මොනර පිහාටු ගෙදර තියාගත්තොත් වෙන දේ දන්නවද?
මොනර පිහාටු පෙනුමෙන් අලංකාර වගේම වාස්තු විද්‍යාත්මකව බොහෝ ප්‍රයෝජනවත් යහපත් විශ්ව ශක්තීන් ආකර්ෂණය කර දෙන දෙවියන්ට ඉතා ප්‍රිය පූජනීය වස්තුවකි. සෑම විටෙමකම වාගේ අර්ථයක් නොමැති බොරු මිථ්‍යා අදහස්වලින් පිරී ඉතිරී පවතින ලාංකේය සිංහල ක්‍රමයට දෙවියන් අදහන පුද්ගලයන්ගේ මතයට අනුව ‘මොනර පිල්’ නිවාස තුළ තබා ගැනීමට යහපත් නොවන, දේවස්ථානයක හෝ දේවාලයක පමණක්ම තැබිය යුතු දෙයකි. මොනර පිල් නිවෙසේ තැබීමෙන් දොස් වන්නේ ඇයි? කියා ඔවුන්ගෙන් ඇසුවාම ඔවුන්ට දෙන්නට උත්තරද නැත. නිවැරදි හින්දු වාස්තු විද්‍යාවට අනුව නම් එක් මොනර පිලක් හෝ නිවෙසක තිබේ නම් ඉන් එම නිවෙසට බොහෝ ශුභ වාසනා ගුණයන් ළඟා කර දෙනු ලැබේ.
මොනර පිල යනු බොහෝ දෙවි දේවතාවුන් විසින් මුතු මැණික් මෙන් සිය ශරීරයේ අලංකාරය පිණිස පලඳිනු ලබන වස්තුවකි. මුතු මැණික් මෙන්ම මොනර පිලටද යම් යම් ශුභ විශ්ව ශක්තීන් ආකර්ෂණය කර ගැනීමේ හැකියාවක් ඇත. විශේෂයෙන්ම මොනර පිල් පැලඳීමෙන් රූපශ්‍රීය, සිරියාව, සුන්දරත්වය තීව්‍ර වන බව පැවැසේ. මොනර පිල් පලඳින දෙවියන් අතර ‘ශ්‍රී ක්‍රිෂ්ණ’ දෙවියන් ප්‍රධාන වේ. ඊට අමතරව ශ්‍රී විෂ්ණු දෙවියන්, ‘ගණ දෙවියන්’ තාරා දේවිය, කුමාර් කර්තිකේය දෙවියන් (කඳ කුමරුන්), වල්ලි මෑණියන්, සරස්වතී මෑණියන්, රතී දෙවඟන (කාමදේවයන්ගේ බිරිය) මාතාංගි දේවිය ආදී දෙවි දේවතාවුන් මොනර පිල් පැලඳ ඇති බව සඳහන් වේ. විශේෂයෙන්ම කඳ කුමරු හෙවත් කතරගම දෙවියන් මොනර පිලක් වෙනුවට සම්පූර්ණ පිල් කලඹක් සහිත මයුර රාජයකු තම වාහනය කොට ගෙන වැඩ සිටිනා නිසා අන් කිසිදු දෙවියකුට නැති රූප ස්වභාවයක් හා ආකර්ෂණීය භාවයක් කතරගම දෙවියන්ට උරුම වී ඇත.
මොනර පිල ඔබේ පූජා කුටියේ හෝ පූජාසනයේ තැබීමෙන් දෙවියන්ගේ ආකර්ෂණය ඔබේ පූජාසනයට බලවත්ව ලැබේ. ශ්‍රියාව උතුරා යයි. නිවෙසේ ධන හානි අවම වේ. ඒ වගේම මොනර පිලක් ඔබේ නිවෙසේ තිබීමෙන් ඔබගේ නිවෙසේ ඇති නරකාත්මයන් (අදුරු අහිතකර ශක්තින් බලවේගයන්) ඔබේ නිවෙසින් ඉවත්වේ. මොනර පිල ඇති නිවෙසට ධනයට අධිපතිනිය වන මහා ලක්ෂ්මි දේවියත්, විද්‍යාවට, ඥානයට, කලාවට අධිපතිනිය වන සරස්වතී මෑණියන්ගේ ආකර්ෂණයත් ලැබෙනා නිසා ඔබ නිවෙසට ධන වාසනාව, මිල මුදල් ආකර්ෂණය මෙන්ම ඥානය හා බුද්ධිමත්ව තීන්දු තීරණ ගැනීමට හැකියාවන් උදා කරනු ලබයි.
