අගහිඟකම් වාස්තු දෝෂ නැති නිවෙසක්

වාස්තු දෝෂ සඳහා පිළියම් යෙදූ නිවෙසක් හෝ වාස්තු නිවැරදි නිවෙසක් ශක්තිමය හෝ භෞතික වශයෙන් බලගැන්වීමක් සිදුකිරීමෙන් ඉක්මන් ප්‍රතිඵල ලබා ගැනීමටත් ප්‍රතිඵල වර්ධනය කර ගැනීමටත් හැකියාව ලැබේ. මෙහිදී අපට වඩාත් වැදගත් වන කාරණය වන්නේ අපගේ නිවෙසට ඊසානයෙන් ගලා එන අන්තරික්ෂ ප්‍රවාහය වැඩි කර ගැනීම හෙවත් වැඩි වැඩියෙන් අන්තරික්ෂ ශක්තිය නිවෙසට ලබාගැනීමත් නිවෙස අභ්‍යන්තරයේ වැඩි අන්තරික්ෂ ශක්ති තීව්‍රතාවක් පවත්වාගෙන යෑමත්ය. මේ සඳහා භෞතික පිළියමක් ලෙස අපට ඊසානයෙන් ගලා එන අන්තරික්ෂ ශක්තිය නිවෙසට ළංකර ගැනීම සඳහා එම දිශාවේ ජල පොකුණක්, නාන තටාකයක් හෝ ළිඳක් එසේත් නැතිනම් භූගත ජල ටැංකියක් නිර්මාණය කර ගත හැකිය. ජලය අන්තරික්ෂ ශක්තිය උරා ගැනීමේ විශේෂ ගුණයෙන් යුක්තය. එම නිසා සාපේක්ෂව ඊසානයෙන් වැඩි වශයෙන් ගලා එන අන්තරික්ෂ ශක්ති කිරණ පොළොව මට්ටමේ සහ ඊට පහළින් පවතින ඉහත කී ජල මූලාශ්‍රයන් නිසා පහළට නැමී ගමන් කිරීමට පටන් ගැනීම සිදුවේ.

මේ හේතුවෙන් නිවෙසට ඉහළින් ඉවතට ගමන් කිරීමට තිබූ අන්තරික්ෂ ශක්තියක් නිවෙසට ලැබීමට පටන් ගැනීම නිසා නිවෙස අභ්‍යන්තරයේ ශක්ති තීව්‍රතාව (cosmic energy intensity) ඉහළ යයි. නමුත් එවැනි ජල මූලාශ්‍රයන් පිහිටුවීම ප්‍රායෝගිකව ගැටලුකාරී අවස්ථාවකදී තෙත රඳන පැළෑටි වර්ගයන් යොදා ගෙවත්ත නිර්මාණය කිරීමෙන් භූමියේ තෙතමනය රඳවා ගැනීම තුළ ඉහත ප්‍රතිඵල ළඟා කර ගත හැකිය. තවද ගෙවතු අලංකරණයේදී ඊසාන, උතුර, නැඟෙනහිර දිශාවන්ට වාස්තුමය නිර්දේශයන් වන්නේ උසින් අඩු කුඩා ශාකයන්ය. මෙම ශාක වර්ගයන්ද පිරමීඩාකාර ලෙස කප්පාදු කර සකස් කර ගැනීමෙන්ද නිවෙසට වැඩි වැඩි වශයෙන් අන්තරික්ෂ ශක්තිය ලබා ගැනීමේ ක්‍රියාවලිය තීව්‍ර කර ගත හැකිය. එමෙන්ම තුල්සි, ඊතණ, දුටුසතුටු ආදී ශාක වර්ගයන් ඊසාන දිශාවේ සිටුවීමද නිවෙසේ ශක්තිමය යෝග්‍යතාවට වඩාත් උචිත බව කිව යුතුය.

