භූමි ඥාතීන් හඳුනා ගනිමු.
ඔබගේ නිවසේ හෝ ඔබගේ ඉඩමේ සැබෑ අයිතිකරුවන් කවුරුන්ද කියා යමෙක්‌ විමසුවහොත් ඔබ දෙන පිළිතුර කුමක්‌ද? එවැනි ප්‍රශ්නයක්‌ නගන පුද්ගලයා කෙරෙහි උපහාසාත්මකව බලා සිනහ පළ කරන්නේ එවැනි ප්‍රශ්නයක්‌ ඇසිය යුතු දෙයක්‌ද යන්න පිළිබඳව තේරුම් බේරුම් කරගැනීමට තරම් බුද්ධියක්‌ නොමැති තැනැත්තෙකු ලෙස සිතමිනි. එසේ වූවද එම ප්‍රශ්නය උපහාසාත්මක ලෙසින් බැහැර කළ යුතු ප්‍රශ්නයක්‌ නොවේ. එහි ඉතා ගැඹුරු අදහසක්‌ ගැබ්ව ඇත. ඉහත ප්‍රශ්නයට ඔබ පිළිතුරු ලබා දෙන්නේ නම් නිසැකවම කියන්නේ නිවසේ හා භූමියේ අයිතිකරු ඔබ බවයි. එම අයිතිය තහවුරු කිරීමට අවශ්‍ය ඔප්පු හා පිඹුරුපත් ඉදිරිපත් කරමින් තමන්ගේ අයිතිය තහවුරු කිරීමේ හැකියාව පවතී.
ඇත්තටම ඉඩම හා ඔබගේ බැඳීම තිබෙන්නේ මෙම කඩදාසි කොළ වලද? ඔබ කුමන රටක සිටියත් ඔබට අයත් ඉඩම පිළිබඳව, හතර මායිම් පිළිබඳව, නිවස පිළිබඳව, කාමර පිළිබඳව, ඔබගේ හද තුළ සටහන්ව පවතිනවා. එසේ නම් භූමියේ බැඳීම හෝ හිමිකාරීත්වය සැබෑ ලෙසම පවතින්නේ කඩදාසි කොළවලම නොව ඔබගේ හදවත තුළ ආධ්‍යාත්මික චින්තන බැඳියාවන් ලෙසයි. එසේ නම් භූමිය ඇති වු දා සිට මිනිසාගේ පරිණාමීය අවධිය පසු කරමින් භූමිය මිනිසා විසින් පරිහරණය කිරීමට පටන්ගත් දා සිට මෙම භූමියට අයිතිවාසිකම් කී ගණන දහස්‌ ගණනින් නොව ලක්‍ෂ ගණනින් කියා නිම කළ නොහැකි බව කිවයුතුයි. භුමිය පිළිබඳව සටහන් කරගත් සත්ත්වයන් මරණින් පසු උපත ලබන ආත්මය තල අනුව භූමිය ඇසුරු කොටගෙන පවත්වන්නා වූ විවිධ සත්ත්ව කොට්‌ඨාස සමුහයක්‌ ඇති බව බෞද්ධ දර්ශනය තුළද මනාව පැහැදිළි කොට තිබේ. වාස්‌තුවේදී මෙම භුමියට සංවේදී ජීවි කොටස්‌ භූමි ඥාතීන් ලෙස හදුන්වනු ලැබේ.
භූමි ඥාතීන් හඳුනා ගැනීම :
තමන් විසින් නව නිවසක්‌ සෑදීමට යාමේදී මෙම භූමි ඥාතීන් නොසලකා හැරීම නිසා විවිධ අපහසුතාවලට ලක්‌වීම නොවැළැක්‌විය හැකි දෙයකි. භූමි ඥාතීන් හඳුනා ගැනීම ඉතා වැදගත් වන්නේ ඒ නිසාවෙනි. සෑම ඉඩම් කැබැල්ලකටම භුමි ඥාතීන් පිරිසක්‌ සිටී. නිදසුනක්‌ ලෙස අක්‌කර 01ක ඉඩමක පර්චස්‌ 10ක කොටස්‌ වලට වෙන් වූවත් එම පර්චස්‌ 10 තුළ අදාළ කොටස තුළ සිටින භූමි ඥාතීන් ප්‍රමාණයද අති විශාල සංඛ්‍යාවකි. කොටින්ම කියනවා නම් සෑම බිම් අඟලකටම අයිතිවාසිකම් කියන භූමි ඥාතීන් සිටී. මෙම භූමි ඥාතීන් සමූහයා ප්‍රධාන කොටස්‌ 03 කට බෙදිය හැක.
