වාස්තු දෝෂ කෙරෙහි බලපාන නිවසේ වර්ණ ආලේපනය
ජීවිතය යථාර්ථවාදීව වින්දනය කර ගැනීමට ස්වභාධර්මය හා ජීවිතය ගෙනයා යුතුය. ස්වභාවධර්මයට පිටුපා ස්වභාවධර්මයට එරෙහිව කටයුතු කිරීම විනාශයට හේතු දේ. මනුෂ්‍යයන් ස්වභාවික පරිසරයෙන් ඈත්ව කටයුතු කිරීමට උත්සාහ කළ ද විද්‍යාව තාක්‍ෂණය කොතරම් දියුණුවට පත්වුණ මේ කාලයේදී පවා ස්වභාවික පරිසරයෙන් ඈත්ව ක්‍රියා කළ නොහැක. වර්තමාන ලෝකයේ නොයෙක් ලෙඩ රෝග, බෝවන අතිශයින් දරුණු වෛරස් රෝග සුව නොවන රෝගවලට ප්‍රධානතම හේතුව වන්නේ මනුෂ්‍යයන් ස්වභාවික පරිසරයෙන් වෙන්ව කටයුතු කිරීමට යෑම නිසාය. ස්වභාවික පරිසරයේ පවතින වර්ණ රටාවන්ද විවිධාකාරය. ගස් කොලන්වල හරිත වර්ණයත් ජලාශ, මුහුද වැනි ස්ථානවල නීල වර්ණය අහසේ සුදු, කලු, නීල, වර්ණයන් ස්වභාවධර්මයෙන් ලත් ඒවාය. මෙයට ශත වර්ෂ ගණනකට එපිට ශ්‍රී ලංකාවේ සීගිරි ශෛල පර්වතය තුළ මල් අප්සරාවන්ගේ වර්ණක සදා ඇත්තේ ස්වභාවික පරිසරයෙහිම අමුද්‍රව්‍ය මතයි. ඒවා කෘතිම ආලේපන නොවේ. අදටත් එම වර්ණයන් දිස්වන්නේ ඒවා ස්වභාවධර්මයෙන් ස්වභාවික පරිසරයට අනුකූල වන ආකාරයෙන්ම නිර්මාණය කිරීම තුළිනි. මිහිදු මහනාහිමියන් ලංකාවට පැමිණීමත් සමග ලංකාවේ ආගමික සංස්කෘතික සමාජ රටාවන් මහත් පෙරළියකට පත්විණි. වෙහෙර විහාර, දාගැබ් පමණක් නොව චිත්‍ර කලාව, කැටයම් ශිල්පය, මූර්ති නිර්මාණය වුණේ ඉන් පසුවය. ඒ සමග මනුෂ්‍යයන් මේ නිර්මාණයන් සඳහා වර්ණ ගැන්වීම් සිදු කිරීමට උනන්දු විය. විහාර දාගැබ් වලින් පසු මනුෂ්‍යයන්ගේ සෙවණට ඉදිකරන ලද නිවස ද කලාත්මකව ඉදිකිරීමට උත්සාහ ගත්තේය. එහි ප්‍රතිඵල වශයෙන් නිවාස කර්මාන්තය හෙවත් ගෘහ නිර්මාණයේදී රජ මාලිගා ඉදිකිරීමේදී ඒවාවල බිත්ති සඳහා වර්ණ ආලේපනයට ප්‍රවිෂ්ට විය.
