වැසි ජලය නිවසේ අට දිශාවට බැස යෑමේ ශුභාශුභ

බොහෝ දෙනා කරන ඉල්ලීම් තමයි තමන්ගේ නිවාස සැලසුම දමන්නම් බලලා දෙන්න. එහෙම නැති නම් තමන්ගේ භූමියේ නිවාසයක් ඉදිකර ගන්න නිවාස සැලසුමක් හදලා දෙන්න කියන කාරණාව. එහෙම කියන බොහෝ දෙනකුට මං කියලා තියෙන්නේ නිවැරදිව, වාස්තු විද්‍යානුකූලව නිවාස සැලසුමක් අඳින්න නම් එම භූමියේ ප්‍රවේශය හෙවත් ඉඩමට පැමිණෙන මාර්ගය, ගේට්ටුව පිහිටා තිබෙන ආකාරය, ඉඩමේ හැඩය, ළිඳ, වැසිකිළි ආදිය පිහිටා ඇති දිශාවන් ස්ථාන ගැන සැලකිලිමත් නොවී නිවාස සැලසුමක් හෝ නිවාස පරීක්ෂාවක් කළ නොහැකි බවයි. ඒ සියල්ලම අතර තවත් වැදගත්ම සුවිශේෂී කරුණක් තමයි, නිවස ඉදි කළ හෝ ඉදිකිරීමට බලාපොරොත්තු වන භූමියේ වර්ෂාවට වැසි ජලය බැස යන ආකාරය. මක් නිසා ද භූමියේ වැසි ජලය සෑම දිශාවකටම අපට ඕනේ කරන ආකාරයට බැස යෑමට ඉඩ සැලසීමෙන් නිවස මොනතරම් වාස්තු විද්‍යානුකූලව ඉදිකර තිබුණත් පලක් නෑ. නිවස පිහිටි භූමිය අශුභ නම්. ඒක හරියට කියනවා නම් කොරෝනා රෝගියකු නිදියන කාමරයක නිරෝගී පුද්ගලයකු එකට සිටිනවා වගේ දෙයක්. එම නිසා යම්කිසි භූමියක නිවසක් ඉදිකිරීමට පෙර එම භූමියේ ජල අපගමන රටාව නිවැරදිව කපා, ගොඩකර, ශුහාකාරයට ජලය බැස යන ලෙසින් භූමිය සකසා නිවසේ වැඩ ආරම්භ කළ යුතු අතර දැනට ඉදිකර ඇති නිවෙස්වල භූමිවල ද ජලය බැස්ම (වැසි ජලය) නිවැරදි දිශාවන්ට බැස යන පරිදි භූමිය සැකසිය යුතුය. බොහෝ දෙනකු නොසලකා හරින එතරම් තැකීමකට ලක්නොකරන මෙම වාස්තු දෝෂ තත්ත්වය නිසා ඔබගේ පදිංචි නිවසේ ධන හානි, සෞඛ්‍ය ගැටලු, විවාහය, දරු උපත් යන සියල්ල දෝෂ සහිත වීමට ඉඩකඩ පවතී. දැන් අපි බලමු අට දිශාවට ජලය බැස යෑම තුළින් එක් එක් දිශාවන්ගේ පවතින ශුභාශුභ තත්ත්වයන්.

● දකුණු දිශාවට වැසි ජලය බැස යන භූමි

ඔබගේ නිවස ඉදිකර තිබෙන භූමිය වර්ෂාව පැමිණි විට පතිත වන ජලය දකුණු දිශාවට බැස යනවා නම් ඔබට ඉතාම අශුභ ප්‍රතිඵල අත්කර දේ. මනුෂ්‍යයකුට තම ජීවිතයේ විඳින්නට හැකි උපරිම සුවය නම් තමන්ගේ මනස ප්‍රීතියෙන් සතුටින් තබා ගැනීමයි. නමුත් නිවස ඉදි කර තිබෙන භූමියේ වැසි ජලය දකුණු දිශාවට බැස යෑම නිසා ඔහුගේ හෝ ඇයගේ මානසික සුවය හීන කරයි. සතුට පලවා හරියි. සිතට නිතරම පැමිණෙන්නේ අශුභවාදී ඍණාත්මක සිතුවිලියි. සෑමවිටම පරාජිත හැඟීම් ඇති කරයි. තමන්ගේ දියුණුව පිරිහෙයි. ව්‍යාපාර බංකොලොත් වෙයි. කීර්තිනාමය, සමාජයේ පිළිගැන්ම අහිමි කරයි. දූ දරුවන්ට විශේෂයෙන් දියණියන්ගේ විවාහය ප්‍රමාද කරයි. ගිනි බිය ඇති වේ. විදුලි අකුණුවලින් හානි, හදිසි අනතුරුවලට මුහුණ දීමට සිදුවේ. පදිංචිය එපා කරවයි. ජීවිතය කලකිරීමට ලක්ව සිය දිවි පවා නැති කර ගැනීමට සිත් දෙන ඉතා අශුභ ප්‍රතිඵලවලට ලක්වෙන දෝෂයකි.