වාස්තු නිර්දේශයන් සැකසී ඇත්තේ නිවෙසට වැඩි ශක්ති ප්‍රමාණයක් ලබා ගැනීම සහ රඳවා ගැනීම පදනම් කරගෙනය. එම නිසා නිවෙසක ඊසානට නොදෙවැනි ලෙස නිරිත දිශාවත් වැදගත්කොට සලකා කටයුතු කළ යුතුය. ඒ සඳහා නිවෙසේ නිරිත දිශාවේ නිවෙසින් බැහැරව උද්‍යාන අලංකරණයේදී යම් දායකත්වයක් ලැබෙන අයුරින් කටයුතු කළ හැකිය. වැඩි ප්‍රමාණයක් සහිත උසින් වැඩි ශාකයන් යොදාගෙන කරන නිර්මාණයන් තුළින් මෙන්ම පාෂාණ, දෘඩ පාංශු නිධි ආදිය යොදාගෙන කරන නිර්මාණයන් තුළින්  උද්‍යාන අලංකරණය මෙන්ම නිවෙසේ වාස්තුමය සහනශීලී ගුණය වඩාත් දියුණු කර ගැනීමට හැකියාව ලැබේ. විශේෂයෙන් නිරිත දිශාවේ උණ ශාකයේ කුඩා පඳුරක් සිටුවීම මඟින් අන්තරික්ෂ ශක්තිය භූගත කිරීම මඟින් නිවෙසේ ශක්තිමය ක්‍රියාවලිය යහපත් කරගත හැකිය. එමෙන්ම නිරිත, දකුණ, බස්නාහිර දිශාවන්හි තාප්පය අනෙකුත් දිශාවන්ට වඩා උසින් පිහිටන ලෙස සකස් කර ගැනීමද අන්තරික්ෂ ශක්තිය ගෙවත්තේ වඩ වඩාත් රඳවා ගැනීම තුළින් නිවෙසේ අන්තරික්ෂ ශක්ති තීව්‍රතාව ධනාත්මක ලෙස ඉහළ නංවා ගත හැකිය.

ගිනිකොන දිශාව තේජෝ ධාතුවට හිමිකම් කියයි. එම නිසා එම දිශාවේ තේජෝ ධාතුව බලවත්ව තබා ගැනීම සඳහා රළු බොරලු වැලි ආදිය යොදා ගනිමින් කරන නිර්මාණයන් සුදුසු වේ. බොරලු වැලි ආදිය සුළු අව් රශ්මියෙන් පවා රත්වී උණුසුම ඉහළ යන බැවින් තේජෝ ධාතුව බලවත්ව පවත්වාගත හැකිය. එමෙන්ම වයඹ දිශාවේ වායෝ ගුණය හෙවත් චලනය වන ගුණය සක්‍රිය කිරීම සඳහා ක්‍රියාශීලී මත්ස්‍යයන් සහිත ජල තටාකයක් පවත්වාගෙන යෑම සුදුසු වේ. මේ ආකාරයට පංච මහ ධාතුන් බලවත් කිරීම ඍජුවම නිවෙසේ වාස්තුමය ක්‍රියාවලිය තවදුරටත් යහපත් ලෙස වර්ධනයට හේතු වේ.

ඉහත අප විසින් සඳහන් කළේ වාස්තු නිවැරදි නිවෙසක් තවදුරටත් භෞතිකව බලගැන්වීම සිදුකර යහපත් වූ ප්‍රතිඵල ලබා ගත හැකි ක්‍රමවේදයන් කිහිපයකි. එමෙන්ම ඇතැම් යෝජනා ප්‍රායෝගිකව ක්‍රියාත්මක කිරීමට නොහැකි අවස්ථා නැතිවාම නොවේ. නමුත් ප්‍රායෝගිකව අවස්ථාව තිබුණත් නිවෙසක මධ්‍ය ලක්ෂ්‍යය ගුණන පිරමීඩ නවයක් (Multier Original Pyramid) යොදා බලගැන්වීමෙන් ඉහත කී අවශ්‍යතාව සපුරා නිවැසියන්ට සාර්ථක සහ ඉක්මන් ප්‍රතිඵල ලබාගත හැකිය. මෙහිදී ඉතා වැදගත් කාරණයක් වන්නේ නිවැරදිව නිවෙසේ මධ්‍ය ලක්ෂ්‍යය ගණනය කිරීමයි. මෙහිදී බිත්ති ඔස්සේ කල්පිත හතරැස් කොටුවක් සේ නිවෙස සලකා නිවෙසෙහි මැද සෙවීම ප්‍රමාණවත් නොවේ.

එසේ කිරීමෙන් සොයාගන්නා මධ්‍ය නිවැරදි නොවන බැවින් එතැන බලගැන්වූ විට අප විසින් අපේක්ෂිත ප්‍රතිඵලය අත් නොවනු ඇත. ඒ වෙනුවට නිවෙසේ පවත්නා බාහිර බිත්ති ඔස්සේ නිවෙසේ සැලසුම කපා තනා ගන්නා පතරොම තැන් කිහිපයකින් ඇල්පෙනති වැනි තුඩකින් එල්ලා ඒ හරහා යන සිරස් රේඛා ඇඳ එහි එකිනෙක කැපී යන තැන සෙවීමෙන් නිවැරදි මධ්‍ය සොයා ගත යුතුය. මෙයට අමතරව නිවෙසේ වාස්තු දෝෂ නැතත් නිවෙසෙන් පිටත අපට කටයුතු යෙදී ඇති තැන්වලදී එන බාහිර බලපෑම්වලින් අත්මිදීම සඳහා සිරුරේ පැලඳ ගත හැකි පිරමීඩ කාඩ්පත් මාල පෙති ආදියද භාවිතයට හුරුවීම වැදගත් වේ.

උපුටා ගැනීම මව්බිම