මොනර පිලක් (පිහාටුවක්) ඔබේ නිවෙසේ ‘උතුරට’ හෝ ‘ඊසාන’ දිශාවට පිහිටන බිත්තියක එල්ලා තිබීමෙන් නිවැසියන්ට බලපවත්නා සියලු රාහු ෙදා්ෂයන්ගේ බලපෑම් දුරු වී යයි. එමෙන්ම නිවැසියන්ට ජීවිතේ ඇති වන ගැටලුවලදී ඒවාට විසදුම් වශයෙන් නිවැරදි තීන්දු තීරණ ගැනීමට හැකියාවන් ඇති වේ.
එමෙන්ම මොනර පිලක් නිවෙසේ දකුණු දිශාවේ බිත්තියක එල්ලා තැබීමට හෝ ඔබේ ධනය තැන්පත් කර තබනා ස්ථානයේ තැන්පත් කර තැබීමට හැකි නම් ඉන් ඔබේ ධන වාසනාවන් වර්ධනය වේ. ධනය ආකර්ෂණය වීම ප්‍රබල වේ. ධන හානිය අවම වේ.
සෑමවිටම ඉහත කී දිශාවන්ගේ මොනර පිල ස්ථාපනය කිරීමේදී පිල් කෙළින් සිටිනා සේ සිටුවා හෝ එල්ලා තැබීම වැදගත්ය.
තවද අධ්‍යයනය ලබනා ඇත්තන් තමන් විසින් පාඩම් කරනා පොත්පත් තුළ මොනර පිලක් දමාගෙන සිටී නම් ඔවුනට සරස්වතී මෑණියන්ගේ ආකර්ෂණය ලැබේ. මතක ශක්තිය බලවත් වේ. ධාරණ ශක්තිය ප්‍රබල වේ. අධ්‍යාපන කටයුතු පහසුවෙන් උදේ‍යා්ගයෙන් කිරීමට හැකියාව ලැබේ. මොනර පිල යෙදූ පන්හිදෙන් පින්සල් වැනි ලිවීමට යොදා ගන්නා කුමන හෝ උපකරණයකට මොනර පිල යොදා ගැනේ නම් ඔබට අධ්‍යාපන කටයුතු තුළ පෙර නොලැබූ බොහෝ ජයග්‍රහණයන් ලබා ගැනීමට අවස්ථාවන් උදා වේ. කලා කටයුතු කරනා ඇත්තන් මොනර පිල් තමා සමීපයේ නිතර තමාට දර්ශනය වන ආකාරයෙන් තබා ගැනීමෙන් කලාකාමී හැඟීම්, සිතුවිලි, දක්ෂතාවන් තමන් තුළ වර්ධනය කෙරේ. කවියන්, ලේඛකයන්, සංගීතඥයන් වැනි ක්‍ෂේත්‍රයන්වල යෙදෙමින් කටයුතු කරන්නන් නව නිර්මාණ කිරීමට කල්පනා කරනා අතර තුර මොනර පිල් දෙස බලා සිටී නම් සරස්වතී මෑණියන්ගෙන්, විශ්වයෙන් ඔවුනට නව නිර්මාණශීලී සිතුවිලි, නව අදහස් සුක්ෂ්මව ආධ්‍යාත්මිකව ලබාදේ. කලාකාරීනියන්, නිළියන්, නිරූපිකාවන්, මොනර පිල් ආභරණ හා ඇදුම් පැලඳුම් සඳහා යොදා ගනී නම් ඔවුන් අන් හැමෝම අතර කැපී පෙනේ. අන්‍යයන් අභිභවා යෑමේ ශක්තීන් ඔවුන්ට ආකර්ෂණය කෙරේ.
මේ සෑම දෙයකටම වඩා ඔබ අවධානයෙන්ම තේරුම් ගත යුතු දෙය නම්, ඔබ විසින් කැඩුණු, බිදුණු, අර්ධ වශයෙන් හෝ පූර්ණ වශයෙන් විනාශ වුණු, පිහාටු කොටස් කැඩී ගිය මොනර පිල් භාවිත කරන්නේ නම්, ඉහත කී කිසිදු දෙයක් ඔබට උරුම නොවනු ඇත. එම නිසා අලංකාර අංගසම්පූර්ණ පෙනුමකින් ඇති උසස් තත්ත්වයේ පවතින් මොනර පිල්ම ඔබේ වාසනාවන් උදා කර ගැනීමට යොදා ගන්න!
ඔබ සැමට මහා දුර්ගා මෑණියන්ගේ පිහිටයි!
උපුටා ගැනීම මව්බිම