● නිරිත දිශාව

නිරිත දිශාවට ජලය බැස යන භූමිවල පිහිටි නිවාසවල වෙසෙන අයට තම දියුණුව උදෙසා මොනයම් දේ සිදු කළ ද සාර්ථක ප්‍රතිඵල අත් නොවේ. විශාල ධන හානිවලට මුහුණ දීමට සිදුවේ. තමන් සතු ධනය පවා සොර සතුරු උපද්‍රවට ලක්ව විනාශ වේ. නිවසේ අඹු – සැමි ආරවුල් හට ගනී. දරු උපත් හීන වේ. නිවසේ සතුට, සමඟිය හානි වේ. පිරිමි දරුවන්ට අපල දේ. ඔවුන්ගේ විවාහය ප්‍රමාද වේ. ගෘහ හිමියාට ලෙඩ රෝග, හදිසි අනතුරු විපත් ඇති වේ. සියලු බලාපොරොත්තු, අනාගත සැලසුම් ගඟට ඉනි කපා දැමුවා සේ සුනුවිසුණු වේ. නිවසක බලවත්ම දිශාවක් වන නිරිත දිශාව මෙලෙස පහත් වී වැසි ජලය ගලා යෑම ගෘහ හිමියාගේ අතැති මුදල් නෝට්ටු ගඟට විසි කළා මෙන් විනාශයට පත් වේ. ශෝකයට පත්වේ. නිවැසියන්ට හදිසි අනතුරුවලට ලක්වීමේ ප්‍රවණතාව ඉහළයයි.

● නැඟෙනහිර දිශාවට වැසි ජලය බැස යන භූමි

නැඟෙනහිර දිශාවට වැසි ජලය බැස යන භූමිවල වෙසෙන නිවෙස් හිමියන්ට ඉතාම ශුභ වේ. කරන කියන සියලු කටයුතුවල දියුණුව, සෞභාග්‍ය අත්වේ. අගහිඟකම් නොපැමිණේ. උසස් මානසික තත්ත්වයකින් සියලු කටයුතු ධනාත්මකව ඉෂ්ට සිද්ධ වෙයි. දරුවන්ගේ අධ්‍යාපන කටයුතු, රැකී රක්ෂාවලින් උසස් වීම් ලැබේ. උසස් මනසකින් කටයුතු කිරීමේ හැකියාව නිවැසියන්ට හිමි වේ. සමාජයේ ඉහළ පිළිගැනීමක්, නිලතල දැරීමක් හිමි වේ. දිනෙන් දින දියුණුවට පත්වේ. යසස, කීර්තිය, අභිවෘද්ධිය වර්ධනය වේ.

● ගිනිකොන දිශාවට වැසි ජලය බසින භූමිවල පිහිටි නිවාස

ඉතා බලවත් දිශාවක් වූ ගිනිකොන දිශාවෙහි පවතින සියලුම බලවත්කම් වැසි ජලය බැස්සීම මෙම දිශාවට සිදුකිරීම තුළින් බොහෝ අශුභතාවන්වලට මුහුණ දීමට සිදුවනු ඇත. අඹුසැමි ආරවුල්, නිවසේ අසමඟිකම දිනෙන් දින වර්ධනය වේ. දරුවන්ට අපල වේ. නිතරම ලෙඩරෝගවලට භාජන වේ. ආදායම් මාර්ග වැසී යයි. අතමිට හිඟ වේ. අධික වියදම දිනෙන් දින උග්‍ර වේ. මානසික දුර්වලතා ඇති වේ. සිතේ අසතුට ඇති කරයි. ණයතුරුස් වී ඒවා ගෙවා ගැනීමට නොහැකි තත්ත්වයන්ට පත් වේ. හදිසි අනතුරු, පිරිමි දරුවන්ට විපත් ඇති කරයි. නිවසේ බිරිඳ රෝගී බවට පත් කරයි. දරුවන්ගේ අධ්‍යාපන කටයුතු කඩාකප්පල් වේ. මොනම ආකාරයකවත් සැනසීමක් නොලැබෙන දෝෂ තත්ත්වයට පත්වෙන පිහිටීමකි, ගිනිකොන දිශාවට වැසි ජලය බැස යන ආකාරයට නිවස පිහිටි භූමිය පත්වීම.