සමාජීය, ආර්ථික, තාක්‍ෂණික දියුණුවත් සමගින් අද වනවිට ලෝකයේ නිපදවන සෑම දෙයක් සඳහාම වර්ණ ආලේපනය සිදු කරයි. අද වනවිට නොයෙක් වර්ණ නිෂ්පාදනය කරන කර්මාන්ත ශාලා ලොව ව්‍යාප්තව තරගකාරීව තීන්ත නිෂ්පාදන කටයුතු සිදුකරනු ලබයි. අද අප විශේෂයෙන්ම කතා කිරීමට බලාපොරොත්තු වන්නේ මෙම තීන්ත ආලේපනයන් අපගේ නිවසට භාවිත කරන ආකාරය හා ඒවා ආලේපනය කිරීමෙන් නිවාසවලට ගන්නා අමුද්‍රව්‍යයන්වල වර්ණ රටා වාස්තු විද්‍යාත්මකව කොතරම් හිතකර හා අහිතකර වන්නේ ද යන බවය. ප්‍රථමයෙන්ම නිවසක් ගැන කතා කිරීමේදී එයට ආලේප කරන බිත්ති ආලේපන එළියට හා ඇතුළක වර්ණයන්, දොර, ජනෙල්වල වර්ණයන්, ටයිල් වර්ග භාවිත කිරීමේදී තෝරාගත යුතු වර්ණයන් පිළිබඳ අවබෝධයක් නොමැතිව කටයුතු කිරීම නිසා අද බොහෝ නිවෙස්වල වාස්තු දෝෂ තව තවත් වර්ධනය වීමයි.
නිවසකට වර්ණ ආලේපනය හෙවත් තීන්ත ගෑමේදී නෝනාට ආශා පාටවත්, දරුවන්ගේ ප්‍රියමනාප පාටවත් නිවැරදි වන්නේ නැත. නිවසක් වර්ණ ගැන්වීම ක්‍රම කීපයකින් කළ හැකිය.
- පංච මහා ධාතුන්ට අනුකූලව දිශාවන් අනුව
- දිශාවන්ගේ අධිපති ග්‍රහයන් අනුව
- උපන් අංකයට අනුව
වාස්තු විද්‍යාත්මකව පංච මහා ධාතුන්ට අනුව දිශාගැන්වීමේදී ආපෝ, තේජෝ, වායෝ, පඨවි, ආකාශ යන ධාතුන්ගේ පිහිටි දිශාවන් අනුව සලකා වර්ණ ආලේපනය සිදුකරන අතර එය බොහෝ දුරට නිවැරදි වේ. ඒ අනුව ආපෝ ධාතුව බලවත්ව ඇති උතුරු කලාපය සඳහා සුදුසු වර්ණ වන්නේ නිල් පාට, ලා නිල් පාට, සුදු වර්ණයයි. සුදු වර්ණය නිවසේ පිටත ඕනෑම දිශාවක් සඳහා ශුභ වේ. නැගෙනහිර දිශාව සඳහා ලා කොළ, කෙසෙල් දලු පාට සුදුසු වේ.
දකුණු දිශාව හෙවත් තේජෝ කලාපයට ශුභ දෙන වර්ණය වන්නේ තැඹිලි පාට, රෝස පාට, ලා රතු පාට වන අතර බටහිර දිශාවට අලු පාට, ලා දුඹුරු පාට ගැලපේ. මෙම පංච ධාතුන්ට අනුව වර්ණ යෙදීමේදී උතුරු දිශාවේ නිල් වර්ණය, දකුණටත්, දකුණු දිශාවේ රත් පැහැය උතුරටත් යෙදීම අශුභ වේ. ඒ වගේම නැගෙනහිර කොළ වර්ණය බටහිර දිශාවටත් බටහිර දිශාවේ අලු වර්ණය නැගෙනහිර දිශාවටත් අශුභ වේ. මෙයින් අදහස් කරන්නේ නිවසක වර්ණ යෙදීම වර්ණ 04කින් සතර දිශාවට ආලේපනය කිරීම නොව නිවසේ මුහුණත පිහිටි දිශාව සඳහා තෝරාගන්නා වර්ණය තෝරා නිවසේ ආලේපනය කිරීමයි. නිවසේ දොර ජනෙල් සඳහා කිසිම විටක කලු වර්ණය හෙවත් කාල වර්ණය කිසිම ගෘහ කටයුත්තකදී භාවිත කිරීම අශුභ වේ. බොහෝ නිවාසවල දොර, ජනෙල්, ග්‍රිල් ආදියට කලු වර්ණය යොදා පැවතීම එම නිවෙස්වල දියුණුව අඩාලවීමටත් වියදම් අධික වීමට, ලෙඩ රෝග ඇති වීමටත් හේතු දේ. නිවසේ ප්‍රවේශයට දමන ගේට්ටුව සඳහා ද ශුභ වර්ණයක් යෙදිය යුතු අතර නිවෙස්වල 80%කටත් වඩා පවතින්නේ කාල වර්ණ ගේට්ටුයි. ගේට්ටුව සඳහා උතුර – නිල් වර්ණය, දකුණ – රතු වර්ණය, තැඹිලි පාට, නැගෙනහිර – කොළ වර්ණය, බස්නාහිර – අලු වර්ණය.
