙන්වයි. ජිවිතයේ අඟ කොටසේදී තරමක් කරදර ඇති විය හැකිය.
ගුරු හතරේ නම්,
තමාගේ නෑදෑ පිරිවර අතර ප්‍රධාන තත්වයක් ලැබිය හැකිය. පිරිවර ඇති වේ. ඉඩ කඩම් හා ගෙවල් ඇත්තෙකු වේ. අන්තිම කාලය ගත කරන්නේ විශාල ගෙයකය. වැඩිහිටියන්ගෙන් දේපල උරුම වෙයි. ගෙදර ජීවිතය සැපවත් වේ. පව්කම් වලට හිත පෙළඹවිය නොහැකිය. කෙසේ නමුත් අන්‍යන් විරුද්ධ කර ගන්නේ නැතිව වැඩකටයුතු කිරීමට දනී. එනිසා උපන් ගමේම වූවත් දියුණු තත්වයක් ලැබිය හැකිය. ජිවිතයේ අග කොටසේදී අන්‍යන්ට ගුරු හරුකම් කියා දෙන නායකයෙක් වෙයි. දූ දරුවන්ගේ දියුණුවක් ඇති වේ.
ශනි හතරේ නම්,
ඉවසීමෙන් ප්‍රවේශමෙන් කටයුතු කරයි. එහෙත් හිතට දුක් ඇති වන අවස්ථා ඇති වේ. තමා ඥාතීන්ට උදව් උපකාර කරයි. නමුත් ඔවුන්ගෙන් තමාට සෑහෙන තරම් උදව් ලැබිය නොහැකිය. නෑයන් සමග ආශ්‍රය තමාට පාඩුවක් නිසා නෑදෑ ආශ්‍රය අඩු වේ. පපුවේ අමාරු ගතියක් ඇති කරයි. එහෙත් ලෙඩක් වශයෙන් යමක් තෝරා ගත නොහැකිය. හිට්ඨාට ප්‍රිය උපදවන ප්‍රදේශයක ජිවත් වීමට ලැබෙන්නේ කලාතුරකිනි. මව්පිය දෙදෙනාටම අපල ඇති කරන පිහිටීමකි. එහෙත් ඔවුන්ගෙන් දේපල ලැබීමට හේතුය. වයසට යනවිට දේපල ඇත්තෙක් වෙයි. එහෙත් හිතේ ප්‍රීතිය අඩුව තනි වි කාලය ගෙවීමට සිදු වේ. විවාහ වූ අය අකාලයේ මිය යාමෙන් හෝ ඒ අයගෙන් වෙන්වීම නිසා හෝ තමා තනි වූවාක් මෙන් තමාට දැනේ.
රාහු හතරේ නම්,
ශරීරයේ උෂ්ණ කමින් හටගන්නා අසනීපයක් ඇති වේ. එවෙලේම හිතුන දේ කරනවා මිස දුරදිග බැලීමක් නැත. ගමින් පිට වි යාමට සිදු වේ. වැඩිපුර ගෙදරට වී කාලය ගත කිරීමට ලැබෙන්නේ නැත. රැවටිලි වලට හසු වීමට සිදු වේ. නැත්නම් ඉඩකඩම් පිලිබඳ පැටලවිලි ඇති කරයි. මුල් දේපල අයිති උනොත් ඒ කලාතුරකිනි. තම බාල වයසේදී මවට තමාගේ ශරීර සනීපය නිසා කරදර වීමට සිදු වේ. හිතේ කලබල නොසන්සුන් ගතියක් ඇති කරයි.
කේතු හතරේ නම්,
නුවණ ඇති රැවටීම් වලට හසු නොවන කෙනෙකි. ශරීරයේ ගෙඩියක්, වනයක් හෝ කුෂ්ඨයක් ඇති වේ. හිතේ බය ගතියක් ඇති වේ. හෙමින් හෙමින් වූවත් ඉගෙන ගත හැකිය. ශරීරය එතරම් ලොකු නොවේ. වාසය කරන ස්ථානය හොඳින් පිරිසිදුව තබා ගනී. මව් පිය දෙදෙනාටම කරදර සහිත විය හැකිය. පොඩි අලුත් ගෙයක වාසය කිරීමට ලැබේ. ගෙදර ජීවිතය තරමක් කරදර සහිතව විය හැකිය. ඒ උනත් වැඩි පුර විවේක කාලය ගෙදරට වී පොතක් පතක් බලමින් ගත කිරීමට කැමති වේ. හිතේ අදහස් හෙළි කරන්නේ නැත. ඇවිදිලි අඩුය.
සුමනදාස අබේගුණවර්ධන උපුටා ගැනීම දියණිය