- හිතවත් භූමි ඥාතීන්
- අහිතවත් භූමි ඥාතීන්
- මැදහත් භූමි ඥාතීන්
නූතනයේ නිවාස සඳහා සැලසුම් සකස්‌ කිරීමේදී මෙම භූමි ඥාතීන් පිළිබඳව කිසිම සැලකිල්ලක්‌ දක්‌වන්නේ නැත. එයට හේතුව මේ පිළිබඳව අදාළ සැලසුම් ශිල්පීන් සතුව පවතින නොදැනුවත්කමයි. සැලසුම් සකස්‌කිරීම සඳහා භූමියට යන මුල්ම දවසේ ප්‍රථමයෙන් කළයුත්තේ ඉඩම් කැබැල්ලේ සිටින භූමි ඥාතීන්ගෙන් අවසරය ලබාගෙන අදාළ කටයුත්ත ආරම්භ කිරීමයි. සැලැස්‌ම සකස්‌ කිරීමට යනමුල්ම දිනය තමයි එම ගෘහ හිමියා භූමිය සමගින් සම්බන්ධ වන ප්‍රථම අවස්‌ථාව වන්නේ. මෙය ඉතා වැදගත් අවස්‌ථාවකි. එබැවින් භූමියට ප්‍රවේශවීම සුබ වේලාවෙන් සුබ දිශාවෙන් සිදුකළ යුතු අතර ඉඩමට ඇතුළු වීම සඳහා භූමි ඥාතීන්ගේ අවසර ලබා ගැනීම සිදු කළ යුතුයි. භූමි ඥාතීන්ගෙන් අවසර ලබා ගැනීම ඉතාමත් වැදගත් අවස්‌ථාවක්‌. අපි හිතුමතේට භූමියට ගොස්‌ නිවස පිළිබඳව සිදුකරනු ලබන සැලසුම් සඳහා භූමි ඥාතීන්ගේ ආශිර්වාදය නොලැබෙනු ඇත. විශේෂයෙන් අපට අහිතවත් හා මධ්‍යස්‌ථ කොටස්‌ අප සමග උරණු වනු ඇත. මෙය හරියට මේ වගේ දෙයක්‌. අපි කිසිම අවසරයකින් තොරව කෙනකුගේ ඉඩමකට ඇතුළු වී යම් කටයුත්තක්‌ සිදුකරන විට ඉඩමේ හිමිකරු විසින් ඒ පිළිබඳව උරණ වන බව අපි දනිමු. එසේම ඔහුගෙන් අවසර ලබාගෙන යම් දෙයක්‌ කරන විට ඔහුගේත් උදව් උපකාර ලැබෙනු ඇත. මේ ආකාරයටම භූමි ඥාතීන්ගේ අවසර ලබාගෙන කටයුතු සිදුකරන විට ඔහුගේ ආශිර්වාදය හා උදව් උපකාර ලැබෙනු ඇත.
වාසි :
- නිවස කඩිනමින් සෑදේ.
- අනතුරු සිදු නොවේ.
- සොර සතුරු බිය දුරු වේ.
- ලෙඩ රෝග දුරුවේ.
- සියල්ලන්ගේම උපකාර ලැබේ.
- පරිශ්‍රය ප්‍රිය මනාප වේ.
භුමි ඥාතීන්ගේ ආශිර්වාදය නොලැබීම නිසා සිදුවිය හැකි අවාසි :
- නිවස සෑදීම ප්‍රමාද වීම
- හදිසි අනතුරු සිදු වේ (නිවස සෑදීමේ දී)
- වාස්‌තු භූමියේ සොරකම් සිදු වේ.
- ලෙඩ රෝග බහුලයි.
- අසල් වාසීන් සතුරු වේ.
- නඩු හබ පැටලේ
- වාස්‌තු භූමිය ප්‍රිය මනාප නොවේ.