නිවසේ පිටත ඇති සිවිලිම්, වහලයේ වඩිම්බු සුදු වර්ණය, ක්‍රීම් වර්ණ ගැලපේ, ශුභ වේ. නිවස ඇතුළත කාමර, කුස්සිය, නිදන කාමරය ඇතුළත සිවිලිම සඳහා ද තද වර්ණ නොගැලපේ.
නිදන කාමරය
ලා නිල්, ලා කහ, වර්ණයන්ද නිවසේ ප්‍රධාන නිදන කාමරය වූ නිරිත පිහිටි කාමරය සඳහා ලා දම්, ලා රතු, ගැලපෙන අතර නිදන කාමර සඳහා තද වර්ණ යෙදීම ඇස්වලට ද හොඳ නැත.
ළමුන්ගේ අධ්‍යාපන කාමරය
බොහෝ විට ඊශාන දිශාවේ පවතින මෙම කාමරය සඳහා සුදු පාට, කහ පාට, ක්‍රීම් පාට, ලා නිල් පාට යොදා ගැනීම ශුභ වේ.
කුස්සි කාමරය
කුස්සි කාමරයේ බොහෝ තැන්වල දකින්නට ලැබෙන්නේ පැන්ටි්‍රකබඩ් කාලවර්ණයෙනි. ඒ වගේම සින්ක් එක තබා ඇති කොන්ක්‍රීට් ලෑල්ල ද කළු පාට ටයිල් වලින් නිමවා ඇත. කලු පාට ටයිල් ද නිවසේ බිමට යොදා ගැනීම ද ඉතා අශුභ වේ. ශනි අපලය පවතින විටදී සෙනසුරුගේ අපලතාවය මෙයින් තවත් වර්ධනය වේ. කුස්සිය සඳහා ශුභ වර්ණ වශයෙන් ලා රතු, ලා රෝස, කහ පාට, සුදු පාට හා ක්‍රීම් පාට ශුභ වේ.
කලු පාට ටයිල්, කුස්සියේ සින්ක් ලෑල්ල මතට අශුභයි.
නාන කාමරය
නිවසේ පවතින නාන කාමරය සඳහා ද කාල වර්ණ ටයිල් යෙදීම අශුභ වේ. මේ සඳහා ලා කොළ වර්ණය, අහස් නිල්, ලා නිල්, සුදු පාට ශුභ වේ.
නිවස ඇතුළත සිවිලිම
නිවසේ සිවිලම නිවස අභ්‍යන්තරයේ ක්‍රීම් වර්ණයෙන්, සුදු වර්ණයෙන් පැවතීම ශුභ වේ. කෙසේ වුවද මනුෂ්‍යයන් වන අප අපගේ ජීවිතයේ වැඩි කාලයක් ගත කරන්නේ නිවස ඇතුළතයි. එම නිවසේ බිළිඳු දරුවන්, රෝගීන්, ගැබිනි මාතාවන් වාසය කරයි. නිවසක තීන්ත ආලේපනයේදී ලාබ බාල තීන්ත ආලේපනය නිසා නිවැසියන් රෝගී තත්ත්වයන්ට භාජනය වේ. එම නිසා තීන්ත ආලේපනයේදී නිවස ඇතුළත හොඳ ප්‍රමිතීන්ට අනුව නිපදවූ තත්ත්ව සහතික ලත් තීන්ත වර්ගම භාවිත කළ යුතුය.