● බටහිර දිශාවට වැසි ජලය බැස යෑම

නිවසේ ධනය හිස්කරයි. කොතරම් ඉපැයීමක් කළ ද පසුදින වන විට මුදල් වාෂ්ප වේ. දරු සම්පත්තිය හීන කරයි. පවුලේ අසමගිය ඇති වේ. මංගල යෝජනා බිඳ වැටේ. දරුවන්ගේ අධ්‍යාපනයට බාධා ගෙනදේ. කොතරම් භක්තිමත්ව දෙවියන් ඇදහීම කළ ද පිහිටක් නොමැත. දියුණුවක් නොමැත. සමාජ පිළිගැන්ම අඩුවේ. නිවස අඳුරු ස්වභාවයක් ගනී.

● උතුරු දිශාවට වැසි ජලය බැස යෑම

වාස්තු විද්‍යාවේ සඳහන් අන්දමට රාජශ්‍රිය ගෙන දේ. ධනය, බලය, කීර්තිය, සෞභාග්‍ය අත්වේ. සියලු බලාපොරොත්තු සඵල වේ. දරුවන්ගේ අධ්‍යාපන කටයුතු සාර්ථක වේ. ව්‍යාපාරවලින් ලාභ අත්වේ. ජයග්‍රහණ අත් කරයි. හදිසි ධන ලාභ උදාකර දේ. ඉඩකඩම්, යාන වාහන, ව්‍යාපාර තව තවත් හිමිවේ. සතුට, සමඟිය, සිතේ ප්‍රීතිය, මානසික නිදහස, මානසික සුවය අත්වේ. යන යන තැන සමාජයේ ගෞරවයට, කීර්තියට ලක්වේ. වාසනාවන්ත ගෘහයකට හිමිකම් ලැබේ.

● වයඹ දිශාවට වැසි ජලය බැස යන නිවාස

වයඹ දිශාවට වැසි ජලය බැස යන භූමියක ඔබ නිවසක් ඉදිකරන්නේ නම් ඔබගේ අතේ මුදල් පැවතිය ද එය අවසන් කර ගැනීමට නම් ඉක්මනින් කළ නොහැක. දිනෙන් දින සතියෙන් සතිය මාසයෙන් මසය අවුරුදු ගාණක් එය ඇදෙනු ඇත. අවාසනාවන්තකම රැඳෙන නිවසකි. ගෘහ හිමියාට අධික වියදම්, ලෙඩ රෝග බහුලව ඇති කරයි. දරුවන්ගේ අධ්‍යාපන කටයුතු ද නිසි ආකාරයට කර ගැනීමට නොහැකි වේ. කාන්තාවන්ට අශුභ ඵල දේ. රෝගීතාවයට පත් කරයි. කාන්තාවන්ගේ ගෞරවය කෙලෙසෙන ආකාරයේ කටයුතු කුමන්ත්‍රණ සිදුවේ. වියදම් අධික වේ. ව්‍යාපාර බංකොලොත් භාවයට පත්වේ. අසමඟිකම, මානසික පීඩා බහුල වේ.

● ඊශාන දිශාවට වැසි ජලය බැස යන භූමිය

මෙවැනි භූමියක ඉදිකර ඇති නිවාසවලට දේවාශීර්වාදය, දෙවියන්ගේ බැල්ම නිතැතින්ම හිමි වේ. ඉතාම වාසනාවන්ත නිවසකි. සෑම දෙයකින්ම ජයග්‍රහණය අත්වේ. දරුවන්ගේ අධ්‍යාපන කටයුතු සාර්ථක වේ. දිනෙන් දිනම දියුණුවට පත්වෙන මෙවැනි පිහිටීම් ඇති නිවෙස්වලට ධනය, බලය, කීර්තිය නිතැතින්ම අත්වේ. ජයග්‍රහණ අත්වේ.

රැකියාවලින් උසස්වීම්, විදේශීය අධ්‍යාපන ශිෂ්‍යත්ව දරුවන්ට හිමි වේ. තව තවත් වතුපිටි, යාන වාහන හිමි වේ. ව්‍යාපාර දියුණුවට පත්වේ. නිරවුල් නිදහස් මනසක්, මානසික සුවයක් මෙවැනි භූමිවල ජීවත්වන නිවැසියන්ට අත්වේ. නිවසේ සතුට, සාමය, සමගිය වර්ධනය වේ. ඉතාමත්ම වාසනාවන්ත නිවසක් බවට පත් වේ.

දේශබන්ධු, දේශමාන්‍ය, විශ්වශක්ති, වාස්තු විද්‍යා විශාරද, ඩබ්. කේ. ඒ. එම්. චන්ද්‍රසිරි, 0777856649.
උපුටා ගැනීම දිවයින