නිවසක්‌ සෑදීමේදි භූමි ඥාතීන්ගේ අවසර ලබා ගැනීමේ ප්‍රථම සීහුම් කිරීම (බල ගැන්වීම) ගෘහ හිමියා හා භූමිය අතර සිදුකළ යුතුයි. මෙය භූමියට ඇතුළුවන අවස්‌ථාවේදීම වාස්‌තු ශිල්පියාගේ උපදෙස්‌ පරිදි සිදුකළ යුතුයි.
භූමියේ ප්‍රථම සීහුම් කිරීමේ ක්‍රමවේදය :
නියමිත සුබ හෝරාවෙන් වාස්‌තු කර්ම සිදුකරනු ලබන වාස්‌තු භුමියට ගෘහ හිමියා ඊශාන දිශාව බලා ඇතුළු කරනු ලබයි. (නියමිත වාස්‌තු ගාථා රත්නයන් සඡ්ඡාධායනා මධ්‍යයේ) වාස්‌තු භූමියේ ගෘහ හිමියාට පෑගෙන මුල්ම පස්‌ කොටස රැගෙන එය භූමියේ මධ්‍යයට පෙර ස්‌ථරවලට භූමි ඥාතීන් රැස්‌ කරවා ඔවුන් සමග කතා කොට එම පස්‌ කොටස භූමියේ මධ්‍ය ලක්‍ෂයේ කලවම් කොට ලබා ගන්නා පස්‌ කොටස රැගෙන දොස්‌ දුරු කිරීම සඳහා ගලන ජලයේ පා කොට හැරිය යුතුයි. වාස්‌තු භූමියේ ප්‍රධාන ස්‌ථර 03 කට රැස්‌වන භූමි ඥාතීන් (බ්‍රහ්ම පාද කොටස හැර) වෙන් වෙන්ව හඳුනා ගෙන ඔවුන්ගේ ආශිර්වාදය ලබා ගත යුතුයි. වාස්‌තු භූමියේ 03 වන ස්‌ථරයට රැස්‌වන භූමි ඥාතීන් සෑම විටම අහිතවත් කොටස්‌ වන අතර ඔවුන් කෙරෙහි විශේෂ අවධානයක්‌ යොමු කළ යුතුයි. මේ ආකාරයට භූමියේ භූමි ඥාතීන්ගේ අවසරය ලබාගෙන ඔවුන් සතුටු කොට ඉදිරියේ පින් පෙත් ලබා දෙන බව ගිවිසගෙන වාස්‌තු භූමියේ ගෘහ කර්මයේ මූලික කටයුතු සිදුකළ යුතුයි. එනම් එම ඉඩමේ සෑදීමට අපේක්‍ෂිත නිවසේ සැලැස්‌ම පිළිබඳව අවශ්‍ය සැලසුම් කිරීම කළ යුතු වන්නේ ඉහත කරුණු කාරණා ඉටු කළ පසුයි. එහෙත් නූතනයේ නිවාස සැලැස්‌මක්‌ සකස්‌ කිරීමේදී එම කාර්යය ඉටු නොවේ. එය විශාල අඩුපාඩුවක්‌ වන අතර එවැනි නිවාසවලට දිගින් දිගට භුමි ඥාතීන්ගේ අයහපත් බලපෑම ඇති වීම නොවැළැක්‌විය හැකි දෙයකි. එසේ වූවද එම භූමිය හිමිවන භූමි ඥාතීන් වැඩි කොටසක්‌ ගෘහ හිමියාට හිතවත් කොටස්‌ නම් එහි බලපෑම තීව්‍ර නොවේ. එහෙත් අපට ඒ පිළිබඳව සොයා බැලීමට ක්‍රමයක්‌ නොමැති බැවින් මුලික කටයුතු ඉටු කිරීම ඉතාමත් ඥානාන්විත වේ.