වර්ණ ආලේපනයේදී මෙන්ම නිවසට දොර රෙදි, හා ජනෙල් රෙදි දැමීමේදී ද වර්ණ සම්බන්ධයෙන් සැලකිලිමත් විය යුතුය. තිර රෙදි දැමීමේදී වුවද කාලවර්ණය යොදා ගැනීම අශුභ බව සඳහන් කරමි. කෙසේ වුවද තිර රෙදි තෝරා ගැනීමේදී ලා ක්‍රීම් වර්ණ, සුදු වර්ණ යොදා ගැනීම උචිත වේ.
නිවාසවලට වර්ණ ආලේපනය කරන බොහෝ ක්‍රම පවතී. නමුත් ඉතාම සුදුසුම ක්‍රමය වන්නේ පංච ධාතුන්ගේ දිශාවන්ට ගැලපෙන ආකාරයට තීන්ත ආලේපනය කිරීමයි. සමහරු දිශාවන්ගේ පාලනය වන ග්‍රහයන්ගේ වර්ණයන් ද සැලකිල්ලට ගෙන වර්ණ යොදා ගනී.
- නැගෙනහිර – රවි ග්‍රහයා – සුදු වර්ණ
- බටහිර – සෙනසුරු – නිල් වර්ණ
- උතුර – බුධ – කොළ වර්ණ
- දකුණ – කුජ – රතු, තැඹිලි වර්ණය
- ඊශාන – ගුරු – ලා කහ, ක්‍රීම්
- වයඹ – සඳු – සුදු වර්ණය
- ගිනිකොන – සිකුරු – සුදු වර්ණය
- නිරිත – රාහු – කොළ වර්ණය
කෙසේ වුවද වාස්තු විද්‍යාත්මකව ද නිවසක වර්ණ යෙදීම වැරදි ආකාරයට සිදුකිරීමෙන් තිබෙන වාස්තු දෝෂ තව තවත් බලවත් වන අතර අලුත් වාස්තු දෝෂ ද එක්කරනු ලබයි. සමහර වෙළෙඳ සල්, ව්‍යාපාර ස්ථානවල යොදා ඇති වර්ණ නිසා එම ව්‍යාපාර අක්‍රියවී බංකොලොත්භාවයට පත්ව ඇත. සමහර ව්‍යාපාර ස්ථානවල යොදා ඇති ව්‍යාපාර නාමපුවරුවේ යොදා තිබෙන වර්ණයන් නිසා එම ව්‍යාපාරයම කඩාවැටී ඇත. එම නිසා වර්ණ ආලේපනය නිවසට වගේම ව්‍යාපාර ස්ථානයට එහි ගෘහ අංගවලට යෙදීම කල්පනාකාරීව කළ යුතුමය. වර්තමානයේ බොහෝ ආපන ශාලා, වෙළෙඳ සල්වල කළු වර්ණය ඇතුළත හෝ පිටත බිත්ති සම්පූර්ණයෙන්ම කාලවර්ණ කිරීම දැකිය හැක. මේවා ගැන ටික කාලයක් අවධානයෙන් බලා අධ්‍යනය කරන්න. අලුතින් පටන් ගත් ව්‍යාපාර ස්ථානයක් වුවද පැවැත්ම මාස කීයද යන්න එවිට ඔබටම තේරුම් ගැනීමට හැකි වේවි වර්ණ ආලේපනය කොතරම් බලපෑම් ඇති කිරීමට සමත්වේද යන්න.
උපුටා ගැනීම දිවයින