ගෘහ කටයුත්තක්‌ ආරම්භ කිරීමේදී මූලික අවස්‌ථාව වන භූමි ඥාතීන්ගෙන් අවසර ලබා ගැනීම කළ පසු නිවසේ සැලැස්‌ම සකස්‌ කළ යුතු වේ. ඉන් පසුව නිවසේ ඉදිකිරීම් කටයුතු ආරම්භ කිරීමට ප්‍රථම බහිරව දේවතා පූජාවන් පැවැත්වීම ඉතාමත් ප්‍රතිඵල දායක වේ. බහිරව දේවතා පූජාව සිදුකිරීමේ මුලික අදහස වන්නේත් භූමියේ වෙසෙන භූමි ඥාතීන්ට පින්පෙත් අනුමෝදන් කිරීම හා ඔවුන්ගේ ආශිර්වාදය ලබා ගැනීමයි. එම අවස්‌ථාවේදි සිදුවන විශේෂ දෙයක්‌ වන්නේ මූලික සීහුම් අවස්‌ථාවේදී වාස්‌තු භුමියේදී ස්‌ථර 04 ක්‌ මැද ස්‌ථරය වන බ්‍රහ්ම කොටසට අයත් භූමි ගත බලවත් කොටස්‌ පැමිණිම හා ඔවුන්ගේ ආරක්‍ෂාව හා ආශිර්වාදය ලබා ගැනීමයි. එම නිසා ඔබගේ නිවසේ සැලැස්‌ම සකස්‌ කිරීමේදී ප්‍රථම ඉඩමට ප්‍රවේශය භූමි ඥාතීන් සමග කතා කොට ඔවුන්ගේ අවසර ලබා ගැනීම සිදු කළ යුතුම දෙයක්‌ බව සිතන්න. එවැනි නිවාසවල වාස්‌තු දෝෂ හට නොගනී. භූමි ඥාතීන්ගේ අප්‍රසාදය ඇතිවන නිවාසවල වාස්‌තු දෝෂ හටගනී. මෙය ඉතා සක්‍රීය දෙයක්‌ බව අත්දැකීමෙන් පෙනී යයි. ඔබට මෙම කටයුත්ත සඳහා පළපුරුදු වාස්‌තු ශිල්පියෙකුගේ සහය ලබා ගැනීමට අවස්‌ථාව නොමැතිනම් මෙම කටයුත්ත ඔබටම කරගැනීම සඳහා ඉහතින් දක්‌වන ලද සීහුම් (බල ගැන්ම) ක්‍රමයන් අනුගමනය කළ හැක. එහෙත් කිසිම විටෙක භූමි ඥාතීන් නොසලකා හැර නිවාස සෑදීම නොකළ යුතුයි. මෙම භුමි ඥාතීන් වසර දහස්‌ ගණනේ සිට මෑත කාලීන වශයෙන් තමන්ගේම ඥාතීන් පවා විය හැකියි. එම නිසා නිවසේ ආගමික වතාවත් සිදු කරන සෑම විටකම දෙවියන්ට හා මියගිය ඥාතීන්ට මෙන්ම භූමි ඥාතීන්ට පින් පෙත් අනුමෝදන් කළ යුතු බව සිතන්න. මෙසේ පින්පෙත් අනුමෝදන් කිරීමෙන් හිතවත් අහිතවත් හා මැදිහත් යන සෑම කොටසකම භූමි ඥාතීන්ගේ ආශිර්වාදය ලබා ගැනීමේ හැකියාව ලැබෙන අතර ඔවුන්ගේ අකුසල් දුරුකොට එම ආත්මභාවලින් ඔවුන් නිදහස්‌ කිරීමේ කුසල කර්මයන්ටද දායකවීමේ හැකියාව ලැබේ. ඔබ සෑම විටම ඔබගේ නිවසට සෙත් පැතිය යුතු අතර එය ඔබගේ නිවසේ වාස්‌තු දෝෂ සමනය වීමටද හේතු වේ. එසේම කරණිය මෙත්ත සූත්‍රය නිවස තුළ නිතර සජ්ජායනා කිරීමද වාස්‌තු දෝෂ හීන කිරීමට හා භූමි ඥාතීන්ගේ ආශිර්වාදය ලබා ගැනීමට හේතු වේ.
ඉහතින් පෙන්වා දුන් පරිදි ඔබගේ කියා සිතා සිටින මෙම ඉඩම ඔබට පෙර සිටි සිය දහස්‌ ගණනක්‌ වු හිමිකරුවන්ගේ සියුම් ආත්ම භාවයන් සමගින් සීහුම් ලෙස ගනුදෙනු කොට ඔවුන්ගේ ආශිර්වාදය ලබාගෙන වාස්‌තු දෝෂවලින් තොර වාසනාවන්ත නිවසක්‌ තුළ සතුටින් ජීවත් වීමට වාසනාව උදාවේවා!
ශාස්‌ත්‍රවේදී ඩී. යු. සෙනරත්
දිවයින පුවත්පත
